Juaa̱ 10
10
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ énkjiín nchꞌoaá
1Ja̱koxi̱, ja̱koxi̱ ni xi xiánjnúꞌun: Tsi ngo xi ki̱a̱jín nga̱ntjo̱a̱a̱ nchꞌoá nínga ndyi̱a̱ cho̱tsa̱nga̱a̱ kꞌo̱sꞌienni, tsi xín ku̱i̱jintꞌa, kó xín kꞌo̱sꞌienni, chejé boá xi̱ꞌba̱. 2Ta̱nga xi nga̱ntjo̱a̱a̱ nchꞌoaá kꞌo̱sꞌienni, kuí xi̱ꞌba̱ xi nda̱ xi koo̱n cho̱tsa̱nga̱a̱. 3Nda̱ xi konda nga̱ntjo̱a̱a̱ kjíxꞌaá, kó cho̱tsa̱nga̱a̱ ntꞌieé nda̱a̱, kó jaꞌeén cho̱tsa̱nga̱a̱ chji̱a̱nii̱, kó ꞌboxié nchꞌoaá. 4Kó ngije tsꞌaxié ngayeje cho̱tsa̱nga̱ xi tsi̱ꞌe̱, fí tjoón, kó cho̱tsa̱nga̱a̱ fítji̱ngii̱, ngatꞌa̱ jè be nda̱a̱, 5ta̱nga tsi ngo xi bejín cho̱tsa̱nga̱a̱ ko̱e̱je̱tji̱ngijiín, ta̱sá ko̱ngaa̱, ngatꞌa̱ cho̱tsa̱nga̱a̱ ntꞌiéjiín nda̱a̱ kje̱ꞌe xota̱.
6Kuí nii̱ xi katsó Kjisoo̱ nga íjñá chi̱bo̱a̱ ni xi̱ꞌbi̱, ta̱nga kui xotaa̱ kamákjínjiín ni xi kiꞌmií.
Bi̱ tsꞌén íjñá chi̱bo̱a̱ Kjisoo̱ kjo̱a̱a̱ nda̱ nda xi koo̱n cho̱tsa̱nga̱a̱
7Sꞌe̱ ti̱ bi̱ ti̱ katsó nginí Kjisoo̱:
–Ja̱koxi̱, ja̱koxi̱ ni xi xiánjnúꞌun: Án boá xi nga̱ntjo̱a̱a̱ cho̱tsa̱nga̱a̱. 8Ngayeje xota̱ xi jeꞌe ngindiee̱ nga kjoéꞌe̱ an, xota̱chejé boá, ta̱nga cho̱tsa̱nga̱a̱ tsintꞌiéꞌénjiín. 9Án boá xi nga̱ntjo̱a̱a̱: Kó xi kꞌo̱sꞌienni kui nga̱ntjo̱a̱a̱, kjo̱tjoꞌa. Kó ngo cho̱tsa̱nga̱ xi kꞌo̱sꞌien ko̱jo kjo̱tjo ka̱ma, kó sa̱ko̱ó ndi̱xcho̱.
10Chejeé kjo̱e̱ꞌe, ta̱ tsi̱ꞌe̱ nga sa̱ꞌínchejé tsí, ko̱jo kjo̱e̱ꞌe nga sa̱ꞌínkꞌién, ko̱jo kjo̱e̱ꞌe tsꞌenkjié, ta̱nga an jéꞌe̱ án tsi̱ꞌe̱ nga kꞌuiéjnú kjo̱a̱mindyion, ko̱jo tsi̱ꞌe̱ nga tsie kꞌuiéjnú. 11Án boá kui nda̱ nda xi koo̱n cho̱tsa̱nga̱a̱, kó kui nda̱ nda xi koo̱n cho̱tsa̱nga̱a̱, tsja̱a yojoo̱ ta̱ngatꞌanii̱ cho̱tsa̱nga̱a̱, 12ta̱nga nda̱ xi kjimachjií ta̱ tsi̱ꞌe̱ nga tsꞌénkónrií cho̱tsa̱nga̱a̱, kjiꞌanga be nga tsꞌéndibá cho̱loboo̱ monga, kó ꞌbijñámasien cho̱tsa̱nga̱a̱, ngatꞌa̱ kuijín bo̱a̱ nda̱a̱ xi koo̱n cho̱tsa̱nga̱a̱, kó ngatꞌa̱ kuijín tsi̱ꞌe̱ cho̱tsa̱nga̱a̱. Kó cho̱loboo̱ tsꞌénꞌoón cho̱tsa̱nga̱a̱, kó cho̱tsa̱nga̱a̱ tsojoboa. 13Kó monga kui nda̱ xi kjimachjií, ngatꞌa̱ ta̱ to̱o̱n tsí xi ndasee̱n, jmí ndasénjiín cho̱tsa̱nga̱a̱.
14Án boá nda̱ nda xi koo̱n cho̱tsa̱nga̱a̱, kó be án cho̱tsa̱nga̱na, kó cho̱tsa̱nga̱na bena an, 15xikótsꞌèn bena Na̱ꞌmina, an ti̱ bo̱a̱ ti̱ tsꞌén be an Na̱ꞌmina, kó an tsja an kjo̱a̱mindyionna ta̱ngatꞌanii̱ cho̱tsa̱nga̱na. 16Kó ti̱ tjínna kje̱ꞌe cho̱tsa̱nga̱ xi kuijín nchꞌoaá chji̱a̱ni, kó ti̱ kjuínkjáꞌa an nga, kó kui cho̱tsa̱nga̱a̱ ku̱i̱ntꞌiè nda̱na, kó ta̱ ngo tsí tjín ka̱ma, kó ta̱ ngo tsí nda̱ xi skoón kui cho̱tsa̱nga̱a̱.
17Kuíni nga Na̱ꞌmina tjoó an, ngatꞌa̱ tsꞌén tsja an yojona tsi̱ꞌe̱ nga ko̱yà án, ko̱jo tsi̱ꞌe̱ nga kjo̱a̱ꞌáꞌyá nginína. 18Nde ngojín xi ka̱maa̱ sa̱ꞌínkꞌiénna, ngatꞌa̱ ngayejení ko̱n an nga sa̱ꞌinkꞌasꞌien an yojona. Tjínna ngaꞌniú tsi̱ꞌe̱ nga sa̱ꞌinkꞌasꞌien an yojona, kó ti̱ tjínna ngaꞌniú tsi̱ꞌe̱ nga kjo̱a̱ꞌáꞌyá nginína. Kuí bí kjo̱a̱botíxoma xi katsjána Na̱ꞌmina.
19Nga tsintꞌié xota̱ jundíoo̱ én xí katsó Kjisoo̱, ti̱ akjángá nginí yojoo̱. 20Kjín má kui xotaa̱ xi bi̱ katsó:
–Xindajín tjíjii̱n, kó tsobérií, ánní nga ndyi̱ndaꞌyájnúu̱.
21Kje̱ꞌe xí bi̱ katsó:
–Nde ngojín xota̱ xi tjíjii̱n xindajín xi ka̱tso̱ kui eén. A ka̱márií xindajín sa̱ꞌíntsijee̱n ngo xota̱ xi ti̱ka̱.
Já jundíoo̱ bi̱ tsꞌén katsꞌénchꞌó Kjisoo̱
22Sꞌe̱ jachó ni̱xtjin nga ma sꞌueé na̱ngo̱xi̱i̱ na̱xi̱ńdáꞌniú Jerusale̱n, kó cho̱nchꞌàn má, 23kó Kjisoo̱ jaꞌa ndi̱tsen na̱ngo̱xi̱i̱, tiña nínga tikón ngindie nga̱ntjo̱a̱a̱ Salomoo̱. 24Kó xota̱ jundíoo̱ jaꞌatjindee̱ Kjisoo̱, kó bi̱ katsoó:
–Ngaskande kjiꞌání nga kꞌuiyéjne̱ nga ji xi Kristoo̱. Tꞌíyéjne̱ ngotꞌe̱ nga ji.
25Sꞌe̱ Kjisoo̱, bi̱ katsó:
–Jè kixiyajnúꞌun, ta̱nga sꞌijinjínjnú, ngayeje ni xi tsꞌen an nga tsꞌenkjién án jaꞌeén Na̱ꞌmina, kuí xí bokó ꞌyání án, 26ta̱nga jún sꞌijinjínjnú, ngatꞌa̱ cho̱tsa̱nga̱najín jún. 27Cho̱tsa̱nga̱na ntꞌiérií nda̱na, kó be án kuí, kó fítji̱ngina, 28kó an tsjàa̱ kjo̱a̱mindyion ngatsjéni̱xtjii̱n, kó nginijánjín ko̱yà, kó nde ngojín xi kjo̱a̱ꞌáxínna ngi̱ya ndsa̱ án. 29Na̱ꞌmina xi katsjána, nkꞌa ngase xaá ta̱bo̱a̱jiín ta̱ꞌyaní, kó nde ngojín xi ka̱maa̱ kjo̱a̱ꞌáxiín ngi̱ya tsja. 30Na̱ꞌmina ko̱jo an ta̱ ngo tsí májne̱.
31Kó xota̱ jundíoo̱, ti̱ iskjíbé nginí ndi̱jo̱ tsi̱ꞌe̱ nga kꞌo̱ya. 32Sꞌe̱ Kjisoo̱, bi̱ katsó:
–Achichí má ni xi ndaa̱ xi je akójnú Na̱ꞌmina, kjo̱a̱a̱ ñání kui nii̱ xi kjoyànijnúꞌun ndi̱jo̱.
33Sꞌe̱ bi̱ katsó xota̱ jundíoo̱:
–Kjoyàjínjne̱ ndi̱jo̱ kjo̱a̱a̱ ngo ni xi nda xi kiniꞌín ji, kjoyàjne̱ ndi̱jo̱ kjo̱a̱a̱ nga chꞌo tꞌísée̱ Néná, ngatꞌa̱ xota̱ jí, kó Néná tꞌísée̱ yojòo̱.
34Sꞌe̱ bi̱ katsó nginí Kjisoo̱:
–A kjitꞌajín ngi̱yaa̱ kjo̱a̱kitijnú nínga bi̱ tsó: “Án xí kixian an nga jún xi ne jún”. 35Tsi ne katsoó kui xota̱ xi kasakoo̱ eén Néná, kó ka̱májín tsi si̱ꞌankjatjosónjín xo̱jo̱n eén Néná, 36míkjo̱a̱a̱ nga kui nda̱ xi Néná xí Na̱ꞌmii̱ katsꞌéntsjie ko̱jo katsangiya kui nga̱sondiee̱, jún bi̱ ndyi̱ꞌmìjnúu̱: “Néná chꞌo tsoó”, ngatꞌa̱ bi̱ kixian an, nga an xi ndií Néná. 37Tsi sa̱ꞌinjín an xaá Na̱ꞌmina, sꞌi̱jinjínjnú, 38ta̱nga tsi sa̱ꞌin an, ndatsi sꞌi̱jinjínjnú an, sꞌijin ngatamajnú ni xi tsꞌen an, tsi̱ꞌe̱ nga xcha̱jnú, kó ka̱makjínjnú nga Néná xí Na̱ꞌmii̱ tikónjinna, kó an tikónjìi̱n kui.
39Kui xotaa̱ ti̱ kamámejeén nginií nga katsoboá Kjisoo̱, ta̱nga nde kamábejín kótsꞌèn jatjoni ngi̱ya tsja.
40Sꞌe̱ ti̱ kijí nginí Kjisoo̱ xi ingoboaá ndejèꞌ Jorndaa̱n, ki̱a̱ nínga tjón atíndá xota̱ Juaa̱, kó ki̱a̱ kisꞌijña. 41Sꞌe̱ achichí má xota̱ xi jachókoón, kó bi̱ katsó kui xotaa̱:
–Nga ja̱koxi̱, Juaa̱ nde ngojín chi̱bo̱a̱ ndikón katsꞌén, ta̱nga ngayeje ni xi katsó Juaa̱ kjo̱a̱a̱ Kjisoo̱, ni ja̱koxi̱ boá.
42Kó achichí má xota̱ xi kisꞌijii̱n Kjisoo̱ kui ngi̱ndiee̱.
Currently Selected:
Juaa̱ 10: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
