ĠENESI 49

Kapitlu 49

L-aħħar barka ta’ Ġakobb

1U Ġakobb sejjaħ lil uliedu u qalilhom: “Inġabru ħdejja ħa nħabbrilkom x’għandu jiġri fl-aħħar jiem:#Dt 33; Mħ 5.

2Inġabru u isimgħu, ulied Ġakobb,

agħtu widen lil Iżrael missierkom.

3Ruben, int il-kbir tiegħi,

il-qawwa tiegħi u l-bikri ta’ rġuliti,

l-ogħla fil-ġieħ,

u l-ogħla fil-qawwa.#Ġen 29,32.

4Imbaqbaq bħall-ilma,

ma togħliex fil-ġieħ.

Għax int tlajt fuq friex missierek,

biex kasbart is-sodda ta’ martu.#Ġen 35,22; 1 Kron 5,1-2.

5Simgħon u Levi aħwa,

għodod il-vjolenza sjufhom.

6Qalbi ma tagħtinix għal laqgħathom,

u ġieħi ma nsibux f’ġemgħathom.

Għax f’għadabhom qatlu n-nies,

u b’kapriċċ qatgħu għerq il-barri.#Ġen 34,25-31.

7Misħut għadabhom għax qalil;

misħuta l-kefrija ta’ qillthom.

Inqassamhom f’Ġakobb,

u nxerridhom fost Iżrael.

8Ġuda, int lilek ifaħħruk ħutek.

Idek fuq ras l-għedewwa tiegħek;

u quddiemek imilu wlied missierek.#Ġen 27,29; 37,7-9.

9Int ferħ ta’ ljun, O Ġuda,

inti ibni mill-priża tiela’.

Bħal iljun imkennen,

mimdud bħal mart l-iljun.

Min se jqajmek?#Num 24,9; 1 Kron 5,2; Apk 5,5.

10Ix-xettru minn id Ġuda ma jitneħħiex;

u l-ħatar minn bejn riġlejh,

sakemm iġibulu l-ħaraġ,

u minnu l-ġnus jisimgħu.#Num 24,17; 2 Sam 7,1; Is 9,5-6; 11,1-2; Mik 5,1-3.

11Jorbot mad-dielja l-felu tiegħu,

u wild il-ħmara maż-żarġun.

Jaħsel fl-inbid ħwejġu, u lbiesu

f’demm il-għeneb.

12Bl-inbid ħomor għajnejh,

u snienu bojod bil-ħalib.

13Żebulun jgħammar f’xatt l-ibħra,

f’xatt l-iġfien jinsab,

b’ġenbu ma’ Sidon.

14Issakar ħmar imgħaddam,

mimdud qalb l-imqawel.

15Ra l-post tajjeb għall-mistrieħ,

u l-art sabiħa.

Għat-tagħbija niżżel spallejh,

u sar ilsir tax-xogħol bilfors.

16Dan jagħmel ħaqq minn niesu,

bħal wieħed mit-tribujiet ta’ Iżrael.#2 Sam 20,18.

17Dan bħal serp fit-triq,

bħal lifgħa fil-mogħdija,

jigdem għarqub iż-żiemel,

u r-rikkieb jinqaleb lura.

18Ħelsienek nistenna, O Mulej.#Is 25,9.

19Gad, il-qtajja’ jaħbtu għalik,

imma int taħbat għal għarqubhom.

20Aser, ħobżu bnin,

u ħlewwiet is-slaten jagħti.#Dt 33,24.

21Naftali għażżiela ħielsa,

li tagħti ġmiel ta’ frieħ.

22Ġużeppi fergħa ta’ siġra għammiela,

fergħa ta’ siġra għammiela ħdejn għajn,

il-friegħi jiżżarġnu fuq il-ħajt.#Dt 33,13-17.

23Qamu għalih u waddbulu l-vleġeġ,

u ħarbtuh l-arċieri.

24Imma l-qaws tiegħu baqa’ sod,

u ħeffu dirgħajh u idejh,

bis-saħħa tal-Qawwi ta’ Ġakobb,

bl-isem tar-Ragħaj u l-Blata ta’ Iżrael.

25B’Alla ta’ missierek,

- jalla jgħinek,

b’Xaddaj,

- jalla jbierkek.

B’barkiet mill-għoli tas-smewwiet,

b’barkiet l-ilmijiet mifruxa taħt l-art,

b’barkiet is-sider u l-ġuf,#Ġen 17,1.

26b’barkiet tal-qmuħ u ż-żahar,

b’barkiet l-iġbla tal-qedem.

L-għaxqiet tal-għoljiet tal-qedem,

ħa jkunu fuq ras Ġużeppi,

fuq il-qorriegħa tal-magħżul fost ħutu.

27Benjamin lupu tal-ħatfa,

filgħodu jiekol il-qabda,

u filgħaxija jqassam il-priża.”

28Dawn huma t-tribujiet kollha ta’ Iżrael, tnax b’kollox, u dan hu l-kliem li qalilhom missierhom hu u jberikhom; u ’l kull wieħed bierku b’barka għalih.

Il-mewt ta’ Ġakobb

29Imbagħad widdibhom u qalilhom: “Jiena sa ninġabar ma’ niesi. Idfnuni ma’ missirijieti, fl-għar li hemm fl-għalqa ta’ Għefron il-Ħitti; 30fl-għar li hemm fl-għalqa ta’ Makfela biswit Mamri fl-art ta’ Kangħan, li Abraham kien xtara mingħand Għefron il-Ħitti, b’qabar tiegħu.#Ġen 23,17. 31Hemm difnu lil Abraham u ’l Sara martu; hemm difnu lil Iżakk u ’l Rebekka martu, u hemmhekk jien dfint lil Lija. 32Mingħand ulied il-Ħittin inxtrat din l-għalqa bl-għar li hemm fiha.”

33Meta Ġakobb temm iwiddeb lil uliedu, ġabar riġlejh fil-friex, ta l-aħħar nifs, u nġabar ma’ niesu.

Currently Selected:

ĠENESI 49: MB20

Highlight

Copy

Compare