PIENCILNA 20
20
Gerar ah Abraham le Sarah
1Khum tah panin Negeb gam lamah Abraham khuol a zin a, Kadesh le Shur kikal Gerar ah a teng hi. Gerar ah pemta bangin a ten laitahin, 2Abraham in a zi Sarah pen, “Ka sanggamnu hi,” a ci le Gerar’ Kumpipa Abimelech in zong mi sawlin Sarah a lasah hi.#Pien 12:13; 26:7 3Ahi vangin zan khat Abimelech’ mangah Pasien pei-in a kungah, “Zi dinga na lah numei ziehin a si ding na hi hi; azieh pen ama pasal neisa ahi bo hi,” a ci hi. 4Tua hunin Abimelech in tua nu kung neh nai lo hi; tuaci’n ama in, “Topa, mawpeng minam khat a susie ding na hi amah? 5Amama in keima kungah, ‘Ama ka sanggamnu hi,’ ei ci hi lo amah? Tuale amama in zong, “Ama ka sanggampa hi,” ei ci hi. Tua ahi ziehin lungsim siengtho le khut siengtho tawh tam banga gamta ka hi bo hi,” a ci hi. 6Tua ciengin a mang sungah Pasien in, “A hi hi, lungsim siengtho tawh na bawl ahi lam ka thei hi; tua banah kei tungah nang maw lo nadinga nang ang kempa khu keima ka hi hi. Tua zieha ama kang khoisah lo ahi hi. 7Tua ahi ciengin tu-in tua mipa’ zi piekia in; azieh pen ama kamsang khat hi a, ama in nang thu ang ngetpieh ding a, tuaci’n nang na hing ding hi. Ahi vangin ama na piehkia sih leh nangma le na mite na unpi-un pel loin na si ding lam uh thei in,” a ci hi.
8Tuaci’n zingmawngin Abimelech a tho bai a, ama in a nasemte zosie hlanin tam thu teng a unpi-in a kung vuah a gen hi; tuale mite a zau mama uhi. 9Tua ciengin Abimelech in Abraham hlanin ama kungah, “Ko tungah bang hing bawl na hiei? Kei tung le ka kumpi gam tungah tam bang khielna lienpi nang tunsah nadingin nang tungah ken bangza-in mawna bawl ka hei? Keima tungah nang bawl dinga a kilawm lo nate nang bawlzo hi,” a ci hi. 10Abimelech in Abraham kungah, “Bang ngaisun a, tam na bawl ahiei?” a ci hi. 11Abraham in, “Tam munah Pasien zatahna a om vawt sih ding a, ka zinu ziehin ei that ding uhi, ci-a ka ngaisut zieha tam ka bawl ahi hi. 12Tua banah ama ka sanggamnu tahtah ahi a, ka pa’ tanu hi-in, ahi vangin ka nu’ tanu ahi sih hi; tuale ama keima’ zi ang suoh hi. 13Pasien in ka pa’ inn panin ei pusuohsah ciengin keima in ama kungah, ‘Ka tunga nang bawl lo a phamaw na migitna tam ahi hi: I peina mun zosie-ah ama ka sanggampa ahi hi, ei ci’n,’ ka ci hi,” ci hi. 14Tua ciengin Abimelech in tuu le bawngtangte, sila numei le sila pasalte la-in Abraham a pie a, ama kungah a zi Sarah zong a piekia hi. 15Abimelech in, “Na mai-ah ka leitang a om hi; na nopna mun popo-ah teng in,” a ci hi. 16Ama in Sarah kungah, “En in, na sanggampa ngun tang tulkhat ka pie zo hi; tami khu na oppi mi zosie mai-ah na maw nei lo lam kipulahna ahi hi; na maw lo lam kilang kilkel hi,” a ci hi. 17Tua ciengin Abraham in Pasien kungah thu ngen hi; tuale Pasien in Abimelech damsah a, ama gel in ta a nei thei nadingin a zi le a sila numeite zong a damsah hi. 18Bangzieh ahei cile Topa in Abraham’ zi Sarah ziehin Abimelech innkuon’ naubute zosie a khacip pieh hi.
Currently Selected:
PIENCILNA 20: ZBOTF01
Highlight
Share
Copy
Want to have your highlights saved across all your devices? Sign up or sign in
Zo Bible © Bible Society of Myanmar, 2018.
