PIANPATNAK 44
44
A Paimi Ngun Khuathai
1Josef in, a inncingtu umlawhpa i lakah, “Hi tei dip sungah a puak theih zah haw in an thun inna, a dip sung a humtabelah a sumpai haw koihin hi. 2Ka ngun khuathai hi a nautabel haw i dip sung humtabelah a sumpai tuah koihin hi,” tin tik hi. A hilh bangin a umlawhpa in bawl hi. 3A zingleh zingtungno in, a laak haw tuah pintik haw hi. 4Khua pen dawm a hawh nung haw ten Josef in, a inncingtu umlawhpa i lakah, “Manlangin na tuangtim inna, hite khi hillehin hi. Na phat ten, a pha mi cu ita a sia in lul kam uh ci? 5Ita ka bawipa i ngun khuathai ngu uh cim? Ka bawipa i sabittui a innak hi a, kungkhainak hei in, a maanmi hi. Thil pha ngawl lauhuai bawl uh ci, tin na ti in hi,” ti hi.
6A umlawhpa in, hilin, a phat ten Josef i hilh bangin ti hi. 7Amuh ten, “Bawipa hi bangin na tih lih hi na tih nuammi ikaw? Mahtibang zahta bawl tukin ka ngaihsut khak uh ngawlmi hi. 8Ka dip sung uh a, ka muh uhmi sumpai cu Kanaan ngam pen kengin, na lakah kik le ung hi tih cu thei ci. Mah nungten itin kaw na bawipa i innta sui le ngun cu ka nguk tuk uh? 9Bawipa, keimu lak pen pa kha khatin ka ngu uh tale mah cu thah hihen; mahten midang cu na sal tukin manin hi,” tin ti haw hi.
10Amah in, “Hi hen nei, na tih uhmi cu ka lungkim ing; mahnaven nangmu lak a, pa kha khat lak pen ngun khuathai ka mu ahi tale mahpa bek cu ka salah suak henna, midang cu pin thei tuk uh ci,” ti hi. 11Mah hangin manlang zetin, a dip haw khunin hong tek haw hi. 12Josef i umlawhpa in upabel pa i dip sung pen nautabel pa i dip tian komno in, a zei ten Benjamin i dip sungah ngun khuathai cu na mu hi. 13A tha haw sia leita in, a puan haw botkek haw. A laak tei humah a van haw suanlehin khuasungah kikleh haw hi.
14Judah le a unaupihte Josef i inn a henleh haw ten Josef cu innah na umlaih hi. A maiah bok haw a, 15Josef in, “Na thil bawl uhmi hi i him? Keimah bangin thuneitu mi bawi in kungkhai in, a man leleng tuk hi tih thei ma uh cim?” tin ti hi.
16Judah in, “Bawipa na lakah ot tuk nei ma ung. Itin kaw ka el theih tuk uh? Itin kaw sual ma ung ka tih theih tuk uh? Pathian in ka khelhnak uhte langtik khawng zo hi. Mah hangin bawipa, a dip sung a, ngun khuathai na muh pa bek hi ngawlin ka venghawng uhin, na salin suak khawng ni ung,” ti hi.
17Josef in, “Cangthei tukma, mahti bangin bawl tuk mang. A dip sung a, ngun khuathai amuh mipa bek ka sal hi tuk hi. Midang cu na pa uh i lakah damno in pin un,” ti hi.
Judah In Benjamin Ca Ngen
18Judah cu dingto in, Josef lakah, “Bawipa, hehpihnakin thuhilhnak hun pia hih zal inna, ka humah thinuk zal pahsun, bawipa nang cu amu Izipt ngam a, kumpi bang leng hi ci.” 19Bawipa, nangmah in, “Pa nei uh cim? Unau dang nei uh cim? tin na dot ten, 20Pa nei nave ung tekzet zo, nau nei nave ung naupangno laih. Ka pa uh a tek nungten a neihmi hi. Ka naupa uh i upa cu thi zo hi, amah tuah nu khat sungsuak amah bek a nungca hi; mah hangin ka pa uhin amah cu deih cuang hi,” tin hilh zo ung. 21Bawipa nangmah in, “Na naupa uh cu pui un, mu nuam ing hi,” tin na tih laih khin, 22“Ka pa uh zamsan thei tukma hi, a zam tale ka pa uh cu thi kha tuk hi,” tin ti ung hi. 23nangmah in, “Na naupa uh a hung bokma tale ka mel hei mu thei tukma uh ci,” tin ti ci.
24“Na salpa, ka pa uh lakah ka kihleh uhten, na tih bangin hilh ung. 25amah in, hawhlehta unna, a eih tuk uh an leita un,” tin ti hi. 26Kohten, ‘Hawh tukma ung, itahim titale ka nautabel uh a telma tale, ka hilhmi pa uh tawk thei tukma ung. Ka nautabel uh a tel tale hawh tuk ung,’ ka tih uhten 27Ka pa uhin, “Ka zi Rachel in capa pa nih neihsakin, 28pa khat cu umleh ma toh. Sahangin botbal khawng hi tuk hi tin um ing; itahim titale tuni tiangin mu lehma toh ing. 29Hi a tangmi ka capa la leleu in iti bang tihin, a thi pang tale thi ngangai tung,” ti hi.
30-31“Mah hangin, bawipa, ka pa i lakah keimuh bek kikin, ka nau amu ma tale ka pa uh cu thi tatak tuk hi. Ka pa uh i nunnak cu hi naupang pa i nunnak tuah pehzomdun hi. Ka pa uh hi a tek lam ten thihpih tak lungsiatnak a humah hengtik ngangai kha tuk ung. 32Mah hum pen bawipa, hi ka naupangpa i ca in ka pa i lakah ka nunnak tiamta ing. ‘Na lak a, hi naupangpa ka kihpih uh ma tale na maiah ka nun sung hempoh mikhial hi tung hi,’ tin ka tihsa hi. 33Mah a hih ten, bawipa, atu-in hi naupang pa cu a u tuah pintik zal inna, keimah saw hi nangma salin tang saw nang. 34Naupang pa tel ngawlin itin kaw ka pa i lakah ka pin ngam tuk? Ka pa i thuak tukmi lungsiatnak cu itin kaw ka muh ngam tuk?” tin ti hi.
Currently Selected:
PIANPATNAK 44: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
