PIANPATNAK 45
45
A Suahpih Tei Lakah Josef Phuangdun
1Josef cu a lungmu supleh thei ngawltohin, a umlawh tei lakah, “Mi hempoh tultik un,” tin au hi. Tul khawng haw in, a unau tei lakah Josef ing hi tin, a phuandun ten a elah kuamah um haw ma hi.#Nung 7:13; 2Josef cu kapin, nase zetin, a kah hangin Izipt miten za haw hi. Mah thu cu kumpipa i inn tian zaktheih hi. 3Josef in, a unau tei lakah, “Josef ing hi, ka pa nunglaih maw?” tin dong hi. Mahnaven a unau ten a lau leita haw hangin don ngam haw ma hi. 4Josef in, “Ka bulah nek deuh hem un,” ti in, a nelah a hen haw ten Josef in, Izipt ngam a, na zuak uhmi na nau uh Josef ing hi. 5Atu-in hi ngamah na zuak uh hangin lungsia in, sual nawndun li pahsuh un. Mitei nunnak pan tukin hi munah a hengtiktu ngangai cu Pathian hi. 6Tu kum hi ngamsung a, paam kum, a kum nihnak bek laih hi. Paam kum, kum nga um tuk laih, mah sungin leilet le an cop vang um tukma hi. 7Na casuan uh tianin, a nun theihnak tukin nangmu laih ngawlin Pathian in keimah hah hi. Mi tampi ka pat theihnak tukin le nangmuh tei nunnak tukin hahmi ing. 8Mah hangin hi ngam a hengtiktu ngangai cu nangmuh kha ma uh ci, Pathian hi. Pathian in, kumpipa ca in, a pa bangin bawlin, a ngamsung hempoh hi ka dehvo hi a, uktu ing.
9Atu-in ka pa i lakah manlangin kik unna, na ca Josef in, “Pathian in Izipt ngam hempoh uktu in bawl zo hi. Ka lakah manlangin hungin hi.#Nung 7:14; 10Keimah tuah khawla leita tuk ngawlin Goshen ngamah um ni uhcin, nangmah le na cate, na casuante le na neihmi ngam, tuu, keel le khui hempoh tuah um un hi. 11Goshen ah na um uh tale cingkhawi thah thei tung. Paam kum, kum nga tanglaih a hih ten, nangmah hihen, na innkua le na neihmi ngan hihen, eih tuk nei ngawlin na um sual tuk uh deih mang,” tin na hilh un hi.
12“Atu-in nangmuh le ka naupa Benjamin in, na lak uh a, awn litu hi Josef ing hi tih na mit loli uhin mu khawng zo uh ci. 13Izipt ngamsung a, huham ka neih daan hi ka pa i lakah hilh unna, na tawh uhmi le na muh uhmi hempoh a dang vang hilh khawng un hi. Manlang zetin kikta unna, pa cu hi laiah pui un,” ti hi.
14Josef in, a naupa Benjamin cu pomin, kap hi. Benjamin vangin pomin kap bok hi. 15Mah nungten Josef in, a unaupihte cu pa khat nung pa khat kapthah pomin, nam pepel hi. Mahceng ten a unaupihte tuah thunop sonin, khung langkhat haw hi.
16Josef i unaupihte hung haw tih thu cu kumpipa le a khutnuai bawite vang lungdamzet haw hi. 17Kumpipa in Josef lakah, “Na unau cu a laak haw tuah an pua haw henna, Kanaan ngamah pin haw hen. 18A pa haw le a unaupih dangte vang pui haw henna, ka lakah hung haw hen hi. Izipt ngamsung a, ngam phabel pia tung a, ka ngamsung uh a, suakmi a phabel ei haw tuk hi. 19A zi haw le a cano tei khun tukin Izipt ngam pen cipuh leeng vang keng haw hen. A pa haw pui tukin komno in, na hilhin hi. 20A thilzam haw mite mahel haw pahsuh hen. Itahim titale Izipt ngamsung a, a phabel cu amuta hi tuk poh,” ti hi.
21Israel i capa ten, a hilh bangin bawl haw hi. Kumpipa i thupiak bangin Josef in cipuh leeng pia a, lampiah a eih haw tukin sunsiah vang ken hi. 22A unaupihte cu puansilh vei khat thekdunnak ten pia naven Benjamin cu ngun tangka za thum le puan silh vei nga theknak tuk pia hi. 23Izipt ngamsungah a suakmi thil phabel laak sawm khat puak cu a pa thuan hi. A pa i hunnak sunsiah tukin an, cangho le an nam dadang laak sawm khat puak thuan bok hi. 24A unaupihte cu dawmlaih henin, “Lam lakah haudun pahsuh un,” tin cahta hi.
25Izipt ngam pen tulin Kanaan ngam a, a pa Jakob lakah heng haw hi. 26“Josef nunglaih pah cuh! Izipt ngam hempoh uktu hi,” tin, a pa cu a hilh haw ten, a pa cu lamdang sa in, canzokin sang thei hihim ma hi.
27Mahnaven Josef i thu hilhmi hempoh a hilh haw ten le Izipt ngam pen amah laknak tuk Josef i kuatmi cipuhlengte amuh ten a lungdam leita in umdan tuk hei thiam ma hi. 28Jakob in, “Ka capa Josef nunglaih ngangai hi tih cu ciang ing, na hilh uh hei kulma toh. Hawh nang inna, ka thih laih ngawlin tawkta tung,” tin ti hi.
Currently Selected:
PIANPATNAK 45: NBF1
Highlight
Share
Copy
Want to have your highlights saved across all your devices? Sign up or sign in
Ngawm Bible © Bible Society of Myanmar, 2014.
