SAWLTAHTE 3
3
Peter in Khutdawngen Khelbai Khat Damsah
1Ni khat, nitah lam nai thum thunget hunin biehinnpi ah Peter le John-te a peito uhi. 2Tuale a pienpi khelbai khat na kipuo hi. Tua pa in biehinn kai mite tung panin sum a nget thei nadingin mite in Kotpi Hoi kici biehinn tunkot gei-ah nisielin ama a koi uhi. 3Biehinnpi sungah Peter le John a lut kuonun tua pa in mu a, ama gel kungah sum a ngen hi. 4John ma bangin Peter in zong tua pa encien a, “Ko gel ei en vawi” a ci uhi. 5Tua pa in zong bang khat nga ding ci kinepna tawh ama gel a lim-et mama hi. 6Ahi vangin Peter in, “Ngun le kham ka nei poma sih hi, hizongle ka nei pen kang pie hi; Nazareth mi Jesu Khris’ min tawh ding inlen lam pei in,” a ci hi. 7Ama in tua pa a zietlam khut tawh manin a kaito leh thakhatin a keng le a sietmitte a khaupai lien hi. 8Ama kitomin dingto a, lam pei pai-in amate tawh biehinnpi sungah lut a, a lam pei kawmin dieng vazawhin Pasien min’ a phat hi. 9Mi zosie in ama lam pei-in Pasien a phat a mu vua, 10tuale ama pen biehinnpi’ Kotpi Hoi gei-ah to-in sum ngenngen pa ahi lam amate in a thei uhi; tuale ama tunga a pieng thute ziehin amate in lamdang sa-in a lungmang uhi.
Solomon Talap-ah Peter in Thugen
11Tua mipa in Peter le John a tuhdet laitahin mi zosie in lamdang a sa vua, amau’ opna Solomon Talap a kici innhlim lamah tai-in a kikhawm uhi. 12Peter in a mu ciengin mipite kungah, “No Israel-te aw, tam mipa lam ka peisah theina uh pen ka vang ule ka hoina uh zieh sa-in bang dingin ei cien-et na hi uh ahei? 13I pupite ahi Abraham, Isaac, le Jacob-te’ Pasien in a nasempa#3:13 Ahi sihle “a tapa” Jesu a minthangsah zo hi. Tua pa pen Pilat in hla dingin a khensat vangin note in ama na niel vua, Pilat mai-ah tha dingin na pie ta uhi.#Pei 3:15 14Note in a Siengtho le Midih Pa na niel vua, mithat pa khat a hla nadingin na ngen zawsop uhi.#Mat 27:15-23; Mrk 15:6-14; Luk 23:13-23; Jhn 19:12-15 15Note in Hinna a piengsah pa na that vua, hizongle Pasien in misite lah panin ama a thosah hi. Tam thu-ah kote teci ka hi uhi. 16Ama’ min upna hang tawh tua ama’ min mama in na mu ule na thei uh ahi tua pa a thakhausah zo hi. Jesu#3:16 Gk “ama” tung pana kinga upna in note zosie mai-ah dam siengthona ama a pie zo hi.
17“Tu-in lawmte#3:17 Gk “sanggamte” aw, na makaite un a na bawl bangin note in zong na thei lo ziehun na bawlkhah lam uh ka thei hi. 18Ama’ Messiah#3:18 Ahi sihle “Khris” in gimna thuoh ding hi, ci-in kamsangte zosie tung panin a na magensa thute Pasien in tam bangin a tangtungsah zo hi. 19Tua ahi ziehin na mawnate uh a kiphietmai thei nadingin kisiakia-in Pasien lamah kihei un. 20Tuaci’n Topa kung panin tha tha ngana hun ang tung ding a, ama in note dinga a kisekholsa Messiah#3:20 Ahi sihle “Khris” ahi Jesu ang sawl ding hi. 21Pasien in a kamsang mi siengthote tungtawnin a tangko bangin na zosie a kibawlthakia hun masangsie vantungah Jesu a op kul ding hi. 22Moses in, ‘Topa na Pasien un na mite#3:22 Gk “sanggamte” panin note adingin keima tawh kibang kamsang khat ang piengsah ding hi. Ama in na kung vua ang gen popo note in na man ding uh ahi hi.#Thkna 18:15, 18 23Tua kamsangpa’ thugen a mang lo poma a mite lah panin kiphungkal ding hi,’ a ci hi.#Thkna 18:19 24Samuel a kipanin a nua-a ang pieng kamsang zosie in zong tuhun thupiengte a na genkhol tabo uhi. 25Note pen kamsangte le Pasien in na pu na pate uh tunga a na pieh thuciemna’ suonlehlahte na hi vua, tuaci’n ama in Abraham kungah, ‘Na suon na hlahte sungah leitung innkuon zosie thupha kipie ding hi,’ a ci hi.#Pien 22:18 26Pasien in a sila pa#3:26 Ahi sihle “a tapa” a thawsah ciengin na gitlona zosie panun kihei-in thupha ang pieh thei nadingin na kung vuah ama ang sawl masah ahi hi,” ci-in a gen hi.
Currently Selected:
SAWLTAHTE 3: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
