PIANPATNAK 42
42
Josef Unaute Izipt Ah Hung Haw
1Jakob in Izipt ngamah an um tih a theih ten a capa tei lakah, “Ita hi bangin umthong uh cim? 2Izipt ngamah an um tih thei ing. An ngawlin a thih khawng ngawlnak tuk uhin hawh unna, an leita un,” ti hi.#Nung 7:12; 3Mah hangin Josef i unau sawm khatte cu Izipt ngamah an lei tukin hawh haw hi. 4Mahnaven Jakob in Josef tuah nu khat hin Benjamin cu hawh phal ma hi. Itahim titale liamsuah tawk kha kawn tih a lau hang hi.
5Kanaan ngam sungah paam a tun bok hangin midang bangin Israel capate cu an lei tukin hawh haw hi. 6Josef cu Izipt ngamuktu bawi a hih hangin ngam hempoh pen a hungmi hempoh tei lakah an zuak hi. Mah hangin Josef ute vang Josef maiah hungin upatnak tuah a mai haw lei tawngkha tianin kuun haw hi. 7Josef in, amuh ten a u hi tih cu thei naven a thei ngawl bangin um hem hi. Awn li zetin, a lak hawah, “I lai lam pen hung nge uh cim?” tin dong hi.
Amuh ten, “An lei tukin Kanaan ngam lam pen hung ung,” tin donleh haw hi.
8Josef in, a ute hi tih cu thei naven a u ten thei haw ma hi. 9A mangin amu thu le la a mat mite phawkleh a, “Nohte cu mi zawldawttute uh ci. Ka ngamsung uh a, ka zawngkhalnak uhte thei nuamin hung uh ci,” tin ti hi.#Pian 37:5-10;
10Amuh ten, “Bawipa, mah kha ma ung hi. Na sal kohten an lei tuk bekin hung ung. 11Ka venghawng uhin unau hawng ung hi. Bawipa, mipha hi ung hi; mi zawldawttu kha ma ung,” tin ti haw hi.
12Josef in, “Mah kha ma hi, ka ngam uh zawngkhalnak zawldawt nuamin hung hi uh ci,” ti hi.
13Amuh ten, “Bawipa, ka venghawng uhin unau sawm le pa nih ung. Kanaan ngam a, a ummi pa khat i capate ung hi. Ka nautabel uh cu atu-in ka pa uh i lakah innah um hi, ka unau uh pa khat cu thi zo,” tin ti haw hi.
14Josef in, “Ka hilhsa bangin nohte cu mi zawldawttute uh ci. 15Na hi uh le hi uh ngawl ciang tukin hi bangin khingkhai tung: kumpipa i min tuah thutiam ing. Na nautabel uh hi laiah a hung ma tale pin thei tukma uh ci. 16Nangmu lak pen pa kha khatin puita un. Na thu uh a cel laklawh a dang cu thawng khia tung. Mah ahimata kumpipa i minsalin hilh ing: noh cu mi zawldawttu hi hihim uh ci,” ti hi. 17a unau hawng haw in thawnginn sungah ni thum sung khum hih hi.
18A ni thumnak ten Josef in, “Keimah in Pathian ka kihca hangin, ka tih bangin na bawl uh tale thihnak pen luat tuk uh ci. 19Midik na hi ngangai uh tale atu na umnak uh thawnginnah pa khat cu tangta unna, midang cu ngilkialin, a ummi na innkua tei lakah na lei uhmi na an uh tuah pin hihta un. 20na hilh uhmi a man le man ngawl theihnak tukin na nautabel uh ka lakah hunpih hihim un. Mahti bangin na bawl uh tale thihnak pen suakca tuk uh ci,” ti hi.
A unau ten mah thu cu lungkim haw a, 21amuh le amuh cu, “A nau uh Josef hi bangin a bawl uh hi khial ngangai hung hi. Haksatnak a thuak laih mu leng nave hungin hehpih zal un tin, lem li naven ngai kha nuam ma hung hi. Mah hang ven atu-in haksatnak a thuak uh,” tin tidun li haw hi.
22Reuben in, a unau tei lakah, “A naupa uh i humah thilpha ngawl bawl pahsuh un, ti ma ing maw? Ka thu ngai nuamma uh ci. Atu-in, a thihman phulaknak thuak hi hung,” ti hi.#Pian 37:21-22; 23Josef in mah a otlih haw cu thei khawng leng hi; mahnaven amuh ten, a ot haw a theih khawng lam cu thei haw ma hi. Itahim titale Josef tuah a otpihdun haw ten awn lettu mangin otpihdun haw hi. 24Josef cu mundangah hawhin kap pan hi. A kah celh ten a lak hawah hunglehin, amu lak pen Simeon cu kai in, a mitmuh cikcek hawah khaukhihtik hi.
Josef i Ute Kanaan Ah Pin
25Josef in, “A dip haw dimin, an thun unna, a sumpai haw cu a dip sung tek hawah koihleh un, lampi pen a eih haw tuk lam an kenta un,” tin thupia hi, a thupiak bangin a u tei humah bawl haw. 26A u ten a lei haw mi an cu a laak hum hawah suanin pin haw. 27Mah ni tak a ngiahnak hawah a unau haw pa khatin, a laak an pia tukin a dip a hon ten a sumpai cu a dip sung humtabelah mu hi. 28“Ka sumpai kikleh haw, ka dip sungah um,” tin au in, a unaupihte cu hilh hi. Thinsu can tawtok khawng haw a, “Pathian in, a hum uhah i bawl kaw?” tin pa khat le pa khat dongdun haw hi.
29Kanaan ngam a, a pa haw Jakob lakah a hen haw ten, a tawh haw mi le a thuakmi haw hempoh cu a pa haw i lakah hilh haw hi. 30“Izipt ngam uktupa cu ka hum uhah a awn hang zetin, mi zawldawttu uhte ci tin sual nawn hi; 31zawldawttu hi kha ma ung mipha muantakmi ung hi. 32Pa, pa khat i ca, unau sawm le pa nih ung, mahnaven ka unau uh pa khat cu thi zo hi, nautabel cu Kanaan ngam a, ka pa uh i lak a, innah um hi tin hilh ung. 33Mah bawipa in, san tak na hih uh le hih uh ngawl ka theihnak tukin ka lakah pa khat cu zamta un hi, a dang cu ngilkialin, a um na innkua tei ca in an puakta un. 34Na nautabel uh cu ka lakah pui un hi. Mah bek ten mi zawldawttu hi ngawlin san takmi hi uh ci tih thei tung a, na unau pa uh hahleh tung, mahten ka ngamsung uhah na nuanuam uhin thil zuakin lei thei tuk uh ci,” tin, a pa cu hilh haw hi.
35A puak haw mi an cu a suah haw ten a dip sung ten hawah a sumpai haw cu amuh haw ten, a paca hawng haw in thinsuzet haw hi. 36A pa haw Jakob in, “Cano pa khat tuah ngawlin maw na zam tuk uh. Josef cu thi zo, Simeon tale pai zo toh. Atu-in Benjamin lak tum leleu uh ci. Kei hi a thuakbeltu ing ngei,” ti hi.
37Reuben in, “Benjamin na lakah ka kih pihleh uh ma tale ka capa pa nih hi that thei ci ti hi. Benjamin cu ka khut sungah koih inna, kihpih hihim tung hi,” tin, a pa i lakah ti hi. 38A pa in, “Ka capa cu hah thei tuk mang. A u tale thi zo, atu-in amah bek tang hi. Lampi lakah tawh pha ngawl tawk kha kawn. Keimah tale ka kum tamin, tekzet zo ing, lungsiatnak thuak thei tuk hi lehma toh ka hih ten thi ngangai tung,” ti hi.
Currently Selected:
PIANPATNAK 42: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
