तोलिङ्सोमु 20
20
अब्राहाम नु अबिमेलेक
1खे़ॽयोलाम् अब्राहाम्मिन् नेगेब ते़ङ्गप् ले़प्माङ् थासिङ्, हे़क्क्याङ् कादेस नु सुर लाजेःल्ले़ कुलुम्मो युङ्मा हेःक्ते़॥ खे़न् एगाङ् खुने़ॽ सप्फा गरार लाजेॽओ युङे़॥ 2खे़प्मो अब्राहाम्मिल्ले़ साराःल्ले़ कुबान् पाःत्तु, “खुने़ॽग आन्साॽरो॥” खे़ल्ले़चोगुल्ले़ गरारबा हाङ् अबिमेलेक्किल्ले़ सारान् खुने़ॽओ ताःप्पाङ्घुसिआङ् मे़देॽरु॥ #तोलिङ् १२:१३, २६:७
3कर थिक्ले़ङ् से़न्दिक् अबिमेलेक्किल्ले़ निङ्वाॽफुमाङ्ङिन् ओसेःन्धाक्सिङ्ङाङ् अक्खे मे़त्तुबा से़प्माङ् माक्तु, “आल्ल खे़ने़ॽ के़सिःॽ थेआङ्भे़ल्ले़ खे़न् मे़न्छुमान् वेॽ मनारे़ कुहिम्सामारो॥”
4कर अबिमेलेक्किन् खे़न् मे़न्छुमान्नु मे़न्इम्मे वये़, हे़क्केःल्ले़ खुने़ॽ मे़त्तु, “यहवे दाङ्बाए, खे़ने़ॽ फोत्या मेःन्नेबा मे़न्छाम् सुवाङ्ङिन् के़से़रुबाबि? 5‘खुने़ॽग आन्जेलिमा आन्साॽरो’ लॽरिक् अब्राहाम्मिल्ले़ पाःत्तुआङ् मे़वये़ने़न्नाङ्बि? हे़क्क्याङ् कल्ले़आङ् ‘खुने़ॽग आङ्गाॽ आम्भुॽरो’ लॽरिक् पाःत्तुआङ् मे़वये़न्नाङ्बि? आङ्गाॽग कन् पाःन्निन् नुबा निङ्वाॽ नु कुदोःप्माआङ् चोगुङ्बारो॥”
6खे़ब्याङ् निङ्वाॽफुमाङ्ङिल्ले़ अबिमेलेक्किन् से़प्माङ्ङो मे़त्तु, “ओबे़, खे़ने़ॽ नुबा निङ्वाॽरे़ के़जोगुबा फाॽआङ् आङ्गाॽ निसुङ्॥ हे़क्केःल्ले़ चोगुल्ले़ खे़ने़ॽ आदक्ले़ङ्वाओ लायो चोःक्मालाम् आङ्गाॽ साक्ने़बारो, हे़क्क्याङ् आङ्गाॽ खे़न् सुमे़बाङ्ने़न्बारो॥ 7आल्ल खे़न् मनाःल्ले़ कुमेःत्तिन् नुःक्ते़ पिरे़ॽ, थेआङ्भे़ल्ले़ खे़ङ्ग माङ्निङ्वाॽपान् के़बाःप्पा मनारो॥ खे़ल्ले़ तुवा के़जोक् के़बि, हे़क्क्याङ् खे़ने़ॽ के़हिङ्लो॥ कर कुमेःत्तिन् के़न्नुःक्तुन्ने़फाग्र कन् पाःन्निन् निस्से कुसिङ्निःत्ते़ॽ, खे़ने़ॽ नु के़मनाहाॽ के़स्ये़ॽइरो॥”
8अबिमेलेक्किन् कुनाम्दाःप्मा तानाम् हारावरा पोगे़आङ् के़रे़क् कुसुहाङ्युक्पाहाॽ उःत्तुसिआङ् कन् के़रे़क् पाःन्हाॽ चे़क्तुसि॥ खम्ब्याङ् खे़ङ् मनाहाॽ साॽरिक् मे़गिसे़॥ 9खे़ब्याङ् अबिमेलेक्किल्ले़ अब्राहाम्मिन् उःत्तुआङ् मे़त्तु, “खे़ने़ॽ आनिगे याप्मि थे के़मे़त्ते़बाबे? आङ्गाॽ खे़ने़ॽ के़धे फे़त्लाःन्दुङ्ङाङ् वये़आङ् आङ्गाॽ नु आहाङ्जुम्मो कन् यारिक् यम्बा लायो ताःप्मारे़ लागि खे़ने़ॽ आङ्गाॽनु मे़न्जोःक्मा याःम्बक् के़जोगुरो!” 10अबिमेलेक्किल्ले़ याम्मो अब्राहाम्मे़न् मे़त्तु, “खे़ने़ॽ थे के़इःत्तुआङ् कम्भदाङ्बा याःम्बक् के़जोगुबे?”
11अब्राहाम्मिल्ले़ मे़त्तु, “कन् ते़न्नो निङ्वाॽफुमाङ्ङिन् के़गिप्पा मना लत्छाआङ् होप् के़लॽबा आङ्गाॽ इःत्तुङ्ङाङ् वये़, हे़क्क्याङ् आमेःत्तिल्ले़ चोगुल्ले़ आङ्गाॽ मे़से़त्ताबि फाॽआङ् इःत्तुङ्॥ 12से़क्खाःल्ले़ खुने़ॽग आङ्गाॽ आन्साॽएरो॥ खुने़ॽ आम्बारे़ए कुस्सारो कर आम्मारे़ कुस्सा मेःन्लो॥ हे़क्क्याङ् खुने़ॽ आहिम्सामा पोःक्खे़रो॥ 13निङ्वाॽफुमाङ्ङिल्ले़ आङ्गाॽ आम्बारे़ कुहिम्मिन् ले़प्मारे़ लागि उःत्ताङ् हे़क्क्याङ् नाना कत्नाना ताक्के़गम्बाआङ् के़वाॽबा लाम्दिःक्पा चोगाङ्, खे़बे़ल्ले़ आङ्गाॽ लुङ्माॽ तुक्ताङ्ङे़ॽआङ् मनाहाॽ ‘खुने़ॽग आङ्गाॽ आम्भुॽरो’ मे़त्ते़से़ॽ फाॽआङ् सारान् मे़त्तुङ्ङाङ् वये़॥”
14खे़ब्याङ् अबिमेलेक्किल्ले़ मे़ल्लुक्, पित्हाॽ, से़वारोबा से़वारोमाहाॽ तारुसिआङ् अब्राहाम्मिन् पिरु, हे़क्क्याङ् कुमेत् सारान् नुःक्तुबिरु॥ 15हे़क्क्याङ् अबिमेलेक्किल्ले़ अब्राहाम्मिन् मे़त्तु, “ओमत्ते़ॽ, आङ्गाॽ आलाजेन् खे़ने़ॽ के़दगाङ्ङे ने़ःॽ, आत्तान् के़सिराॽथाङ् खे़प्मोए युङे़ॽ॥”
16खुने़ॽ सारान् मे़त्तु, “आङ्गाॽ हे़न्छिङ् थिक् युप्पायाङ् के़म्भुॽ पिरुङ्ङाङ् वाॽ॥ कन् खे़ने़ॽ ताप्फे़ःम्बा याःम्बक् थेआङ् मे़न्जोःक्के के़वाॽ फाॽआङ् मिक्सेःन्ले़ लागि के़रे़क् मनाहाॽरे़ खुन्छिॽ तगि चोगुङ्ङाङ् वाॽआरो॥ कङ्ग आङ्गाॽ खे़ने़ॽ ताफे़ःम्बा चोगुङ्ङाङ् वाॽबि फाॽआङ् के़माङ्गे़न्ना फोःङ्ने़ पिने़बारो॥”
17खे़ब्याङ् अब्राहाम्मिल्ले़ निङ्वाॽफुमाङ्ङिन् पेलि फाक्तु, हे़क्क्याङ् निङ्वाॽफुमाङ्ङिल्ले़ अबिमेलेक्के़न्, कुमेःत्तिन् हे़क्क्याङ् कुसे़वारोमाहाॽ याम्मो सागप्मा मे़सुक्ल फाॽआङ् खे़ङ्हाॽ वेःन्दुसि॥ 18थेआङ्भे़ल्ले़ अबिमेलेकरे़ अब्राहामरे़ कुमेःत्तिन् तेॽरुआङ् वये़बाल्ले़ चोगुल्ले़ यहवे दाङ्बे़ल्ले़ के़रे़क् मे़न्छुमाहाॽ सागप्मा मे़न्छुक्मना चोगुसिआङ् वये़रो॥
Currently Selected:
तोलिङ्सोमु 20: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
