Lukas 22

De Plon de Huagapriesta Jesus doottomoaken. Jesus woat von Judas verot

1Oba daut Fast de onjesuade Brood kjeem dichtbie, jenant Passa. 2Un de Huagapriesta un de Schreftjelieede sochten, woo see am ombrinjen kunnen, dan see enjsten sikj fa daut Volkj.

3Oba Soton fua en Judas nenn, jenant Iskariot, dee eena von dee 12 wia. 4Un hee jinkj han un beräd daut met de Huagapriesta un Hauptmana (Tempelwajchta), woo hee am (Jesus) utleewren kunn. 5Un see freiden sikj un kjeemen äwareen, am Jelt to jäwen. 6Un hee säd too un socht eene goode Jeläajenheit, om am onen de Volkjsmenj to äwajäwen.

7Oba doa kjeem de Dach de onjesuade Brood, aun däm daut Passalaum jeschlacht woaren must. 8Un hee schekjt Petrus un Johanes en säd: Got han un moakt ons daut Passamol reed, doamet wie daut äten. 9Oba see säden to am: Wua west du, daut wie daut reed moaken? 10Oba hee säd to an: Kjikj, wan jie enne Staut nenkomen, woat junt een Maun bejäajnen, dee eene Kruck Wota drajcht; got am hinjaraun bat em Hus, en daut hee nenjeit; 11un jie sellen toom Hushar, [von daut Hus], sajen: De Meista sajcht die: Wua es de Gauststow, wua ekj met miene Jinja daut Passamol äten kaun? 12Un jana woat junt eene groote Bowastow wiesen, met Polsta belajcht; doa moakt daut reed. 13Oba aus see hanjinjen, fungen see daut, soo aus hee an jesajcht haud; un see muaken daut Passamol reed.

14Un aus de Stund jekomen wia, läd (sad) hee sikj aum Desch un de [12] Apostel met am. 15Un hee säd to an: Met Velangen (Bangen) ha ekj mie jebangt, dit Passamol met junt to äten, ea ekj lieden woa. 16Dan ekj saj junt, ekj woa daut nich mea äten, bot daut erfelt woat em Rikj Gottes. 17Un hee neem een Kuffel un dankt un säd: Nämt disen un deelt am unja junt. 18Dan ekj saj junt, en kjeenem Faul woa ekj mea von nu aun vonne Wiendruwen Frucht drinkjen, bot daut Rikj Gottes kjemt.

Jesus fieet daut Owentmol en

19Un hee neem daut Broot, dankt, bruak daut, un jeef daut an un säd: Dit es mien Lief, dee fa junt jejäft woat; dit doot to mienem Jedajchnis. 20Uk daut Kuffel nom Äten un säd: Dis Kuffel es daut niee Tastament en mienem Bloot, daut fa junt vegoten woat.

De Norecht wäa Jesus veroden woat – De Jinja strieden, wäa de jratsta en Gott sien Rikj es

21Doch kjikjt, däm siene Haunt, de mie veroden woat, es met mie aum (opp däm) Desch. 22Dan de Menschensän jeit zwoa doahan, woo daut bestemt es; doch wee janem Mensch, derch däm hee veroden woat. 23Un see fungen aun, daut metenaunda to beräden, wäa daut woll von an sennen kunn, dee dit doonen wudd.

24Oba daut jeef uk een Striet unja an, wäa von an fa däm Jratsten to hoolen es. 25Oba hee säd to an: De Kjennichs vonne Velkja harschen äwa an, un äare Beaumte/Harscha (Rejierungsmana, dee, waut Macht äwa an haben) woaren bejnodjende Haren jenant. 26Oba jie sellen nich soo doonen, oba de Jratsta unja junt saul aus de Jinjsta sennen, un de Väaschta aus de Deena. 27Dan wäa es jrata, dee waut aum Desch licht ooda dee waut bedeent? Es daut nich dee wäa aum Desch licht? Oba ekj sie en june Medd aus dee waut bedeent (deent).

28Oba jie sent dee, dee bie (met) mie utjehoolen ha en miene Vesieekjungen; 29un ekj bestemm fa junt, aus mien Voda fa mie bestemt haft, een Rikj, 30daut jie äten un drinkjen sellen aun mienem Desch en mienem Rikj un setten sellen opp Troons, un dee 12 Stam Israel rechten.

Jeus sajcht däm Petrus daut hee am dreemol velieejen woat

31 Oba de Har säd: Simon, Simon, kjikj, däm Soton haft daut jejankat, fa sikj, junt to säwen aus däm Weit. 32Oba ekj ha fa die jebät, daut dien Gloowen nich opphieed; un du, wan du die eenst bekjieet hast (trigj jekomen best), dan stoakj diene Breeda. 33Oba hee säd to am: Har, met die sie ekj reed, uk em Jefenkjnis un em Doot to gonen. 34Oba hee säd: Ekj saj die, Petrus, de Hon woat vondoag nich kjreien, ea du dree Mol jeloagen hast, daut du mie kjanst.

35Un hee säd to an: Aus ekj junt utschekjt onen Jelttausch ooda Reissak ooda Schoo, ha jie aun irjentwaut Mangel (Noot) jehaut? Oba see säden: Aun nuscht. 36Un hee säd to an: Oba nu, wäa een Jeltbiedel haft, dee nemm am un uk eenen Reissak, un wäa nich haft vekjeep sien Mauntel un kjeep een Schwieet. 37Dan ekj saj junt, daut Jeschräwne mott aun mie erfelt woaren: «Un hee es unja de Jesazloose jetalt (jeräakjent) worden»; {Jes.53,12} waut mie bestemt es, kjemt to siene Erfellunk. 38Oba see säden: Har, kjikj, hia sent 2 Schwieeta. Oba hee säd to an: Daut es jenuach.

Jeus bät em Goaden Getsemane

39Un hee jinkj rut un jinkj no de Jewanheit nom Eeljboajch; oba uk siene Jinja foljden am. 40Oba aus hee aun däm Uat jekomen wia, säd hee to an: Bät, daut jie nich en Vesieekjunk komen. 41Un hee jinkj (trand sikj) von an onjefäa een Steen schmieten wajch, un kjneed sikj un bäd 42un säd: Voda, wan du west, nemm dis Kuffel von mie! Doch nich mien Wellen, oba de dienja passieet! 43Oba doa kjeem no am een Enjel vom Himmel un stoakjt am. 44Un hee kjeem en Angst (Doodesangst) un hee bäd noch dolla (kjraftja); un sien Schweet wort aus Bloot Dreppen dee oppe Ieed follen. 45Un aus hee oppstunt vom Jebäd, un kjeem no de Jinja, funk hee an enjeschlopen fa Truarichkjeit. 46Un hee säd to an: Waut schlop jie? Stot opp un bät, daut jie nich en Vesieekjunk komen!

Jesus woat faustjenomen

47Aus hee noch räd, kjikj, doa kaum eene Schoowa (väl Menschen), un dee, de Judas jenant wort, eena von de 12, jinkj ver an un kjeem no Jesus, om am to Kusse. 48Oba Jesus säd to am: Judas, verotst du dän Menschensän met eenem Kuss? 49Oba aus dee, dee om am wieren, sagen, waut passieren wudd, säden see [to am]: Har, sell wie metem Schwieet mankschlonen? 50Un eena von an schluach däm Huagapriesta sien Kjnajcht un hakt (heiwd) sien rajchtet Ua auf. 51Oba Jesus auntwuad un säd: Lotet soo wiet; un hee schieed daut Ua aun un heeld am.

52Oba Jesus säd to dee, dee jäajen am doahan jekomen wieren, Huagapriesta un Hauptmanna vom Tempel un Eltestasch: Aus jäajen eenen Reiba sent jie utjegonen met Schwieeta un Kjneppels? 53Aus ekj jieda Dach bie junt em Tempel wia, ha jie de Henj nich utjestrakjt jäajen mie; oba dit es june Stund un de Macht de Diestanis.

Petrus velicht Jesus

54Oba aus see am jefangen jenomen hauden, fieeden (leiden) see am auf un brochten am em Huagapriesta sien Hus; oba Petrus foljd von wiethäa. 55Oba aus see medden em Hoff een Fia aunjestekjt un sikj toop hanjesat hauden, sad sikj Petrus medden unja (mank) an. 56Un eene Deenstmejal sach am aum Fia setten un kjikjt am schoap aun un säd: Uk disa wia met am. 57Oba hee luach un säd: Fru, ekj kjan am nich. 58Un kort doano sach am een aundra un säd: Uk du best eena von an. Oba Petrus säd: Mensch, ekj sie daut nich. 59Un onjefäa eene Stund nodäm behaupt een aundra un säd: Woarhauft, uk disa wia bie am, dan uk hee es een Galiläa. 60Oba Petrus säd: Mensch, ekj weet nich, waut du sajchst. Un fuaz, aus hee noch räd, kjreid de Hon. 61Un de Har dreid sikj om un kjikjt Petrus aun; un Petrus docht aum Harn sien Wuat, waut hee to am säd: Iea de Hon kjreit, woascht du mie dree Mol velieejen. 62Un hee (Petrus) jinkj rut un hield bettalich.

Jesus woat ver dän Huagen Rot jeleit

63Un de Mana, dee am fausthilden, vespotten un schluagen am. 64Un aus see am bedakjt hauden, fruagen see am un säden: Openboa (Profezei), wäa es daut dee die jeschloagen haft? 65Un välet aundre säden see lastalichet jäajen am.

66Un aus et Dach wort, vesaumelden sikj de Eltestasch vom Volkj, (de) Huagepriestasch aus uk de Schreftjelieede, un fieeden (leiden) am wajch en äarem huagen Rot; 67un säden: Wan du de Jesaulwda (Christus) best, saj daut ons. Oba hee säd to an: Wan ekj daut junt uk saj, en kjeenem Faul woa jie daut jleewen; 68oba wan ekj froagen wudd, soo wudd jie mie nich auntwuaden, [noch mie loosloten]. 69Oba von nu aun woat de Menschensän setten to Rajchten de Krauft Gottes. 70Oba daut säden aula: Du best aulsoo de Sän Gottes? Oba hee säd to an: Jie sajen, daut ekj daut sie. 71Oba see säden: Waut bruck wie noch fa een Zeichnis? Wie selfst ha daut ut sienem Mul jehieet.

Currently Selected:

Lukas 22: PBJHF

Highlight

Copy