လံာ်လူၤကၣ် 13
13
ဃၣ်ကွံာ်လၢသုတၢ်ဒဲးဘးတက့ၢ်, မ့တမ့ၢ်ဘၣ်ဒီးသုကသံလီၤ.
1ဖဲဆၢကတီၢ်အဝဲန့ၣ်, ပှၤအိၣ်ဝဲဒၣ်တနီၤလၢအစံးဘၣ်တဲဘၣ် ယ့ၣ်ၡူးဘၣ်ဃးဒီးပှၤကၤလံၤလါဖိတဖၣ်လၢ စီၤပံၤလးမၤသံတ့ၢ်ဝဲဖဲအဝဲသ့ၣ်လုၢ်ထီၣ်ပာ်ထီၣ် တၢ်ဆူကစၢ်ယွၤအအိၣ်အဖၢမုၢ်အဂ့ၢ်န့ၣ်လီၤ. 2ယ့ၣ်ၡူးစံးဆၢအဝဲသ့ၣ်, “မ့ၢ်လၢပှၤကၤလံၤလါဖိသ့ၣ်တဖၣ်အံၤ, ဘၣ်တၢ်မၤသံအီၤလၢကျဲဒ်န့ၣ်အဃိ, သုဆိကမိၣ်မ့ၢ်တၢ်အုၣ်အသးလၢအဝဲသ့ၣ်မ့ၢ်ပှၤတၢ်ဒဲးဘး ဖိလၢအအၢန့ၢ်ဒံးပှၤကၤလံၤလါဖိအဂၤတဖၣ်န့ၣ်ဧါ. 3တမ့ၢ်ဘၣ်. ယစံးဘၣ်တဲဘၣ်သုလၢသုမ့ၢ်တဃၣ်ကွံာ်လၢသု တၢ်ဒဲးဘးတဖၣ်ဘၣ်ဒီး, သုကသံသုဝဲကိးဂၤဒဲးဒ်အဝဲသ့ၣ်သံဝဲအသိးလီၤ. 4ပှၤတဆံဃိးဂၤလၢအသံဝဲဖဲတၢးထီၡံလိၣ်လီၤပှီၢ်လၢအဖီခိၣ်, တခီလဲၣ်. မ့ၢ်သုဆိကမိၣ်လၢတၢ်မၤအသးတမံၤအံၤမ့ၢ်တၢ်အုၣ်အသးလၢ အဝဲသ့ၣ်အၢဝဲသီဝဲဒိၣ်န့ၢ်ပှၤအဂၤတဖၣ်လၢအအိၣ်ဆိးလၢဝ့ၢ် ယရူၤၡလ့ၣ်အပူၤန့ၣ်ဧါ. 5တမ့ၢ်ဘၣ်. ယစံးဘၣ်တဲဘၣ်သုလၢသုမ့ၢ်တဃၣ်ကွံာ်လၢသုတၢ်ဒဲးဘး တဖၣ်န့ၣ်, သုဝဲကိးဂၤဒဲးသုကသံဒ်အဝဲသ့ၣ်အသိးလီၤ.”
တၢ်ကတိၤဒိဘၣ်ဃးချၢၣ်ဒၢတထူၣ်လၢ အတသၣ်ထီၣ်
6တုၤနုၤတစုယ့ၣ်ၡူးစံးဘၣ်တဲဘၣ်အဝဲသ့ၣ်လၢတၢ်ကတိၤဒိ တထံၣ်အံၤလီၤ. “တဘျီလၢပှၤတဂၤအတၤသၣ်လီၢ်အပူၤန့ၣ်, ချၢၣ်ဒၢအိၣ်သူၣ်လီၤအသးတထူၣ်လီၤ. အဝဲဒၣ်လဲၤကွၢ်ဃုချၢၣ်ဒၢသၣ်လၢအလိၤဘၣ်ဆၣ် တထံၣ်န့ၢ်ဝဲနီတဖျၢၣ်ဘၣ်. 7လၢတၢ်န့ၣ်အဃိ, အဝဲဒၣ်စံးဘၣ်အပှၤပၢၤတၤသၣ်လီၢ်န့ၣ်, ‘ကွၢ်ကွၢ်တက့ၢ်. လၢသၢနံၣ်အတီၢ်ပူၤယဟဲယဲဖဲအံၤဒီး ကွၢ်ဃုချၢၣ်ဒၢသၣ်လၢချၢၣ်ဒၢတထူၣ်အံၤအလိၤ, ဒီးယတထံၣ်န့ၢ်ယဲနီတဖျၢၣ်ဘၣ်. ကူာ်လီၤကွံာ်အီၤတက့ၢ်. ဘၣ်မနုၤအဃိအကဘၣ်အိၣ်နိးဟီၣ်ခိၣ်န့ၣ်လဲၣ်.’ 8ဘၣ်ဆၣ်ဒီးပှၤပၢၤတၤသၣ်လီၢ်စံးဆၢဝဲ, ‘တၢ်ဒိၣ်ဧၢ, ပျဲအိၣ်ဒၣ်ကလိာ်အီၤထဲအအံၤတနံၣ်အံၤတက့ၢ်. ယကခူၣ်တၢ်ပူၤဝးတရံးအီၤဒီးမၤပှဲၤအီၤလၢတၢ်အ့ၣ်လီၤ. 9သ့ၣ်န့ၣ်မ့ၢ်သၣ်ထီၣ်တၤသၣ်လၢခံတနံၣ်ဒီး, ကဂ့ၤဒိၣ်ဒၣ်တၢ်တက့ၢ်လီၤ. မ့ၢ်တသၣ်ထီၣ်ဘၣ်တခီကူာ်လီၤကွံာ်အီၤ တက့ၢ်.’ ”
ယ့ၣ်ၡူးမၤဘျါပိာ်မုၣ်ပျိၢ်သကူးတဂၤ ဖဲမုၢ်အိၣ်ဘှံးနံၤ
10ဘၣ်ဖဲမုၢ်အိၣ်ဘှံးနံၤတနံၤန့ၣ်, ယ့ၣ်ၡူးသိၣ်လီၤသီလီၤတၢ်လၢဘူၣ်ဘျီၣ်လၢ အမ့ၢ်တၢ်ဘါလီၢ်တဖျၢၣ်အပူၤလီၤ. 11ပိာ်မုၣ်အိၣ်ဝဲဒၣ်ဖဲန့ၣ်တဂၤလၢတၢ်နါဒိးအီၤဒီးဒုးဆူးဒုးဆါထီ ဃာ်အီၤလၢတဆံဃိးနံၣ်အတီၢ်ပူၤလီၤ. အဝဲဒၣ်အပျိၢ်သကူးဒိၣ်မးဒီးဆၢထၢၣ်ဝဲဘျၢဘျၢတန့ၢ်ဘၣ်. 12ဖဲယ့ၣ်ၡူးထံၣ်ဘၣ်အီၤန့ၣ်, အဝဲဒၣ်ကိးဃီၤအီၤဆူအအိၣ်ဒီးစံး, “ပိာ်မုၣ်ဧၢ, နထူၣ်ဖျဲးထီၣ်ကွံာ်လၢနတၢ်ဆူးတၢ်ဆါလံ.” 13အဝဲဒၣ်ပာ်ထီၣ်အစုလၢအလိၤဒီးတဘျီဃီ, အဝဲဒၣ်အပျိၢ်ဘျၢထီၣ်က့ၤဒီးစံးထီၣ်ပတြၢၤကစၢ်ယွၤလီၤ. 14ဘူၣ်ဘျီၣ်အခိၣ်အသးထီၣ်လၢယ့ၣ်ၡူးမၤဘျါတ့ၢ်တၢ်လၢမုၢ် အိၣ်ဘှံးနံၤအဃိလီၤ. လၢတၢ်န့ၣ်အဃိအဝဲဒၣ်ကတိၤထီၣ်တၢ်ဒီးစံးဘၣ်ပှၤဂီၢ်မုၢ် တဖၣ်, “မုၢ်နံၤမုၢ်သီအိၣ်ဝဲဒၣ်ဃုနံၤဃုသီလၢပကြၢးဖံးတၢ်မၤတၢ်လီၤ. လၢတၢ်န့ၣ်အဃိ, ဟဲသုဝဲဖဲမုၢ်နံၤမုၢ်သီတဖၣ်န့ၣ်လၢ သုကဘၣ်တၢ်မၤဘျါသုအဂီၢ်န့ၣ်တက့ၢ်. မ့မ့ၢ်လၢမုၢ်အိၣ်ဘှံးနံၤတနံၤန့ၣ်တဘၣ်မၤတဂ့ၤ.” 15ကစၢ်စံးဆၢက့ၤအီၤဒီးစံးဝဲ, “ပှၤပာ်မၤအသးသ့ၣ်သုဧၢ, သုဝဲတဂၤဂ့ၤတဂၤဂ့ၤသုဃ့ၣ်လီၤသုကျီၢ်မ့တမ့ၢ်သုကသ့ၣ် ယီၤလၢကပိၤပူၤဒီးမိၤထီၣ်အီၤဆူခိဒ်သိးသုကဒုးအီအီၤထံဖဲ မုၢ်အိၣ်ဘှံးနံၤတမ့ၢ်ဘၣ်ဧါ. 16ခဲကနံၣ်အံၤ, ပိာ်မုၣ်လၢအမ့ၢ်စီၤအၤဘြၤဟၣ်အစၢၤအသွဲၣ် အိၣ်ဝဲဒၣ်ဖဲအံၤတဂၤလၢမုၣ်ကီၤလံၢ်ဟံးဃာ်တ့ၢ်အီၤလၢတၢ်စၢဃာ် အပူၤ, အိၣ်လံတဆံဃိးနံၣ်လံန့ၣ်လီၤ. တၢ်ကဒုးထူၣ်ဖျဲးထီၣ်ကွံာ်အီၤလၢအတၢ်စၢဃာ်အပူၤဖဲမုၢ်အိၣ်ဘှံး အနံၤန့ၣ်, တကြၢးဝဲဘၣ်ဝဲဘၣ်ဧါ.” 17လၢယ့ၣ်ၡူးအတၢ်စံးဆၢတထံၣ်အံၤအဃိ, အဒုၣ်အဒါခဲလၢာ်အမဲာ်ဆှးလီၤက့ၤအသး, မ့မ့ၢ်, ပှၤဂီၢ်မုၢ်ခဲလၢာ်သူၣ်ဖှံသးညီလၢကယဲၢ်တၢ်မၤ လီၤလိၢ်လီၤလးလၢအမၤတ့ၢ်ဝဲတဖၣ်အဃိန့ၣ်လီၤ.
တၢ်ကတိၤဒိဘၣ်ဃးသဘၣ်ချံ
(မး. ၁၃:၃၁-၃၂; မၢ်. ၄:၃၀-၃၂)
18မၤသးဒ်န့ၣ်ဒီးယ့ၣ်ၡူးစံးဝဲ, “ကစၢ်ယွၤအဘီအမုၢ်န့ၣ်လီၤဂာ်ဒီးမနုၤလဲၣ်. မ့ၢ်ယကထိၣ်သတြီၤအီၤလၢမနုၤတမံၤလဲၣ်. 19မ့ၢ်အလီၤဂာ်ဒီးသဘၣ်အချံတဖျၢၣ်လၢပှၤတဂၤဟံးန့ၢ်ဝဲဒီးသူၣ်လီၤ ဝဲလၢအစံာ်ပူၤန့ၣ်လီၤ. တၢ်ချံန့ၣ်မဲထီၣ်ဒီးဒိၣ်ထီၣ်, ဒီးကဲထီၣ်သ့ၣ်တထူၣ်ဒီးထိၣ်ဖိလံာ်ဖိတဖၣ် ဘှီထီၣ်အသွံလၢအဒ့အတြၢ်တဖၣ်အလိၤလီၤ.”
တၢ်ကတိၤဒိဘၣ်ဃးကိၣ်မံၣ်
(မး. ၁၃:၃၃)
20ယ့ၣ်ၡူးစံးကဒီးဝဲ, “မ့ၢ်ယကဒိလီၤကစၢ်ယွၤအဘီအမုၢ်လၢမနုၤတမံၤလဲၣ်. 21မ့ၢ်အလီၤဂာ်ဒီးကိၣ်မံၣ်လၢပိာ်မုၣ်တဂၤဟံးန့ၢ်ဝဲ, ဒီးဃါဃုာ်ဝဲဒီးကိၣ်ကမူၣ်သၢသလီးတုၤအဖးထီၣ်ဝဲခဲလၢာ်လီၤ.”
ကျဲစၢၤလၢအအံၣ်
(မး. ၇:၁၃-၁၄; ၂၁-၂၃)
22ဖဲယ့ၣ်ၡူးလဲၤတၢ်ဆူဝ့ၢ်ယရူၤၡလ့ၣ်အကျဲန့ၣ်, အဝဲလဲၤခီဂာ်ဝ့ၢ်တဖၣ်ဒီးသဝီတဖၣ်, ဒီးသိၣ်လီၤသီလီၤတၢ်လီၤ. 23ပှၤတဂၤသံကွၢ်အီၤ, “ကစၢ်ဧၢ, ပှၤလၢအကဘၣ်တၢ်အုၣ်က့ၤခီၣ်က့ၤအီၤအိၣ်ထဲစှၤဂၤဧိၤလီၤဧါ.” ယ့ၣ်ၡူးစံးဆၢအဝဲသ့ၣ်, 24“ဂုာ်ကျဲးစၢးလဲၤနုာ်သုဝဲလၢကျဲစၢၤအအံၣ်န့ၣ်တက့ၢ်. အဂ့ၢ်ဒ်အံၤ, ပှၤအါဒံအါဂၤကကျဲးစၢးဝဲ, ဘၣ်ဆၣ်ဒီးလဲၤနုာ်ဝဲတန့ၢ်ဘၣ်. 25တုၤဟံၣ်ကစၢ်ဂဲၤဆၢထၢၣ်ဒီးကးတံာ်တြဲၤလံန့ၣ်, သုကအိၣ်ဆၢထၢၣ်လၢတၢ်ချၢ, ဒီးဖဲသုဒိတကျိာ်တြဲၤဒီးစံးသုဝဲ, ‘ကစၢ်ဧၢ, အိးထီၣ်တြဲၤလၢပဂီၢ်တက့ၢ်.’ န့ၣ်, အဝဲဒၣ်ကစံးဆၢသု, ‘သုဟဲဖဲလဲၣ်န့ၣ်ယတသ့ၣ်ညါယဲဘၣ်.’ 26တုၤနုၤတစုသုကစံးဆၢသုဝဲ, ‘ပအီၣ်တၢ်အီတၢ်ဒီးနၤ, ဒီးနသိၣ်လီၤသီလီၤတၢ်လၢပဝ့ၢ်ပူၤလီၤ.’ 27ဘၣ်ဆၣ်ဒီးအဝဲဒၣ်ကစံးကဒီးဝဲ, ‘သုဟဲဖဲလဲၣ်န့ၣ်ယတသ့ၣ်ညါဘၣ်. သုဝဲကိးဂၤလၢအမၤတၢ်အၢတၢ်သီသ့ၣ်ဧၢ, ဟးထီၣ်ကွံာ်လၢယအိၣ်တက့ၢ်.’ 28တုၤသုထံၣ်ဘၣ်စီၤအၤဘြၤဟၣ်, စီၤအံၤစဲး, ဒီးစီၤယၤကိာ်ဒီးဝံခဲလၢာ် အိၣ်လၢကစၢ်ယွၤအဘီအမုၢ်အပူၤ, ဖဲသုဝဲတခီသုဘၣ်တၢ်ညိကွံာ်သုလၢတၢ်ချၢန့ၣ်, သုကအိၣ်ဒီးတၢ်ဟီၣ်တၢ်ယၢၤ, ဒီးတၢ်မဲအ့ၣ်တဃံးဆံးဒိၣ်လဲၣ်. 29ပှၤကဟဲလၢမုၢ်ထီၣ်မုၢ်နုာ်, လၢကလံၤစိးဒီးကလံၤထံး, ဒီးဆ့ၣ်နီၤဖဲစီၢ်နီၤခိၣ်, လၢကစၢ်ယွၤအဘီအမုၢ်အပူၤလီၤ. 30တုၤနုၤတစု, ပှၤလၢအအိၣ်လၢခံကတၢၢ်ခဲကနံၣ်အံၤသ့ၣ်တဖၣ်, ကအိၣ်က့ၤဝဲလၢညါကတၢၢ်, ဒီးပှၤလၢအအိၣ်လၢညါကတၢၢ်ခဲ ကနံၣ်အံၤတဖၣ်, ကအိၣ်က့ၤဝဲလၢခံကတၢၢ်လီၤ.”
ယ့ၣ်ၡူးအတၢ်အဲၣ်ဘၣ် ဝ့ၢ်ယရူၤၡလ့ၣ်
(မး. ၂၃:၃၇-၃၉)
31တကတီၢ်ဃီဖဲန့ၣ်, ပှၤဖၤရံၤၡဲတနီၤဟဲဆူယ့ၣ်ၡူးအအိၣ်ဒီးစံးဘၣ်အီၤ, “နကဘၣ်ဟးထီၣ်ကွံာ်နဲဖဲအံၤ ဒီးလဲၤဆူတၢ်လီၢ်တၢ်ကျဲအဂၤ တပူၤ, အဂ့ၢ်မ့ၢ်လၢစီၤပၤဟ့ၤရိာ်အဲၣ်ဒိးမၤသံနၤအဃိန့ၣ်လီၤ.” 32ယ့ၣ်ၡူးစံးဆၢအဝဲသ့ၣ်, “လဲၤတဲဘၣ်ထွံၣ်ဟီၣ်ခိၣ်အဝဲန့ၣ်, ‘ယဟီထီၣ်ကွံာ်တၢ်နါတဖၣ်, ဒီးမၤဘျါတၢ်ဆူးတၢ်ဆါတဖၣ် မုၢ်မဆါတနံၤအံၤ, ဒီးခဲမုၢ်ဆ့ၣ်, ဒီးသၢနံၤတနံၤန့ၣ်, ယကမၤဝံၤယတၢ်ဖံးတၢ်မၤလီၤ.’ 33မ့ၢ်နာ်သက့ဒ်န့ၣ်ဒီး, တနံၤအံၤ, ခဲမုၢ်ဆ့ၣ်ဒီးလၢခံတနံၤန့ၣ်, ယကဘၣ်လဲၤတၢ်လီၤ. အဂ့ၢ်ဒ်အံၤ, မ့တမ့ၢ်လၢဝ့ၢ်ယရူၤၡလ့ၣ်ဘၣ်ဒီး, ဝံတဂၤတကြၢးဘၣ်တၢ်မၤသံအီၤလၢတၢ်လီၢ်နီတတီၤဘၣ်. 34ယရူၤၡလ့ၣ်ဧၢ, ယရူၤၡလ့ၣ်ဧၢ, နမၤသံဝံတဖၣ်, ဒီးပှၤစိာ်တၢ်ကစီၣ်လၢကစၢ်ယွၤဆှၢလီၤဝဲဆူနအိၣ်တဖၣ်န့ၣ် နကွံာ်သံအီၤလၢလၢၢ်လီၤ. ဆၢကတီၢ်အိၣ်ဝဲအဘျီတဖၣ်အဘျီဖဲယသး အိၣ်ဖိးဟုနပှၤဂီၢ်မုၢ်တဖၣ်, ဒ်ဆီမိၢ်ပှၢ်တဘ့ၣ်ဒုးအိၣ်ဖှိၣ်အဖိတဖၣ်လၢ အဒံးဆ့အဖီလာ်န့ၣ်အသိး, ဘၣ်ဆၣ်ဒီးနတပျဲယၤဘၣ်. 35ဒီးလၢတၢ်န့ၣ်အဃိ, နတၢ်လုၢ်ဟံၣ်ကဘၣ်တၢ်လဲၤသဒၣ်ကွံာ်အီၤလီၤ. ယစံးဘၣ်တဲဘၣ်သု, တုၤလီၤဆၢကတီၢ်ဖဲသုစံးသုဝဲ, ‘မ်ကစၢ်ယွၤဆိၣ်ဂ့ၤဘၣ်ပှၤတဂၤ လၢအဟဲလၢကစၢ်အမံၤတက့ၢ်’ တစုန့ၣ်, သုတထံၣ်ဘၣ်ယၤဘၣ်.”
Currently Selected:
လံာ်လူၤကၣ် 13: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
