तोलिङ्सोमु 26
26
इसहाक्किल्ले़ अबिमेलेक्के़न् इङ्ले़क्तु
1आल्ल अब्राहाम्मिल्ले़ कुये़म्मो साक् पोगे़बा हे़क्के खे़न् लाजेॽओ याम्मो साक्वान् त्ये़॥ खे़ब्याङ् पलिस्तिहाॽरे़ खुन्छिॽ हाङ् अबिमेलेक्के़न् युङे़बादे़न् गे़रारओ इसहाक्के़न् पे॥ 2यहवे दाङ्बान् थाःन्छिङ्ङाङ् इसहाक्के़न् मे़त्तु, “मिस्र लाजेॽओ मे़म्बेःक्के़ॽ कर आङ्गाॽ मे़त्ने़बा ते़न्नोए युङे़ॽओ॥ 3हाबा कन् लाजेॽओ सप्फा युङे़ॽ, हे़क्के के़जोगुने़ फाग्र आङ्गाॽ खे़ने़ॽनु वाॽआ हे़क्क्याङ् हाङ्वागे़न् मुॽइसाम् पिने़॥ के़म्बा अब्राहाम्मे़न्नु चोगुङ्बा माङ्हुप्पिन् के़त्तुङ्ॽ हे़क्क्याङ् कन् के़रे़क् लाजेन् खे़ने़ॽ नु के़मुइदाङ्साहाॽ पिनिङ्लो॥ #तोलिङ् २२:१६-१८ 4आङ्गाॽ के़मुॽइदाङ्साहाॽ ताङ्साङ्बो के़बप्पा खेसे खेःम्सिक्पाहाॽ हे़क्के आत्तातान्ने यरिक् चोगुङ्सिङ् हे़क्क्याङ् कन् के़रे़क् लाजेॽहाॽ खे़ङ्हाॽ पिरुङ्सिङ्॥ हे़क्क्याङ् खे़ने़ॽ के़मुॽइदाङ्साहाॽ लाम्बाए इक्सादिङ् खाम्बेःक्मोबा के़रे़क् मे़न्छाम् याप्मिहाॽरे़ हाङ्वागे़न् मुॽइसाम् मे़घोसुॽ, 5थेआङ्भे़ल्ले़ अब्राहाम्मिल्ले़ आङ्गाॽ आबाःन्जाकिन् इःत्तु नाःत्तु, हे़क्क्याङ् आङ्गाॽ आधिम्हाॽ नु पिरुङ्बा आइङ्जाङ्हाॽ हे़क्क्याङ् आभाङ्हाॽ इःत्तु नाःत्तुरो॥” 6खे़ल्ले़चोगुल्ले़ इसहाक्के़न् गरारओए युङ्सिङ्॥
7हे़क्क्याङ् खे़प्मोबा याप्मिहाॽरे़ खुने़ॽ कुमेःत्तिल्ले़ कुयाःम्बेओ खुने़ॽ सेःन्मे़दोसुल्ले़, “खुने़ॽग आङ्गाॽ आन्जेलिमा आन्साॽ” मे़त्तुसि, थेआङ्भे़ल्ले़ खे़न् “आङ्गाॽ आमेत्” फाॽआङ् मे़प्मासि खुने़ॽ किसे़आङ् वये़॥ खे़न् ते़न्नोबा मनाहाॽरे़ “रिबेकान् तेॽमारे़ लागि आङ्गाॽ मे़से़त्ता” फाॽआङ् खुने़ॽ इःत्तुआङ् वये़ थेआङ्भे़ल्ले़ खुने़ॽ साॽरिक् नुमा चोगे़॥ #तोलिङ् १२:१३, २०:२
8इसहाक्के़न् खे़ॽयो यरिक् ये़न् थारिक् वये़, पलिस्तिहाॽरे़ खुनिॽ हाङ् अबिमेलेक्के़न् पेधाःप्पोलाम् ओमये़ल्ले़ इसहाक्के़ल्ले़ रिबेकान् मिःम् मे़त्तुर यागे़बा निसु॥ 9खे़ल्ले़चोगुल्ले़ अबिमेलेक्किल्ले़ इसहाक्के़न् उःत्तुआङ् मे़त्तु, “खुने़ॽग से़क्खाए खे़ने़ॽ के़मेःत्रे़छ॥ ‘खुने़ॽ आन्साॽ’ लॽरिक् थेआङ् के़बाःत्तुबाबे?”
इसहाक्के़ल्ले़ नुगप् पिरु, “खुने़ॽ तेॽमारे़ लागि कुभारे़ आङ्गाॽ मे़से़त्ता फाॽआङ् किसाङ्॥”
10खे़ब्याङ् अबिमेलेक्किल्ले़ मे़त्तु, “थेआङ् खे़ने़ॽ कन् आनिगे़नु अक्खे के़जोगुबा? कुभा मनाहाॽओ थिक्पा के़मेःत्तिन्नु इप्सेल्ले़ग खे़ने़ॽ आनिगे़ओ आप्तिक् के़दारुमे़न्॥”
11खे़ल्ले़चोगुल्ले़ अबिमेलेक्किल्ले़ के़रे़क् मनाहाॽ अक्खेलॽरिक् इङ्जाङ् पिरुसि, “आत्तिल्ले़ कन् याप्मिन् इग्र कुमेःत्तिन् तुक्खे चाःत्तुॽ खे़न् से़प्मा पोङ्॥”
12इसहाक्के़ल्ले़ याक्वा याॽरिःम्बा हेॽरु, हे़क्क्याङ् बाखे़न् तङ्बेओ किप्थिक् ले़ङ्नुःल्ले़ यरिक् कुजा फत्छु, थेआङ्भे़ल्ले़ यहवे दाङ्बाल्ले़ खुने़ॽ हाङ्वा मुॽइसाम् थासुपिरु॥ 13हे़क्क्याङ् खुने़ॽ याङ्साकुन्धेसाबा पोःक्खे़, हे़क्क्याङ् खुने़ॽ साॽरिक् के़गप्पा याङ्साकुन्धेसाबा मे़म्बोङ्ङे थारिक् चक्मे़न्लॽए कुयाङ्सा कुन्धेहाॽ पोरे़र पे॥ 14खुने़ॽ आत्तातान्ने यरिक् मे़ःन्दाॽ मे़ल्लुक्हाॽ हे़क्क्याङ् पित्हाॽ हे़क्क्याङ् से़वारोबा से़वारोमाहाॽ कत्तुसि॥ हे़क्केःल्ले़ पलिस्तिहाॽरे़ खुने़ॽ नामे़हे़त्तु॥ 15खुने़ॽ कुम्बा अब्राहाम्मिल्ले़ कुये़म्मो कुसे़वारोबाहाॽरे़ मे़दयु मे़ने़स्सुबा के़रे़क् वबाक्हाॽ पलिस्तिहाॽरे़ मे़साक्तु, हे़क्क्याङ् खाम्लुङ्हाॽ मे़गेःत्तुआङ् मे़लुप्तु॥
16खे़ब्याङ् अबिमेलेक्किल्ले़ इसहाक्के़न् मे़त्तु, “आल्ल आनिगे़ओलाम् माःङ्घा पेगे़ॽओ, थेआङ्भे़ल्ले़ खे़ने़ॽ आनिगे़नुःल्ले़ मुक्साम्साबा के़बोक्खे़आङ् के़वाॽरो॥”
17खे़ल्ले़चोगुल्ले़ इसहाक्के़न् खे़प्मोलाम् लःन्दे़आङ् गरारबा ने़ने़बा ते़न्नो साःङ्गाहिम् खिङ्सुआङ् बाखे़प्मो युङ्मा हेःक्ते़॥ 18इसहाक्के़ल्ले़ कुम्बा अब्राहाम्मिल्ले़ कुये़म्मो मे़दयुआङ् के़ने़बा वबाक्हाॽ याम्मो तमा पाङ्घुसि, थेआङ्भे़ल्ले़ अब्राहाम्मिन् मासिङ्ङाङ् एगाङ् पलिस्तिहाॽरे़ खे़न् वबाक्हाॽ मे़लुप्तु मे़देसुआङ् ने़स्से़॥ हे़क्क्याङ् कुम्बारे़ वाःत्तुधबा वबाक् मिङ्हाॽए खुने़ॽआङ् चोगु॥
19इसहाक्के़ल्ले़ कुसे़वारोबाहाॽरे़ ने़ने़बा ते़न्नो कुसङ् वबाक् मे़दयुल्ले़ च्वाःत् के़बुम्बा के़लःम्बा वबुन्दाक् मे़घोसु॥ 20कर गरारबा पित् के़गम्बाहाॽ मे़द्ये़आङ् “कन् च्वाःत्तिन् आनिगे़न्” मे़लॽरे़र इसहाक्के़ल्ले़ कुबित् के़गम्बाहाॽनु खेमा मे़हेःक्ते़॥ हे़क्केलॽरिक् खे़माॽ मे़जोगे़बाल्ले़ चोगुल्ले़ इसहाक्के़ल्ले़ खे़न् वबाक्किल्ले़ कुमिङ् एसेक् मे़त्तु॥
21खे़ब्याङ् इसहाक्किल्ले़ कुसे़वारोबाहाॽरे़ वेॽसमा वबाक् थिक्काङ् मे़दयु, कर खे़प्मोआङ् खे़माॽ पोःक्खे़॥ खे़ल्ले़चोगुल्ले़ खे़न् वबाक्किल्ले़ कुमिङ् सित्ना मे़मे़त्तु॥ 22खुने़ॽ खे़प्मोलाम् वेॽसमादे़न्नो पेगे़, हे़क्क्याङ् वेॽसमा वबाक्थिक् तयु॥ खे़प्मोग आत्तिन्हाॽरे़आङ् खे़माॽ मे़न्जोगुन्॥ खे़ल्ले़चोगुल्ले़ खे़न् वबाक्किल्ले़ कुमिङ् अक्खे पाःत्तुर “रहोबोत” युक्खु, “आल्लग यहवे दाङ्बाल्ले़ आनिॽ युङ्मादे़न् आबिरे़आङ् वाॽ, हे़क्क्याङ् आनिॽ कन् ते़न्नो आबोन् आधे़ॽरो॥”
23खे़प्मोलाम् इसहाक्के़न् थो बेर्सेबा चत्छिङ् पे॥ 24हाबा खे़न् से़न्दिक् यहवे दाङ्बान् खुने़ॽओ निधाःम्सिङ्, हे़क्क्याङ् मे़त्तु, “आङ्गाॽ के़म्बा अब्राहाम्मिल्ले़ कुनिङ्वाॽफुमाङ्आ॥ खे़ने़ॽ मे़ङ्गिए़ॽ थेआङ्भे़ल्ले़ आङ्गाॽ खे़ने़ॽनु वाॽआ॥ आङ्गाॽ खे़ने़ॽ हाङ्वामुॽइ पिने़, आसे़वारोबा अब्राहाम्मिन्नु चोगुङ्बा माङ्हुप्पिल्ले़ चोगुल्ले़ आङ्गाॽ के़मुॽइदाङ्साहाॽ फोसुङ्सिङ् पिने़॥”
25खे़ब्याङ् इसहाक्के़ल्ले़ खे़प्मो ले़त्ति तोःम्मादे़न् थिक् चोगुआङ् यहवे दाङ्बान् पेलि फाक्तु॥ हे़क्क्याङ् कुसाःङ्गा हिम्मिन् हाबा खे़प्मो खिङ्सुआङ् खे़प्मो इसहाकरे़ कुसे़वारोबाहाॽरे़ लत्छा वबाक्थिक् मे़दयु॥
इसहाक नु अबिमेलेकरे़ खुन्छिॽ माङ्हे़क्
26थिक्यान् गरारलाम्बा अबिमेलेक्के़न् कुसुजादाङ्बा अहुज्जते़न् नु कुधक्सुबाहाॽरे़ खुनिॽ थक्मोबा पिकोल्ले़न् सोरिक् तेॽरुसिआङ् इसहाक्के़ल्ले़ कुदुम्से़ त्ये़॥ #तोलिङ् २१:२२ 27इसहाक्के़ल्ले़ खे़ङ्हाॽ मे़त्तुसि, “निङ्मि कुसिक् आग्इते़आङ् खे़निॽ लाजेॽलाम् आङ्गाॽ याप्मि के़लःत्ते़ के़देसे़, हे़क्क्याङ् याम्मो थेआङ् आदुम्से़ के़द्ये़ॽइबाबे?”
28खे़ङ्हाॽरे़ खुने़ॽ मे़मे़त्तु, “यहवे दाङ्बान् खे़ने़ॽनु वाॽ के़लॽबान् आनिगे नुरिक्काङ् निःम्ना॥ खे़ल्ले़चोगुल्ले़ हाबा कन् पाःन्निन् खे़ने़ॽ मे़प्मा निङ्वाॽ चोगुम्बे़ खे़ने़ॽनु आनिॽ लुम्मो पाःन्दङ् पोङ्ल, हे़क्क्याङ् खे़ने़ॽनु आनिॽ लुम्मो लत्छा माङ्हे़क् थिक् चोगुम्॥ 29आनिगे खे़ने़ॽ थेआङ् ताप्फे़ःल्लिक् मे़म्मे़त्ते नुरिक् मे़त्तासिगे़आङ् सनारुङ्ङो पाङ्ने़छिगे़बा हे़क्के खे़ने़ॽआङ् आनिगे हान्ति मे़जोगे़न्ने़ॽओ॥ हे़क्क्याङ् आल्ल ओमे़त्ते़ॽ, यहवे दाङ्बाल्ले़ खे़ने़ॽ कम्भ्यारिक् यरिक् मुॽइसाम् के़बिरे़आङ् वाॽ॥”
30खे़ब्याङ् इसहाक्के़ल्ले़ खे़ङ्हाॽरे़ खुनिॽ लागि सा नु तःक् थोःक्तुआङ् पिरुसि, हे़क्क्याङ् खे़ङ्हाॽरे़ मे़ज मे़धुङु॥ 31कुदाःन्दिक्मा तानाम्सा खे़ङ्हाॽ मे़बोगे़, हे़क्क्याङ् खुन्छिॽलुम्मो माङ्मे़हे़क्सिङ्॥ खे़ब्याङ् इसहाक्के़ल्ले़ खे़ङ्हाॽ लाम्मे़त्तुसिआङ् निङ्वाॽ याङ्याङ् लॽरिक् मे़बे॥
32हाबा खे़न् ये़न्नो इसहाक्के़ल्ले़ कुसे़वारोबाहाॽ मे़द्ये़आङ् खुन्छिॽ मे़दयुबा वबाक्किल्ले़ कुयाःम्बेओ खुने़ॽ मे़मे़त्तु, “आनिगे च्वाःत् वबुन्दाक् खोमनाआङ् ने़ःॽ॥” 33खे़ब्याङ् खुने़ॽ खे़न् वबाक्किल्ले़ कुमिङ् सिबा युक्खु॥ खे़ल्ले़चोगुल्ले़ आल्ल थारिक् खे़न् ये़क्यक्किल्ले़ कुमिङ् बेर्सेबा मे़मे़त्तुरो॥
एसाबे़ल्ले़ वेॽ लाजेॽओबा कुमेःत्हाॽ
34एसाबे़न् लिबोङ् तङ्बे योरे़ल्ले़ खुने़ॽ हित्ति बेरिरे़ कुस्सा मे़न्छुमा यहुदिते़न् नु हित्ति एलोने़ल्ले़ कुस्सा मे़न्छुमा बासमते़न् ते़न्धाम् मेःक्खिम् मे़त्तु तारुसि॥ 35खे़ङ् मे़न्छुमाहाॽरे़ चोगे़छुल्ले़ इसहाक नु रिबेकाःल्ले़ खुन्छिॽ हिङ्मन्नो साॽरिक् निङ्वाॽ तुक्मा पाःन्हाॽ पोःक्खे़द्ये़॥
Currently Selected:
तोलिङ्सोमु 26: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
