Рүүт 1
1
Наомии болон Рүүт
1Израилиие хаашуулай захиран зонхилхо үе сагһаа урид тэрэ орондо үлэсэхэлэн хооһон байдал тохёолдоо бэлэй. Иудадахи Бэтлэһээм хотын нэгэ хүн һамгантаяа, хоёр хүбүүдтэеэ хамта Моһаабай нютаг руу ажаһуухаар ябаба. 2Тэрэ хүнэй нэрэнь Элимээлэх, һамганайнь нэрэ Наомии, хоёр хүбүүдынь Махлоон ба Хилеон һэн. Тэдэ Иудадахи Бэтлэһээмэй эпраат бүлөөлингэй зон бэлэй. Моһаабай орон нютаг руу ерээд байхадаа, 3Элимээлэх наһа баража, Наомии һамганиинь гансаараа хоёр хүбүүдтэеэ үлэбэ.
4Хүбүүдынь моһаабай басагадые һамга абаа. Нэгэнь Орпаа, нүгөөдэнь Рүүт гэжэ нэрэтэй һэн#1.4 Энэ номой эхинһээ дурдагдаһан нэрэнүүд иимэ удхатай: «Элимээлэх» — «Минии Бурхан хаан», «Наомии» — «зохидхон, сэбэрхэн», «Махлоон» — «үбшэн», «Хилеон» — «үлбэр», «Рүүт» — «Һэргээлгэ», «Орпаа» — «үсэд».. Арбаад жэл тэндэ амидарһанай удаа 5Махлоон ба Хилеон мүн лэ наһа бараба. Иигэжэ тэрэ эхэнэр хоёр хүүгэдээ болон үбгэеэ үнгэрүүлээ бэлэй.
6Эзэн Өөрын арад түмэн тушаа анхаралаа табижа, һайн ургаса үршөөнэ гэжэ Наомии Моһаабта байхадаа дуулаба. Тиигээд тэрэ хоёр бэритэеэ хамта тэндэһээ гаража ябахаар зэһэбэ. 7Байһан газараа орхижо, тэрэ хоёр бэритэеэ хамта Иудын газар нютаг руу бусаха замда гараба. 8Наомии хоёр бэридээ иигэжэ хэлээ бэлэй:
— Эжы эжынгээ гэр руу бусагты даа. Наһа барагшадта болон намда энэрхы һайнаар хандадаг байгаат, Эзэн тон тиимээр таанарта харюулхань болтогой! 9Ондоо үбгэтэй боложо, өөрын гэртэй, амгалан тайбан байхыетнай Эзэн үршөөхэнь болтогой!
Тиигээд тэрэ бэридээ таалаба. Теэд тэдэнь шангаар бархиралдан:
10— Арад түмэн руутнай тантай хамта ошохомнай, — гэбэ.
11Наомии хэлэбэ:
— Басагадни, бусагты. Юундэ таанар намтай хамта ябахабта даа. Таанадта үбгэд болохо хүбүүдые би үшөө түрэжэ шадахагүй бшууб. 12Бусагты, басагадни, ябагты! Хадамда гаража шадахагүйб, би хүгшэрөөб. Хэрбээ «найдал намда үшөөл бии» гэжэ хэлээд, энэ һүниндөө үбгэнтэй унтажа, хүбүүдые түрөөшье һаам, 13тэдэнэй томо болотор таанар яажа хүлеэхэбта?! Хадамда гарахаһаа татагалзажа байха юм гүт? Үгы даа, басагадни. Энэнь таанарһаа үлүү намда хүндэ байна. Эзэн намайе хэһээгээ.
14Тэдэ дахин шангаар уйлалдаба. Орпаа хадам эжыгээ үнсэжэ хахасаба, харин Рүүт хадам эжыдээ няалдаад, ошобогүй. 15Наомии тэрээндэ:
— Хара даа, бэришни арад түмэндээ, бурхадтаа бусаба. Хойноһоонь шишье буса даа, — гэбэ. 16Теэд Рүүт:
— Таниие орхижо ошохыемни, бусахыемни бү баалыт даа. Юуб гэхэдэ, танай ябаха газар руу би ябахаб, танай хонохо газарта бишье хонохоб. Танай арад түмэн минии арад түмэн, танай Бурхан минии Бурхан! 17Танай нүгшэхэ газарта бишье нүгшэхэб, тэндээ хүдөөлүүлэгдэхэб. Хэрбээ үхэлһөө бэшэ ондоо аргаар минии танһаа һалабал, Эзэн намайе шанга хэһээхэнь болтогой! — гэжэ хэлэбэ. 18Өөртэйнь хамта ябахаар эрид шиидэһыень Наомии хараад, бэшэ юумэ хэлэхэеэ болибо.
19Тиигээд тэдэ хоюулаа ябажа, Бэтлэһээмдэ хүрэжэ ерэбэ. Тэдэнэй ерэхэдэ, хотын бүхы зон хүлгэжэ, эхэнэрнүүд «энэ Наомии мүн гү?» гэлдэбэ. 20Наомии тэдээндэ иигэжэ хэлэбэ:
— Намайе Наомии гэжэ бү нэрлэгты. Түгэс Хүсэтэ Бурхан минии ажабайдалые угаа ехэ гашуудалтай болгоһон тула намайе Мараа#1.20 Эхэ еврей хэлэн дээрэ «Мараа» болбол «гашуун» гэһэн удхатай. гэжэ нэрлэгты. 21Би эндэһээ гарахадаа бүхы юумээр дүүрэн гараһан болобошье, Эзэн намайе хооһон бусааба. Нам тушаа Эзэнэй хатуу харюу айладхаһанай, Түгэс Хүсэтэ Бурханай намда гай зоболон эльгээһэнэй удаа таанад намайе яагаад Наомии гэжэ нэрлэхэбта?!
22Иигэжэ Наомии моһааб Рүүт бэритэеэ хамта орон нютаг Моһаабһаа бусаа бэлэй. Тэдэ ешмээн хадаха сагай эхиндэ Бэтлэһээм руу ерээ һэн.
Currently Selected:
Рүүт 1: BurOTp
Highlight
Share
Copy
Want to have your highlights saved across all your devices? Sign up or sign in
© Bible Society in Russia, 2002-2007, 2011, 2013, 2018.