ESOTO 38
38
Ko te Fatafaitaulaga mo Taulaga Sunu
(Eso 27.1-8)
1Ne faite ne Pesaleli te fata-fai-taulaga ki laupapa o te akasia mo te faiga o taulaga sunu. A te fata-fai-taulaga e pau lei ona feitu e fa me e lua tesimale lua mita tena loa kae lua tesimale lua mita foki tena lauefa, ka ko tena maluga e tasi tesimale tolu mita. 2Ne fai foki ne ia a ona nifo i luga i tulimanu e fa ko te mea ke foitino tasi mo te fata-fai-taulaga. Ne ufi katoa ne ia a te fata-fai-taulaga ki te palasi. 3Ne faite foki ne ia a mea katoa o te fata-fai-taulaga: ko ulo, ko sevolo, ko pola, ko pine fakalave mo mea tali lefu ei. Ko mea fai galuega katoa konei ne faite eiloa ki te palasi. 4Ne faite foki ne ia se mea valavala palasi kae ne fakamau mai lalo o kaugutu o te fata-fai-taulaga, ko te mea ke nofo tonu i te kogaloto. 5Ne faite ne ia a mama sau e fa mo te mea valavala kae fakamau ne ia i luga o tulimanu e fa. 6Ne fai foki ne ia ne amo laupapa ki te lakau ko te akasia kae ufi ne ia ki te palasi, 7kae faulu ne ia a amo ki mama sau i feitu takitasi o te fata-fai-taulaga. A te fata-fai-taulaga ne faite eiloa ki laupapa kae anaana te koga i loto.
Ko te Faitega o te Pesini Palasi
(Eso 30.18)
8 #
Eso 30.18
Ne faite ne Pesaleli a te pesini palasi mo tena tulaga palasi ki kilo a fafine kola e tavini i te mataloa o te Faleie o te Aliki.
Ko te Pui Fakatamilo o te Faleie o te Aliki
(Eso 27.9-19)
9Ne faite ne ia a te pui fakatamilo o te Faleie o te Aliki ki laugatu lino gali. I tena feitu ki saute, a pui laugatu e taki fa sefulu fa mita te loa, 10e tautau i pou palasi e luasefulu kola e fakatu ki tulaga palasi e luasefulu, mo pine fakalave e faite ki siliva, e pena foki ana talava. 11A te pui ki te feitu ki matu e pau eiloa mo te feitu tenei. 12I te feitu ki te togala, a pui laugatu e taki luasefulu lua mita te loa, mo ona pou e sefulu e mau i olotou tulaga e sefulu, fakatasi mo pine fakalave mo talava e faite ki siliva. 13I te feitu ki te saegala, tela e tu i ei a te mataloa, a te pui loto i ei e luasefulu lua foki a mita te lauefa. 14-15I feitu takitasi o te mataloa e isi a pui laugatu e taki ono tesimale ono mita, mo pou e tolu mo olotou tulaga e tolu. 16A pui laugatu katoa kola e fakatamilo i te pui ne faite katoa mai laugatu lino. 17A tulaga o pou ne faite ki te palasi, ka ko pine fakalave mo talava, mo ufi o ulupou o pou ne faite ki te siliva. Ko pou fakatamilo katoa o te pui loto e fakasoko katoa ki talava siliva. 18Ko te laugatu pui o te mataloa o te pui fakatamilo ne faite ki laugatu lino gali tela ne laga ki vulu lanu usi, lanu kulakula, mo te kula kae ne teu ki suisuiga fakagaligali. E iva mita tena loa kae lua mita tena maluga, e pela eiloa mo laugatu o te pui fakatamilo. 19A te pui laugatu tenei e tautau ki pou e fa kola e mau i olotou tulaga palasi e fa. Olotou pine fakalave, mo ufi o ulupou, mo olotou talava ne faite katoa ki siliva. 20A pine fakamau katoa o te Faleie fakatasi mo pine fakalave o te pui loto ne faite katoa ki te palasi.
Ko Vaega Fiti ne Fakaaoga i te Faleie o te Aliki
21Tenei te fakasologa o te aofaki o vaega fiti ne fakaaoga i te faitega o te Faleie o te Aliki, te koga tela e tausi i ei a papa fatu e lua kola e tusi i ei a Tulafono e Sefulu. Ne fakatonu ne Mose ke fakamau a te fakasologa o mea konei kae ne tusi ne te matakaiga o Levi kola ne galue mai lalo o te takitakiga a Itamala, te tamaliki tagata a Alona, te faitaulaga.
22A mea katoa kola ne fakatonugina ne te Aliki ke fai, ne fai katoa ne Pesaleli te tamaliki tagata a Uli, kae ko te mokopuna o Hulo mai te matakaiga o Iuta. 23A tena fesoasoani tela ko Oliapo, te tamaliki tagata a Aisamako mai i te matakaiga o Tanu, se tufuga poto i te ta fatagata, lomi ata, kae se tagata poto foki i te laga o laugatu ki vulu lanu usi, kulakula mo te kula.
24A te mafa o te aulo katoa tela ne fakatapu mo te Aliki mo fai tena Faleie tapu e tusa mo te afe kilokalame, kae ne fua eiloa ki te fua faka‐te‐malo i aso kona. 25#Eso 30.11-16Ko te mafa o te siliva tela ne maua mai i te lauga o tino o te fenua e tusa mo te 3,430 kilokalame, kae ne fua eiloa ki te fua faka te malo i aso kona. 26#Mata 17.24A mea konei ko te aofaki katoa tela ne togi ne tino katoa kola ne tusi a igoa o latou i te lauga o tino, kae ko te tino tokotasi ne togi eiloa ne ia a te aofaki ne manakogina, kae ne fua eiloa ki te fua faka‐te‐malo i aso kona. E tusa mo te 603,550 a tagata ko taki luasefulu tausaga io me matua atu ne tusi a igoa o latou i te lauga o tino. 27I te siliva eiloa, e 3,400 kilokalame ne fakaaoga mo te faitega o te selau tulaga siliva o te Faleie tapu, e pela foki mo te pui laugatu, kae e 34 kilokalame ne fakaaoga mo te faitega o tulaga takitasi. 28A te tolusefulu kilokalame tela ne toe, ne fakaaoga ne Pesaleli mo te faitega o talava mo laugatu pui mo pine fakalave mo pou, mo ufi o ulupou. 29Kae tusa mo te 2,425 kilokalame o te palasi ne fakatapu mo te Aliki. 30Mai te vaega fiti tenei, ne faite ei ne Pesaleli a tulaga o pou o te mataloa o te Faleie o te Aliki; te fata-fai-taulaga palasi mo tena mea valavala palasi, mo mea katoa o te fata-fai-taulaga, 31pela foki mo tulaga o te pui fakatamilo mo tulaga o te mataloa o te pui fakatamilo, mo pine fakamau o te Faleie fakatasi mo pine fakamau o te pui fakatamilo.
Currently Selected:
ESOTO 38: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
