PIANPATNAK 40
40
Josef In Thawngta Tei Manglet
1Hun a ngei deuh ten Izipt kumpipa i sabittui piatu le moh bawl hotu ten a bawipa haw cu thinuktik haw hi. 2Kumpipa cu a nadektu pa nih tei humah a thinuk zetin, 3Josef a koihnak haw kumpi inncingtu bawi i innah thawngkhia hi. 4Thawnginn sungah hun ngeipi sung umten haw a, Kumpipa i inncingtu bawi in, Josef cu mah thawngta pa nih tei lakah koihin, a nadektik hi. 5Zan khat cu thawnginn sung a, kumpipa sabittui piatu le moh bawl hotu ten sullam nei veve mi, mangman haw hi. 6Zingtungno in Josef cu a lak hawah hawh a, lungnop viang ngawlin a um haw cu mu hi. 7Josef in, “Ita tuni hi na lung uh sia cuang kaw?” tin dong hi.
8Amuh ten, “Mangman veve ung a, ka mang uh i sullam a hilhciang theitu hi laiah kuamah um haw ma,” tin ti haw hi.
Josef in, “Mang lehtheihnak cu Pathian i piakmi hi a, na mang uh cu hilh hem un,” ti hi.
9Mah hangin sabittui piatu pa in, “Ka mangin sabit ngui pa khat ka maiah na mu ing, 10a kak pa thum nei hi. Sabit kak cu tawtpaih haw a, paakto in, a ngah cu na min paih haw hi. 11Kumpipa i khuat cu cawi thahin, sabit ngah thawi in khuat sungah suuk ing a, kumpipa cu pia ing,” ti hi.
12Josef in, “A sullam cu hi bangin hi: a kak pa thum cu ni thum hi. 13Ni thum sungin kumpipa in hah tuk hi; nangmah cu ngaidam tuk a, na nadeh leng ngahleh tuk ci. Sabittui piatu na hih bangbokin sabit khuat cu kumpipa pialeh tuk ci. 14Na lamtuang tuk a, kumpipa i lakah, hi thawng pen ka suah theihnak tukin kei phawkngil pahsun hi. 15Thungai in titale, Hebru tei ngam pen a nguk haw mi ing a, hi laiah vangin thawngkhiak theihnak tukin bawl sualmi nei mang,” ti hi.
16Moh bawl hotu pa in, sabittui piatu pa i mang lehmi cu thupha lam hi tih amuh ten, Josef lakah, “Kei vang mang nei bok ing; ka mangin, ka lu humah moh kho thum um hi. 17A humtabel kho sungah Kumpipa i ca in moh em mi a phunkim na um a, mah an cu vano ten ei tawtok haw,” ti hi.
18Josef in, “A sullam cu hi bangin hi: Kho pa thum cu ni thum hi. 19Ni thum sungin kumpipa in suah tuk a, na lu tan tuk hi! na luang cu thingkung humah khai tuk a, vano ten na cik cu ei tawtok haw tuk,” ti hi.
20A ni thumnak, kumpipa i hincamah a khutnuai a, bawi hempoh puai bawlsakin, sabittui piatu pa le moh bawl hotu pa cu thawnginn pen suahin, a bawi tei maiah hawhpih hi. 21Sabittui piatu pa cu a masa a deh bang leng dektikleh hi. 22Mahnaven Josef i lehsakmi bangin, moh bawl hotu pa cu a ngawng pen khai in thi hi. 23Mahnaven sabittui piatu pa in, Josef cu thei khaleh ngawltohin, phawkngil vawkta hi.
Currently Selected:
PIANPATNAK 40: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
