तोलिङ्सोमु 22
22
निङ्वाॽफुमाङ्ङिल्ले़ अब्राहाम्मे़न् कुनिङ्वाॽ साॽरु
1कुभा ये़म् एगाङ् निङ्वाॽफुमाङ्ङिल्ले़ अब्राहाम्मे़न् कुनिङ्वाॽ साॽरु, हे़क्क्याङ् खुने़ॽ मे़त्तु, “अब्राहाम्मे॥” #हिब्रु ११:१७-१९
हम्भे़ल्ले़ खे़ल्ले़ खुने़ॽ मे़त्तु, “है, आङ्गाॽ आम्भा कॽयो वाॽआरो॥”
2खे़ब्याङ् निङ्वाॽफुमाङ्ङिल्ले़ अब्राहाम्मे़न् मे़त्तु, “खे़ने़ॽ के़स्सा, खे़ने़ॽ साॽरिक् लुङ्माॽ के़दुक्तुबा लत्थिक्लक् के़स्सा इसहाक्के़न् मोरियाह लाजेॽओ तेॽरे़आङ् पेगे़ॽ हे़क्क्याङ् आङ्गाॽ ओसेःन्धाक्ने़बा कोःक्माओ खे़न् मिधिङ्मनादेमनाबा सिदुङ्जभा कुइसिक् सिदुङ्जभा तोःन्दे़ॽ॥” #२ साप्मु ३:१
3अब्राहाम्मे़न् खाओःत्ते़नुमे़ःन्ने तानाम्सा पोगे़आङ् अदङ्ङिन् कक् कुःत्तु, हे़क्क्याङ् ने़प्फु कुसे़वारोबाहाॽ नु कुस्सा इसहाक्के़न् तेॽरुसि॥ हे़क्क्याङ् वयागे़न् सिदुङ्जभा मिधिङ्मा सिङ् खे़रु, खे़ब्याङ् निङ्वाॽफुमाङ्ङिल्ले़ मे़त्तुबा ते़न्नो खुने़ॽ थासिङ्॥ 4लाम्दिक् मे़जोगे़बा सुम्यान् के़रे़ल्ले़ अब्राहाम्मे़न् अक्खे ओमये़, हे़क्केःल्ले़ खुने़ॽ खे़न् ते़न्निन् माःङ्घालाम् निसु॥ 5खे़ब्याङ् अब्राहाम्मे़ल्ले़ खे़न् ने़प्फु कुसे़वारोबाहाॽ मे़त्तुसि, “खे़न्छिॽ हाबा कॽयो अदङ्ङिन्नु युङे़से़ॽ॥ कन् चुक्पे़न् नु आङ्गाॽ चिनानाक् पित्छिगे़ हे़क्क्याङ् माङ्से़वा चोःक्सिगे़आङ् खे़न्छिॽओ आन्छिगे नुःङ्सिगे़ फे़न्छिगे़॥”
6अब्राहाम्मे़ल्ले़ मिधिङ्मनादेमनाबा वयागे़न् सिदुङ्जभाःल्ले़ लागि सिङ्ङिन् पक्खुआङ् इसहाक्के़न् कुःत्तु, हे़क्क्याङ् मि नु कार्दाःन् याङ्सिङ्॥ अक्खेलॽरिक् खे़ङ्हाॽ ने़प्मजाङ् सोरिक् पेगे़त्छिर पत्छे़सिल्ले़, 7इसहाक्के़ल्ले़ कुम्बा अब्राहाम्मे़न् मे़त्तु, “आम्बौ?”
कुम्बारे़ मे़त्तु, “थेग पाबुए?”
कुस्साःल्ले़ मे़त्तु, “कन् मिन् नु सिङ्ङिङ्ग वाॽ, कर वयागे़न् सिदुङ्जभा तोःम्मा थुःम्बाःङ्ग आत्ति वाॽबे?”
8अब्राहाम्मे़ल्ले़ मे़त्तु, “आस्साए, मिधिङ्मनादेमनाबा वयागे़न् सिदुङ्जभारे़ लागि थुःम्बाःन् निङ्वाॽफुमाङ्ङिल्ले़ आबाङे तारु आबिॽ॥” हे़क्क्याङ् खे़ङ्हाॽ ने़प्माङ् सोसोरिक् पेसि॥
9निङ्वाॽफुमाङ्ङिल्ले़ खुने़ॽ मे़त्तुबा ते़न्नो खुन्छिॽ के़रे़त्छि, हे़क्क्याङ् अब्राहाम्मिल्ले़ खे़ॽयो लत्छा ले़त्ति तोःम्मादे़न् थिक् चोगुआङ् सिङ्ङिन् खे़ॽयो कुधाॽकुधाॽ से़त्तु॥ हे़क्क्याङ् कुस्सा इसहाक्के़न् इघेःक्खुआङ् ले़त्ति तोःम्मा ते़न्नो सिङ्सम्धाङ् ने़स्सु॥ #याकु २:२१ 10खे़ब्याङ् अब्राहाम्मिल्ले़ आबाङे कुस्सान् वयागे़न् सिदुङ्जभा चोःक्मारे़ लागि कार्दाःन् थाःङ् फोःक्खु॥ 11कर यहवे दाङ्बे़ल्ले़ कुमाङ्ला इङ्बाधिक् साङ्ग्राम्पेदाङ्लाम् अःक्ते़आङ् मे़त्तु, “अब्राहाम्मे, अब्राहाम्मे!”
खुने़ॽ मे़त्तु, “आङ्गाॽ हाबा कप्मोए वाॽआरो॥”
12खे़ल्ले़ मे़त्तु, “खे़न् चुक्पे़न् हुक्मे़याक्ते़न्ने़ॽओ, हे़क्क्याङ् खे़न् थेआङ् मे़मे़त्ते़न्ने़ॽओ॥ खे़ने़ॽ निङ्वाॽफुमाङ्ङिन्नु के़गिरत्छ के़लॽबान् आल्ल आङ्गाॽ निङ्वाॽ खोसुङ्लो, थेआङ्भे़ल्ले़ खे़ने़ॽ के़स्सा, लत्थिक्थिक् के़स्साःन्नाङ् आङ्गाॽलाम् के़न्दाङ्घुन् के़न्युक्खुल्लो॥”
13अब्राहाम्मे़न् थो ले़प्माङ् ओमये़ हे़क्केःल्ले़ खुने़ॽ लत्छा थुःम्बाधिक् फात्ताप्पो कुदाङ्ङिन् हाप्तुआङ् ये़बे़बा निसु॥ हे़क्क्याङ् खुने़ॽ पेआङ् खे़न् थुःम्बाःन् युरु, हे़क्क्याङ् खुने़ॽ कुस्साःल्ले़ कुले़क्वा खे़न् वयागे़न् सिदुङ्जभा तोःन्दु॥ 14खे़ल्ले़चोगुल्ले़ अब्राहाम्मे़ल्ले़ खे़न् ते़न्निन् “यहवे दाङ्बाल्ले़ तङ्गाम् चोगु आबिॽ” मिङ् वाःत्तु॥ मनाहाॽरे़ आल्ल थारिक्साङ् “यहवे दाङ्बाल्ले़ कुगोःक्माओ तङ्गाम् चोगु आबिॽ” फाॽआङ् मे़बाःत्तुरो॥
15यहवे दाङ्बाल्ले़ कुमाङ्ला इङ्बे़ल्ले़ निसिगेक्पाले़ङ् अब्राहाम्मे़न् साङ्ग्राम्पेदाङ्लाम् अःक्ते़आङ् मे़त्तु, 16“यहवे दाङ्बाल्ले़ पाःत्तु, ‘आङ्गाॽ आबाङे आमिङ्ङो माङ्हे़क्सिङ्ङाआङ् वाॽआ, खे़ने़ॽ कङ् याःम्बक्किन् के़जोगुबाल्ले़ हे़क्क्याङ् खे़ने़ॽ के़स्सा, लत्थिक्थिक् के़स्साःन्नाङ् 17के़न्दाङ्घुम्बाल्ले़ चोगुल्ले़ आङ्गाॽ से़क्खाए हाङ्वागे़न् मुॽइसाम् पिने़॥ #हिब्रु ६:१३-१४ खे़ने़ॽ के़मुॽइदासाहाॽ फोसुङ्सिङ्ङाङ् ताङ्साक्कोबा खेःम्सिक्पाहाॽ नु वरःङ्ङिल्ले़ कुयाओबा ये़ःङ्घा यारिक् यरिक् चोगुङ्सिङ्ॽ॥ खे़ने़ॽ के़मुॽइदाङ्साहाॽरे़ खुनिॽ निङ्मिहाॽरे़ खुन्छिॽ ये़क्यक्हाॽ मे़नाप्तुसिरो॥ 18खे़ने़ॽ के़मुॽइदाङ्साहाॽ लाम्बाए इक्सादिङ् खाम्बेःक्मोबा के़रे़क् मे़न्छाम् सुवाङ्हाॽरे़ हाङ्वागे़न् मुॽइसाम् मे़घोसुॽ, थेआङ्भे़ल्ले़ खे़ने़ॽ आङ्गाॽ आबाःन्जाःक्किन् के़घे़प्सुरो॥’” #सेःक्युक् ३:२५
19खे़ब्याङ् अब्राहाम्मे़न् सेवारोबाहाॽओ नुःक्खे़ फे़रे़, हे़क्क्याङ् खे़ङ्हाॽ बेर्सेबा थारिक् सोसोरिक् मे़बे॥ हे़क्क्याङ् अब्राहाम्मे़न् बेर्सेबा ये़क्यक्को युङे़॥
नाहोरले़ कुमुॽइदाङ्साहाॽ
20मिसाक् याङ्सि मिल्काःल्ले़आङ् के़न्साॽ नाहोरे़न् ये़म्बित्छासाहाॽ कत्तु पिरु के़लॽबा पान् अब्राहाम्मिल्ले़ खे़प्सु॥
21तुम्बे़न् उज, खे़ल्ले़ कुन्साॽ बुज,
हे़क्क्याङ् कमुएल (आराम्मिल्ले़ कुम्बा),
22हे़क्क्याङ् केसेद, हजो, पिल्दास, यिदलाप नु बतुएल॥
23बतुएलरे़ रिबेकान् कत्तु॥
कङ् ये़त्छि ये़म्बित्छासाहाॽ अब्राहाम्मिल्ले़ कुन्साॽ नाहोरलाम् मिल्कारे़ कत्तुसि॥
24कङ्हाॽनुःल्ले़ वेॽ रुमा मिङ् के़वाःप्मा कुमेत् पाःक्मे़ल्ले़आङ्
तेबह, गहम, तहस नु माकान् मे़प्मनाबा साहाॽ कत्तुसिरो॥
Currently Selected:
तोलिङ्सोमु 22: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
