IOANE 19

1Ne 'kave ne Pilato a Iesu o 'kini. 2Ka ko sotia ne 'fili ne latou te foualiki ki kaula o lakau makai'kai kae tuku atu ki tona ulu, ne fakapei foki ne latou a ia ki te gatu fakatupu e lanu violeta. 3Ne o'mai latou ki a ia kae fai mai, “Ke manuia te Tupu o Tino Iutaia!” Ne laupapa foki ne latou a ia.

4Ne toe fanatu foki ki tua Pilato kae fai atu ki a latou, “Kiloke, ko aumai ne au a ia ki tua ki a koutou, ko te mea ke iloa ne koutou me seai eiloa se mea ne maua ne au e ala ei o fakasala a ia.” 5Tela, fanatu ei a Iesu ki tua, e fou ki te foualiki makaikai, kae pei ki te gatu fakatupu e lanu violeta. Ne muna atu a Pilato ki a latou, “Kilo mai! Tenei te tagata!” 6I te laveaga ne faitaulaga sili mo leoleo, ne paka'laga mai latou, “Fakasataulo a ia! Fakasataulo a ia!” Muna a Pilato ki a latou, “Ave la ne koutou a ia o fakasataulo; kae seai se mea ne maua ne au, e ala ei o fakasala a ia.” 7Ne toe tali mai a tino Iutaia, “E isi te motou tulafono tela e fai mai, me e 'tau eiloa a ia o mate, me ne fai mai i a ia ko te Tama a te Atua.”

8I te lagonaga ne Pilato a muna kona, ko na mataku ake eiloa a ia; 9ne toe ulu atu a ia ki loto i te fale kae fai mai ki a Iesu, “A koe se tino a?” Ka ko Iesu ne seki tali atu ki a ia. 10Tela, faipati mai ei Pilato ki a ia, “A koe e se faipati mai? E se iloa ne koe me e i a aku te pule o fakasaoloto koe, mo te pule foki o fakasataulo koe?” 11Ne tali atu a Iesu ki a ia, “E iai fua tau pule ki a au, i te mea i tau pule ne aumai mai luga; tela la, a te tino ne 'moli mai au ne ia ki a koe, e tafasili atu te masei o tena agasala.” 12I te lagonaga ne Pilato a te muna tenei, ne salasala ne ia se ala e fakasaoloto ei a Iesu; ka ko tino Iutaia ko ka'laga mai eiloa, “Kafai e fakasaoloto ne koe te tagata tena, e se se taugasoa koe o Kaisala; so se tino e fia fai a ia mo tupu, se fili a ia o Kaisala.” 13I te lagonaga ne Pilato a muna konei, ne avatu ne ia a Iesu ki tua kae fakanofo ki lalo i te nofoga fakamasino, i te koga e fakaigoa ko te “Pae Fatu.” Kae i te 'gana Epelu ko “Kapata.”

14Ko tai oko ki te tutonu o te Aso Fakatoka mō te Paseka, ne fai atu Pilato ki tino Iutaia, “Tenei te otou tupu.” 15Ne paka'laga mai latou, “Ave a ia keatea! Fakasataulo a ia!” Ne muna atu Pilato ki a latou, “Ka fakasataulo ne au te otou Tupu?” Ne tali mai faitaulaga sili, “E seai se motou tupu, ko Kaisala fua!” 16Tela, tuku atu ei a ia ne Pilato ki a latou ke fakasataulo.

Ko Fakasataulo a Iesu

(Mata 27.32-44; Male 15.21-32; Luka 23.26-43)

Tela la, puke ei ne latou a Iesu. 17Ne kave ne latou a Iesu ki tua ke amo tena sataulo, ki te koga tela e fakaigoa ki te “Te Koga o Gatiulupoko,” e fakaigoa i te 'gana Epelu ko “Kolokota.” 18Ne fakasataulo ei ne latou a ia i kona, fakatasi foki mo te sua tokolua, e takitokotasi i feitu, ka ko Iesu e i te kogaloto o laua. 19Ne tusi foki ne Pilato se muna penei: “Ko Iesu te Nasaleta, ko te Tupu o tino Iutaia,” kae ne tuki fakamau ki luga i te sataulo. 20E tokouke a tino Iutaia ne faitau i te faka'pulaga tena, i te mea e pili fua ki te fa'kai a te koga tela ne fakasataulo ei a Iesu. A te faka'pulaga foki tena ne tusi ki te 'gana Epelu, te 'gana Loma, mo te 'gana Eleni. 21Ne fai mai faitaulaga sili o Iutaia ki a Pilato, “Sa tusi pena, ‘Ko te Tupu o Tino Iutaia,’ kae ke tusi penei, ‘Ne fai mai a te tagata tenei, Ko Au ko te Tupu o Tino Iutaia.”’ 22Ne tali atu Pilato, “Ko te mea ko oti ne tusi ne au, e tusi eiloa.”

23I te otiga ne fakasataulo ne sotia a Iesu, ne ave ne latou ona gatu kae vaevae ki vaega e fa, e tofu te sotia e tokotasi mo tena vaega. Ne ave foki ne latou tena gatu loa, tela e seai se sokoga kae 'laga katoa mai luga ke oko ki lalo. 24Ne faipati sotia i a latou eiloa, “Mo a mana saesae ne tatou te gatu, kae ke fai ne tatou se vili me ko oi ka maua ne ia.” Ne fai a te mea nei ke fakataunu ei a muna a te Tusi,

“Ko tufa ne latou oku gatu i a latou eiloa,

Ko fai foki ne latou a te vili ki toku gatu lasi!”

Tena te mea ne fai ei pena ne sotia.

25Ne tu pili atu ki te sataulo o Iesu a tona matua mo te taina o tona matua, e pela foki Malia te avaga a Kalopa, mo Malia te Makatala. 26I te laveaga ne Iesu a tona matua, mo te soko tela e alofa a ia ki ei e 'tu pili atu, faipati atu ei a ia ki tona matua penei, “Te fafine, kiloke, tenei tau tama.” 27Ne faipati atu foki a ia ki te soko tena, “Kiloke, tena tou matua.” Mai te taimi eiloa tena, ne ave ei ne te soko tena a ia ke 'nofo laua i tona fale.

Ko te Mate o Iesu

(Mata 27.45-56; Male 15.33-41; Luka 23.44-49)

28 # Sala 69.21; 22.15 Mai tua ifo i kona, ko iloa ne Iesu me ko oti a mea katoa, faipati atu ei a ia ko te mea ke fakamaoni te Tusi, “Au ko fia inu.” 29Ne iai i kona a te tanoa e fonu i te vinika; ne faka'siu ei ne latou a te omomi ki te vinika, fakalave ei ki te kaula o te isopo, kae tuku atu ki tona gutu. 30I te otiga ne talia ne Iesu te vinika, ana muna, “Ko oti!” I kona foki eiloa, fakagaugau ifo ei tona ulu kae mate.

Ko Velo te Kaokao o Iesu ki te Tao

31Ne fakatagi atu a tino Iutaia ki a Pilato ke fakataga ake latou o fatifati a vae o tino kola ne fakasataulo, kae ke ave foki keatea a foitino mai olotou sataulo, ke se tumau i ei ke oko ki te Sapati, me i te Sapati, se aso 'malu; kae ne fai ne latou a te mea tenei i te Aso Fakatoka. 32Tela, olo atu ei sotia o fatifati a vae o te tagata muamua, pela foki mo te sua tino. Ko laua kona ne fakasataulo fakatasi mo Iesu. 33Ka ko te lotou okoatuga ki a Iesu, ne iloa ake ne latou me ko mate a ia, tela ne seki fatifati ei ne latou ona vae. 34Kae se gata i kona, e tokotasi te sotia ne velo ne ia tena tao ki te kaokao o Iesu, ne tafe mai ei te toto mo te vai. 35A ia tela ne lavea tonu ne ia te mea ne tupu ne fakamatala ne ia, ko te mea ko koutou foki ke talitonu;#19.35: talitonu; i nisi lomiga e isi i ei fakatumau te talitonu. kae e iloa foki ne ia me tonu eiloa tena pati, ko te mea ke tali'tonu koutou. 36#Eso 12.46; Nume 9.12; Sala 34.20Ne fai a mea kona ke fakataunu ei muna a te Tusi, “Ka seai eiloa sona ivi e fati.” 37#Saka 12.10; Faka 1.7E fai mai foki te sua Tusi, “Ka kilo'kilo atu latou ki a ia tela ne 'velo ne latou.”

Ko te Tanuga o Iesu

(Mata 27.57-61; Male 15.42-47; Luka 23.50-56)

38Fakamuli ifo, a Iosefa te Alimataia ne fanoi atu ki a Pilato, me mafai o ave ne ia te foitino o Iesu. A Iosefa se soko o Iesu, kae fai 'funa ana mea ona ko te mataku i tino Iutaia. Ne fakasaoloto atu ne Pilato a ia ke fai a te mea tena, tela, fanatu ei a ia o ave keatea te foitino o Iesu. 39#Ioa 3.1,2A Nikotemo foki, ko te tino tela ne fano ki a Iesu i te sua po, ne vau kae aumai foki ne ia te mulo ko oti ne palu tasi mo te aloe, e tusa mo te selau pauna te 'mafa. 40Ne ave ne laua te foitino o Iesu, kae pelu ki te sulukafu lino fakatasi mo mea manogi, e pela mo te tu faka Iutaia i te teuteuga o te foitino o te mate mō te tanuga. 41E isi se togalakau i te koga tena ne fakasataulo ei a Iesu; i te togalakau foki tena, e isi se tanuga fou e seki tanu eiloa i ei se tino. 42Ona ko te aso tena ko te Aso Fakatoka o tino Iutaia ki te Sapati, tuku ei ne laua a te foitino o Iesu i te tanuga tena, me pili mai fua.

Currently Selected:

IOANE 19: Tusi Tapu

Highlight

Copy