SAWLTAHTE 2
2
Hlagau Siengtho ang Peina
1Pentecost ni a tun ciengin mun khatah amate a unpi-un a omton uhi. 2Tuale vantung panin thakhatin huipi lang tawh kibang aw khat ging a, a tona uh innsung teng zosie a dim hi.#Siem 23:15-21; Thkna 16:9-11 3Amate lahah meikuong kikhenkeh tawh a kibang leiite kilangin a tung ciet vuah a tu hi. 4Amate a unpi-un Hlagau Siengtho tawh a kidim vua, tua Hlagau in a pieh siemna bangin kam tuomtuomte tawh a ham uhi.
5Khum laitahin vansin nei-a om gam zosie panin Jerusalem ah Pasien a um Jew mite a teng uhi. 6Khumi awging ziehin mihonpi a kikhawm vua, thu kigente amau’ pienpi ham cietin a zah ziehun lamdang a sa uhi. 7Amate in tam thu lamdang sa-in a lung uh mang a, “Tu-a thugen zosie Galilee mi ahi sih uh amah? 8Bangci dan a i pienpi ham ciet tawh i zah thei uh ahei? 9Parthia gam, Media gam, Elam gam, Mesopotamia gama tengte, Judea gam, Cappadocia gam, Pontus gam le Asia gam, 10Phrygia gam, Pamphylia gam, Egypt gam le Cyrene khuopi-a’ ahi Libya gamkhen sunga tengte le Rome pana a haw mite, Jew mite, le Judah biehna a zuite, 11Crete mite le Arab mite ahi, Pasien’ nasep lienpite i pienpi ham cietin i za uhi,” a ci uhi. 12Mi zosie in lamdang sa-in a lungmang vua, “Tami bang a cinopna hi poma ding ahei?” ci-in khatlekhat a kiho uhi. 13Ahi vangin pawlkhat in, “Lenggazu tha kham ahi uhi,” ci-in a ehneh ho uhi.
Peter in Mihonpi Thuhil
14Ahi vangin sawm le khatte tawh Peter dingto a, a aw sangsahin amate kungah, “Jew mite le Jerusalem khuo-a tengte aw, tami thu thei unlen ka thugen na ngai un. 15Na upmaw bangun zukham ahi sih uhi, bang ding ahei cile tuhun pen zingmawng nai kuo ahi na bo hi. 16Hi vawt lo hi, tam pen kamsangpa Joel tungtawnin tam bangin na kigen hi:
17‘Pasien in a genna ah ni tawp ni ciengin
mi zosie tungah ka Hlagau ka buo ding a,
na tapate ule na tanute un kamsangin, na tangvalte un mang mu ding a,
na puvuoite un zong mang a man ding uhi.
18Hi hi, khum ni ciengin ka sila pasalte le
ka sila numeite tungah ka Hlagau ka buo ding a,
amate in kam a sang ding uhi.
19Tunglam vanah a lamdangte ka lah ding a,
neilam leitungah limte, sisan, meikuong le
meikhu sapite ka lah ding hi.
20A lien a thupi Topa’ ni a tun masangin
ni ang miel ding a, hlapi sisan ang bang ding hi.
21Tua ciengin Topa’ min tawh
thu ngen zosie in hutdamna a nga ding uhi,’ a ci hi.#Joel 2:28-32
22“No, Israel-te aw, ka thugen ngai un: Note in na theisa ma bangun Nazareth mi Jesu pen Pasien in note lahah ama tungtawna a bawl vanglietna le na lamdangte, le limte tawh Pasien in a kipsah mi ahi hi. 23Pasien in ama’ ngimna le a theikholna bangin note khut sungah tam pa ang piekhie a, note in singlamte tungah khai-in migilote’ khut tawh ama na that uhi.#Mat 27:35; Mrk 15:24; Luk 23:33; Jhn 19:18 24Ahi vangin sina in ama tukip zo lo ahi ziehin Pasien in sina panin suohtasahin a thosah hi.#Mat 28:5-6; Mrk 16:6; Luk 24:5 25Bangzieh ahei cile ama tawh kisai David in a genna-ah,
‘Ka masangah Topa a op den lam ka mu hi,
azieh pen ei kilawthing thei lo na dingin
ka zietlamah ama a om hi;
26tua ahi ziehin ka lungsim kipahin
ka leii zong a lungdam hi;
tua banah ka tahsa zong
lametna sungah a hing ding hi.
27Azieh pen nang in Misikhuo ah
ka hla na nuasie sih ding a,
na Mi Siengtho pa zong
muotna nei thuohsah sih ding hi.
28Nangma in hinna lampi nei lah zo hi; nei ompina tawh
kipahna bukim nei bawlpieh ding hi,’ a ci hi.#Late 16:8-11
29“Sanggam Israel-te aw, pupi David’ si-in kivui zo a, tuni dongin a han zong eite tawh om hi, ci kimuongtahin na kung vuah kang gen thei hi. 30Ama kamsang khat ahi a, Pasien in a kumpi topha tungah a suonlehlahte khat ka tosah ding hi, ci-in a kiciem lam ama in a thei hi.#Late 16:8-11 31Tam thu a mukhol ziehin David in Messiah’#2:31 Ahi sihle “Khris” thawkiana thu a genna-ah,
‘Misikhuo ah ama kinuasie loin,
a pumpi zong muot lo ding hi, a ci hi.
32Pasien in tua Jesu thosah zo a, tami thu-ah kote zosie teci ka hi uhi. 33Tua ahi ziehin Pasien’ zietlamah ama kilamsang zo a, note in Pa tung panin a kikamciemsa Hlagau Siengtho zong na sang zo ta vua, note in na mu uleh na zah uh ahi tami zong khu ama in ang buohsuh zo ta hi. 34Bangzieh ahei cile vantungah David a kato sih a, ahi vangin ama in,
“Topa in ka Topa kungah,
35na keng ngahna munah
na galte ka koi masangsie
ka zietlamah to in,’ ci hi,” ci-in a gen hi.#Late 110:1
36Tua ahi ziehin note in na khailia uh tua Jesu, Pasien in Topa le Messiah#2:36 Ahi sihle “Khris” a suohsah zo ta hi, ci thu Israel innkuon buppi in teltahin thei ta uheh,” a ci hi.
A Kikhel Masa Pente
37Amate in tam thu a zah ciengun a lungsim uh sukha a, Peter le adang sawltahpite kungah, “Sanggamte aw, bang ka bawl ding vuoi?” a ci uhi. 38Peter in amate kungah, “Kisiakia unlen na mawnate uh a mai thei nadingin Jesu Khris’ min tawh ki-baptize un; tua hile note in Pasien’ letsong ahi Hlagau Siengtho na nga ding uhi. 39Bangzieh ahei cile tua kamciem pen note, na suonlehlahte ule Topa i Pasien in ama kunga a hlat gamlapi-a om mi zosie ading ahi hi,” a ci hi. 40Tuale Peter in adang thu kiselna tampi tawh teci pangin, “Tami a gilo khang mite panin kihunkhie un,” ci-in amate a hanthawn hi. 41Tuaci’n a thugenna a um mite a kibaptize vua, khum ni-in mi tul thum bang kibelap hi. 42Amate in sawltahpite’ thuhilna le kipawltonna ah a lunglut ciet vua, tuale khomun phalsuona le thungetna a neiton uhi.
Thu um Mite Lahah Hindan
43Tuaci’n mi zosie a zausi vua, sawltahpite in na lamdangte le lim tampi a bawl uhi. 44Thu um zosie omtonin na vannuoi a neiton uhi;#Sawl 4:32-35 45amate in amau’ neisate le vante zua-in mi khatpo’ kisapna zui-in tua sumte#2:45 Gk “tuate” a hawmpieh uhi. 46Amate in biehinnpi sungah nisimin hun tampitah zangtonin, inn ah#2:46 Ahi sihle “inn khat zaw inn khat” khomun a phalsuo vua, kipahna le kiphalna lungsim#2:46 ahi sihle “lungsim tah tawh” tawh an a ne uhi. 47Amate in Pasien’ min phatin mite’ maipha zong a nga uhi. Pasien in nisimin gupna nga mi a kibelapsah hi.
Currently Selected:
SAWLTAHTE 2: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
