YOHANA 3

1KANDI hakaba haroho omuntu owomu Bafalisayo, ibaralye Nikodemo, omulemi wa Bayudaya: 2ogu akaija namberali ekiro, namugambira ati Rabi, tumanyire iwoli mwegesa ayarugire hali Ruhanga: baitu busaho muntu asobora okukora obwokuro’raho obwokora, rundi Ruhanga obwaikara nauwe. 3Yesu yagarukamu namugambira ati, Mali mali nninkugambira nti Omuntu obwatazarwa bwakabiri, tasobora kubona obukama bwa Ruhanga. 4Nikodemo yamugabira ati Omuntu nasobora ata okuzarwa obwaba akuzire? Nasobora okutaha obwakabiri omu nda ya nyina nokuzarwa? 5Yesu yagarukamu ati Mali mali ninkugambira nti Omuntu obwatazarwa amaizi Nomwoyo, tasobora okutaha omu bukama bwa Ruhanga. 6Ekinyakuzarwa omubiri guba mubiri; nekinyakuzarwa Omwoyo guba mwoyo. 7Otahuni’ra nyowe obwokukugambira nti Kibahiki’ra okuzarwa obwakabiri. 8Embeho ehuha nambere egonza, naiwe ohu’ra okuhi’ra kwayo, baitu tomanya nambere eruga, nobuhokuba nambere egenda; nukwo aba ati wena anyakuzarwa Omwoyo. 9Nikodemo yagarukamu namugambira ati Ebigambo ebi bisoboka bita? 10Yesu yagarukamu namugambira ati Niwe mwegesa wa Isareri, torukumanya ebigambo ebi? 11Mali mali ebitumanyire nti Itwe tugamba ebitumanyire, tutebeza ebitwaboine; nainywe timuikiriza ebyokutebeza byaitu. 12Obumbagambire ebigambo ebyensi mutarukuikiriza, muliikiriza muta obundibagambira ebigambo ebyomu iguru? 13Kandi busaho muntu aratembere omu iguru, rundi ogu ayasirimukire okuruga omu iguru, nuwe Mwana womuntu ali omu iguru. 14Kandi nka Musa okuyahanikire enjoka omu irungu, nukwo Omwana womuntu kimusemerire kiti okuhanikwa: 15omuntu wena anyakuikiriza abe nobwomezi obutahwaho omwogu.

16Baitu Ruhanga nukwo yagondeze ati Ensi, nahayo Omwanawe ayazairwe omu wenka, omuntu wena anyakumuikiriza aleke okubura, baitu atunge obwomezi obutahwaho. 17Baitu Ruhanga atatume Mwana Omu Nsi okucwera Ensi omusango; rundi Ensi enjuwe habwe. 18Anyakumuikiriza tacwerwa musango, baitu aturukuikiriza amazire okucwerwa, baitu taikirize ibara Lyomwana wa Ruhanga ayazairwe omu wenka. 19Kandi gunu nugwo musango, omusana guizire omu Nsi, abantu nibagonza omuirima okukira omusana; baitu engeso zabu Zikaba zibihire. 20Baitu omuntu wena anyakukora ekibi, nuwe anoba omusana, kandi taija hali omusana, engesoze zireke okuhanwa. 21Baitu anyakukora ebyamananu aija hali omusana, engesoze zisukurwe, baitu zikakorwa omu Ruhanga.

22Hanyuma yebi Yesu akaija nabegeswabe omu nsi ya Buyudaya; yaikarayo hamu nabo nabatiza. 23Kandi Yohana akaba nabatiza omu Enoni haihi na Salimu, baitu nuho hakaba hali amaizi maingi: baija babatizibwa. 24Baitu Yohana akaba atakatairwe omu nju yenkomo. 25Kandi abegeswa ba Yohana bakatera empaka hamu Nomuyudaya omu bigambo byokusemeza. 26Baija hali Yohana bamugambira ngu Rabi, ogu akabali hamu naiwe nseri ya Yorudani, ouwagambireho, dora ogu nabatiza, abantu bona nibaija namberali. 27Yohana yagarukamu nagamba ati Omuntu tasobora kuhebwa ekigambo, rundi kimuherirwe okuruga omu iguru. 28Inywe muli nakaiso bange okunagambire nti Nyowe tindi Kristo,, baitu nkatumibwa okumwebembera. 29Anyakuina omugole nuwe muswezi: baitu enganjani yomuswezi ayeme’ra namuhu’ra asemererwa muno obwiraka lyomuswezi: okusemererwa kwange oku nukwo kuhuikirire. 30Uwe kimuhikirire okukura, baitu nyowe okufoka omuto.

31Aruga gaiguru alemu byona: owomunsi ali wa ha Nsi, agamba ebya ha Nsi: aruga omu iguru alema byona. 32Ekiyaboine nekiyahulire nikyo agamba; kandi busaho muntu aikiriza ebigambobye. 33Anyakuikirize ebigambobye, buli ataireho akokuro’rahoke ngu Ruhanga wa Mananu. 34Baitu ogu Ruhanga ouyatimire agamba ebigambo bya Ruhanga: baitu tagabira Mwoyo omu ndengo. 35Isitwe nagonza Omwana, amuhaire byona omu mukonogwe. 36Anyakuikiriza obutahwaho; baitu ataikirize Mwana talibona bwomezi, baitu ekiniga kya Ruhanga kiikaire haluwe.

Currently Selected:

YOHANA 3: BRR64

Highlight

Copy