PIANPATNAK 41
41
Josef In Kumpipa i Manglet
1Kum nih a kim nungten Izipt kumpipa in mangman hi. A mangin Nail ngunpi mawkah dingin, 2tuisung pen khuipi thau mamzet salih na tul haw a, ham dawnno a eih lih haw mu hi. 3khuipi ngawm haduap salih cu tuisung pen tul bok haw in, a masa khuipi thau salih tei el a, ngun mawkah ding haw hi. 4Khuipi ngawm haduap ten khuipi thau mamzet cu ei khawng haw hi. Kumpipa cu khanglo hi. 5Mah nungten hihbu leleu in, mang dang pa khat manleh hi. A mangin, cangngui phazet le ahhun tohmi cangngui salih cu cangkung pa khat pen ngui hi. 6Mahten sivai nguakcang, phillawn huih i nuaisiatmi cangngui salih cu na ngui bok hi. 7Mahten a sezetmi cangngui in, a malian zetmi cangngui cu thon khawng hi. Kumpipa cu khanglo in, a mang hi tih cu thei hi. 8A zingten a lungnop viang ngawlin, Izipt ngamsung a, mitzial thiamte le micip hempoh sam khawng hi. A mang cu hilh khawng naven, a hilhciang thei kuamah um haw ma.#Dan 2:2;
9Mahten sabittui piatu pa in, kumpipa i lakah, “Ka khelhdan cu tuni in phuang tung. 10Na moh bawl hotu pa le keima humah na thinukin, na inncingtu tei hotu bawi innah thawng khia ci. 11Zan khat cu ka pa nih uhin mangman ung. Ka mang uh cu sullam nei veve hi. 12Mahlaiah Hebru tangval pa khat kumpi inncingtu bawi i umlawhpa cu ka lak uhah na um bok hi. Ka mang uhte hilh ung a, aman, a sullam hilhcian khawng hi. 13A hilh bang cikcekin kim khawng hei: kei cu ka nadeh dekleh ing a, moh bawltu pa cu that ci,” ti hi.
14Kumpipa in mi hah a, manlang zetin thawnginn pen Josef cu suah hi. A multe met ciangin a vansilh a thek ceng ten kumpipa i maiah hung hi. 15Kumpipa in, “Mangman ing a, kuamah in hilhciang thei haw ma. Nang cu mang i sullam hilhciang thei ci ti haw si,” tin ti hi.
16Josef in, “Kumpipa aw, keima tih theihmi kha ma hi; mahnaven Pathian in hilhciannak dik pia tuk,” ti hi.
17Kumpipa in, “Ka mangin Nail ngunpi mawkah ding ing a, 18khuipi thau mamzet salih tuisung pen tul haw in, ham dawnno ei haw hi. 19Mah nungten khuipi dang salih tul bok haw in, ngawm haduap haw hi. Mahti bang khuipi nawmtam cu Izipt ngam hempoh ah mu awng mang. 20khuipi ngawm haduap ten khuipi thaute cu ei khawng haw hi. 21Mahnaven a eih celh haw ten kuamah in khuipi thau salih ei haw tih thei haw tukma hi; a laihngawl bangin ngawm haduap leng haw hi. Khanglo ing. 22Mangman leleu ing a, ka mangin cangkung pa khat pen cangngui salih, malian zetmi le ah hunzet tohmi tul hi. 23Mahnung ten a sivai nguakcang, phillawn huih i nuai siatmi cangngui salih tulin; 24cangngui sivai ten cangngui phazet salih cu thon khawng haw. Ka mang cu mitzial thiam tei lakah hilh naveng, a hilhciang theitu pa khat hei um haw ma,” ti hi.
25Josef in kumpipa i lakah, “Na mang pa nih tei sullam cu bangten hi. Pathian in, a bawl tummi a theihtiknak hi. 26Khuipi thau mamzet salih cu kum salih hi, cangngui phazet salih vang cu kum salih leng hi in, a sullam cu bangve hi. 27Nungdawl saw tulmi khuipi ngawm haduap salih le phillawn huih i nuaisiatmi le cangngui sivai salih cu paam kum, kum salih hi. 28Ka hilh zo bangin Pathian in, a bawl tukmi a laknak hi. 29Izipt ngamsung hempoh ah kum salih sung hauhsaknak um tuk hi. 30Mah nungten, paam kum, kum salih tung tuk a, Izipt ngam sungah hauhsak kum hempoh cu phawhngilh khawng hi tuk hi. Itahim titale pamnak hangin Izipt ngam cu sia khawng tuk hi. 31Hauhsak hun cu kuamah in cingleh haw tukma toh hi. Itahim titale nungdawl saw a, a heng tukmi paam cu nasezet tuk hi. 32Na mang vei nih loli na matnak cu Pathian in hi thu cu kipkhotik zo in, a ngei can um ngawlin heng tuk tihnak hi.
33“Atu-in thu ngaisung thiam le micip pa khat teng inna, Izipt ngam buppi dehvo latu tukin koihin hi. 34Na ngam sungah hotu upa dang koih inna, hauhsak kum, kum salih sung a, a neih uhmi an sung pen khen nga khenkhat khawltikin hi. 35An cu hauhsak kum sungin cum khawm khawng tukin le khuapi hempoh ah cingkhawi tukin thupia in hi. 36Hih an cu Izipt ngamsung a, a heng tukmi paam kum, kum salih ca in khawlsa mi an hi tuk hi. Mahti bangin mipi ngilkialin, a um ngawlnak haw tukin hi,” tin ti hi.
Josef Cu Izipt Ngam Uktu In Suak
37Kumpipa le bawi upa ten, hi thu vaihawmnak cu pha sa in, lungkimpih ten haw a, 38kumpipa in amuh tei lakah, “A sungah Pathian hawvang umpihmi, Josef sangin mipha saw ituk mahten mu tukma toh hung,” ti hi. 39Kumpipa in Josef lakah, “Pathian in hi na hempoh hi nangmah a theihtik hangin, nangmah sangin thu thei saw le micip saw kuamah um haw ma hi, tih cu cangcianzet hi. 40Ka ngam sungah dehvo neibeltu in bawl tung a, ka mihing ten na thupiak ngai haw tuk hi. Nangmah cu keima nuai a, thuneibeltu hi tuk ci.#Nung 7:10; 41Atu pepanin Izipt ngam buppi uktu bawi in bawl ing,” ti hi. 42Kumpipa in, kumpi min khetmi zungbut cu dukin, Josef i khutzungah bulh hi; a mawi le a manpha mi van tuah thuamin, sui long-awh a ngawngah oktik hi. #Dan 2:29; 43Kumpi cipuhleng a pa nihnak pia in, khungtik hi. Upatnakin, a cingtu ngalkap ten a maiah hawhham haw a, “Lampi na kian un! Lampi na kian un!” tin au haw hi. Josef cu Izipt ngam buppi uktu bawi in, na suakta hi. 44Kumpipa in Josef lakah, “Kei cu kumpi ing hi; nangma thu ngawlin Izipt ngam sungah kuamah in, a khut le a ke haw nangawn, phia thei haw tukma,” ti hi. 45Josef cu Zafenath Paneah tin Izipt min pia hi. Heliopolis khua a, thiampi Potifera i canu Asenath cu a zi tukin huaisak hi.
46Josef cu Izipt kumpipa i nadeh a pat ten, kum sawm thum hi. Josef cu kumpi inn pen Izipt ngamsung mun hempoh ah hawhin zin kawkawi hi. 47Hauhsak kum, kum salih sung cu an eih celh ngawlin nei haw. 48Hauhsak kum, kum salih sungin an tamzet a neih sung haw hempoh cu Josef in, Izipt ngamsung an cu khawm hetin, khuapi hempoh ah cum hi. Khua elkim a, an cu mah khuasungah cum hi. 49An a khawlmi cu tuipi mawk a, philnel zah bangin a tam leita toh hangin Josef in teh zoma toh hi.
50Paam kum a hen laihngawlin, Josef cu Asenath tuah capa pa nih nei haw hi. 51Josef in, “Pathian in ka cim le khamnak hempoh le ka pa i innkua thu vang phawkngiltik zo hi,” tin ti in, a capa masa min cu Manasseh#41:51 Manasseh tih cu Hebru awnin Phawkngiltik tihnak hi tin sa hi. 52Josef in, “Pathian in haksat ka tawhnak ngam pen casuan pia hi,” ti in, a capa pa nihnak min cu Efraim#41:52 Efraim tih cu Hebru awnin Cano pia hi tihnak hi. sa hi.
53Izipt ngam a, hauhsak kum, kum salih cu bo in, 54Josef i a hilh hamsa bangin paam kum, kum salih cu na heng ngangai hi. Izipt ngam bek hi ngawlin ngamdang hempoh ah vang paam na tung bok naven Izipt ngamsung khua hempoh ah an um hi.#Nung 7:11; 55Izipt miten a eih haw tuk an a bo ten, kumpipa lakah an ngenin, au in kio haw hi. Mah hangin kumpipa in, “Josef lakah hawh unna, a tih bangin bawl un,” tin thupia hi.#Jn 2:5; 56Paampi cu nase sesem a, ngam buppi a zalh pepel ten, Josef in an koihnak innpi cu hongin, an cu Izipt mitei lakah zuak hi. 57Mun hempoh ah paam cu nase zetin, a hen bok hangin, leihummi hempoh ten Josef lakah ancaw tukin Izipt ah hung haw hi.
Currently Selected:
PIANPATNAK 41: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
