PIANPATNAK 34
34
Dinah Sualpih Haw
1Ni khat cu, Jakob le Leah tei canu Dinah cu Kanaan numei tei lakah leng hi. 2Mah ngam a, cikhaihtu, Hiv miphun Hamur i capa Shekhem in Dinah amuh ten manin, a nuam ngawl zal buanin sualpih hi. 3Dinah i lak bekah a lungmu koihin, a deihzet sih bok hangin lem hi. 4A pa Hamur lakah, “Hi khanglainu hi ka zi tukin dotsakin,” ti hi.
5Jakob in, a canu Dinah minsiatik zo haw tih thei naven, a capate hampa lakah khui khalin, a um haw hangin a pin haw laih ngawl sung cu imah ti ngawlin um hi. 6Shekhem i pa Hamor cu Jakob otpih tukin hawh hi. 7Jakob i capate hampa lak pen a hen haw ten heng bok hi. A celnu haw sualpih hi tih le Shekhem in hiti bang nawngkai mi le zahcakhuai a bawl hangin Israel hinnam zawnsakin, nautat hi tih thu a theih haw ten a thin haw pulhangin, a thinukzet haw hi. 8Hamor in, a lak hawah, “Ka capa Shekhem in, na canu uh cu a deihzet hangin a huai theihnak tukin hu hehpih zal un. 9Huaidunnak tuah ngual mandun nung. Na canu uhte huai nung inna, noh vangin ka canu uhte huai bok un hi. 10ka ngamsung uhah keimuh tuah um unna, lungmuang zetin, na nuamnak pawpoh uhah um tuk uh ci. Sumbawlin, ngimta zetin thil tampi nei tuk uh ci,” ti hi.
11Shekhem in, Dinah i pa le a ningpa tei lakah, “Na mitmai pha cotik zal unna, na deih uhmi hempoh pia tung. 12I laksawng kaw na deih uh, hilh un; na celnu uh man cu na deih zah uhin ngen un; huai na phal uh tale na nget uhmi pawpoh pia tung,” ti hi.
13Jakob i capa ten, Shekhem in, Dinah a min a siattik zo hangin lem hemdiakin le a thu haw cu zom hemin, 14a lak hawah, “Vuncep tan ngawlmi cu ka celnu uh pasaltik thei ma ung, ka phal uh bang ahin, keimu ca in iti zahin zahcakhuai tuk hum. 15Keimah bangin pano hempoh vuncep na tan khawng uh tale lungkim thei tuk ung. 16Mahten na bawl uh tale ka khanglai uhte huai thei tuk uh ci, keimuh vangin, na khanglai uhte huai bok tuk ung hi. Nangmu lakah khuasa in um tuk ung a, nangmuh tuah hinnam pa khatin suak tuk hung hi. 17Mahnaven ka thu uh pom thei ngawlin vuncep na tan uh ma tale, ka celnu uh cu la in hawh tuk ung,” tin ti haw hi.
18Jakob capa tei thu cu Hamor le a capa Shekhem in, lemcang em poh si tin ngaisung haw hi. 19Shekhem in, a ngei um ngawlin a thuhilh haw bangin bawl khawng hi. Itahim titale Jakob i canu cu a deih ngangai hang hi. Shekhem cu a innkua sung haw pen mitei maisonbelmi hi.
20Hamor le a capa Shekhem cu pinin, a khua suah haw pen a khuapihte tuah tawkdunin, a lak hawah, 21“Jakob le a innkuapihte tuah lemdunzet ung, a ngam uhah, um bok haw poh henna, a nuamnak mun hawah ngamta haw poh hen. Amu umnak thamin, a ngam uh zal leng poh hi. A canu haw huai nung inna, amuh vangin a canu uhte huai bok haw hen. 22Mahnaven amuh bangin pano hempoh vuncep a tan uh bek ten eimu lakah umin, eimuh tuah hinnam khat hi tukin a lung haw kim tuk hi. 23A ngan haw, a thil neihmi le a khuihon cu eimuta in suak tuk hi. Mah hangin eimu lakah a um theih hawnak tuk cu bawlbok nung,” tin ti haw hi. 24Khuasung mi hempohin Hamor le Shekhem tei thu cu zomin khuasung a, pano hempoh cu vunceptan khawng haw hi.
25Ni thum nungten a vunceptalhnak haw a nase laihtakin, Jakob i capa pa nih, Dinah i ningpa, Simeon le Levi cu namsau tuah khuasungah kuamah i theihtup tuk ngawlin tumin, a pano hempoh na that khawng haw hi. 26Hamor le a capa Shekhem vang cu a lu tan haw in, a celnu haw Dinah cu Shekhem i innsungta taipih haw hi. 27Jakob i capa dang ten a celnu min a siattik haw khua ngai in, maliam mite vang that vanglak haw in, khuasung a, na hempoh tian laksak khawng haw hi. 28Tuu, khui, laak, khuasung le lo sung a, a neihmi tian laksak belh haw hi. 29A sumpai haw, a lo le lam, innkua a, nuncak khuasaknak na hempoh tian la in, numei le naupang vang man khawng haw hi.
30Jakob in, a capa Simeon le Levi lakah, “Haksatnak sungah heng zo hung; hi ngamsung a, ummi Kanaan mi le Periz miten oh cu hua haw tuk hi. Kei tale mihing tampi nei mang. Amuh munkhat tangkhawmin, a do haw tale cu a venghawng uhin, cimit khawng tuk hung,” ti hi. 31Mahnaven amuh ten, “Ka celnu uh ci Numei phangawl bangin a bawl haw cu thuak thei hihim ma ung,” tin ti haw hi.
Currently Selected:
PIANPATNAK 34: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
