PIANPATNAK 33
33
Jakob In Esau Tawk
1Jakob in Esau cu mihing za li tuah hung li amuh ten a cate cu Leah, Rachel le a zineu pa nih tei lakah khenkhek khawng hi. 2A zineu pa nih le a cate cu masabel koihin, a sangtuah Leah le a cate koih a, nungdawlbelin Rachel le Josef koih hi. 3Jakob cu a mai hawah hawhin, vei salih tian a lu a kun nungten a u i lakah heng hi. 4Mahnaven Esau in Jakob amuh ten tawk tukin tai in, Jakob cu pomin nam a, a pa nih haw in kap ngel haw hi. 5Esau cu khuadang a hek ten numei le naupang mu hi. “Na lak a, numei le naupang hi akua kaw?” tin dong hi.
Jakob in, “Na silapa keimah hi Pathian in hehpihin, a piak mite haw,” ti hi. 6a zineu le a cate hung haw a, upatnak pia in, a lu kun haw, 7mahten Leah le a cate cu a lu haw kunin; a nungdawlbel ten Josef le Rachel hungin lu kun bok haw hi.
8Esau in, “Ngan hon ka tawhmi khi itihnak kaw?” tin dong hi.
Jakob in, “Bawipa, na maipha ka co theihnak tukin ka piakmi hi,” tin ti hi.
9Mahnaven Esau in, “Ka deih zah cu nei bok ing hi, ka naupa; nangmata cu nangma nei pohin,” ti hi.
10Jakob in, “Mah kha ma; na mitmai pha na cotik tale ka laksawng cu sang zazalin hi. Atu cu ka humah na lungmu tuang zetin, a um taktoh cu ka ca in, na mitmai muh cu Pathian mitmai mu bang ing. 11Hehpihnakin nangma ca ka kenmi laksawng cu co zazalin hi; Pathian in hehpihin ka kulmi pawpoh cu pia,” ti hi. Jakob in Esau i a san laklawh pia lo hi.
12Esau in, “Timtuah nung inna, hawh toh nung ngei. Keimah in lamhuai tung,” ti hi.
13Jakob in, “Naupangte hi va viang haw ma laih tih cu thei ci; tuu, khuite le dawnzet haw laih hi. Ni khatin khawlapi a hawl haw tale thi khawng haw tuk hi. 14Hehpihnakin, maiah na hawh ham poh inna, demhetno in hil tuk ung, Seir ngam, na lak a, ka hen uh tian ngan le naupang tei a hawh theih zah haw in hilleh saw nung,” ti hi.
15Esau in, “Mah ahimata na lakah ka mihing khenkhat zam nang,” ti hi.
Mahnaven Jakob in, “Na thu ngaihsut thiamnak humah ka lungdam ing, kul tukma poh,” ti hi. 16Mah hangin Esau cu Seir ngamah mah ni-in kikleh hi. 17Jakob cu tulin Sukkoth ah hawh hi. Mahlaiah amah i ca tuk innsa in, a ngan tei ca in deupheng a zaaksak hangin, mah mun cu Sukkoth#33:17 Sukkoth tih cu Deubuk tihnak hi. tin minsa hi.
18Jakob cu Mesopotamia ngam pen a kihleh ten Kanaan ngam Shekhem khua ah himdamno hengin, mah khuahialah ngiahbuk khual hi. 19Mah mun cu Shekhem i pa Hamor i capa tei lak pen ngun tangka za khat tuah lei hi.#Josh 24:32; Jn 4:5; 20Biaklan dawhin, a min El, Israel i Pathian tin sa hi.
Currently Selected:
PIANPATNAK 33: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
