तोलिङ्सोमु 24
24
इसहाक्किल्ले़ मेःत् तारु
1आल्ल अब्राहाम्मिन् काप्पोबा तुम्से़घे़रे़आङ् वये़, हे़क्क्याङ् यहवे दाङ्बाल्ले़ के़रे़क् पाःन्हाॽओ अब्राहाम्मे़न् हाङ्वागे़न् मुॽइसाम् पिरुआङ् वये़॥ 2अब्राहाम्मिल्ले़ कुहिम्मो के़रे़क् पाःन्हाॽ के़हिबा के़दङ्बा के़रे़क्नुःल्ले़ यम्बा के़से़वारोबान् मे़त्तु, “खे़ने़ॽ के़हुक्किन् आलाङ् से़बङ्बाहाॽरे़ कुसिःक्तो ने़स्से़ॽ॥ 3आङ्गाॽ साङ्ग्राम्पेदाङ् नु इक्सादिङ् खाम्बेःक्मोबा यहवे दाङ्बा निङ्वाॽफुमाङ्ङिल्ले़ कुमिङ्ङो कन् माङ्हे़क्किन् चोःक्पाङ्ने़, आल्लो आङ्गाॽ युङ्ङाबा ते़न्नोबा कनानि सुवाङ्हाॽरे़ खुन्छिॽ आत्तिन् मे़न्छुमा साहाॽआङ् आसाःल्ले़ कुलागि खे़ने़ॽ मेःत् मे़मे़दारे़न्ने़ॽओ, 4कर आङ्गाॽ आबाङे आलाजेॽओ के़बेःक्काङ् आङ्गाॽ आमनाहाॽओलाम्मे़ आस्सा इसहाक्किल्ले़ कुलागि लत्छा मेःत् के़दारु के़बिरुर पोङ्लो॥”
5से़वारोबाल्ले़ अब्राहाम्मे़न् मे़त्तु, “खे़न् मे़न्छुमाःन् कन् लाजेॽओ आङ्गाॽनु सोरिक् फे़म्मा मे़दे़न्ने़न्निल्ले़ग? खे़ने़ॽ के़ले़रु के़धबा लाजेॽओए के़स्सा इसहाक्किन् तेॽरुङ्बि?”
6अब्राहाम्मिल्ले़ खे़न् मे़त्तु, “कन् पाःन्निन् निःन्धो चोगे़ॽ, खे़ने़ॽ आस्सान् खे़प्मो मे़नुःक्ते़न् मे़देॽरे़न्ने़ॽ॥ 7आङ्गाॽ आम्बारे़ कुहिम् नु आमनाहाॽरे़ खुन्छिॽ लाजेॽलाम् के़भे़प्पा साङ्ग्राम्पेदाङ् नु इक्सादिङ् खाम्बेःक्मोबा यहवे दाङ्बा निङ्वाॽफुमाङ्ङिन् माङ्हे़क्सिङ्ङाङ् आङ्गाॽनु कम्भलॽरिक् माङ्हुप् चोगुआङ् वाॽ, ‘आङ्गाॽ खे़ने़ॽ के़मुॽइदाङ्साहाॽए कन् लाजेन् पिरुङ्सिङ्॥’ आङ्गाॽ आस्साःल्ले़ कुलागि लत्छा मेःत्थिक् खे़प्मोलाम् फे़प्मा के़सुक्तुर फाॽआङ् खुने़ॽ कुमाङ्ला इङ्बाधिक् खे़ने़ॽ के़दगि पाङ्घुरो॥ 8खे़न् मे़न्छुमान् खे़ने़ॽनु फे़म्मा मे़दे़न्ने़न्निफाग्र आङ्गाॽ माङ्हे़क् चोगुङ्बा पाःन्निल्ले़ खे़ने़ॽ के़न्छुने़न्॥ कर आस्सान् खे़प्मो मे़नुःक्ते़न् मे़देॽरे़न्ने़ॽ॥” 9खे़ब्याङ् खे़न् से़वारोबाल्ले़ कुन्दाङ्बा अब्राहाम्मिल्ले़ कुलाङ् से़बङ्बाल्ले़ कुसिःक्तो कुहुक्किन् ने़स्सुआङ् कन् पाःन्निल्ले़ कुयाःम्बेओ खुने़ॽनु माङ्हे़क्सिङ्॥
10हे़क्क्याङ् खे़न् से़वारोबान् कुन्दाङ्बाल्ले़ थिबोङ् कुउमेहाॽ नु के़रे़क् परिक्ले़न् नुःब्नुबा मिक्तोक् चासुङ्हाॽ याङ्सिङ्ङाङ् थासिङ्॥ हे़क्क्याङ् अराम नहरैम् ले़प्माङ् थासिङ्ङाङ् नाहोरले़ कुये़क्यक्को पेगे़॥ 11युःन्छिक् मे़न्छुमा हिन्जाॽहाॽरे़ खुन्छिॽ च्वाःत् फाःप्मा ये़म् पोःक्खे़॥ हे़क्केःल्ले़ ये़क्यक् लाःक्कात् ले़प्माङ्बा वबाक्किल्ले़ कुबेसाङ् खुने़ॽ उमेहाॽ ये़प्सुसि॥
12हे़क्क्याङ् खे़ल्ले़ तुवा चोगु, “आन्दाङ्बा अब्राहाम्मिल्ले़ कुयहवे दाङ्बा निङ्वाॽफुमाङ्ङे, आइन् आङ्गाॽ आयाःम्बक्किन् कुलिङ्दो के़त्ताङ् पिराङ्ङे़ॽओ, खे़ब्याङ् आन्दाङ्बा अब्राहाम्मे़न् खे़ने़ॽ के़नुॽबा के़जोःक्पा पाःन्निन् उसेःन्धाक्ते़ॽओ॥ 13ओमे़त्ते़ॽओ, आङ्गाॽ कन् वबाक्किल्ले़ कुयाओ ये़प्पारो, हे़क्क्याङ् ये़क्यक्कोबा मनाहाॽरे़ खुन्छि मे़न्छुमा साहाॽ च्वाःत् फाःत्छे़ मे़भे़न्ल मे़बत्॥ 14हे़क्केःल्ले़ अक्खे पोङ्लरो—आत्तिन् सिसादिङ् मे़न्छ्यान् आङ्गाॽ ‘के़गुःन्दाओलाम् च्वाःत् थुङ्मारे़लागि कुःन्दाःन् के़ःङ्या मे़त्ताङ् पिराङ्ङे़ॽ’ मे़त्तुङ्, हे़क्क्याङ् आत्तिल्ले़ ‘थुङे़ॽने़बा’ मे़त्ताआङ् ‘के़उमेहाॽआङ् च्वाःत् थुङ्सुङ्सिङ्’ लॽ, हाबा खे़न्ने खे़ने़ॽ के़से़वारोबा इसहाक्किल्ले़ कुलागि के़सेगुमा पोङ्लरो॥ खे़न्लाम्बाए खे़ने़ॽ के़नुॽबा के़जोक् के़लॽबा पाःन्निन् आङ्गाॽ आन्दाङ्बान् उसेःन्गे़धाक्तु फाॽआङ् आङ्गाॽ निङ्वाॽ खोसुङ्लो॥”
15खे़ल्ले़ कन् पाःप्माआङ् मे़न्छुःत्ते वये़र, रिबेकाःल्ले़ कुभक्ताङ्ङो कुःन्दाःन् पक्सुर खा फे़रे़॥ खे़न् अब्राहाम्मिल्ले़ कुन्साॽ नाहोरे़ल्ले़ कुमेत् मिल्कारे़ कुस्सा ये़म्बित्छा बतुएलरे़ कुस्सा मे़न्छुमा वये़॥ 16सिसादिङ् मे़न्छ्यान् चाॽरिक् नुमासुक्मा चोगे़, हे़क्क्याङ् कम्भ थारिक् आत्तिन् ये़म्बित्छाःन्नुआङ् सोरिक् मे़न्ने़ए वये़॥ खुने़ॽ वबाक्को यो थ्ये़आङ् च्वाःत्तिन् फाःत्तु हे़क्क्याङ् थो थाङे़॥
17खे़न् से़वारोबान् हारा लोःक्ते़र पेआङ् मे़त्तु, “के़गुःन्दाओलाम् मिसाक् च्वाःत् थुङ्माजि पिराङ्ङे़ॽ॥”
18खे़ल्ले़ “पोङ् आदाङ्बे, थुङे़ॽबा” मे़त्तुआङ् खिमो कुगुःन्दान् मु थासु, हे़क्क्याङ् कुहुक्किल्ले़ कुःन्दाःन् ते़म्सुआङ् से़वारोबान् च्वाःत् थुङ्सु॥
19च्वाःत् थुङ्सु सुरुआङ् खे़ल्ले़ से़वारोबान् मे़त्तु, “के़उमेहाॽरे़ लागिआङ् खुन्छिॽ थुङ्धुङ् आङ्गाॽ च्वाःत् पागुङ् पिरुङ्सिङ्॥” 20हे़क्क्याङ् पजात् चात्ते़र वघोःङ्ओ खे़ल्ले़ कुगुःन्दाओबा च्वाःत्तिन् हुक्सुआङ् याम्मो च्वाःत् फाःत्छे़ वबाक् ले़प्माङ् लोःक्ते़र पे, हे़क्क्याङ् खे़ल्ले़ के़रे़क् कुउमेहाॽरे़ लागिआङ् च्वाःत् फाःत्तु पिरु॥ 21खे़न् से़वारोबाल्ले़ आङ्गाॽ आलाम्दिःक्को पोङ्मा के़बोङ्बा पाःन्हाॽ यहवे दाङ्बाल्ले़ के़त्तु पिराङ्बाबि मेःम्बि फाॽआङ् निङ्वाॽ खोमारे़ लागि मे़म्बाःत्ते स्वाःत् नुरिक्काङ् खे़न् ओमे़त्तुर युङे़॥
22उमेहाॽरे़ च्वाःत् मे़धुङु मे़सुरुआङ् खे़न् से़वारोबाल्ले़ तुक्सि ग्राम यारिक्ले़न् साम्म्याङ् मुन्द्रि नु किप् थिक् ग्राम यारिक्ले़न् ने़प्जाङ् साम्म्याङ् हुक्पाःङ्गिहाॽ लःत्तु॥ 23हे़क्क्याङ् मे़त्तु, “खे़ने़ॽ हाःत्ले़ कुस्साने़बे? खे़ने़ॽ के़म्बारे़ कुहिम्मो आइन् से़न्दिक् आनिगे लागि याङ्धोःक्मादे़न् ने़बि?”
24खुने़ॽ खे़न् मे़त्तु, “आङ्गाॽ नाहोरलाम् मिल्कारे़ कत्तुबा कुस्सा ये़म्बित्छा बतुएलरे़ कुस्साआरो॥” 25खे़ल्ले़ याम्मोआङ् मे़त्तु, “आनिगे चासेॽ नु याॽलाङ् सिदत् कत्तुम्बे़, हे़क्क्याङ् युःन्छिक् खिनिॽ याःक्मारे़ लागि याङ्धोःक्मादे़न्नाङ् ने़ःॽ॥”
26खे़ब्याङ् खे़न् से़वारोबाल्ले़ यहवे दाङ्बान् अःक्खुम् फन्छिङ्ङाङ् से़वा मे़त्तुर मे़त्तु, 27“यहवे दाङ्बा, आन्दाङ्बा अब्राहाम्मिल्ले़ कुनिङ्वाॽफुमाङ्ङिल्ले़ कुनारा पोररो, खुने़ॽ थधप् मे़ल्लॽमनाबा मिःम्जि नु नसाःन्साःन्बा चोःक्पा पाःन्निन् आन्दाङ्बान् ओसेःन्धाक्तुआङ् वाॽ॥ आङ्गाॽग यहवे दाङ्बाल्ले़ए लाम्मो तिःक्ताङ्ल आन्दाङ्बाल्ले़ कुगाॽइल्ले़ कुहिम्मो ताराङ्ङाङ् वाॽआरो॥”
28सिसादिङ् मे़न्छ्यान् पेआङ् कुम्मारे़ कुहिम्सयङ्हाॽ कन् के़रे़क् पाःन्हाॽ चे़क्तुसि॥ 29रिबेकाःल्ले़ लाबान मिङ् के़वाःप्पा कुम्भुॽधिक् वये़॥ हे़क्क्याङ् लाबाने़न् लःन्दे़आङ् अब्राहाम्मिल्ले़ कुसे़वारोबा के़वाॽबा वबाक्किल्ले़ कुबेसाङ् लोःक्ते़र पे॥ 30खुने़ॽ कुन्साॽरे़ कुन्बोओ मुन्द्रि नु कुहुक्कोबा हुक्पाःङ्गिहाॽ निसु हे़क्क्याङ् “खे़न् मनाःल्ले़ आङ्गाॽ अक्खे मे़त्ताङ्” के़लॽबा पाःन्निन् कुन्साॽरोलाम् खे़प्सुनेमे़ःन्ने खुने़ॽ खे़न् मनाओ पेगे़॥ 31खे़न् मनान् वबाक्किल्ले़ कुयाओ उमेहाॽरे़ खुन्छिॽ पेसाङ् ये़बे़बा लाबाने़ल्ले़ निसु॥ हे़क्क्याङ् खुने़ॽ मे़त्तु, “निङ्वाॽफुमाङ्ङिल्ले़ कुमुॽइसाम् के़घोबा आदाङ्बे सिगाङ् फे़रे़ॽओ॥ थेआङ् लाःक्कात् थःप्पे़त् के़ये़प्पाबे? खे़ने़ॽ के़लागि ने़मादे़न् नु उमेहाॽरे़ लागि ये़प्मादे़न् यारिप् चोगुङ्ङाङ् ने़रो॥”
32खे़ब्याङ् खे़न् से़वारोबे़न् लाबाने़न्नु हिम्मो पेगे़, हे़क्क्याङ् लाबाने़ल्ले़ उमेहाॽओलाम् कक्हाॽ थासुआङ् खे़ङ्हाॽ याॽलाङ् नु चासेॽ पिरुसि॥ हे़क्क्याङ् अब्राहाम्मिल्ले़ कुसे़वारोबान् हे़क्क्याङ् खे़न्नु के़वाॽबा मनाहाॽरे़ लागि खुन्छिॽ लाङ् वाहप्मा च्वाःत्ताङ् पिरुसि॥ 33हे़क्क्याङ् खे़ल्ले़ कुदगाङ् चामा थुङ्मा कुजाहाॽ मे़युक्सु मे़बुरु, कर खे़ल्ले़ मे़त्तुसि, “आङ्गाॽ आइङ्घङ्ङिन् खिनिॽ मे़म्मे़त्तेग आङ्गाॽ मे़जाआन् मे़धुङ्ङाल्लो॥”
लाबाने़ल्ले़ मे़त्तु, “लु, ओमे़त्ते़ॽ॥”
34खे़ब्याङ् खे़ल्ले़ मे़त्तुसि, “अब्राहाम्मिल्ले़ कुसे़वारोबाहाॽओ आङ्गाॽ थिक्पाआरो॥ 35यहवे दाङ्बाल्ले़ आङ्गाॽ आन्दाङ्बे़न् यरिक् मुॽइसाम् पिरुआङ् खुने़ॽ याङ्साकुन्धेसाबा यम्बा मना पोःक्खे़आङ् वाॽ॥ यहवे दाङ्बाल्ले़ खुने़ॽ मे़ल्लुक् नु मे़ःन्दालुप्हाॽ, हे़क्क्याङ् पित्हाॽ, साम्म्याङ् युप्पा, से़वारोबा से़वारोमाहाॽ, उमेहाॽ हे़क्क्याङ् अदङ्हाॽ पिरुआङ् वाॽरो॥ 36आङ्गाॽ आन्दाङ्बाल्ले़ कुहिम्सामा साराःल्ले़ कुगाप्मो तुम्मो अब्राहाम्मिन् ये़म्बित्छा साधिक् कत्तु पिरु, हे़क्क्याङ् आन्दाङ्बाल्ले़ कत्तुबा के़रे़क् पाःन्हाॽ खुने़ॽ पिरुआङ् वाॽ॥ 37आन्दाङ्बाल्ले़ आङ्गाॽ अक्खे मे़त्ताङ्ङाङ् माङ्हे़क्सिङ्मा पाङ्घाङ्ङाङ् वाॽ, ‘खे़ने़ॽ आसाःल्ले़ कुलागि आङ्गाॽ आल्लो युङ्आबा लाजेॽओबा कनानिहाॽरे़ खुन्छिॽ सामे़न्छ्याहाॽ आत्तिन्नाङ् पाङ्लि मे़दारे़न् मे़बिरे़न्ने़ॽओ॥ 38कर आङ्गाॽ आबाङे आलाजेॽओ नु आम्बारे़ कुमनाहाॽओ पेगे़ॽआङ् आस्सान् लत्छा मेःत्थिक् कोःत्ते़ तारे़बिरे़ॽओ॥’
39“खे़ब्याङ् आङ्गाॽ आन्दाङ्बे़न् मे़त्तुङ्, ‘खे़न् मे़न्छुमान् आङ्गाॽनु फे़म्मा मे़दे़न्ने़न्निल्ले़ग?’
40“खुने़ॽ मे़त्ताङ्, ‘आङ्गाॽ आत्तिन् यहवे दाङ्बाल्ले़ कुदगि लाङ्घेःक्का बा खुने़ॽए कुमाङ्लाइङ्बान् खे़ने़ॽनु पाङ्घु के़बि, हे़क्क्याङ् खे़ने़ॽ के़याःम्बक्किन् कुलिङ्दो के़त्, हे़क्क्याङ् खे़ने़ॽ आगाॽइ नु आम्बारे़ कुहिम्सयःङ्बाहाॽलाम् आस्साःल्ले़ कुलागि लत्छा मेःत् के़दारु के़बिरुरो॥ 41खे़ने़ॽ आङ्गाॽ आगाॽइहाॽओ के़बेःक्काङ् खे़ने़ॽ माङ्गे़हे़क्सिङ्बा पाःन्निन् के़गे़त्तुबा पोङ्॥ कर खे़ङ्हाॽरे़ खुन्छिॽ सा मे़न्छुमान् फे़म्मा मे़म्भाःक्तुन्छाङ् खे़ने़ॽ माङ्गे़हे़क्सिङ्बा पाःन्नो के़न्धाने़न्लो॥’
42“आइन् वबाक्को के़राङ्ङाङ् आङ्गाॽ अक्खेलॽरिक् पेलिगे़न् तुवा चोगुङ्, ‘आङ्गाॽ आन्दाङ्बा अब्राहाम्मिल्ले़ कुनिङ्वाॽफुमाङ्, यहवे दाङ्बाए, खे़ने़ॽ निङ्वाॽ के़जोगुनिफाॽग्र आयाःम्बक्किन् कुलिङ्दो के़त्ल याःन्दे़ॽओ॥’ 43खा कन् वबाक्को ये़प्पारो॥ आत्तिन् मे़न्छ्यान् च्वाःत् फाःत्छे़ फे़न्, हे़क्क्याङ् आङ्गाॽ खे़न् ‘खे़ने़ॽ के़गुःन्दाओलाम् चबे़ःत्छिक् च्वाःत् थुङ्मा पिराङ्ङे़ॽ,’ मे़त्तुङ्ॽ॥ 44खे़ल्ले़ ‘थुङे़ॽओ’ मे़त्ताने़भग्र हे़क्क्याङ् ‘आङ्गाॽ के़उमेहाॽआङ् च्वाःत् पागुङ् पिरुङ्सिङ्,’ पाःत्तुॽ, हाबा खे़न् मे़न्छुमाःन्ने आन्दाङ्बाल्ले़ कुस्साःल्ले़ कुलागि यहवे दाङ्बे़ल्ले़ सेगुमा पोङ्लरो॥
45“आङ्गाॽ कन् पाःन्निन् आनिङ्वाॽओ पाःप्मा सुःप्मानुःल्ले़ तगि, कुभक्ताङ्ङो कुगुःन्दान् पक्खुर रिबेकान् खा फे़रे़, हे़क्क्याङ् वबाक्को यो थासिङ्ङाङ् च्वाःत् फाःत्तु॥ हे़क्केःल्ले़ खुने़ॽ मे़त्तुङ्, ‘आङ्गाॽ च्वाःत्चि थुङ्मा पिराङ्ङे़ॽ॥’
46“खिमो खुने़ॽ कुगुःन्दान् कुभक्ताङ्ङोलाम् यो थासुआङ् मे़त्ताङ् ‘पोङ् थुङे़ॽसिने़, आङ्गाॽ खे़ने़ॽ के़उमेहाॽआङ् च्वाःत् थुङ्सुङ्सिङ्ॽ॥’ खे़ब्याङ् आङ्गाॽ च्वाःत् थुङुङ्, हे़क्क्याङ् खुने़ॽ आउमेहाॽआङ् च्वाःत् थुङ्सुसि॥
47“आङ्गाॽ खुने़ॽ खे़ने़ॽ ‘हाःत्ले़ कुस्साने़बे?’ फाॽआङ् सेःन्दोसुङ्॥
“खुने़ॽ पाःत्तु, ‘नाहोर नु मिल्कारे़ खुन्छिॽ ये़म्बित्छासा बतुएलरे़ कुस्साआरो॥’
“खे़ब्याङ् आङ्गाॽ खुने़ॽ कुन्बोओ मुन्द्रिःन् नु कुहुक्को हुक्पाःङ्गिहाॽ वाःत्तुङ्॥ 48हे़क्क्याङ् आङ्गाॽ अःक्खुम् फन्छिङ्ङाआङ् यहवे दाङ्बान् से़वा मे़त्तुङ्॥ हे़क्क्याङ् आङ्गाॽ आन्दाङ्बा अब्राहाम्मिल्ले़ कुन्साॽरे़ कुम्मे़न्छाॽइन् आन्दाङ्बाल्ले़ कुस्साओ पाङ्लिमा ताःप्मारे़ लागि कुदोःप्मा लाम् के़दोम्बा आन्दाङ्बा अब्राहाम्मिल्ले़ कुनिङ्वाॽफुमाङ् यहवे दाङ्बान् कुनारा फोसुङ्॥ 49आल्ल आङ्गाॽ आन्दाङ्बान्नु खिनिॽ थधप् मे़ल्लॽमनाबा मिःम्जि नु से़क्खाबा याःम्बक् चोःक्मा निङ्वाॽ के़जोगुम्ने़ फाॽग्र आङ्गाॽ ओमे़त्ते़ॽ॥ मेःन्ने फाॽसाङ् आङ्गाॽ ओमे़त्ते़ॽ, हे़क्क्याङ् आङ्गाॽ थे चोःक्मा पोङ् आङ्गाॽ खे़न् चोःक्मा निङ्वाॽ चोगुङ्॥”
50खे़ब्याङ् लाबाने़न् नु बतुएलरे़ नोगप् पिरे़छु, “कन् पाःन्निन् यहवे दाङ्बालाम् के़दाबारो, हे़क्केःल्ले़ आन्छिगे खे़ने़ॽ वेॽ पान् थेआङ् मे़प्मा मे़सुक्ने़छिगे़न्लो॥ 51खा ओमे़त्ते़ॽ, रिबेकान् बाकप्मोए वाॽ, खुने़ॽ तेॽरे़आङ् पेगे़ॽ, हे़क्क्याङ् यहवे दाङ्बाल्ले़ पाःत्तुबा हे़क्केए खे़न् खे़ने़ॽ के़न्दाङ्बाल्ले़ कुस्साःल्ले़ कुमेत् पोङ्ल॥”
52अब्राहाम्मिल्ले़ कुसे़वारोबाल्ले़ खे़ङ्हाॽरे़ खुन्छिॽ पाःन्निन् खे़प्सुआङ् खाम्बाङ्ङो साम्बोन् हबत् फन्छिङ्ङाङ् यहवे दाङ्बे़न् से़वा मे़त्तु॥ 53खे़ब्याङ् खे़ल्ले़ साम्म्याङ् नु युप्पा वाःत्तिहाॽ हे़क्क्याङ् चाङ्हाॽ लःत्तुआङ् रिबेकान् पिरु॥ खे़ल्ले़ रिबेकाःल्ले़ कुम्मा नु कुम्भुॽसिआङ् यरिक् कुमे़न् के़घिःक्पा मिक्तोःक्हाॽ पिरुसि॥
54खे़ब्याङ् खे़न् हे़क्क्याङ् खुने़ॽनु के़वाॽबा मनाहाॽरे़ मे़ज मे़धुङु, खे़न् से़न्दिक् खे़प्मोए मे़ने़स्से़॥
कर कुदाःन्दिक्मा खाओःत्ते़नुमे़ःन्ने तानाम्सा खे़ल्ले़ मे़त्तुसि, “आङ्गाॽ पेक् आबाङ्घे़ॽओ हे़क्क्याङ् आन्दाङ्बे़ओ पेःक्कारो॥”
55कर रिबेकाःल्ले़ कुम्भुॽ नु कुम्मारे़ नोगप् पिरे़छु, “हिन्जाॽइन् थिबोङ् ये़न् यारिक् आनिगे़नु वाॽर हे़क्क्याङ् पेःक्साङ् नुॽ॥”
56कर खे़न् से़वारोबाल्ले़ खे़ङ्हाॽ मे़त्तुसि, “आङ्गाॽग नुःङ्ङा पेःक्का याप्मि आन्छाक्ते़न्ने़ॽओ, यहवे दाङ्बाल्ले़ आङ्गाॽ आलाम्दिक् चोःक्मा याःम्बक्किन् कुलिङ्दो के़त्ताङ् पिराङ्ङाङ् वाॽ॥ आङ्गाॽ पेक् आबाङ्घे़ॽओ हे़क्क्याङ् आन्दाङ्बे़ओ पेःक्कारो॥”
57खे़ङ्हाॽरे़ मे़त्ते़छु, “हिन्जाॽइन्ने आनिॽ सेःन्दोसुम् खुने़ॽ थे पाःत्तुइ॥” 58हे़क्क्याङ् खुन्छिॽ रिबेकान् उःत्ते़छुआङ् सेःन्दोसे़छु, “कन् मनाःन्नु पेःक्मा के़दे़म्बि?”
खुने़ॽ पाःत्तु “आङ्गाॽ पेःक्का॥”
59खे़ल्ले़चोगुल्ले़ खे़ङ्हाॽरे़ खुन्छिॽ नुसाॽ रे़बिकाःन्, सेवारोमानु सोरिक् अब्राहाम्मिल्ले़ कुसे़वारोबे़न् हे़क्क्याङ् खे़ल्ले़ कुमनाहाॽनु मे़बाङ्घुमे़देसु॥ 60खे़ङ्हाॽरे़ रिबेकान् मुॽइसाम् मे़धासु मे़बुरुआङ् मे़मे़त्तु,
“आनिगे चेलिमा नुसाॽए,
खे़ने़ॽ हे़न्छिङ् हे़न्छिङ्ले़ खुन्छिॽ मा के़बोङ्लरो,
हे़क्क्याङ् खे़ने़ॽ के़स्सा के़एहाॽनु
थङ् के़जोःक्पा निङ्मिहाॽरे़ खुनिॽ ये़क्यक्हाॽ
के़स्साहाॽ हुक्काप् मे़मे़त्छिङ्लरो॥”
61खे़ब्याङ् रिबेकान् नु कुसे़वारोमाहाॽ उमेहाॽओ मे़लासे़आङ् खे़न् अब्राहाम्मिल्ले़ के़से़वारोबे़न्नु मे़धासिङ् मे़बे॥ अक्खेलॽरिक् रिबेकान् याङ्सिङ्ङाङ् खे़न् मनान् थासिङ् पे॥
62आल्ल इसहाक्के़न् बेअर लहै रोइलाम् फे़रे़, थेआङ्भे़ल्ले़ खे़न् ये़म्मो खुने़ॽ कनानबा नेगेब मे़प्मनाबादे़न्नो युङे़॥ 63खुने़ॽ थिक्यान् युःन्छिक् पेलिगे़न् तुवा चोःक्से़ प्याङ्सिओ लःन्दे़, हे़क्क्याङ् थो ओमये़ल्ले़ उमेहाॽ मे़भे़रे़र मे़बत्छे़बा निसुसि॥ 64हे़क्क्याङ् रिबेकान्नाङ् ओमये़ल्ले़ इसहाक्के़न् निसु, हे़क्क्याङ् उमेओलाम् यो लःन्दे़॥ 65खे़ब्याङ् खे़न् से़वारोबान् सेःन्लाप्तु, “आनिॽ तुम्से़ प्याङ्सिओलाम् के़भे़म्बार के़बप्पा याप्मिन् हाःप्पे?”
खे़न् से़वारोबाल्ले़ मे़त्तु, “खुने़ॽग आङ्गाॽ आन्दाङ्बारो॥” हे़क्केःल्ले़ रिबेकाःल्ले़ कुबःत्थाङ्ङिन् खुःक्सिङ्ङाङ् कुनारान् ते़प्तु॥
66हे़क्क्याङ् सेवाराबाल्ले़ खुने़ॽ चोगुबा के़रे़क् पाःन्हाॽ इसहाक्के़न् चे़क्तु॥ 67इसहाक्के़ल्ले़ रिबेकान् आबाङे कुम्मा साराःल्ले़ कुसाःङ्गा हिम्मो तेॽरुआङ् मेःक्खिम् मे़त्तु॥ खे़ब्याङ् खे़न् खुने़ॽ कुमेत् पोःक्खे़, हे़क्क्याङ् इसहाक्किल्ले़ रिबेकान् नानुॽरु॥ अक्खेलॽरिक् इसहाक्किल्ले़ आबाङे कुम्मा मासिङ्बा एगाङ् खुने़ॽ आःन्छिङ्मा खोसुरो॥
Currently Selected:
तोलिङ्सोमु 24: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
