လံာ်မၢ်ကူး 14
14
ပှၤကူၣ်မၤသံယ့ၣ်ၡူး
(မး. ၂၆:၁-၅; လူၤ. ၂၂:၁-၂; ယိၤ. ၁၁:၄၅-၅၃)
1အကတီၢ်မ့ၢ်ဖဲဘူၣ်လဲၤကပာ်ဒီးဘူၣ်ကိၣ်တအိၣ်ဒီးကိၣ်မံၣ် တချုးဘၣ်ဒံးဘၣ်ခံသီန့ၣ်, ပှၤလုၢ်တၢ်အခိၣ်အဒိၣ်တဖၣ်ဒီးပှၤသ့တၢ်ဘူၣ်တၢ်ဘါအတၢ် သိၣ်တၢ်သီတဖၣ်ဃုဝဲကျဲလၢတၢ်ခူသူၣ်အပူၤလၢအကဖီၣ် န့ၢ်ယ့ၣ်ၡူးဒီးမၤသံကွံာ်အီၤအဂီၢ်န့ၣ်လီၤ. 2အဝဲသ့ၣ်စံးဝဲ, “တၢ်အံၤပတဘၣ်မၤအီၤဖဲဘူၣ်အဆၢကတီၢ် အံၤဘၣ်. ပမ့ၢ်မၤအီၤဖဲဘူၣ်အဆၢကတီၢ်အံၤဒီးပှၤဂီၢ်မုၢ်တဖၣ် ကတၢထီၣ်တၢလီၤဘၣ်ဖုးလီၤ.”
တၢ်ဖှူယ့ၣ်ၡူးအခိၣ်လၢသိနၢမူဖဲသဝီဘ့ၤသနံ
(မး. ၂၆:၆-၁၃; ယိၤ. ၁၂:၁-၈)
3ယ့ၣ်ၡူးအိၣ်ဝဲဒၣ်လၢသဝီဘ့ၤသနံလၢပှၤဘၣ်တၢ်ဆါအၢ စီၤၡံမိၣ်အဟံၣ်ပူၤလီၤ. ဖဲအဝဲဆ့ၣ်နီၤအီၣ်တၢ်အခါ, ပိာ်မုၣ်တဂၤဟဲနုာ်စိာ်ဃုာ်ဒီးသိကိလၢၢ်ဝါတကိပှဲၤဒီးနၢ် ဒူးသိနၢမူနီၢ်နီၢ်လၢအပှ့ၤဒိၣ်နီၢ်မးန့ၣ်လီၤ. ပိာ်မုၣ်န့ၣ်မၤကၢ်အသိကိအကိာ်ဒီးလူလီၤဝဲသိနၢ မူန့ၣ်လၢယ့ၣ်ၡူးအခိၣ်လိၤလီၤ. 4ပှၤအိၣ်ဖဲန့ၣ်တနီၤအသးဟဲဒိၣ်ထီၣ်ဒီးစံးလိာ်အသးတဂၤ ဒီးတဂၤ, “သိနၢမူအံၤဘၣ်မနုၤတၢ်မၤလၢာ်ဂီၤကွံာ်အီၤဒ်အံၤလဲၣ်.
5သိနၢမူဒ်အံၤပှၤမ့ၢ်ဆါလီၤဒီးကန့ၢ်စ့ဒန့ၤရံအဘ့ၣ်သၢကယၤ ဒီးစ့န့ၣ်တၢ်ဟ့ၣ်လီၤပှၤလၢအဖှီၣ်သ့လီၤ. ဒီးအဝဲသ့ၣ်ကတိၤအ့ၣ်လိာ်ပိာ်မုၣ်န့ၣ်ဆါဆါကလဲာ်လီၤ.” 6မ့မ့ၢ်ယ့ၣ်ၡူးစံးဝဲ, “ကတိၤအီၤနီတမံၤတဂ့ၤ. ဘၣ်မနုၤသုဘၣ်မၤတံာ်တာ်အီၤလဲၣ်. တၢ်လၢအဝဲဒၣ်မၤ ဘၣ်ယၤအံၤမ့ၢ်တၢ်လၢအဃံလၤဂ့ၤမးလီၤ. 7ပှၤဖှီၣ်ဖိတဖၣ်အိၣ်လၢသုသိးသုကျါထီဘိ, ဒီးတဘျီလၢ်လၢ်ဖဲသုအဲၣ်ဒိးမၤစၢၤအဝဲသ့ၣ်န့ၣ်, သုမၤစၢၤသ့လီၤ. မ့မ့ၢ်ယဲဒၣ်ယတအိၣ်ဒီးသုထီဘိဘၣ်. 8ပိာ်မုၣ်အံၤတၢ်လၢအမၤဝဲသ့န့ၣ်မၤတ့ၢ်ဝဲလံ. ဟဲဒီးဖှူဆိပာ်လံ ယလိၤဒ်အမ့ၢ်တၢ်ကတဲာ်ကတီၤယနီၢ်ခိလၢတၢ်ခူၣ်လီၤအီၤ အဂီၢ်န့ၣ်လီၤ. 9ယစံးဘၣ်သုသပှၢ်ကတၢၢ်လီၤ. လၢဟီၣ်ခိၣ်ဒီဘ့ၣ်တၢ်လီၢ်တပူၤ လၢ်လၢ်ဖဲပှၤစံၣ်တဲၤတဲလီၤတၢ်သးခုအကစီၣ်န့ၣ်, ပှၤကစံးကတိၤစ့ၢ်ကီးတၢ်လၢပိာ်မုၣ်တဂၤအံၤမၤတ့ၢ်ဝဲအဂ့ၢ်, လၢတၢ်ကသ့ၣ်နီၣ်ထီၣ်က့ၤအီၤအဂီၢ်န့ၣ်လီၤ.”
စီၤယူဒၤအၢၣ်လီၤလၢကဟ့ၣ်လီၤကွံာ်ယ့ၣ်ၡူး
(မး. ၂၆:၁၄-၁၆; လူၤ. ၂၂:၃-၆)
10အန့ၣ်ဝံၤ စီၤယူဒၤအံၣ်စကၤရံၤအိာ်လၢအမ့ၢ်အပျဲၢ်အဘီၣ် တဆံခံဂၤအကျါတဂၤန့ၣ်, လဲၤဝဲဆူပှၤလုၢ်တၢ်အခိၣ်အဒိၣ်တဖၣ်အအိၣ်ဒ်သိးအကဟ့ၣ် လီၤကွံာ်ယ့ၣ်ၡူးဆူအဝဲသ့ၣ်အစုပူၤအဂီၢ်န့ၣ်လီၤ. 11တုၤအဝဲသ့ၣ်နၢ်ဟူဘၣ်အဝဲဟဲလၢမနုၤအဂီၢ်လဲၣ်န့ၣ်ဒီး, သူၣ်ခုသးခုဝဲဒီးအၢၣ်လီၤအီလီၤဝဲလၢအကဟ့ၣ် လီၤအီၤစ့လီၤ. အန့ၣ်ဒီးစီၤယူဒၤစးထီၣ်ဃုကျဲလၢကန့ၢ် ဘၣ်ဆၢဂ့ၤကတီၢ်ဘၣ်လၢကဟ့ၣ်လီၤကွံာ်ယ့ၣ်ၡူးဆူ အဝဲသ့ၣ်အစုပူၤအဂီၢ်လီၤ.
ယ့ၣ်ၡူးအီၣ်ဘူၣ်လဲၤကပာ် ဒီးအပျဲၢ်အဘီၣ်တဖၣ်
(မး. ၂၆:၁၇-၂၅; လူၤ. ၂၂:၇-၁၄,၂၁-၂၃; ယိၤ. ၁၃:၂၁-၃၀)
12ဖဲဘူၣ်ကိၣ်တအိၣ်ဘၣ်ဒီးကိၣ်မံၣ်ဘၣ်ဝဲအခီၣ်ထံးတနံၤ, လၢအမ့ၢ်မုၢ်နံၤလၢတၢ်မၤသံဒီးလုၢ်ထီၣ်ဘူၣ်လဲၤကပာ်အသိဖိ န့ၣ်, ယ့ၣ်ၡူးအပျဲၢ်အဘီၣ်တဖၣ်သံကွၢ်အီၤ, “နအဲၣ်ဒိးလၢပကလဲၤကတဲာ်ကတီၤပာ်ဘူၣ်လဲၤကပာ်အတၢ် အီၣ်လၢနဂီၢ်ဖဲလဲၣ်တပူၤလဲၣ်.”
13အန့ၣ်ဒီးယ့ၣ်ၡူးမၢလီၤအပျဲၢ်အဘီၣ်ခံဂၤဒီးစံးဘၣ်အဝဲသ့ၣ်, “လဲၤနုာ်ဆူဝ့ၢ်ပူၤဒီးသုကထံၣ်ဘၣ်ပှၤတဂၤယိးသပၢၤထံတဖျၢၣ်လီၤ. လဲၤပိာ်အခံ, 14ဒီးဖဲအလဲၤနုာ်ဝဲဟံၣ်တဖျၢၣ်န့ၣ်, စံးဘၣ်ဟံၣ်ကစၢ်, ‘သရၣ်စံးဝဲ, ပှၤသမှံၤအဒၢးလၢယဂီၢ်, လၢယၤဒီးယပျဲၢ်ယဘီၣ်တဖၣ်ကအီၣ် တၢ်အီတၢ်လၢဘူၣ်လဲၤကပာ်တဘျီအဂီၢ်န့ၣ်, အိၣ်ဖဲလဲၣ်.’ 15အန့ၣ်ဒီး အဝဲဒၣ်ကဒုးနဲၣ်သုဒၢးဖးလဲၢ်တဖျၢၣ်လၢဟံၣ်ဖီခိၣ် တဆီ, အိၣ်လၢအိၣ်ပှဲၤဒီးတၢ်လၢပလိၣ်ဘၣ်တဖၣ်ဒီးအိၣ်ကတဲာ် ကတီၤပာ်အသးဂ့ၤဂ့ၤဘၣ်ဘၣ်န့ၣ်လီၤ. ကတဲာ်ကတီၤပာ်တၢ်အီၣ်တၢ်အီလၢပဂီၢ်ဖဲဒၢးအဝဲန့ၣ်အပူၤ တက့ၢ်.”
16အပျဲၢ်အဘီၣ်တဖၣ်ဟးထီၣ်ဒီးလဲၤဝဲဆူဝ့ၢ်န့ၣ်အပူၤ, ဒီးထံၣ်ဘၣ်တၢ်ခဲလၢာ်ဒ်ယ့ၣ်ၡူးစံးဘၣ်တ့ၢ်အဝဲသ့ၣ်အသိးလီၤ. ဒီးအဝဲသ့ၣ်ကတဲာ်ကတီၤဝဲတၢ်အီၣ်လၢဘူၣ်လဲၤကပာ်အဂီၢ်န့ၣ်လီၤ.
17တုၤမုၢ်ဟါလီၤဒီး, ယ့ၣ်ၡူးဟဲဝဲဒီးအပျဲၢ်အဘီၣ်တဆံခံဂၤန့ၣ်လီၤ. 18ဖဲအဝဲသ့ၣ်ဆ့ၣ်နီၤဒီးအီၣ်တၢ်အဖၢမုၢ်န့ၣ်, ယ့ၣ်ၡူးစံးဝဲ, “ယစံးဘၣ်သုသပှၢ်ကတၢၢ်လီၤ. ပှၤလၢအီၣ်သကိးအီသကိးတၢ်ဒီးယၤလၢသုကျါတဂၤန့ၣ် ကဟ့ၣ်လီၤကွံာ်ယၤလီၤ.”
19အဝဲသ့ၣ်အသးတမုာ်လၢၤနီတစဲးဘၣ်ဒီးသံကွၢ်အီၤတဂၤဝံၤတဂၤ “မ့ၢ်ယၤဧါ” န့ၣ်လီၤ.
20အဝဲဒၣ်စံးဆၢက့ၤအဝဲသ့ၣ်, “မ့ၢ်ပှၤလၢသုတဆံခံဂၤအကျါ တဂၤ, ပှၤလၢအစုၣ်လီၤအကိၣ်လၢလီခီတဘ့ၣ်ဃီအပူၤဒီးယၤ တဂၤန့ၣ်လီၤ. 21ပှၤကညီဖိခွါအံၤကဘၣ်လဲၤဝဲဆူတၢ်မၤသံအလီၢ်ဒ်တၢ်ကွဲး အသးစီဆှံစံးဝဲအသိးလီၤ. ဘၣ်ဆၣ်ဒီးပှၤလၢအဟ့ၣ်လီၤပှၤကညီဖိခွါအံၤဆူဒုၣ်ဒါ အစုပူၤတဂၤန့ၣ်ကဘၣ်အဖှီၣ်လီၤ. ပှၤတဂၤန့ၣ်မ့ၢ်တအိၣ် ဖျဲၣ်ထီၣ်ဘၣ်ဒီးကမ့ၢ်တၢ်ဂ့ၤဒၣ်တၢ်တက့ၢ်လၢအဂီၢ်လီၤ.”
ကစၢ်အတၢ်အီၣ်လၢဟါ
(မး. ၂၆:၂၆-၃၀; လူၤ. ၂၂:၁၄-၂၀; ၁ကရံၣ်. ၁၁:၂၃-၂၅)
22ဖဲအဝဲသ့ၣ်အီၣ်တၢ်အကတီၢ်န့ၣ်, ယ့ၣ်ၡူးဟံးန့ၢ်ကိၣ်, ဃ့ထုကဖၣ်ယွၤအိၣ်ဒီးတၢ်စံးထီၣ်ပတြၢၤယွၤ အဘျုးအဖှိၣ်, စိၢ်ဘျဲးကိၣ်န့ၣ်, ဒီးဟ့ၣ်လီၤဝဲအပျဲၢ်အဘီၣ်တဖၣ် ဒီးစံးဝဲဒၣ်, “ဟံးန့ၢ်ဒီးအီၣ်တက့ၢ်. အအံၤမ့ၢ်ယနီၢ်ခိလီၤ.”
23အန့ၣ်ဝံၤအဝဲဒၣ်ဟံးန့ၢ်စပံးထံလီခီ, စံးထီၣ်ပတြၢၤကစၢ်ယွၤအဘျုး အဖှိၣ်ဝံၤဟ့ၣ်လီၤအဝဲသ့ၣ်, ဒီးအဝဲသ့ၣ်ကိးဂၤဒဲးအီဝဲစပံးထံလၢလီခီန့ၣ်အပူၤလီၤ. 24ယ့ၣ်ၡူးစံးဘၣ်အဝဲသ့ၣ်, “အအံၤမ့ၢ်ယသွံၣ်လၢအဘၣ်တၢ်ဂၢ်လီၤ အီၤလၢပှၤအါဂၤအဂီၢ်, သွံၣ်လၢအမၤဂၢၢ်မၤကျၢၤကစၢ်ယွၤအတၢ်အၢၣ်လီၤအီလီၤန့ၣ်လီၤ. 25ယစံးဘၣ်သုသပှၢ်ကတၢၢ်လီၤ. တချုးဒံးဘၣ်လၢယအီစပံးထံအသီလၢကစၢ်ယွၤအဘီမုၢ်အပူၤန့ၣ်, ယတအီလၢၤဘၣ်စပံးထံဖဲအံၤနီတဘျီလၢၤဘၣ်.”
26အန့ၣ်ဒီးအဝဲသ့ၣ်သးဝံၣ်ထါစံးပတြၢၤယွၤတယုၢ်ဝံၤဟးထီၣ် ဝဲဒီးလဲၤဝဲဆူကစၢၢ်သ့ၣ်စၤယံးအဒီခိၣ်န့ၣ်လီၤ.
ယ့ၣ်ၡူးကတိၤဆိပာ်ဝဲလၢစီၤပ့းတရူး ကသမၢအီၤ
(မး. ၂၆:၃၁-၃၅; လူၤ. ၂၂:၃၁-၃၄; ယိၤ. ၁၃:၃၆-၃၈)
27ယ့ၣ်ၡူးစံးဘၣ်အဝဲသ့ၣ်, “သုဝဲသ့ၣ်ကိးဂၤဒဲးသုသးကဟး ဂီၤကွံာ်လၢယပူၤ, အဂ့ၢ်ဒ်အံၤတၢ်ကွဲးအသးစံးဝဲ, ‘ယကမၤသံကွံာ်ပှၤကွၢ်သိ, ဒီးသိတဖၣ်ကလီၤပြံလီၤပြါကွံာ်ဝဲလီၤ.’ 28ဘၣ်ဆၣ်ဒီးလၢတၢ်ဒုးဂဲၤဆၢထၢၣ်က့ၤယၤလၢတၢ်သံဝံၤအလီၢ်ခံန့ၣ်, ယကလဲၤပာ်စၢၤဆူကီၢ်ကၤလံၤလါလၢသုမဲာ်ညါလီၤ.”
29စီၤပ့းတရူးစံးဘၣ်အီၤ, “ပှၤဂၤခဲလၢာ်မ့ၢ်သးဟးဂီၤကွံာ်လၢနပူၤ သနာ်က့, ယဲဒၣ်ယသးတဟးဂီၤနီတစုဘၣ်.”
30ယ့ၣ်ၡူးစံးဘၣ်စီၤပ့းတရူး, “ယစံးဘၣ်နၤသပှၢ်ကတၢၢ်, တနၤအံၤတချုးဆီဖါကီၢ်အိၣ်အိဒံးဘၣ်ခံဘျီန့ၣ်, နဲဒၣ်နကသမၢယၤသၢဘျီလၢနတသ့ၣ်ညါယၤဘၣ်န့ၣ်လီၤ.”
31စီၤပ့းတရူးစံးဆၢက့ၤအီၤဆူၣ်ဆူၣ်ကလဲာ်, “ယမ့ၢ်ဘၣ်တၢ်မၤသံဃုာ်ဒီးနၤဒၣ်လဲာ်န့ၣ်, ယတသမၢနၤနီတစုဘၣ်.”
ဒီးအပျဲၢ်အဘီၣ်အဂၤတဖၣ်စံးစ့ၢ်ကီးတၢ်တမံၤဃီဒ်သိးန့ၣ်ကိး ဂၤဒဲးလီၤ.
ယ့ၣ်ၡူးဃ့ထုကဖၣ်လၢက့ၤသစ့းမနၤ
(မး. ၂၆:၃၆-၄၆; လူၤ. ၂၂:၃၉-၄၆)
32အဝဲသ့ၣ်လဲၤတုၤတၢ်လီၢ်တကဝီၤလၢတၢ်ကိးအမံၤလၢက့ၤသစ့းမ နၤ, ဒီးယ့ၣ်ၡူးစံးဘၣ်အပျဲၢ်အဘီၣ်တဖၣ်, “ဆ့ၣ်နီၤသုဝဲဖဲအံၤ, ဖဲယဃ့ဘါထုကဖၣ်တၢ်အကတီၢ်န့ၣ်တက့ၢ်.” 33အဝဲဒၣ်ကိးန့ၢ်ဝဲစီၤပ့းတရူး, စီၤယၤကိာ်, ဒီးစီၤယိၤဟၣ်လၢအကလဲၤသကိးဒီးအီၤလီၤ. အကတီၢ်ဖဲန့ၣ်အသးဘၣ်တံာ်တာ်ဒီးတၢ်သူၣ်ကိၢ်သးဂီၤအိၣ်ဝဲလၢ အပူၤဒိၣ်ဒိၣ်မုၢ်မုၢ်, 34ဒီးစံးဘၣ်အဝဲသ့ၣ်, “တၢ်သူၣ်အုးသးအုးအဒိၣ်အမုၢ်အိၣ်ပှဲၤ ယသးပူၤ, တုၤဒၣ်လဲာ်ယကသံဘၣ်ယသးလီၤ. အိၣ်သုဝဲဖဲအံၤ, ဒီးဆိးသီတက့ၢ်.”
35အဝဲဒၣ်လဲၤဒံးဝဲဆူညါတစဲး, ထိၣ်လီၤပှီၤအသးလၢဟီၣ်ခိၣ် လိၤ, ဒီးဃ့ထုကဖၣ်ယွၤလၢမ့ၢ်သ့ဒီးအကတီၢ်နၣ်ရံၣ်လၢအဝဲ ကတူၢ်ဘၣ်တၢ်နးတၢ်ဖှီၣ်န့ၣ်ကလဲၤပူၤကွံာ်အီၤအဂီၢ်လီၤ. 36ဒီးအဝဲဒၣ်စံးဝဲ, “အးဘၤ, ပၢ်ဧၢ, နမၤတၢ်သ့ခဲလၢာ်လီၤ. တၢ်နးတၢ်ဖှီၣ်အလီခီအံၤဒုးလဲၤပူၤကွံာ်လၢယၤတက့ၢ်. သနာ်က့ဒီး, အသုတမ့ၢ်ဒ်တၢ်ဘၣ်ယသးအသိးတဂ့ၤ. မ်အမ့ၢ်ဒ်တၢ်ဘၣ်နသးအသိးတက့ၢ်.”
37အန့ၣ်ဝံၤ အဝဲဒၣ်က့ၤကဒါက့ၤဒီးထံၣ်ဘၣ်အပျဲၢ်အဘီၣ် သၢဂၤန့ၣ်မံဘၣ်အသးလီၤ. အဝဲဒၣ်သံကွၢ်စီၤပ့းတရူး, “စီၤၡံမိၣ်ဧၢ, နမံဘၣ်နသးလံဧါ. နကဆိးသီထဲတနၣ်ရံၣ်ဧိၤတကဲဘၣ်ဧါ.” 38ဒီးအဝဲဒၣ်စံးဘၣ်အဝဲသ့ၣ်တဖၣ်န့ၣ်, “ဆိးသီဒီးဃ့ထုကဖၣ်ယွၤဒ်သိးသုဝဲသ့ၣ်အံၤ သုတလီၤနုာ်ဘၣ်ဆူတၢ်လ့ပစီပူၤတဂ့ၤန့ၣ်တက့ၢ်. သုသးအဂံၢ်အဘါဆူၣ်ကစီဒီ, မ့မ့ၢ်သုနီၢ်ခိတခီအဂံၢ်အဘါစၢ်ဝဲလီၤ.”
39အဝဲဒၣ်လဲၤကဒီးဝဲတဘျီဒီးဃ့ထုကဖၣ်ယွၤလၢတၢ်ကတိၤတမံၤ ဃီဒ်လၢညါတဘျီအသိးန့ၣ်လီၤ. 40အန့ၣ်ဝံၤအဝဲဒၣ်ဟဲက့ၤကဒီးတဘျီဆူအပျဲၢ်အဘီၣ်တဖၣ်အအိၣ် ဒီးထံၣ်ဘၣ်ဝဲလၢအဝဲသ့ၣ်မံဘၣ်အသးလီၤ. အဝဲသ့ၣ်အမဲာ်ဖံးဃၢဒီးစီၣ်ထီၣ်အမဲာ်တန့ၢ်ဘၣ်ဒီး ကဘၣ်စံးဆၢအီၤလၢတၢ်ကတိၤမနုၤလဲၣ်န့ၣ်တသ့ၣ်ညါလၢၤ ဝဲဘၣ်.
41တုၤအဟဲက့ၤသၢဘျီတဘျီဒီး, အဝဲဒၣ်စံးဘၣ်အဝဲသ့ၣ်, “သုမံဘၣ်ဒံးသုသးဒီးအိၣ်ဘှံးအိၣ်သါဒံးဒၣ်အဖၢမုၢ်လီၤ ဧါ. ထဲန့ၣ်ဘၣ်လံ. တၢ်အကတီၢ်နၣ်ရံၣ်တုၤဃီၤဝဲလံ. ကွၢ်ကွၢ်ခဲအံၤပှၤကညီဖိခွါအံၤဘၣ်တၢ် ဟ့ၣ်လီၤအီၤဆူပှၤတၢ်ဒဲးဘးဖိတဖၣ်အစုပူၤလံ. 42ဂဲၤဆၢထၢၣ်, ဒီးမ်ပလဲၤသကိးတက့ၢ်. ကွၢ်တက့ၢ်. ပှၤလၢအဟ့ၣ်လီၤကွံာ်ယၤန့ၣ်ဟဲတုၤဝဲလံ.”
တၢ်ဖီၣ်ယ့ၣ်ၡူး
(မး. ၂၆:၄၇-၅၆; လူၤ. ၂၂:၄၇-၅၃; ယိၤ. ၁၈:၃-၁၂)
43ဖဲယ့ၣ်ၡူးကတိၤဒံးတၢ်အဖၢမုၢ်, စီၤယူဒၤလၢအမ့ၢ်အပျဲၢ်အဘီၣ်တဆံခံဂၤအကျါတဂၤန့ၣ်ဟဲတုၤဃီၤဝဲဒၣ်လီၤ. ပှၤဂီၢ်မုၢ်တဖၣ်ဟဲဃုာ်ဒီးအီၤ, စိာ်ဒီးနးဒီးနီၣ်တီၢ်တဖၣ်လီၤ. အဝဲသ့ၣ်တဖၣ်အံၤဘၣ်တၢ်မၢလီၤအီၤလၢပှၤလုၢ်တၢ်အခိၣ်အဒိၣ် တဖၣ်, ပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်, ဒီးပှၤယူဒၤဖိကရၢအခိၣ်အနၢ်တဖၣ်လီၤ. 44ပှၤလၢအဟ့ၣ်လီၤကွံာ်ယ့ၣ်ၡူးဆူဒုၣ်ဒါအစုပူၤတဂၤန့ၣ်, ဟ့ၣ်အဝဲသ့ၣ်တၢ်ပနီၣ်တမံၤဒီးစံး, “ပှၤလၢယနၢမူအီၤတဂၤန့ၣ်မ့ၢ်ပှၤလၢသုအဲၣ်ဒိးအီၤန့ၣ်လီၤ. ဖီၣ်အီၤ, ဒီးက့ၤမိၤအီၤတက့ၢ်.”
45တုၤစီၤယူဒၤဟဲတုၤဒီးလဲၤဝဲဆူယ့ၣ်ၡူးအအိၣ်တဘျီဃီဒီးစံးဝဲ, “သရၣ်ဧၢ,” ဒီးနၢမူအီၤလီၤ. 46အန့ၣ်ဒီး ပှၤသ့ၣ်တဖၣ်ဖီၣ်ယ့ၣ်ၡူးဒီးဟံးဃာ်အီၤန့ၣ်လီၤ. 47မ့မ့ၢ်ပှၤလၢအဆၢထၢၣ်အိၣ်လၢပှၤအကျါဖဲန့ၣ်တဂၤထုးထီၣ်အနး ဒီးကျီဝဲပှၤလုၢ်တၢ်အခိၣ်အဒိၣ်ကတၢၢ်တဂၤအကုၢ်, ဘၣ်ဖဲအနၢ်ဒီးထီၣ်တဲာ်ကွံာ်ဝဲန့ၣ်လီၤ. 48ဒီးယ့ၣ်ၡူးသံကွၢ်အဝဲသ့ၣ်, “သုဟဲစိာ်ဃုာ်ဒီးဃဲာ်ဒီးနီၣ် တီၢ်တဖၣ်လၢသုကဖီၣ်ယၤအဂီၢ်အံၤ, မ့ၢ်သုပာ်ယၤဒ်တမျာ်တဂၤအသိးဧါ. 49တနံၤဘၣ်တနံၤယအိၣ်ယဲလၢသုသိးသုကျါလၢတၢ်လုၢ်ဟံၣ်ပူၤဒီး သိၣ်လီၤသီလီၤတၢ်, ဒီးသုတဖီၣ်ယၤဘၣ်. ဘၣ်ဆၣ်ဒီးတၢ်ကွဲးအသးစီဆှံကဘၣ်လၢထီၣ်ပှဲၤထီၣ်ဝဲဒၣ်လီၤ.”
50အန့ၣ်ဒီးအပျဲၢ်အဘီၣ်ခဲလၢာ်ဟးသဒၣ်ကွံာ်အီၤဒီးဃ့ၢ်ပူၤဖျဲး ကွံာ်အသးန့ၣ်လီၤ.
51ပိာ်ခွါသးစၢ်တဂၤလူၤပိာ်ထွဲယ့ၣ်ၡူးအခံ, ဒီးမ့တမ့ၢ်ဘၣ်လၢအဘံထီၣ်အသးလၢတၢ်ကံးယာ်အဝါတခီဘၣ်ဒီး, တၢ်ကူတၢ်သိးအဂၤလၢအလိၤတအိၣ်နီတမံၤဘၣ်. ပှၤအိၣ်ဖဲန့ၣ်တနီၤဖီၣ်အီၤ, 52ဘၣ်ဆၣ်ဒီးအဝဲပာ်တ့ၢ်အတၢ်ကံးယာ်အဝါတခီန့ၣ်, ဒီးဃ့ၢ်ထီၣ်ကွံာ်ဘ့ၣ်ဆ့လီၤ.
ယ့ၣ်ၡူးဘၣ်တၢ်သမံသမိးအီၤ
(မး. ၂၆:၅၇-၆၈; လူၤ. ၂၂:၅၄-၅၅,၆၃-၇၁; ယိၤ. ၈:၁၃-၁၄,၁၉-၂၄)
53ဒီးအဝဲသ့ၣ်မိၤထီၣ်ယ့ၣ်ၡူးဆူပှၤလုၢ်တၢ်အခိၣ်အဒိၣ်ကတၢၢ်တဂၤ အအိၣ်ဒီးဖဲန့ၣ်, ပှၤလုၢ်တၢ်အခိၣ်အဒိၣ်တဖၣ်, ပှၤယူဒၤဖိကရၢအခိၣ်အနၢ်တဖၣ်, ဒီးပှၤသ့တၢ်ဘူၣ်တၢ်ဘါအတၢ်သိၣ်တၢ်သီတဖၣ်ဟဲပာ်ဖှိၣ်ထီၣ်အသး န့ၣ်လီၤ. 54စီၤပ့းတရူးလဲၤပိာ်ဝဲယ့ၣ်ၡူးအခံလၢအယံၤ, ဒီးလဲၤနုာ်ဝဲဆူတၢ်လီၢ်လီၤပျီတကဝီၤလၢပှၤလုၢ်တၢ်အခိၣ် အဒိၣ်ကတၢၢ်တဂၤအဟံၣ်အဂၢၤပူၤလီၤ. ဆ့ၣ်နီၤဝဲဖဲန့ၣ်ဒီးဆူးမ့ၣ်အူလၢပှၤပၢၤတၢ်ဖိတဖၣ်အသကိးလီၤ. 55ပှၤလုၢ်တၢ်အခိၣ်အဒိၣ်တဖၣ်ဒီးကီၣ်ကးဒီဖုညါန့ၣ်, ဃုထံၣ်န့ၢ်တၢ်အုၣ်အသးထီဒါယ့ၣ်ၡူးဒ်သိးစံၣ်ညီၣ်သံဝဲကသ့ အဂီၢ်လီၤ. ဘၣ်ဆၣ်တထံၣ်န့ၢ်ဝဲနီတမံၤဘၣ်. 56ပှၤအါဂၤအုၣ်အသးကဘျံးကဘျၣ်ထီဒါယ့ၣ်ၡူး, ဘၣ်ဆၣ်ဒီးအတၢ်အုၣ်အသးတဖၣ်တဂၤဒီးတဂၤတလီၤပလိာ်လိာ် အသးဘၣ်.
57ပှၤတနီၤဂဲၤဆၢထၢၣ်အုၣ်အသးကဘျံးကဘျၣ်ထီဒါယ့ၣ်ၡူးဒီးစံး ဝဲ, 58“ပနၢ်ဟူအဝဲဒၣ်စံးဝဲ, ‘ယကမၤလီၤပှီၢ်ကွံာ်တၢ်လုၢ်ဟံၣ်လၢအဘၣ်တၢ်ဘှီထီၣ်အီၤလၢပှၤ ကညီအစုတဖျၢၣ်အံၤ, ဒီးလၢသၢသီတသီန့ၣ်ယကဘှီထီၣ်အဂၤတဖျၢၣ်လၢအတဘၣ် တၢ်မၤအီၤလၢပှၤကညီအစုဘၣ်န့ၣ်လီၤ.’ ” 59ဘၣ်ဆၣ်ဒီးအဝဲသ့ၣ်တဖၣ်ဒၣ်လဲာ်, အတၢ်အုၣ်အသးလၢတၢ်ကတိၤတထံၣ်အံၤအဖီခိၣ်တဒ်သိးလိာ် အသးဘၣ်.
60ပှၤလုၢ်တၢ်အခိၣ်အဒိၣ်ကတၢၢ်တဂၤဂဲၤဆၢထၢၣ်လၢပှၤခဲလၢာ် အမဲာ်ညါဒီးသံကွၢ်ယ့ၣ်ၡူး, “နတစံးဆၢတၢ်နီတမံၤဘၣ်ဧါ. တၢ်လၢအဝဲသ့ၣ်အုၣ်အသးထီဒါနၤအံၤမ့ၢ်တၢ်မနုၤတမံၤလဲၣ်.”
61ဘၣ်ဆၣ်ဒီးယ့ၣ်ၡူးအိၣ်ဒၣ်ကစုဒု ဒီးတကတိၤဆၢတၢ်နီတဘီ ဘၣ်. ပှၤလုၢ်တၢ်အခိၣ်အဒိၣ်ကတၢၢ်တဂၤသံကွၢ်ကဒီးအီၤ, “နမ့ၢ်ခရံာ်, ကစၢ်ယွၤတၢ်ဘၣ်ဆိၣ်ဂ့ၤတဂၤအဖိခွါန့ၣ်ဧါ.”
62ယ့ၣ်ၡူးစံးဆၢက့ၤအီၤ, “ယမ့ၢ်အဝဲလီၤ. ဒီးသုကထံၣ်ဘၣ်ပှၤကညီဖိခွါအံၤအိၣ်ဆ့ၣ်နီၤလၢတၢ်သ့တၢ်လၢာ် တဂၤအစုထွဲဒီးသုကထံၣ်အဟဲဒိးဝဲမူခိၣ်အတၢ်အၢၣ်တဖၣ်လီၤ.”
63ပှၤလုၢ်တၢ် အခိၣ်အဒိၣ်ကတၢၢ်တဂၤန့ၣ်ဖှီယာ်ကွံာ်အကူအသိး တဖၣ်ဒီးစံးဝဲ, “ပတလိၣ်အါထီၣ်ပှၤလၢကအုၣ်အသးထီဒါအီၤနီတဂၤလၢၤဘၣ်. 64သုနၢ်ဟူဘၣ်တ့ၢ်အတၢ်ကတိၤတရီတပါယွၤန့ၣ်လံ. သုကစံၣ်ညီၣ်ဒ်လဲၣ်.”
အန့ၣ်ဒီးအဝဲသ့ၣ်ကိးဂၤဒဲးစံးဝဲလၢအတၢ်ကမၣ်အိၣ် ဒီးကြၢးလၢအဘၣ်တၢ်မၤသံအီၤလီၤ.
65ထဲန့ၣ်ဒီး, ပှၤတနီၤထူးပှဲာ်ယ့ၣ်ၡူးဒီးမၤဘၢအမဲာ်ဒီးထိအီၤလီၤ. ဒီးစံးဘၣ်အီၤ, “တယာ်ဒီးတဲတဘီ, မ့ၢ်မတၤထိနၤလဲၣ်.” ဒီးပှၤပၢၤတၢ်ဖိတဖၣ်ဒဲအီၤလီၤ.
စီၤပ့းတရူးသမၢယ့ၣ်ၡူး
(မး. ၂၆:၆၉-၇၅; လူၤ. ၂၂:၅၆-၆၂; ယိၤ. ၁၈:၁၅-၁၈,၂၅-၂၇)
66ဖဲစီၤပ့းတရူးအိၣ်ဒံးဒၣ်လၢတၢ်ဖီလာ်လၢတၢ်လီၢ်လီၤပျီတကဝီၤ အပူၤအကတီၢ်န့ၣ်, ပှၤလုၢ်တၢ်အခိၣ်အဒိၣ်ကတၢၢ်အခ့အပှၤပိာ်မုၣ်အကျါတဂၤဟဲဃီၤ ဝဲဖဲတၢ်ကပၤထံးန့ၣ်လီၤ. 67တုၤအထံၣ်စီၤပ့းတရူးဆူးမ့ၣ်အူန့ၣ်ဒီး, ကွၢ်ထံကွၢ်ဆးအီၤဒီးစံးဝဲ, “နဲစ့ၢ်ကီး, နမ့ၢ်တ့ၢ်ပှၤအိၣ်တပူၤဃီဒီးပှၤနစၤရ့းဖိယ့ၣ်ၡူးန့ၣ်လီၤ.”
68ဘၣ်ဆၣ်ဒီးအဝဲဒၣ်သမၢတၢ်ဒီးစံးဝဲ, “တၢ်လၢနစံးန့ၣ်ယတသ့ၣ်ညါဒီးယတနၢ်ပၢၢ်ဘၣ်.” ဒီးစီၤပ့းတရူးဟးထီၣ်ကွံာ်လၢတၢ်လီၢ်လီၤပျီတကဝီၤန့ၣ် အပူၤဒီးလဲၤနုာ်ဝဲလၢကျဲတဘိလၢပှၤကဟးထီၣ်ဆူတၢ်ချၢ အဂီၢ်လီၤ. အကတီၢ်ဖဲန့ၣ်ဆီဖါတဘ့ၣ်အိၣ်အိထီၣ်ဝဲဒၣ်လီၤ.
69တၢ်ခ့တၢ်ပှၤပိာ်မုၣ်န့ၣ်ထံၣ်အီၤဖဲန့ၣ်ဒီးကတိၤထီၣ်ကဒီးတၢ် ဒီးစံးဘၣ်ပှၤဆၢထၢၣ်ဖဲတၢ်ကပၤတဖၣ်, “ပှၤအံၤမ့ၢ်ပှၤတဂၤလၢပှၤတဖၣ်န့ၣ်အကျါလီၤ.” 70ဘၣ်ဆၣ်ဒီးစီၤပ့းတရူးသမၢကဒီးဝဲလီၤ.
လၢခံတစဲးဖိကဒီးန့ၣ် ပှၤအိၣ်ဆၢထၢၣ်ဖဲတၢ်ကပၤတဖၣ်စံးဘၣ် စီၤပ့းတရူး, “နမ့ၢ်ပှၤတဂၤလၢပှၤတဖၣ်န့ၣ်အကျါအနီၢ်ကီၢ်လီၤ. ဘၣ်မနုၤလဲၣ်န့ၣ်, နမ့ၢ်နဲပှၤကီၢ်ကၤလံၤလါဖိလီၤ.”
71အန့ၣ်ဒီးစီၤပ့းတရူးဆိၣ်အၢလီၤအသးဒီးဆိၣ်လီၤစ့ၢ်ကီးအ သးဒီးစံးဝဲ, “ပှၤတဂၤလၢသုယၢၤထီၣ်အဂ့ၢ်ခဲအံၤန့ၣ်ယတသ့ၣ်ညါအီၤ လ့ၤတက့ၤဘၣ်.”
72တကီၢ်ခါဖဲန့ၣ်ဆီဖါကီၢ်အိၣ်အိထီၣ်ခံဘျီတဘျီ, ဒီးစီၤပ့းတရူးသ့ၣ်နီၣ်ထီၣ်က့ၤဝဲလၢယ့ၣ်ၡူးစံးဘၣ်တ့ၢ် အီၤ, “တချုးဆီဖါကီၢ်အိၣ်အိဒံးဘၣ်ခံဘျီန့ၣ်, နကသမၢယၤသၢဘျီန့ၣ်လီၤ.” ဒီးအသးဘၣ်ဒိဘၣ်ထံးဒီးဟီၣ်ဝဲလၢာ်သးလီၤ.
Currently Selected:
လံာ်မၢ်ကူး 14: KSWC
Highlight
Share
Copy
Want to have your highlights saved across all your devices? Sign up or sign in
Sgaw Karen Common Bible © Bible Society of Myanmar, 1992.
