Juaa̱ 15

Bi̱ tsꞌén katsóyà Kjisoo̱ nga kuí xí ńꞌniuú tostsi̱jè xí ja̱koxi̱i̱

1Án boá xi ńꞌniuú tostsi̱jè xí ja̱koxi̱i̱, kó Na̱ꞌmina, kuí boá nda̱ xi tsꞌénxaá. 2Ngayeje tjia xi tjiín yojona xi jmí to tsjájín, na̱ꞌmina kjo̱a̱ꞌáxín, kó ngayeje tjia xi tsjá to, sa̱ꞌíntsjie tsi̱ꞌe̱ nga kjín ngase to tsja. 3Jún jè kamátsjiejnú, kjo̱a̱a̱ ngayeje én xí je katsóyàjnúꞌun, 4si̱ꞌanngora yojojnú jún ko̱jo an, kó ki̱a̱ kotíjña̱jinjnúꞌun. Xikó tsꞌén nga nde ngojín tjiaa̱ yaá xi tsjá soboá to, tsi ki̱a̱jín ko̱a̱ꞌa̱jo ńꞌniuú tostsi̱je̱è, ti̱ bo̱a̱ ti̱ ka̱majnú tsi kꞌi̱e̱jín ku̱i̱ndyionjo̱jnúꞌun.

5Án boá xi ńꞌniuú tostsi̱je̱è, kó jún boá xi tjiaa̱, xi kꞌuijñájo̱na, ja̱ ti̱ kotíjña̱jìi̱n, kó achichí to ko̱a̱ja̱a̱, ngatꞌa̱ tsi kjin ku̱i̱ndyionjnúꞌun jmí ni ka̱májínjnú si̱ꞌan. 6Xi kꞌuijñájinjínna, bo̱a̱ ka̱maa̱ xikó maá ngo tjia xi jmí to tsjájín: Bichá, xí, chjaꞌáꞌyá, kó ngi̱jin ndiꞌií bichijmijin tsi̱ꞌe̱ nga tí.

7Tsi si̱ꞌanngora yojoná jún ko̱jo an, kó tsi énna kꞌuijñájinjnú, ngayeje ni xi chji̱a̱ꞌajnú, ko̱e̱ꞌéjnú. 8Kuí nii̱ xi ka̱mayani kjo̱a̱jee̱ Na̱ꞌmina nga achichí kjín to kꞌuiéjnú jún, kó bo̱a̱ tsꞌén nga xota̱na ka̱majnú jún. 9Xikó tsꞌén tjoó an Na̱ꞌmina, ti̱ bo̱a̱ ti̱ tsꞌén tjóna jún, ti̱ndyionjinjnú kjo̱a̱tjóna. 10Tsi si̱ꞌankjatjosónjnú kjo̱a̱botíxomana, kjo̱a̱tjóna ku̱i̱ndyionjinjnú, xikótsꞌèn tjítsꞌenkjatjosóo̱n kjo̱a̱botíxomaa̱ Na̱ꞌmina, kó kjo̱a̱tjó tsi̱ꞌe̱ tikónjìi̱n.

11Kuí nii̱ xi kixiyajnúꞌun, tsi̱ꞌe̱ nga kꞌuiéjnú kjo̱a̱tsjana, kó kjo̱tjosón kjo̱a̱tsjajnú. 12Kuí xi̱ꞌbi̱ xi kjo̱a̱botíxomana: Nga tjó si̱ꞌánjnú ja̱kꞌi̱e̱ ja̱ngaján xingi̱jnú, xikótsꞌèn tjó tjítsꞌenjnúꞌun. 13Nde ngojín xi tjín ngasee̱ ngo kjo̱a̱tjó xi ꞌniú je, xikoó ngo xi tsjá kjo̱a̱mindyioo̱n ta̱ngatꞌanii̱ amingoo̱. 14Amingo̱na má jún, tsi si̱ꞌánjnú ni xi xian an. 15Ngiti̱ moso̱jín xiánjnúꞌun, ngatꞌa̱ mosoo̱ bejín ni xi tsꞌén ndi̱a̱ xi tsi̱ꞌe̱, ta̱nga amingo̱ kixianjnúꞌun, ngatꞌa̱ ngayeje ni xi katsóyàna Na̱ꞌmina, jè kixiyajnúꞌun. 16Júnjín xi kachjeꞌéjinjnúꞌun, án boá xi jaꞌajinjnúꞌun jún, kó jè katsangiyajnúꞌun tsi̱ꞌe̱ nga kongínjnú, kó kꞌuiéjnú to, ngo to xi kꞌo̱ndíyaá ngatsjéni̱xtjin, tsi̱ꞌe̱ nga ngayeje ni xi chji̱e̱ꞌèe̱ Na̱ꞌmina ngajona, tsja̱á. 17Kuí xi̱ꞌbi̱ xi kjo̱a̱botíxomana: Ti̱ꞌantjójnú ja̱kꞌi̱e̱ ja̱ngaján xingi̱jnú.

Bi̱ tsꞌén katsóyà Kjisoo̱ nga xota̱ nga̱sondiee̱ sa̱ꞌínchꞌójnú

18Tsi sa̱ꞌínchꞌójnú xotaa̱ kui nga̱sondiee̱, ngatjaꞌátsjienjnú nga tjón án katsꞌénchꞌóna, sꞌe̱ katsꞌénchꞌójnú jún. 19Tsi kui nga̱sondiee̱ ndokjo̱a̱nijnú, sa̱ꞌíntjójnú xotaa̱ kui nga̱sondiee̱, xikótsꞌèn tsꞌéntjó xota̱ tsi̱ꞌe̱, ta̱nga kuijín nga̱sondiee̱ ndokjo̱a̱nijnú, ngatꞌa̱ án xí jaꞌajinjnúꞌun ngi̱jii̱n xotaa̱ kui nga̱sondiee̱, kuíni nga xotaa̱ kui nga̱sondiee̱ tsꞌenchꞌójnú. 20Ngatjaꞌátsjienjnú én xi je kixianjnúꞌun: “Mosoo̱ nkꞌajín ngase xaá ta̱bo̱a̱jiín ndi̱a̱a̱.” Tsi je ikiyotji̱ngina, ti̱ ku̱i̱yotjíngíjnú jún nga, tsi ndyi̱niꞌánkjatjosónjnú énna, ja̱ ti̱ si̱ꞌankjatjosón énjnú nga. 21Ngayeje kui nii̱ xi sa̱ꞌínjo̱jnú xotaa̱ ta̱ngatꞌanii̱ jaꞌénna, ngatꞌa̱ bejín ꞌyání xi katsangiyana.

22Ta̱nga tsi jéꞌe̱jín an, kó tsi tsíchji̱a̱jojín an kui xotaa̱, nde jmí jéjínra̱a̱, ta̱nga ngotꞌe̱ ꞌne̱, nde jmí ni ka̱tso̱jín kjo̱a̱a̱ jeé. 23Xi chꞌoo̱ an, ti̱ chꞌoo̱ Na̱ꞌmina nga. 24Tsi katsꞌénjín an ngi̱jii̱n kui xotaa̱, ni xi kji̱e̱ ngo xi tsꞌén, jmí jéjínra̱a̱, ta̱nga ngotꞌe̱ jè kamábe kui nii̱, kó ti̱ kuira xí katsꞌénchꞌóna an ko̱jo Na̱ꞌmina. 25Ta̱nga ngayeje kui nii̱ kjima, tsi̱ꞌe̱ nga kjifotjosón ni xi kjitꞌa xo̱jo̱n kjo̱a̱kitii̱ kui xotaa̱, xi bi̱ tsó: “Nde jmí kjo̱a̱jín nga katsꞌénchꞌóna.”

26Ta̱nga nga kjo̱e̱ꞌe xí sa̱ꞌíndajoo̱n, kui xi sangiya an ta̱ngatꞌanii̱ Na̱ꞌmii̱, kui A̱si̱énni̱xtjii̱n Néná xí ja̱koxi̱ xi sa̱ngíyá Na̱ꞌmii̱, kuí xí chistiko̱na ka̱ma, kó kuí xí ku̱i̱chji̱a̱ kjo̱a̱a̱ an, 27kó ko̱jo jún ko̱ndókjo̱a̱jnú kjo̱a̱a̱ an, ngatꞌa̱ ki̱a̱ kixindyionjo̱jnúꞌun ndeskande koó nga ítsꞌi̱yanii̱ nii̱.

Currently Selected:

Juaa̱ 15: MAIX

Highlight

Copy