तोलिङ्सोमु 25
25
अब्राहाम्मिन् मासिङ्
1अब्राहाम्मिल्ले़ के़तुरा मिङ् के़वाःप्मा वेॽसमा मे़न्छुमा थिक्काङ् ते़न्धाम् मेःक्खिम् मे़त्तु॥ #१ साप्मु १:३२-३३ 2खे़ल्ले़ अब्राहामलाम् जिम्रान, योक्छान, मेदान, मिध्यान, यिस्बाक, हे़क्क्याङ् सुहन् कत्तुसि॥ 3योक्छाने़ल्ले़ सेबा नु ददान ने़प्फु कुस्सा ये़म्बित्छा वये़सि॥ ददाने़ल्ले़ कुस्साहाॽ अस्सुरि, लतुसि हे़क्क्याङ् लउम्मि मे़वये़॥ 4मिध्याने़ल्ले़ कुस्साहाॽ एपा, एपेर हनोक, अबिदा नु एल्दा मे़वये़॥ कङ्हाॽ के़रे़क् के़तुरारे़ कुमुॽइदाङ्साहाॽ मे़वये़॥
5अब्राहाम्मिल्ले़ कत्तुबा के़रे़क् पाःन्हाॽ कुस्सा इसहाक्के़न् पिरु॥ 6कर खुने़ॽ मासिङ्मानुःल्ले़ तगि हिङे़रए कुमेत् पाःक्माहाॽरे़ खुनिॽ साहाॽ मिक्तोःक्हाॽ पिरुसि, हे़क्क्याङ् इसहाकलाम् से़न्दुसिआङ् माःङ्घा नाम्गे़न् पिसाङ्बा लाजेॽओ पाङ्घुदेसुसि॥
अब्राहाम्मिन् मासिङ्ङाङ् मे़लुप्तुॽ
7अब्राहाम्मे़न् किप् थिक् हे़क्क्याङ् नुबोङ्ङाङ् ङासि तङ्बे थारिक् हिङे़॥ 8हे़क्क्याङ् खुने़ॽ खदाक्मि पोःक्खे़र थारिक् हिङे़ हे़क्क्याङ् खदाक्मि तुम्से़आङ् मासिङ्॥ हे़क्क्याङ् आबाङे कुधाःक्थे़बाहाॽनु तङ्सिङ्से़ पे॥ 9खुने़ॽ कुस्सा इसहाक नु इस्माएलरे़ हित्ति सोअररे़ कुस्सा एप्रोने़ल्ले़ कुब्याङ्सि मम्रेलाम् नाम्गे़त् पिसाङ्बा मक्पेला फुक्कुओ खुने़ॽ कुधक्किन् लुप्ते़छु॥ 10खे़न् प्याङ्सिन् अब्राहाम्मिल्ले़ हित्ति सुवाङ्हाॽलाम् इङुआङ् ने़स्से़॥ खे़ब्याङ् कुमेत् सारान् मे़लुप्तुबा ते़न्नोए खुने़ॽ मे़लुप्तु॥ #तोलिङ् २३:३-१६ 11अब्राहाम्मिन् मासिङ्ङाङ् कुस्सा इसहाक्के़न् निङ्वाॽफुमाङ्ङिल्ले़ हाङ्वागे़न् मुॽइसाम् थासुपिरु॥ खे़न् ये़म्मो इसहाक्के़न् बेअर लहै रोइ कुबेसाङ् युङे़॥
इस्माएलरे़ कुस्साहाॽ
12साराःल्ले़ कुसे़वारोमा मिस्रि हागार ले़प्माङ्लाम् सागे़वाःन्छिङ्बा अब्राहाम्मिल्ले़ कुस्सा इस्माएलरे़ कुस्सा कुम्मे़न्छाॽहाॽरे़ खुन्छिॽ साप्मुःन्धुम्मिन् हाबा कन्लो॥ #१ साप्मु १:२८-३१
13खे़ङ्हाॽ सामे़वाःन्छिङ्बा मिङ्स्रा कुइसिक् इस्माएलरे़ कुस्साहाॽरे़ खुन्छिॽ मिङ् कङ्हाॽरो—
इस्माएलरे़ कुस्सा तुम्बान् नबायोत,
केदार, अदबेल, मिब्साम,
14मिस्मा, दुमा, मस्सा,
15हदद, तेमा, यतुर, नापिस नु केदमा॥
16इस्माएलरे़ कुस्साहाॽ कन्हाॽरो॥ खे़ङ्हाॽ थिक्ने़त् थाःक्हाॽरे़ खुन्छिॽ पाधे़बा मे़वये़ हे़क्क्याङ् खुन्छिॽ पाङ्भेॽ नु युङ्मादे़न् कुइसिक् खुन्छिॽ मिङ्हाॽ पोःक्खे़॥
17इस्माएल्ले़न् १३७ तङ्बे के़रे़आङ् वये़, खे़ब्याङ् खुने़ॽ मासिङ् हे़क्क्याङ् कुधाःक्हाॽनु सोरिक् पोङ्से़ पे॥ 18खुने़ॽ कुमुॽइदाङ्साहाॽ मिस्र लाजेॽ इःन्दोःल्ले़ कुबेसाङ्बा अस्सुर लाजेॽ ले़प्माङ् हबिलालाम् सुर थारिक् खे़ङ्हाॽ मे़बोन्दे़आङ् मे़युङे़॥ हे़क्क्याङ् खे़ङ्हाॽ के़रे़क् खुन्छिॽ फुॽनुस्साॽ लुम्मो निङ्मि मे़बोःक्खे़आङ् मे़न्दङ्ङे मे़युङे़॥
याकुब नु एसाब
19अब्राहामरे़ कुस्सा इसहाक्किल्ले़ कुसाप्मुःन्धुम् हाबा कल्लो॥
अब्राहाम्मिल्ले़ इसहाक्के़न् कत्तु॥ 20हे़क्क्याङ् इसहाक्के़न् लिबोङ् तङ्बे के़रे़ल्ले़ पद्दन अरामबा अरामि बतुएलरे़ कुस्सा मे़न्छुमा अरामि लाबाने़ल्ले़ कुन्साॽ रिबेकान् ते़न्धाम् मेःक्खिम् मे़त्तु॥
21इसहाक्किल्ले़ कुमेःत्तिन् सामे़ङ्गप्मनामा पोःक्खे़बाल्ले़ चोगुल्ले़ खुने़ॽ कुमेःत्तिल्ले़ कुलागि यहवे दाङ्बान् पेलि फाक्तु॥ खुने़ॽ फाक्तुबा पेलिगे़न् तुवान् यहवे दाङ्बाल्ले़ खे़प्सु, हे़क्क्याङ् रिबेकान् मे़न्छुक्मा पोःक्खे़॥ 22खुने़ॽ कुसाप्पोःक्को अङे़ःक्वा ने़त्छि यागे़सि, खे़न् अङे़ःक्वाहाॽ चुङ्मा हेःक्ते़छि॥ “आङ्गाॽओ थेआङ् अक्खे पोःक्खे़बाबे?” पाःत्तुर खे़ल्ले़ यहवे दाङ्बान् सेःन्दोमा हेःक्तु॥
23यहवे दाङ्बे़ल्ले़ खुने़ॽ अक्खे मे़त्तुरो, #रोमि ९:१२
“खे़ने़ॽ के़साप्पोःक्को ने़त्छि सुवाङ्बा
मे़न्छाम् याप्मि याक्सिरो,
के़साप्पोःक्कोलाम् खे़ङ्हाॽ के़गत्तुसिल्ले़सा
खे़ङ्हाॽ एॽए ने़त्छि सुवाङ् लःन्छिरो॥
लत्छान् वेॽसमान्नुःल्ले़ मुक्के़गुबा पोङ्लो,
हे़क्क्याङ् तुम्बाल्ले़ फोःक्वाबे़ल्ले़न् कुसे़वा चोगुरो॥”
24खे़ल्ले़ कुस्सागप्मा ये़म् के़रे़, हे़क्क्याङ् खे़ल्ले़ कुसाप्पोःक्को काप्साबा अङे़ःक्वा ने़त्छि यागे़त्छि॥ 25तुम्बे़न् हे़ःत्यङ्यङ्बा चोगे़, चाङ् चाक्सुबा हे़क्के कुधक्किन् सिदे़प् ते़प्तुर कुम्ब्रिॽ स्योःङ्स्योःङ् युङे़॥ खे़ल्ले़चोगुल्ले़ खे़न् एसाब#२५:२५ एसाब—सेइरे़न् ओसेःन्धाङ् चोःक्मारे़ लागि कन् मिङ्ङे़न् कॽयो मे़दारुआङ् पत्, सेइर ते़ङ्गप्पिन् एसाबरे़ कुमुॽइदाङ्साहाॽरे़ याङ्सि मे़युक्तुआङ् ने़स्से़, सेइर फाॽइन् हिब्रुओ “कुम्ब्रिक् स्योःङ्स्योःङ् के़युङ्बा” हे़क्के खे़म्दे़त्॥ मिङ् मे़वाःत्तु॥ 26खे़न् एगाङ् एसाबे़ल्ले़ कुलाङ्काक्थिःम्बे़न् ते़म्सुर कुन्साॽइन् लःन्दे़॥ खे़ल्ले़चोगुल्ले़ खे़न् याकुब#२५:२६ याकुब—कन् मिङ्ङे़न् हिब्रुओ “लाङ्गाक्थिःम्बा” नु “इङ्आले़क्ले़क्पा” हे़क्के खे़म्दे़त्॥ मिङ् मे़वाःत्तु॥ रिबेकाःल्ले़ खे़ङ्हाॽ कत्तुसिल्ले़ इसहाक्के़न् तुक्पोङ् तङ्बे के़रे़आङ् वये़॥
एसाबे़ल्ले़ तुम्बा कुलक्किन् सङ्घुॽ
27कङ्हाॽ यम्बा पोःक्खे़छिआङ् एसाबे़न् साॽरिक् के़ले़बा सावागे़म्बा नु ते़म्बेॽओ ताक्के़गम्बा के़जाबा मना पोःक्खे़, हे़क्क्याङ् याकुबे़न् साःङ्गाहिम्मो के़युङ्बा कुसुत्ना के़नुॽबा मना पोःक्खे़॥ 28इसहाक्किल्ले़ एसाबे़न् लुङ्माॽ तुक्तु, थेआङ्भे़ल्ले़ खे़ल्ले़ से़रुदारुबा साहाॽ चामा खोसुआङ् वये़॥ कर रिबेकाःल्ले़ग याकुबे़न् लुङ्माॽ तुक्तु॥
29थिक्ले़ङ् याकुबरे़ कुवा केःत्तुआङ् कारिॽइन् थे़न्दुर यागे़ल्ले़ एसाबे़न् ते़म्बेॽओलाम् के़रे़द्ये़॥ खे़न् कुसे़त्लाःक्माल्ले़ कुधना ले़क्खे़आङ् वये़॥ 30एसाबरे़ याकुबे़न् मे़त्तु, “हे़ःत्ताङ्बा कारिॽइल्ले़ कुवाजि आङ्गाॽ थुङ्मा पिराङ्ङे़ॽ॥ आङ्गाॽ आसे़त्लाःक्माल्ले़ आधना ले़क्खे़आङ् वाॽआ॥” (खे़ल्ले़चोगुल्ले़ खुने़ॽ एदोम्माङ्#२५:३० ए़दोम—कन् मिङ्ङे़न् हिब्रुओ “हे़ःत्ताङ्बा” हे़क्के खे़म्दे़त्॥ मे़मे़त्तु॥)
31याकुबरे़ मे़त्तु, “तगि खे़ने़ॽ तुम्बा के़लक्किन् आङ्गाॽ इङ्मा पिराङ्ङे़ॽ॥”
32एसाबे़ल्ले़ मे़त्तु, “आङ्गाॽग सिमाए इःत्ताङ्लो॥ आङ्गाॽ सिआने़फाग्र तुम्बा आलक्किल्ले़ थे पोङ्ङाङ्बे?”
33कर याकुबे़ल्ले़ मे़त्तु, “खे़ने़ॽ तगि माङ्हे़क्सिङे़ॽआङ् पाःत्ते़ॽ॥” खे़ब्याङ् एसाबे़न् माङ्हे़क्सिङ्, हे़क्क्याङ् खुने़ॽ तुम्बा कुलक्के़न् याकुबओ सङ्घुदेसु॥
34खे़न् एगाङ् याकुबरे़ एसाबे़न् खरे़ःङ् नु थे़म्मनाबा कारिॽइल्ले़ कुवान् पिरु॥ खुने़ॽ थुङु चमाःन्दुआङ् लःन्दे़बे॥ अक्खेलॽरिक् एसाबे़ल्ले़ तुम्बा कुलक्किन् कुनामे़न्छाॽ चोगु॥
Currently Selected:
तोलिङ्सोमु 25: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
