तोलिङ्सोमु 21
21
साराःल्ले़ इसहाक्के़न् कत्तु
1आल्ल यहवे दाङ्बाल्ले़ पाःत्तुबा इसिःक् खुने़ॽ सारान् मुॽइसाम् पिरु, हे़क्क्याङ् खुने़ॽ चोगुबा माङ्हुप्पिन् के़त्तु॥ 2सारान् मे़न्छुक्मा पोःक्खे़, हे़क्क्याङ् निङ्वाॽफुमाङ्ङिल्ले़ मे़त्तुआङ् वये़बा ये़म्मो खुने़ॽ अब्राहाम्मे़न् काप्पोबा तुम्से़ल्ले़ ये़म्बित्छा साधिक् कत्तुबिरु॥ #हिब्रु ११:११ 3साराःल्ले़ कत्तुबिरुबा खुने़ॽ कुस्सान् अब्राहाम्मिल्ले़ इसहाक मिङ् वाःत्तु॥ 4अब्राहाम्मिल्ले़ खुने़ॽ कुस्सा इसहाक्के़न् ये़त्छि ये़न् योरे़ल्ले़ निङ्वाॽफुमाङ्ङिल्ले़ इङ्जाङ् पिरुबा इसिःक् खे़न् हर्दो हे़गुबिरु॥ 5अब्राहाम्मिल्ले़ कुस्सा इसहाक्के़न् वये़ल्ले़ खुने़ॽ किप् थिक् तङ्बे के़रे़आङ् वये़॥
6साराःल्ले़ पाःत्तु, “यहवे दाङ्बाल्ले़ आङ्गाॽ लत्छा एःप्मा के़युबा#२१:६ एःप्मा के़युबा—हिब्रुओ इसहाक मिङ्ङे़ल्ले़ कुबेन् “खुने़ॽ एःत्” पोङ्ॽ (१७:१७-१९ ओ आङ् ओमे़त्ते़ॽ)॥ पाःन्धिक् पिराङ्लो॥ कन् पाःन्निन् के़घे़म्बा के़रे़क् आङ्गाॽनु मे़एःत्लो॥” 7खुने़ॽ याम्मो पाःत्तु, “साराःल्ले़ अङे़ःक्वान् नुधुक्तु के़लॽबा हाःत्ले़ अब्राहाम्मे़न् आभे़ल्ले़ मे़त्तुआङ् वये़ग? हे़क्केसाङ् खुने़ॽ कुगाप्पो तुम्मो आङ्गाॽ खुने़ॽ लत्छा ये़म्बित्छा साधिक् कत्तुङ् पिरुङ्ङाङ् वाॽ॥”
8अङे़ःक्वान् पोरे़र पेगे़, हे़क्क्याङ् खे़ल्ले़ नु थुङ्मा ले़रु॥ हे़क्क्याङ् इसहाक्ले़ नुधुङ्मा ले़रुबा ये़न्नो अब्राहाम्मिल्ले़ लत्छा यम्बा साभःङ्जा से़सु॥
हागारे़न्नु इस्माएल्ले़न् मे़लःत्तु मे़देसुसि
9कर मिस्रि हागारे़ल्ले़ अब्राहाम्मे़न् सा कत्तु पिरुबा इस्माएलरे़ इसहाक्के़न् के़ॽरुबा#२१:९ कुभा उनाहुरिबा हिब्रु पाःन्ले़ङ्हाॽओ “इस्माएलरे़ इसहाक्के़न् के़ॽरुबा” मे़बत्ने़न्॥ कर “इस्माएलरे़ के़ॽरुर यागे़” रक् पत्॥ साराःल्ले़ निसु॥ 10खे़ल्ले़चोगुल्ले़ खुने़ॽ अब्राहाम्मे़न् मे़त्तु, “कङ् योःग्मान् कुस्साःन्नु सोरिक् लःत्ते़देसे़से़ॽ, थेआङ्भे़ल्ले़ कङ् योःग्माल्ले़ कुस्सान् आङ्गाॽ आस्सा इसहाक्के़न्नु लक्के़घोबा पोङ्मा मे़घोसुन्॥” #गला ४:२९-३०
11कन् पाःन्निल्ले़ अब्राहाम्मे़न् साॽरिक् कुनिङ्वाॽ तुगे़, थेआङ्भे़ल्ले़ इस्माएल्ले़न्नाङ् खुने़ॽए कुस्सा वये़॥ 12कर निङ्वाॽफुमाङ्ङिल्ले़ अब्राहाम्मे़न् मे़त्तु, “खे़न् अङे़ःक्वान् नु के़से़वारोमाल्ले़ कुलागि खे़ने़ॽ के़निङ्वाॽ मे़न्दुक्केॽ॥ साराःल्ले़ के़मे़प्पा हे़क्केए चोगे़ॽ, थेआङ्भे़ल्ले़ इसहाकलाम्बाए आङ्गाॽ माङ्हुप् चोगुङ्बा के़मुॽइदाङ्साहाॽ मे़बोङ्लो॥ #रोमि ९:७; हिब्रु ११:१८ 13खे़न् सेवारोमाल्ले़ कुस्सालाम्माङ् आङ्गाॽ लत्छा मे़न्छाम् सुवाङ् चोगुङ्सिङ्ॽ, थेआङ्भे़ल्ले़ खे़न्नाङ् खे़ने़ॽए के़स्सारो॥”
14हे़क्केःल्ले़ अब्राहाम्मिन् कुदाःन्दिक् खाओःत्ते़नुमे़ःन्ने तानाम्सा पोगे़, हे़क्क्याङ् खरे़ःङ् नु सेहोॽबा सुक्वाओ च्वाःत्ते़न् केःत्तुआङ् हागारे़ल्ले़ कुभक्ताङ्ङो युक्खुबिरु, अङे़ःक्वाःन्नाङ् कुएःक्को कुःत्तुआङ् पाङ्घुदेसु॥ हे़क्क्याङ् हागारे़न् बेर्सेबाबा मुरे़क् खारे़क् थेआङ् के़होप्पा एःक्सादे़न् हे़ङ्गात्ति ताक्कम्मा हेःक्ते़॥
15सेहोॽबा सुक्वाओ च्वाःत्तिन् मारे़ल्ले़ खुने़ॽ अङे़ःक्वान् ते़क्से़क्से़ःक्पा सिङ्बुङ्धिक्ले़ कुबुङ्ङो ने़स्सु॥ 16खे़ब्याङ् खुने़ॽ चैं तोःङ्धिक् आप्मे़ल्ले़ के़गे़प्पा थारिक् नानाक् पेआङ् युङ्सिङ्, थेआङ्भे़ल्ले़ खे़ल्ले़ कन् अङे़ःक्वाःल्ले़ कुसक्मा पेःक्पा ओमे़प्मा मे़बोङ्ने़ल्ल फाॽआङ् इःत्तु॥ हे़क्क्याङ् खे़प्मो युङ्सिङ्ङाङ् उःक्काङ् उःक् हाःप्मा हेःक्ते़॥
17निङ्वाॽफुमाङ्ङिल्ले़ अङे़ःक्वान् हाबे़बा इक्लान् खे़प्सु॥ हे़क्क्याङ् निङ्वाॽफुमाङ्ङिल्ले़ कुमाङ्लाइङ्बाल्ले़ साङ्ग्राम्पेदाङ्लाम्बा हागारे़न् मे़त्तु, “हागारे, खे़ने़ॽ थे़मा तुक्खेन् के़दुमुबे? मे़ङ्गिए़ॽ, थेआङ्भे़ल्ले़ अङे़ःक्वान् ने़बा ते़न्नोलाम् खे़न् हाःप्पे़न् निङ्वाॽफुमाङ्ङिल्ले़ खे़प्सुआङ् वाॽरो॥ 18पोगे़ॽ, पेगे़ॽआङ् अङे़ःक्वान् पक्खे़ हे़क्क्याङ् कुहुक्को ते़म्से़ फत्छे़ॽ॥ थेआङ्भे़ल्ले़ खे़ल्ले़ कुधाःक्हाॽलाम्बा आङ्गाॽ लत्छा यम्बा मे़न्छाम् सुवाङ् चोगुङ्सिङ्॥”
19हे़क्क्याङ् निङ्वाॽफुमाङ्ङिल्ले़ हागारे़ल्ले़ कुमिक्किन् हन्दु पिरु, हे़क्क्याङ् खे़ल्ले़ वाबाक् थिक् निसु॥ खे़ब्याङ् खे़न् पेआङ् सेहोॽबा सुक्वाओ च्वाःत्ते़न् फाःत्तु फे़त्तुआङ् अङे़ःक्वान् थुङ्सु॥
20हे़क्क्याङ् निङ्वाॽफुमाङ्ङिन् अङे़ःक्वाःन्नु वये़, हे़क्क्याङ् खे़न् यम्बा पोःक्खे़॥ हे़क्क्याङ् एःक्सादे़न्नो युङे़आङ् कुसुर के़नुॽबा तोङ् लि के़आप्पा मना पोःक्खे़॥ 21खुने़ॽ पारानबा एःक्सादे़न्नो युङे़ल्ले़ कुम्मारे़ लत्छा मिस्र लाजेॽबा मे़न्छुमाधिक् कुलागि मेःत् तारुबिरु॥
अब्राहाम नु अबिमेलेक्के़ल्ले़ चोगे़त्छुबा माङ्हे़क्
22खे़न् ये़म्मो अबिमेलेक्के़न् नु खुने़ॽ कुधक्सुबाहाॽरे़ खुनिॽ थक्मोबा पिकोलरे़ अब्राहाम्मे़न् मे़त्ते़छु, “खे़ने़ॽ के़जोगुबा के़रे़क् पाःन्हाॽओ निङ्वाॽफुमाङ्ङिन् खे़ने़ॽनु वाॽ॥ #तोलिङ् २६:२६ 23खे़ल्ले़चोगुल्ले़ आल्ल निङ्वाॽफुमाङ्ङिल्ले़ कुदगि खे़ने़ॽ आङ्गाॽनु इग्र आस्साहाॽनु इग्र आम्मे़न्छाॽ आजक्मे़न्छाॽहाॽनु इङ्ले़क्पा याःम्बक् मे़जोक्कान् फाॽआङ् माङ्बाचा हे़क्सिङ्ङे़ॽ॥ हे़क्क्याङ् खे़ने़ॽ वेॽ लाजेॽलाम् के़द्ये़आङ् के़युङ्बा कन् लाजेॽओबा मनाहाॽनु, आङ्गाॽ खे़ने़ॽ नुरिक् मे़त्ने़बा हे़क्केए चोगे़ॽओ॥”
24अब्राहाम्मे़ल्ले़ मे़त्तुसि, “आङ्गाॽ माङ्हुप् चोगुङ्लो॥”
25खे़ब्याङ् अबिमेलेक्के़ल्ले़ कुसे़वारोबाहाॽरे़ साक्के़ले़क्काङ् मे़नाप्तु मे़देॽरुबा वबाक्किल्ले़ कुयाःम्बेओ अब्राहाम्मे़ल्ले़ अबिमेलेक्के़न् पान् मे़त्तुर चे़क्तु॥ 26हे़क्केःल्ले़ अबिमेलेक्के़ल्ले़ मे़त्तु, “हाःत्ले़ अक्खे चोगु आङ्गाॽ मे़न्निबा॥ खे़ने़ॽ के़म्मे़त्ताङ्ङिन् हे़क्क्याङ् कन् पाःन्निन् आङ्गाॽ आइन्लक् खे़प्सुङ्॥”
27खे़ल्ले़चोगुल्ले़ अब्राहाम्मे़ल्ले़ मे़ल्लुक् नु पित्हाॽ तारुसिआङ् अबिमेलेक्के़न् पिरु, हे़क्क्याङ् ने़प्मजाङ्ले़ माङ्हुप् चोगे़त्छु॥ 28अब्राहाम्मे़ल्ले़ मे़ल्लुक् लुप्पोलाम् नुसि कुम्मामा मे़ल्लुक्साःत्हाॽ से़न्दु लःत्तुसि॥ 29हे़क्क्याङ् अबिमेलेक्के़ल्ले़ अब्राहाम्मे़न् सेःन्दोसु, “थेआङ् खे़ने़ॽ नुसि कुम्मामा मे़लुक्साःत्हाॽ के़से़न्दु के़लःत्तुसिबाबे? कल्ले़ कुबेन् थेग?”
30अब्राहाम्मे़ल्ले़ मे़त्तु, “कन् वबाक्किन् आङ्गाॽए तयुङ्बा फाॽआङ् खे़ने़ॽ आङ्गाॽ तोःन्दि पिमारे़ लागि कन् नुसि कुम्मामा मे़लुक्साःत्हाॽ आङ्गाॽ आहुक्कोलाम् खे़ने़ॽ तेॽरे़से़ॽओ॥”
31खे़ल्ले़चोगुल्ले़ खे़न् ते़न्निल्ले़ कुमिङ् बेर्सेबा#२१:३१ बेर्सेबा—हिब्रुओ कल्ले़ कुबेन् “माङ्हुप् वबाक्” इग्र “नुसि वबाक्” पोङ्ॽ (२६:३३ ओ आङ् ओमे़त्ते़ॽ)॥ पोःक्खे़, थेआङ्भे़ल्ले़ खे़प्मो खुन्छिॽ ने़प्मजाङ् माङ्हे़क्ने़छिआङ् वये़सि॥
32अक्खेलॽरिक् खुन्छिॽ बेर्सेबाओ माङ्हे़क्ने़छिआङ् अबिमेलेक्के़न् नु कुधक्सुबाहाॽरे़ खुनिॽ थक्पेबा पिकोले़न् पलिस्तिहाॽरे़ खुनिॽ लाजेॽओ नुःक्खे़त्छि॥ 33अब्राहाम्मे़ल्ले़ बेर्सेबाओ लत्छा तामारिस्क मे़प्मनाबा सिङ्बुङ् थिक् लेःत्तु, हे़क्क्याङ् खे़प्मो आभे़ल्ले़ना आभे़ल्ले़साङ् के़वाॽबा नुप्मे़न्दिङ् यहवे दाङ्बा निङ्वाॽफुमाङ्ङिल्ले़ कुमिङ्ङो पेलि फाक्तु॥ 34खे़न् एगाङ् अब्राहाम्मे़न् पलिस्तिहाॽरे़ खुन्छिॽ लाजेॽओ यरिक् ये़म् थारिक् युङे़॥
Currently Selected:
तोलिङ्सोमु 21: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
