KENESE 12
12
Ko te Kalaga a te Atua ki a Apelamo
1Muna te Aliki ki a Apelamo, " Tiakina a tou fenua, mo te fale o tou tamana, kae fano ki te fenua tela ka fakasino atu ne au kia a koe . 2Ka fakatokouke ne au tou gafa kae ka fai mo Malo lasi. Ka fakamanuia ne au a koe, ka ko tou igoa ka takutakua, kae ka manuia a tino i a koe.
3 #
Kala 3.8
Ka fakamanuia ne au a latou kola e fakamanuia atu ki a koe.
Kae fakamalaia ne au a latou kola e fakamalaia atu ki a koe.
Ka fakamanuia ne au a malo e auala i a koe.#12.3: Kae auala mai ... fenuaio me A malo katoa ka fakatagi mai ki a au ke fakamanuia atu a latou e pela mo taku fakamanuiaga i a koe.”
4E tusa mo te 75 tausaga o Apelamo kae tiakina ne ia Halana e pela eiloa mo te fakatonuga a te Aliki ki a ia. A Lota ne olo tasi mo ia. 5Ne puke ne Apelamo tena avaga ko Salai, tena tuatina ko Lota, mo koloa, mo pologa katoa kola ne maua ne latou i Halana, kamata eiloa te lotou malaga ki te fenua o Kanana.
I te okoatuga a latou ki Kanana, 6ne fano Apelamo i loto i te fa'kai, oko atu eiloa ki te lakau tapu i Mole, te koga tapu tena i Sekema. I te taimi tena, a tino Kanana e nofo eiloa i te fenua. 7#Galu 7.5; Kala 3.16Ne fanatu te Aliki ki a Apelamo kae fai atu penei, “Tenei te fenua ka avatu ne au ki tou gafa.” Tena ne faite ei ne Apelamo se fata-fai-taulaga i kona, me i te Aliki ne fakaasi atu ki a ia. 8Fakamuli ifo, ne toe malaga atu a ia ki saute ki te fenua mauga i te feitu ki te saega la o Peteli, Ne faka'tu ana faleie i kona, i te va o Peteli i te toga la mo Ai i te saega la. I kona foki ne faite ne ia te fata-fai-taulaga kae tapuaki atu ki te Aliki. 9Ne malaga a ia mai sua koga ki sua koga, i tena auala ki te feitu ki saute o Kanana.
Ko Apelamo i Aikupito
10Ne poko te oge i Kanana, kae ko oko eiloa te fai malosi, tela ne malaga atu ei a Apelamo ki Aikupito i saute, o nofo i kona i se taimi toetoe. 11Kae koi tuai o oko atu a ia ki te tuakoi o Aikupito, ne fai atu a ia ki a Salai tena avaga penei, “A koe se fafine taulekaleka. 12Kafai e matea koe ne tino Aikupito, ka manatu aka latou i a koe ko taku avaga, tena ka tamate ei ne latou a au kae fakaola koe. 13#Kene 20.2; 26.7Fai ki a latou i a koe ko toku tuagaene, me kafai e fai ne koe pena, ko au ka fai faka'lei ne latou ona ko koe.” 14I te okoatuga a latou ki Aikupito, ne matea eiloa ne tino Aikupito i tena avaga se fafine gali. 15E isi ne ofisa a te tupu ne matea ne latou a te avaga a Apelamo tela olo ei latou o fai ki te tupu i te gali o Salai. Tena, ne ave eiloa ne latou a ia ki te palesi o te tupu. 16Ne fai faka'lei ne te tupu a Apelamo ona eiloa ko Salai; ne tuku ne ia ki ei a lafu mamoe, kouti, pulumakau, asini, tavini mo kamela.
17Ne tuku ifo ne te Aliki a famai fakama'taku ki te tupu mo tino o tena palesi, me ne puke ne ia Salai. 18Ne uga te fekau a te tupu ki a Apelamo kae fesili atu penei ki a ia, “Se a te mea tenei ko fai ne koe ki a au? Ai a seki fakaasi mai ei ne koe i te fafine tenei ko tau avaga? 19Ai a ne fai ei koe pela i a ia ko tou tuagaene? Tena te mea ne puke ei ne au mo fai taku avaga. Puke nei tau avaga tenei, kae fano keatea mai konei!” 20Ne fakatonu atu te tupu ki tena kau ke puke Apelamo o ave ki tua mo te fenua, fakatasi mo tena avaga mo ana mea totino katoa.
Currently Selected:
KENESE 12: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific
