Juaa̱ 9
9
Kjisoo̱ bi̱ tsꞌén katsꞌéndaya ngo nda̱ xi ti̱ka̱
1Kó nga jaꞌa Kjisoo̱ ngo ngi̱ndie, kamábe ngo nda̱ xi ti̱ka̱ ndeskande koó nga katsen. 2Kó xota̱ tsi̱ꞌe̱, bi̱ katsoó Kjisoo̱:
–Mostro̱, kjo̱a̱a̱ nga ti̱ka̱ kui nda̱a̱ nga katsen, a kuí nda̱a̱ xi katsꞌénjé, axa̱ xi xchaári.
3Sꞌe̱ Kjisoo̱, bi̱ katsó:
–Nde kuijín nda̱a̱ xi katsꞌénjé, ti̱nde xi xchaájín, kjimá kuí nii̱ tsi̱ꞌe̱ nga ta̱ngatꞌanii̱ kui, nga Néná ko̱kó ngaꞌniuú. 4Chjiéngá si̱ꞌán xaá xi katsangiyana, tji̱e̱nga ni̱xtjin, ngatꞌa̱ ngije ka̱majñoó, ngiti̱ jmíjín xi ka̱ma sa̱ꞌínxá. 5Tji̱e̱nga tikòn an kui nga̱sondiee̱, án boá xi ndiꞌií kui nga̱sondiee̱.
6Ngije katsó kui nii̱ Kjisoo̱, atítiá tꞌanangii̱, sꞌe̱ katsꞌénda ndáse ndáńti̱a̱á, kó katsangijon ndásee̱ ndyi̱ko̱n nda̱ xi ti̱ka̱a̱, 7kó bi̱ katsoó:
–Tꞌenkaníjín ndyikin nínga tikón ti̱xa̱ je xi ndyi̱a̱ ndáfoa xi tikón Siloe̱ (xi kanangiyaa̱, tsó kui eén nga én arameo̱).
Kijí kui nda̱a̱, kó aniéjón ndyi̱ko̱n, kó nga jachó nginí, je kamátsijee̱n. 8Kósꞌe̱ xota̱ xi síndotꞌa ndiꞌaa̱, ko̱jo xota̱ xi kamábe nga ti̱ka̱ kamá, bi̱ katsoó xkjín:
–A kuijín kuí nda̱a̱ xi kisꞌijñatie nga tsíꞌá to̱nchji̱e̱.
9Tjín kuí xotaa̱, xi bi̱ katsó:
–Kuí boá.
Kje̱ꞌe xí bi̱ katsó:
–Bo̱a̱ má kjiꞌi.
Kó kui nda̱ xi kamáti̱ka̱a̱, bi̱ katsó:
–Án boá.
10Sꞌe̱ bi̱ kiꞌmií:
–Kótsꞌèn kamátsijennii.
11Sꞌe̱ bi̱ katsó kui nda̱a̱:
–Kui nda̱ xi ꞌmí Kjisoo̱ katsꞌénda ndáse, sꞌe̱ katsangijon ndyikón án, kó bi̱ katsóna: “Tꞌen ji Siloe̱, kó taníjín ji ndyikin”, kó kijí an, kó aniejón an ndyikón án, kó kamátsijenna.
12Sꞌe̱ bi̱ kiꞌmií kui nda̱a̱:
–Ñá tikón Kjisoo̱.
–Bejín an.
Katsó kui nda̱ xi kamáti̱ka̱a̱.
Já fariseoo̱ bi̱ tsꞌén asíyaá nda̱ ti̱ka̱ xi je kamándayaa̱
13Tsangínjo̱ ngindyi̱ko̱n já fariseoo̱ nda̱ xi kamáti̱ka̱a̱. 14Kó ni̱xtjin ndikón boá nga Kjisoo̱ katsꞌénda ndáse nga katsꞌéndaya nda̱ xi ti̱ka̱a̱. 15Kó já fariseoo̱ ti̱ asíyá nginií nda̱ xi kamáti̱ka̱a̱ kjo̱a̱a̱ kótsꞌèn kamándaya, kó bi̱ katsó kui nda̱a̱:
Ndáse katsangijon ndyikón án, aniejón an, kó kamátsijenna.
16Sꞌe̱ tjín já fariseoo̱, xi bi̱ katsó:
–Nénájín xi katsangiya kui nda̱a̱, ngatꞌa̱ bendikónjín ni̱xtjin ndikoón.
Kje̱ꞌe xí bi̱ katsó:
–Kótsꞌèn nga maa̱ tsꞌén ngo kjo̱a̱ndikón ngo nda̱jé.
Kó ndse̱je̱njín kamá ni xi tsíchji̱a̱ kui jaá. 17Sꞌe̱ ti̱ bi̱ ti̱ kiꞌmí nginií nda̱ xi kamáti̱ka̱a̱:
–Kó se ji kjo̱a̱a̱ nda̱ xi katsꞌéntsijee̱n ndyikin.
Kó bi̱ katsó kui nda̱ xi kamáti̱ka̱a̱:
–Nda̱ chji̱ni̱e̱ꞌe̱én Néná boá.
18Ta̱nga já ngito̱ko̱o̱ xota̱ jundíoo̱ kisꞌijinjiín nga ti̱ka̱ kamá kui nda̱a̱, ko̱jo nga je kamándaya, ngaskande nga tsíchji̱a̱a̱ xi xchaá kui nda̱ xi kamáti̱ka̱a̱, 19kó bi̱ katsoó nga asíyaá:
–A kuí xi̱ꞌbi̱ xi ndíjnú, xi ndeskande kó xoò nga katsen nga ti̱ka̱. Kó kótsꞌèn nga je be ngotꞌe̱ ꞌne̱.
20Sꞌe̱ bi̱ katsó xi xchaá nda̱ xi kamáti̱ka̱a̱:
–Jè yàjne̱ nga kui xi̱ꞌbi̱ xi ndíjne̱, xi ti̱ka̱ kamá ndeskande koó nga katsen, 21ta̱nga ngotꞌe̱ ngije tsijee̱n, yàjínjne̱ kótsꞌèn kamá kui nii̱, ko̱jo yàjínjne̱ ꞌyá xí katsꞌéndaya, ta̱sá kuí tasíyàjnúu̱, ngatꞌa̱ jè xchá ndíjne̱, kó ka̱ma tsi ti̱ kuii̱ ka̱tso̱yàjnú ni xi ko̱si̱yájnúu̱ jún.
22Kui nii̱ katsó xi xchaá kui nda̱ xi kamáti̱ka̱a̱, ngatꞌa̱ katsakjónní xota̱ jundíoo̱, ngatꞌa̱ ja̱bo̱a̱ jè índa já jundíoo̱ nga tsi ngo xi ku̱i̱chji̱a̱ nga Kjisoo̱ xi Kristoo̱, ngiti̱ si̱ꞌankꞌasꞌienjín ngi̱ya ndiꞌa nínga ndokjo̱a̱ eén Néná. 23Kuíni nga bi̱ katsó xi xchaá: “Jè xchá ndíjne̱, ta̱sá kuí tasíyàjnúu̱.”
24Sꞌe̱ kandokjo̱a̱ nginií nda̱ xi kamáti̱ka̱a̱ xi je kamándayaa̱, kó bi̱ kiꞌmií:
–Te̱ꞌée̱ kjo̱a̱je Néná, ji̱n je yàjne̱ nga kui nda̱a̱ nda̱jé boá.
25Sꞌe̱ bi̱ katsó nda̱ xi kamáti̱ka̱a̱:
–Tsi nda̱jé, bejín an, ta̱ ngo tsi ni xi be an, nga ti̱ka̱ kamá an ngasꞌe̱, kó ngotꞌe̱ ꞌne̱ jè kamátsijenna.
26Ti̱ bi̱ ti̱ kiꞌmí nginií:
–Kó katsꞌeén. Kótsꞌèn iskjíxꞌá ndyikin ji.
27Sꞌe̱ bi̱ katsó kui nda̱a̱:
–Jè kixiyajnúꞌun, ta̱nga kandaꞌyájínjnúꞌun, míkjo̱a̱a̱ nga mejénjnú nga ko̱nda̱ꞌyá nginíjnúꞌun. A mejénjnú nga xota̱ tsi̱ꞌe̱ kui ka̱majnú jún nga.
28Sꞌe̱ já ngito̱ko̱o̱ já jundíoo̱ chꞌo katsoó kui nda̱a̱, nga bi̱ katsoó:
–Jí xí xota̱ tsi̱ꞌe̱ kui ji, ta̱nga ji̱n xotaa̱ Moisee̱ boá ji̱n. 29Jè yàjne̱ ji̱n nga Néná tsíchji̱a̱jo Moisee̱, ta̱nga kjo̱a̱a̱ kuii̱ yàjínjne̱ ñá kjindibáni.
30Sꞌe̱ bi̱ katsó kui nda̱a̱:
–Ja̱ ki̱a̱ tikón ngo ni xi fíndikónná, nga jún yàjínjnú ñá kjindibáni kui, kó án ndyikón án katsꞌéntsijee̱n. 31Kó ñá jè ya nga Néná ntꞌiéjiín xota̱ jé, ta̱nga tsi ngo xota̱ xi bendikón Néná, kó tsi tsꞌén ni xi mejeén Néná, kuí xi̱ꞌba̱ xi ntꞌieé. 32Ndeskande koó nga ítsꞌi̱yanii̱ nga̱sondiee̱ kji̱e̱ ngo ndi̱yà ya nga ngo nda̱ katsꞌéndaya ngo nda̱ xi ti̱ka̱ kamá ndeskande koó nga katsen. 33Tsi Nénájín xi katsangiya kui nda̱a̱, nde ngojín ni xi ka̱ma sa̱ꞌín.
34Sꞌe̱ kui jaá, bi̱ katsoó nda̱ xi kamáti̱ka̱a̱:
–Áa̱n a bo̱a̱, a ji xi tjiín jé ndeskande koó nga katsen ji, kó a jí xí ko̱ko̱yéjne̱.
Sꞌe̱ kaꞌnaxié kui nda̱a̱ ngi̱ya ndiꞌa nínga ndokjo̱a̱ eén Néná.
Bi̱ tsꞌén katsóyà Kjisoo̱ kjo̱a̱a̱ xota̱ xi ti̱ka̱ nga A̱si̱énni̱xtjii̱n
35Tsintꞌié Kjisoo̱ nga kaꞌnaxié kui nda̱a̱, kó nga kasakoo̱ nda̱ xi kamáti̱ka̱a̱, bi̱ katsoó:
–A sꞌijii̱n ndií Néná.
36Sꞌe̱ bi̱ katsó nda̱ xi kamáti̱ka̱a̱:
–Ndi̱a̱ tꞌíyéní, ꞌyání bo̱a̱, ki̱a̱ kamaá nga sꞌi̱jinna kui nga.
37Sꞌe̱ Kjisoo̱, bi̱ katsó:
–Ja̱ jè kamáyè ji, kó xi tsꞌénchji̱a̱joo, kuí boá.
38Kó bi̱ katsó kui nda̱a̱:
–Sꞌijinna Ndi̱a̱. Kó katsꞌéndikón.
39Sꞌe̱ Kjisoo̱, bi̱ katsó:
–Jéꞌe̱ án kui nga̱sondiee̱ tsi̱ꞌe̱ nga xcha̱ jeé xotaa̱ kui nga̱sondiee̱, tsi̱ꞌe̱ nga xi ti̱ka̱a̱ ka̱matsijee̱n, kó xi tsijee̱n ka̱mati̱ka̱.
40Tjín já fariseoo̱ xi síndojo̱ Kjisoo̱ nga tsintꞌié kuí nii̱, bi̱ katsó:
–A xota̱ ti̱ka̱ ji̱n ndatsa ji̱n nga.
41Sꞌe̱ Kjisoo̱, bi̱ katsó:
–Tsi ti̱ka̱jnú, jmí jéjínjnú, ta̱nga ngotꞌe̱ ꞌne̱, nga “yàjne̱” ndyi̱ꞌmìjnú, kuíni nga jéjnú ta̱kó tikón.
Currently Selected:
Juaa̱ 9: MAIX
Highlight
Share
Copy
Want to have your highlights saved across all your devices? Sign up or sign in
© Sociedad Bíblica de México, A. C.
Nuevo Testamento en Mazateco de San Pedro Ixcatlán, Oaxaca, México © Sociedad Bíblica de México, A.C. 2014
