LUKE 12

Kineitawmna Hilkholna

1Khatlekhat a kituoncil za dongin mihon tul tampite kikhawmin a op laitahun ama in a nuazuite kungah thugen masa a, “Kineitawmna ahi Pharisee-te’ tol kidawm un.#Mat 16:6; Mrk 8:15 2A kilang lo dinga a ki tuomcip bangma a om sih a, a kithei lo dinga a kiphuoldap bangma a om sih hi.#Mrk 4:22; Luk 8:17 3Tua ahi ziehin khuomiel lahah na gen popo uh khuovah sungah kiza ding a, inn sungtawnga na kidaphona popo uh inn khumvum ah kitangko ding hi.

Zau Loin Mawna Pulah ding Hanthotna

(Mat 10:26-31)

4Lawmte aw, ke’n kang ci-in, pumpi a thazaw uh ciengin tua ban bangma a law thei lote na giing sih un. 5Na giin ding uh koi ahei ci kang hil ding hi: Pumpi a tha zaw ciengin hell #12:5 Gk “Gehenna”khuh sunga khieh thei nading thuneina#12:5 Ahi sihle “vanglietna” a neipa giingzaw un. Ahi hi, ke’n kang ci-in, tua pa na giing un! 6Vato nga ciengin dangkasan peh ni tawh kizua lel hi lo amah? Hinanle Pasien mai-ah tuate khat nangawn kimangngil lo hi. 7Ahi vangin na lu tung vua na samzamte nangawn uh a kisim siengsa ahi hi. Zau sih un; vato tampi sangin na manpha zaw uhi.

Khris Kisanna le Kinuolna

(Mat 10:32-33; 12:32; 10:19-20)

8“Ke’n kang ci-in, midangte mai-a keima ei sang poma, mihing Tapa in zong Pasien vantung mite mai-ah a sang ding hi; 9ahi vangin mi dangte mai-a kei ei nuol poma, Pasien’ vantung mite mai-ah kinuol ding hi. 10Mihing Tapa langpangain thu gen poma kimaisah ding a, hizongle Hlagau Siengtho a gensie poma kimaisah lo ding hi.#Mat 12:32; Mrk 3:29 11Amate in kikhopna innte-ah hile, vaihawmte le thuneite mai-ah hile ang peipi ciengun bangci kihutin bang thu gen ding ka hei ci-in lunghimaw sih un. 12Azieh pen, tua hun ciengin Hlagau Siengtho in na gen ding uh ang hil ding hi,” a ci hi.#Mat 10:19-20; Mrk 13:11; Luk 21:14-15

A hau Mimawpa Thugentena

13Mihonpi lah panin khat in ama kungah, “Siepa, ka sanggampa in gamh ei hop nading in ei genpieh in,” a ci hi. 14Ahi vangin Jesu in tuapa kungah, “Lawm aw, nogel tunga thukhen ding le gamh hawmpieh dingin kei koi in ei se ahei? a ci hi. 15Tuale ama in amate kungah, “Pilvang un! Huoihamna zosie panin na kikem un; azieh pen hau le dipna sungah mihing hinna om lo hi,” a ci hi. 16Tua ciengin ama in amate kungah thugentena khat a gen hi: “Mihaupa khat’ lo-ah an tampi a pieng hi. 17Tuale ama in, ‘Ka ankhol nading mun nei lo ka hi ziehin bang law ding ka hei,’ ci-in a lungsim sungah ngaisun hi. 18Tua ciengin ama in, ‘Tam bangin ka bawl ding hi: Ka ansaal phelin a golzaw khat ka lam ding a, tua sungah ka antang le ka van teng ka khol ding hi. 19Tuale ka hlagau kungah, “Ka hlagau aw, kum tampi khom ding van tampi na khol zo hi; ne-in dawn inlen, guolnuomin om hit hiet in, ka ci ding hi,” a ci hi. 20Ahi vangin Pasien in tuapa kungah, “Nang mimawpa! Tuzan mama-in na hinna kila ta ding hi. Tuale na kholsa nate koi-a’ ahi ta diei?’ a ci hi. 21Tuaci’n amau adinga gou a kholte pen Pasien lamah mihau ahi sih hi,” a ci hi.

Lunghimaw Sih Un

(Mat 6:25-34)

22Ama in a nuazuite kungah, “Tua ahi ziehin ke’n kang ci-in, hinkhuo ading bang kine ding a, pumpi tungah bang kisil ding ahei, ci-in lunghimaw sih un. 23Azieh pen an sangin hinna thupizaw a, puonsil sangin pumpi thupizaw hi. 24Va-ahte ngaituo vawi un: Amate in vaw lah vaw lo, at lah at lo, an kholna inn le ansal zong a nei sih uhi, ahi vangin Pasien in amate a va hi. Vate sangin note nahpi tahin na manphazaw uhi! 25Note lahah a lunghimaw ziehin a khankum nai khat sung beh a belap thei koi om na hi uh ahei?#12:25 Ahi sihle “a tun tong khat a khan thei “ 26Khum banga sil neuno khat zong bawl thei lo na hi uleh bang dinga adangte lunghimawpi na hi uh ahei? 27Unoh paate bangci khan ahei ngaisun un: Tuate in na sem loin vau zong a zom ngai sih uhi;#12:27 Adang tang laibute ah “Unoh paate khu ngaisun un; amate in vau zom loin puon a gan sih uhi” ci-in kigiel hi. hizongle ke’n kang ci-in, Solomon nangawn a minthanna teng tawh a kizep vangin tua unoh paate lahah khat zong a pha zo sih hi.#1Kum 10:4-7; 2Khg 9:3-6 28Ahi vangin Pasien in tuni-in hing a, zing cienga meikhuh sunga a kihaltum ding gamlah lopate puonsil guon ahile ama in bangza tahin note puonsil hing guonzaw sem ding ahei, no upna neute aw! 29Tua ahi ziehin na neh na dawn ding uh sui penin nei loin lunghimawpi den mielmuol sih un. 30Bang ding ahei cile leitung minam zosie in tami nate a sui vua, na Pa un tuate na kisap lam uh a thei hi. 31Tuate sangin ama’#12:31 Adang tang laibute ah “Pasien’ gam” ci-in kigiel hi. manggam suizaw un, tua hile note tungah tami nate ang kipiehbe ding hi.

32“Tuuhon tawmnote aw, zau sih un, azieh pen note kang pieh ding kumpi’ gam khu na Pa uh’ lungkimna ahi hi. 33Na neisate uh zua unlen mizawngte pie un. Noma adingin a tul thei lo sum-ip bawl un, gutate in a nai thei lona, nget in zong a suhsiet thei lona mun vantungah a mang thei lo dingin na gougil uh kholzaw un. 34Azieh pen na gougil opna munah na lungsim uh a om ding hi.

A Kigingsa-a Om Nasemte

35Na kawng uh gahin na meivahte uh tangsah un.#Mat 25:1-13 36Mopawi simna panin a kilekia a pu un kot a kiu ciengin thakhatin a hon thei pai dinga a ngah lenlon mite bangin om un.#Mrk 13:34-36 37A pupa uh a pei ciengin a kigingsa-a a mu nasemte mi hampha ahi uhi; a tahtah a kang ci-in, ama in a kawng gahin an ne dingin amate tosah ding a, tuale ama pei-in amate an a lui ding hi. 38Zankim laitah hile, zingmawng khuovah kuon lam hile a pei hun sunga ama in a mu khah silate mi hampha ahi hi.

39“Ahi vangin tami thu thei un: Inn neipa in gutate pei ding hun thei leh ama#12:39 Adang tang laibute ah “ama in cing ding a” ci kibelap hi. in inn bulusah lo ding hi. 40Note zong a kigingsa-in om zing un, azieh pen na muonmaw lo laitahun Mihing Tapa ang pei ding hi,” a ci hi.#Mat 24:43-44

A Citah le a Citah lo Silapa

(Mat 24:45-51)

41Peter in, “Topa aw, tami thugentena ko dinga na gen amah, ahi sihle mi zosie ading ahei?” a ci hi. 42Tuale Topa in, “Tua ahile a silate uhin, a hunhuna amate an pie dinga a pupa in a koi, a muonhuoi le a pilvang inn sung vaisaipa koi ahei? 43A pupa a tun ciengin tua banga a sem a mu silapa mi hampha ahi hi. 44A tahtah a kang ci-in, ama in a neisa teng zosie a uh dingin tua mipa a koi ding hi. 45Ahi vangin tua silapa in a lungsim sungah, “Ka pupa ang tungha lel ding hi,” ci-in sila numeite le pasalte sat gawpin, an ne tui dawnin zu na kham gawp leh, 46a muonmaw lo ni le a thei khah lo hun laitahin tua silapa’ pupa tung ding a, tuale ama semnenin#12:46 Ahi sihle “sattan” mi thumanlote tawh a koiton ding hi. 47A pupa’ dei dan thei napi-in, tua banga gamta nuom lo le a kigingkhol nuom lo tua silapa in satna nahpi-in a thuoh ding hi. 48Ahi vangin a pupa’ deina a thei lo ziehin sat dinga kilawm mipa a kitawmsat zawdeu ding hi. Tampi a kipie pa tung panin tampi kikalh ding hi; tuale tampi a ki-ap pa tung panin a tamzaw kingenkia ding hi.

Kikhenna a Piengsah Jesu

(Mat 10:34-36)

49“Leitungah mei kuong hla dinga ang pei ka hi a, tua mei khu a kuong zo hi taleh ka nuom hi! 50Ka ki-baptize nading baptize-na khat ka nei a, tuami a kicin masangsie ka lung a nuom thei sih ding hi!#Mrk 10:38 51Leitungah kilemna puoh dinga ang pei nei sa uh amah? Ka hi sih hi. Ke’n kang ci-in, kikhenna a piengsah dinga ang pei ka hizaw hi! 52Tu-a kipanin innkuon khat sungah mihing nga a phate, a langah thum, a langah ni-in a kido ding vua, thumte in nite do-in nite in thumte a langpang ding uhi. 53Amate pen:

A tapa langah a pa, a pa langah a tapa,

a tanu langah a nu, a nu langah a tanu,

monu langah innpi nu, innpinu langah monu kilangpan cietin,

amate a kikhenthang ding uhi,” ci-in a dawng hi.#Mic 7:6

Hun Theina

(Mat 16:1-4; Mrk 8:11-13)

54Ama in mihonpite kungah, “Nitumna lamah meii ang kai na mu ciengun, ‘Guo ang zu ding hi,’ na ci thei pai lien vua, tua bangin a pieng hi. 55Tua ma bangin leitaw lam hui ang lan ciengin, ‘Ni sa ding hi,’ na ci uhi; tua bangin a pieng pai hi. 56No mihoi kipangte aw, leitung pienzie le vantung pienziete a deina khie-in gen thei napi ucin, bang dingin tuhun thute gen thei lo na hi uh ahei?

Na Langpa tawh Kilem in

(Mat 5:25-26)

57“Tuale bang dingin thudihte khen thei lo na hi uh ahei? 58Tua ahi ciengin no ang hehpa tawh thukhenmangpa kungah na peiton laitahun na thu uh a mai thei nadingin lamkalah hanciem#12:58 Gk “ama tawh na thu siengsah in” un, tua ahi sihle ama in thukhenmangpa kungah hing tutin, thukhen mangpa in vaihawm pa khutah ang tut ding a, vaihawm pa in thong sungah ang khum ding hi. 59Ke’n kang ci-in, na lieu ding uh sum dangkasan na pieh sieng masangsie-un thong sung panin na suohta thei sih ding uhi,” a ci hi.

Currently Selected:

LUKE 12: ZBOTF01

Highlight

Copy