LUKE 11

Topa’ Thungetna

(Mat 6:5-15; 7:7-12)

1Khatvei ama in mun khatah thungen a, a man ciengin a nuazuite lahah khat in, “Topa, John in a nuazuite thunget dan ding a hil bangin ko zong ei hil in,” a ci hi. 2Ama in amate kungah, “Thu na nget ciengun tam bangin na ngen un:

Pa aw,#11:2 Adang tang laibute ah “Vantunga om kote Pa aw” ci-in kigiel hi. na min siengtho kizatat taheh.

Na gam hing tung taheh.#11:2 Tang laibu tawmkhatte ah “Kote tungah na Hlagau Siengtho hing kumin ei siengsah taheh” ci-in kigiel hi; Adang tang laibute ah “Vantunga na deina a kicin bangin tam leitungah zong kicing taheh” ci-in kibelap hi.

3Nisim ka neh ding uh an#11:3 Ahi sihle “zing cienga ka neh ding uh an” ei pie in.

4Ko tunga ang mawte ka maisah bangun ka mawnate uh ei maisah in.

Solna ei thuohsah sin,” a ci hi.#11:4 Ahi sihle “ ze-etna ei thuohsah sin”

Thungetna ah Thuohzawhna

5Ama in amate kungh, “Note lahah khat in lawm khat nei-in zankim laitahin ama kungah pei-in, ‘Lawm aw, anlum thum ei leitawi in; 6azieh pen ka lawmpa khat a khuolzinna panin ang tung a, a mai-a lui ding bangma ka nei sih hi,’ a ci hi. 7Tuaci’n inn sung panin ama in, “Ei buoisah sin; kot ka khah zo ta vua, ka tate tawh ka lum zo ta uhi; kei hing tho-in bangma kang pie thei sih hi,” a ci hi. 8Ke’n kang ci-in, tuapa a lawmpa ahi ziehin ama tho-in bangma khat nangawn a pieh lo vangin a nget paupau ziehin ama tho-in a kisap teng pie veve ding hi.

9“Tuaci’n ke’n kang ci-in, ngen un, ang kipie ding hi; sui un, na mu ding uhi; kiu un, kot ang kihon ding hi. 10Bangzieh ahei cile a ngen tapo in nga a, a sui tapo in mu-in, a kiu tapo kot kihon ding hi. 11Note lahah na tapa un nga ngen#11:11 Adang tang laibute ah “moh tangin suong na pie ding uh amah; ahi sihle na tapate un hing ngen leh” ci-in kigiel hi. leh tuami tangin gul a pie ding koi om na hi uh ahei? 12Ahi sihle na tapa un aatui ngen leh mom-ai na pie ding uh amah? 13Tua ahile no migilote in na tate uh na hoi pieh dan ding thei na hi uleh tua sangin vanah a om na Pa un ama kunga a ngen mite tungah Hlagau Siengtho#11:13 Adang tang laibute ah “Pa in vantung panin Hlagau Siengtho a pie hi” ci-in kigiel hi. a pie zaw kan sih ding amah!” a ci hi.

Jesu le Beelzebul

(Mat 12:22-32; Mrk 3:19-30)

14Khatvei Jesu in a ham thei lo dawi khat a deldawh hi; tua dawi a pusuo ciengin a ham thei lo mipa ham thei pai a, mihonpi in lamdang a sa mama uhi. 15Ahi vangin amate lahah mi pawlkhat in, “Dawite’ mangpa Beelzebul’ min tawh dawite a deldawh hi bo,” a ci uhi.#Mat 9:34; 10:25 16Pawlkhatte leuleu in a ze-etna-un vantung panin lim khat a ngen uhi.#Mat 12:38; 16:1; Mrk 8:11 17Ahi vangin Jesu in a ngaisutna uh thei a, amate kungh, “Ama le ama kido a, a kikhenkeh gam khat popo mangthai ding a, innkuon khat zong a sunga om mite a kikhenkeh leh a pua ding hi. 18Satan zong ama le ama kido-in kikhenkeh leh a gam bangci kip thei ding ahei? Bang ding ahei cile note in Beelzebul suonga dawite a deldawh hi bo nei ci uhi. 19Beelzebul suonga dawite deldawh ka hi leh dawi hawlkhie theite#11:19 Gk “Na tate” in koi’ min suonga a deldawh uh ahei? Tua ahi ziehin amate pen na tung vua thukhente ahi ding uhi. 20Hizongle dawite ka hawlkhietna pen Pasien’ khutme hang tawh ahile note tungah Pasien’ manggam ang tung zo ahi ta hi. 21Mi thahat khat in galhiem bukim tawh a inn a cin ciengin a neisate bihtahin a om hi. 22Ahi vangin ama sanga a thahatzaw mi khat in ama bulu-in a zawgawp ciengin ama’ muon a galhiemte lahpiehin a vanlah teng a hawmthang hi. 23Kei ei panpi lo poma kei ei do hi a, kei ei khoppi lo poma a thethang ahi hi.#Mrk 9:40

Hlabua a Lutkiana

(Mat 12:43-45)

24“Mi khat sung panin hlabua a pusuo zaw ciengin, khawl nading mun sui dingin tui op lona gamte-ah vah kawikawi a, a mu zawh lo ciengin ama in, ‘Ka peikhietna inn ma-ah kilekia vang,’ a ci hi. 25Ama a tun ciengin tua inn na kiphiet siengin a kipuo sinsenin a op a mu hi. 26Tua ciengin ama pei-in ama sanga a gilozaw hlagau dang sagi zawpi a, tua inn ah lutin a teng uhi; tua mipa pienzie pen a masa lai sangin siehuoizaw hi,” a ci hi.

A tahtah Thupha Ngana

27Ama in tami thu a gen laitahin mipi lahah numei khat kiko a, “Ang paai gil le na tawp nawi pen thupha nga ahi hi,” a ci hi. 28Ahi vangin ama in, “Pasien’ thu za-a a zui mite hampha zaw uhi,” a ci hi.

Jonah’ Lim

(Mat 12:38-42; Mrk 8:11-13)

29Mihonte a tam semsem ciengin ama thugen kipan a, “Tam khang mite pen a gilo khang mite ahi uhi; amate in lim khat a ngen uhi, ahi vangin Jonah lim longal bangma lim kipie lo ding hi.#Mat 16:4; Mrk 8:12 30Nineveh khuomite adingin Jonah pen lim khat ahi ma bangin mihing Tapa zong tami khang mite adingin lim khat hi ding hi.#Mat 16:4; Mrk 8:12 31Thukhen ni ciengin leitaw lam gam pana ang pei kumpinu in tami khang mite langkhatah dingin a mawsah ding hi, azieh pen Solomon pilna thu ngai dingin leimong khat panin ama a kuon hi, en in tam sungah Solomon sanga a lienzaw khat a om hi.#1Kum 10:1-10; 2Khg 9:1-12 32Thukhen ni ciengin tami khang mite langkhatah Nineveh khuomite dingin a mawsah ding uhi, azieh pen Jonah’ thugenna ziehin amate a kisiakia uhi, en in, tam sungah Jonah sanga a lienzaw mi khat a om hi, a ci hi.#Jhn 3:5

Pumpi Khuovah

(Mat 5:15; 6:22-23)

33“Koima in meivah a vah zaw ciengin mun kawmah#11:33 Adang tang laibute ah “law sungah” ci-in kibelap hi. koi loin a sunga lut mite in khuovah a mu thei nadingin meivah tunna tungah koizaw hi.#Mat 5:15; Mrk 4:21; Luk 8:16 34Na mit pen na pumpi adingin meivah ahi hi. Na mit uh a ciim leh na pumpi uh khuovah tawh kidim ding a, na mit uh a hoi sih leh na pumpi uzong khuomiel tawh kidim ding hi. 35Tua ahi ziehin na sung vua om khuovah a miel lo nadingin pilvang un. 36Tua ciengin na pumpi zosie uh khuovah tawh kidim a, a mielna mun khat zong a op sih leh, khuovah in note ang tanvah ma bangin na pumpi uh ang tangkim ding hi,” a ci hi.

Jesu in Pharisee-te le Thukham Hil Siete Mawsah

(Mat 23:1-36; Mrk 12:38-40; Luk 20:45-47)

37Thu a gen laitahin Pharisee-te khat in ama an nehpi dingin hlan a, tuaci’n ama zong pei-in an ne dingin sabuoi ah a to hi. 38Ama in khut sil masa loin an a neh lam Pharisee pa in a mu bepin lamdangsa mama hi. 39Tua ciengin Topa in ama kungah, “No Pharisee-te in hai le kuongte a pulam na nawt sieng zemzom vua, ahi vangin na sung lam uh huoihamna le gitlona tawh a kidim hi. 40No mimaw lawmte! a pulam a bawlpa in a sunglam zong bawl hi lo amah? 41Tuaci’n a sung lama om nate mizawngte na pie un; tua hile note adingin na zosie a siengtho ding hi.

42“No Pharisee-te in gimna na thuoh ding uhi! Azieh pen note in masala, lengmusel le ante lohing namkim tungah sawm-ah-khat na pie vua, ahi vangin thutang le Pasien itna na don vanuh sih uhi; adangte zong nelsie tuon loin tamte na bawl ding uh ahi hi.#Siem 27:30 43No Pharisee-te in gimna na thuoh ding uhi! Bangzieh ahei cile kikhopna inn sungah topha nuompen na dei vua, vanzuana munte-ah zatah hopi ding na dei uhi. 44Note in gimna na thuoh ding uhi! Azieh pen mite in a thei lo ziehun a tungah lamhlahna-a a nei uh, ciemtena a om lo hankhuhte tawh na kibang uhi.

45Thukham hil siete lahah khat in, “Siepa, tam bang na gen ciengin ko zong ei gensie na hi hi,” ci-in a dawng hi. 46Tuale ama in, “No thukham hil siete in zong gimna na thuoh ding uhi! Azieh pen mi puoh zawh lo ding vangih na suon vua, tua van a puohpi dingin note in lah na khutme uzong na lamto nuom sih uhi. 47Note in gimna na thuoh ding uhi! Azieh pen na pu na pate un a na tha kamsangte’ han na lampieh uhi. 48Tuaci’n note na hi ule na pu na pate uh’ gamtatnate a thukimpi, a tecite na hi uhi; bangzieh ahei cile amate in kamsangte a na that vua, note in amau’ han na lampieh uhi. 49Tua ahi ziehin Pasien’ pilna laibu in zong, ‘Amate kungah kamsangte le sawltahpite ka sawl ding a, amate in tua mite pawlkhat bawlsie-in that ding uhi,’ a ci hi. 50Tuaci’n amate in leitung piencil a kipanin a na luonsah uh kamsang zosiete’ sisan, 51Abel’ sisan a kipanin maitam le mun siengtho kikala a na tha uh Zechariah’ sisan dong, tami khang mite tungah ka phulkia ding hi. Ahi hi, ke’n kang ci-in, tami khang mite tungah ka phulkia ding hi.#Pien 4:8; 2Khg 24:20-21 52No thukham hil siete in gimna na thuoh ding uhi! Azieh pen note in theina tawhtang na ladawh vua, note lah lut loin a lut dingte lah na khahtan vanuh uhi,” a ci hi.

53A pulamah ama a pei ciengin thukham hil siete le Pharisee-te in langbawl kipanin thukhel tampitah a dong vua, 54a kamham tung panin mawmat ding sui-in a buhdap uhi.

Currently Selected:

LUKE 11: ZBOTF01

Highlight

Copy