PIENCILNA 19
19
Sodom’ Sietna
1Nitah lamin Sodom ah vantungmi ni tung a, Sodom khuo kulkotpi ah Lot na to hi. Lot in tua gel a galmu bepin a dawn dingin ding a, a mai tuolah kunin, 2“Ka pute aw, hing thum ing. Na nasempa’ inn lamah hing kihei-in hing gieh ta unlen, na keng uzong sil un; tua ciengin zingmawng tungin thobai-in na maban uh na zom na ding uhi,” a ci hi. Ama gel in, “Hilo hi; ko pen khuolai tuol-awnga gieh ding ka hibo uhi,” a ci uhi. 3Ahi vangin ama in nahpi-in ama gel a hlo hi; tuaci’n ama kungah ama gel kihei-in a inn sungah a lut uhi; tuale ama gel adingin pawi khat a bawlpieh a, tol saw lo anlum emin a ne uhi. 4Ahi vangin a lup masangun tua khuosung mite, Sodom khuomite, a teh a khangin mi zosie in tua inn a imtawm uhi; 5amate in Lot a hlan vua, “Tuzan na kunga zin hing tungte hei-ah a om ta uh ahei? Amate ka luppi thei nadingun ka kung vuah hing peipi in,” a ci uhi. 6Lot zong kotkhah panin tua mite kungah pei-in a kot lekha a, 7“Ka sanggamte aw, hing thum ing. Tam bangin gitlo gamtat sih un. 8En un, pasal tawh lumton nai lo ta ngahnu ni ka nei hi; note kungah tua gel hing puoh vangin na nop bangbangun ama gel tungah kigamtat ta un; tam mite bangma law sih beh un, azieh pen ka innhlim bel a ang lut ahi bo uhi,” a ci hi. 9Ahi vangin amate in a dawngkia vua, “Nuakin vawi!” a ci uhi. Tuale amate in, “Tam mipa ta sungah pemta khat a ang tung hi lel bo a, thukhen dan a ang kinei viel amah! Tu-in amate sangin nang kang khelbawl zaw ding uhi,” a ci uhi. Tua ciengin Lot a phul tentun vua, kotkhah phukeh dingin a nai tehteh uhi. 10Ahi vangin inn sunga mite in a khut uh zahin inn sungah Lot kaiphitin amate tawh kot a kikhalu uhi. 11Tuale inn kotkhah-a om pasalte, a gol a neu-in kotkhah a mu lo nadingun amate in a mit uh a tawsah hi.#2Kum 6:18
Sodom le Gomorrah Kisusie
(Mat 11:23-24; Luk 17:28-32)
12Tua zaw ciengin mite in Lot kungah, “Tam sungah adang koi a om lai ei? Mahte, tapate, tanute ahi sihle tam khuopi sungah mi khatpo na nei leh tam panin pusuopi in. 13Bangzieh ahei cile Topa mai-ah a mite kimawsahna awging lien luo mama a, a susie dingin Topa in kote ei sawl zo ahi ziehin tam mun a susie ding ka hi ta uhi,” a ci uhi. 14Tuaci’n Lot pei-in a tanute a kinunpi ding amah dingte kungah, “Ding unlen, tam mun panin peidawh ta un; azieh pen Topa in tam khuopi a suhsiet ding ahi ta hi,” a ci hi. Hinanle amahte adingin ama pen a ciemmui tawh a kibang lel hi.
15Zingmawng phalvah ciengin vantung mite in, “Tho inlen, tam sunga a om na zi le na tanu nite la in. Tua ahi sihle khuopi danpiehna sungah no zong na sigam ding uhi,” ci-in Lot kungah genin a pausawl uhi. 16Ahi vangin ama a onton lai hi; tuaci’n Topa in ama a hepi ziehin vantung mite in ama, a zi le a tanu nite a bantang ah kai-in a pusuopi vua, khuopi pulamah a nuasie uhi.#2Pet 2:7 17Amate in#19:17 Gk Syr Vg: Heb “ama” pulam a tut zaw ciengun, “Na hinna uh taipi un; kinua hei sih unlen, zanglei mun khatpo ah zong khawl vawt loin muol tungah kitai pai un, ahi sihle na sigam sieng ding uhi,” a ci hi. 18Lot in amate kungah, “Hilo hi, ka pute aw; 19en un, na mitmu-un na nasempa in maipha ka nga zo a, ka hinna nei hutdam nadingun kei tungah migitna lienpi nei lah zo ta uhi; ahi vangin muol tungah ka taizo sih a, gimna in ei nua phahin si ding ka zau hi. 20En un, tai nading khopin khum khuopi a nai a, khuopi neu khat ahi hi. Khum tahah ei taisah un; khuopi neu khat hi lel lo amah? Tua hile suohta bep vang!” a ci hi. 21Ama in tua pa kungah, “Hoi mama hi, tam maipha zong nang kang pie a, na khuopi gen pen ka lumlet sih ding hi. 22Kinaw inlen khum munah tai in. Azieh pen khumtah na tun masangsie ken bangma ka bawl thei sih hi,” a ci hi. Tua ahi ziehin khum khuopi pen Zoar#19:22 “Themkhat” a cina ahi hi. kici hi. 23Zoar-ah Lot a tun ciengin leitungah ni suoh zo hi.
24Tua ciengin van panin Topa in Sodom le Gomorrah khuopite tungah kaat le meikuong a zusah hi; 25ama in khuopite, zanglei zosie, khuopi sunga a teng mi zosie le leitunga po bangkim a lumlet hi.#Mat 10:15; 11:23-24; Luk 10:12; 17:29; 2Pet 2:6; Jude 7 26Ahi vangin a nua-a om Lot’ zi a kinua hei le cikhuom a suoh hi.#Luk 17:32
27 Topa mai a dinnasa munah zingmawng tungin Abraham a pei hi; 28ama in Sodom, Gomorrah le zanglei muncin teng a ensuh leh meikhuh pana a khu bangin leitang pan meikhu kitung valuh pi a mu hi.
29Pasien in zanglei tunga om khuopite a suhsiet ciengin Abraham a phawh a, Lot’ tenna khuopite a lumlet ciengin tua a lumletna panin Lot a peikhiesah hi.
A Zumhuoi Moab le Ammon Pienna Zungpi
30Zoar ah a ten ngam lo ziehin Zoar panin Lot peito-in a tanu nite tawh muol tungah a teng hi, azieh pen Zoar ah ama teng ngam lo hi; tuaci’n suonghawm sung khatah a tanu nite tawh a teng uhi. 31A tanu tapen in a naunu kungah, “I pa lah vuoi ta a, tuale leitung ngaina banga i kiluppi ding pasal khat zong leitungah a om sih hi. 32Hing pei in, i pa lenggazu tekham vai, i pa tungtawnin suonlehlah i kepcing thei nadingin ama tawh lumton vai,” a ci hi. 33Tuaci’n ama gel in khum zanin a pa uh lenggazu a tekham uhi; tuale a unu pei-in a pa tawh a lumton hi. A pa in a tanu a lup lam le a thawkia lam a thei sih hi. 34A zing ni-in a unu in a naunu kungah, “En in, zani zanin i pa tawh ka lumton hi; tu zanin zong ama zu tekham vai. Tua ciengin i pa tungtawnin suonlehlahte i kepcing nadingin va pei inlen, ama tawh va lumton ta’n,” a ci hi. 35Tuaci’n khum zanin zong a pa uh zu a tekham uhi; tuale a naunu pei-in ama tawh a lumton hi; a pa in a tanu a lup lam le a thawkia lam a thei sih hi. 36Tua bang danin a tanu tegel a nipi-un a pa utawh a kigai uhi. 37A unu in tapa khat nei a, a min Moab phuo hi; ama pen tuhun Moab-te’ pienna pa ahi hi. 38A nau in zong tapa khat nei a, a min Benammi ahisah hi; ama pen tuhun Ammon-te’ pienna pa ahi hi.
Currently Selected:
PIENCILNA 19: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
