लुका 14
14
ये़सुन् फरिसिःल्ले़ कुहिम्मो
1थिक् नाःम्सिङ् ये़न्नो ये़सुन् लत्छा फरिसि लाम्लोबाल्ले़ कुहिम्मो चाजासे़ पे॥ खे़प्मो मनाहाॽरे़ खुने़ॽ मे़धोःप्सुआङ् मे़वये़, 2आल्ल खुने़ॽ कुदगि कुलाङ् कुहुक् हःप्सुबा मनाधिक् त्ये़॥ 3हे़क्क्याङ् ये़सुरे़ साम्योथिम्साम्बाहाॽ नु फरिसिहाॽ सेःन्दोसुसि, “साम्योथिम् इङ्जाङ् कुइसिक् नाःम्सिङ् ये़न्नो के़दुक्पा मनाहाॽ वेःम्मासि नुॽबि?”
4कर खे़ङ्हाॽरे़ थेआङ् नोगप् मे़म्बिरुन्॥ हे़क्केःल्ले़ ये़सुरे़ खे़न् मनान् सम्दाङ् कुहुक् ने़स्सुर नुसुआङ् पाङ्घुदेसुरो॥ 5हे़क्क्याङ् ये़सुरे़ खे़ङ्हाॽ मे़त्तुसि, “नाःम्सिङ् ये़न्नो खिनिॽ सा इग्र पित् थिक् केःम्बा लुम्बाःत्तो मक्था लाःत्तिल्ले़ खिनिॽ खिमो लाःक्कात् के़उःक्खुम् के़लःत्तुम्बि मेःम्बि?”
6कर खे़ङ्हाॽरे़ थेआङ् नोगप् पिमा मे़न्छुक्तुन्लो॥
7ये़सुरे़ खे़न् साभाङ्जाओ उःप्मनाबा मनाहाॽरे़ तुम्म्याङ्हाङ् युक्नाहाॽ मे़सेगुर मे़युङे़बा निसुआङ् खे़ङ्हाॽ कन् खे़दाॽइन् मे़त्तुसि 8“खिनिॽ मेःक्खिम् साभाङ्जाओ तरे के़म्उःत्तिने़ फाॽग्र तुम्म्याङ्हाङ् युक्नाओ मे़युङे़म्मिन्ने़ॽओ, थेआङ्भे़ल्ले़ खिनिॽनुःल्ले़आङ् मिङ्सोदाङ्बा मनान् तरे उःत्ते़आङ् वाॽने़ फाॽग्र 9खे़न् हिम्दाङ्बान् ताआङ् ‘खे़ने़ॽ कन् युक्नान् खुने़ॽ ले़रे़बिरे़ॽआङ् यो खाम्लोओ युङे़ॽओ’ के़मे़त्ने़ फाॽग्र के़नाधारो॥ 10खे़ल्ले़ कुले़क्वा तरे के़म्उःत्ने़ फाॽग्र खे़ने़ॽ यो खाम्लोओ युङ्सिङ्ङे़ॽओ॥ हे़क्केलॽरिक् हिम्दाङ्बे़न् ताआङ् ‘मेःन् आदाङ्बे, खे़ने़ॽ थो तुम्म्याङ्हाङ् युक्नाओ युङे़ॽओ’ के़मे़त्ने़ फाॽग्र खे़ॽयो खिरि के़वाॽबा तरेबाहाॽरे़ खुनिॽ तगि खे़ने़ॽ के़मिङ्सो पोरो॥ 11थेआङ्भे़ल्ले़ हात् यम्बा ले़ङ्सिङ् खे़न् चुङ्जिगे़न्सा पोङ्लो, हे़क्क्याङ् हात् चुङ्जिगे़न्सा ले़ङ्सिङ् खे़न् यम्लाबा पोङ्लो॥”
12हे़क्क्याङ् ये़सुरे़ हिम्दाङ्बान् अक्खे मे़त्तु, “खे़ने़ॽ अक्खेलॽरिक् चामुक् थिमुक् के़से़सुल्ले़ के़न्जुम्हाॽ, के़म्भुॽ के़न्साॽहाॽ, के़गाॽइ सोधोःक्हाॽ नु याङ्साकुन्धे के़गप्पा पाङ्भेॽसाबाहाॽ मे़उःत्ते़से़न्ने़ॽओ, थेआङ्भे़ल्ले़ खे़ङ्हाॽरे़आङ् खे़ने़ॽ के़म्उःत्ताङ् चामुक् थिमुक् के़म्बिर याङ्ना के़म्नुःक् के़म्बिॽरो॥ 13कर खे़ने़ॽ चामुक् थिमुक् के़से़सुल्ले़ याङ्गे़साॽबाहाॽ, के़दुक्पाहाॽ, लाङ्सक्पाहाॽ नु मिक्फःम्बाहाॽ उःत्ते़से़ॽओ॥
14“हे़क्के के़जोगुल्ले़ खे़ने़ॽ मुॽइसाम् के़घोसुॽ, थेआङ्भे़ल्ले़ खे़ङ्हाॽरे़ थेआङ् मे़न्गत्तुन्नाङ् खे़न् याङ्ना हुङ्मा मे़न्छुक्तुन्लो॥ कर साम्योबा मनाहाॽ सिमे़न्लाम् याम्मो मे़हिङ्ङिल्ले़ निङ्वाॽफुमाङ्ङिल्ले़ खे़ने़ॽ काक् नुःक्तु के़बिॽरो॥”
पयम् साभाङ्जारे़न् खे़दाॽ
(मत्ति २२:१-१४)
15खुने़ॽनुए सोरिक् के़युङ्बा थिक्किल्ले़ कन् पाःन्निन् खे़प्सुआङ् पाःत्तु, “निङ्वाॽफु हाङ्जुम्बा चामुक् थिमुक्को चा के़जाबाहाॽग मुॽइसाबासिरो॥”
16ये़सुरे़ खे़न् मे़त्तु, “थिक् मनाःल्ले़ यम्बा साभाङ्जा से़मा निङ्वाॽ चोगुआङ् यरिक् तरेहाॽ उःत्तुसि॥ 17हे़क्क्याङ् काक् यारिप् पोःक्खे़आङ् कुसेवारोबाधिक्किन् चामा थुङ्मा यारिप् पोःक्खे़, आल्ल त्ये़म्मे़ॽओ फाॽआङ् तरे उःत्छे़ पाङ्घुदेसुरो॥” 18कर खे़न् मनाहाॽ साभाङ्जाओ मे़म्बेःक्मना मेलाम्सिङ्लो॥ थिक्सिगेक्पाल्ले़ मे़त्तु, “इङ्गाॽ प्याङ्सिगे़न् इक्ताप् इङुङ्ङाङ् वाॽआ, हे़क्क्याङ् खे़न् ओमे़त्छे़ पेःक्मा पोङ्, हे़क्केःल्ले़ साभाङ्जाओ तामा मे़सुक्कान्लो॥ ले़प्मि पिराङ्ङे़ॽओ॥” 19वेॽ मनाःल्ले़ मे़त्तु, “इङ्गाॽ कुगाप् ङासि पित्पाहाॽ इङुङ्सिङ्ङाङ् वाॽआ॥ खे़ङ्हाॽ थोःङ्मा साॽमासि पोङ्, हे़क्केःल्ले़ इङ्गाॽ साभाङ्जाओ तामा मे़सुक्कान्लो॥ ले़प्मि आबिरे़ॽओ॥” 20हे़क्क्याङ् आल्लसाङ् वेॽ मनाःल्ले़ अक्खे मे़त्तु, “इङ्गाॽग खारक् मेःक्खिम् चोगुङ्ङाङ् वाॽआ, हे़क्केःल्ले़ साभाङ्जाओ तामा मे़सुक्कान्लो॥ 21हे़क्क्याङ् से़वारोबाल्ले़ पेआङ् कुन्दाङ्बान् बाहे़क्के खे़न् पाःन्निन् मे़त्तु॥ हे़क्केःल्ले़ खे़न् मनाःल्ले़ साॽरिक् कुसिक् पोगे़आङ् खे़न् के़से़वारोबान् मे़त्तु, ‘हारा पेगे़ॽआङ् पाङ्जुम्मोबा लाम् लाम् के़वाॽबा याङ्गे़साॽबाहाॽ, के़दुक्पाहाॽ, लाङ्सक्पाहाॽ नु मिक्फःम्बाहाॽ उःत्ते़ तारे़से़ॽ॥’ 22हे़क्क्याङ् खे़न् सेवारोबान्नाङ् पेआङ् बाहे़क्के चोगुआङ् नुःक्खे़ त्ये़आङ् मे़त्तु, ‘आदाङ्बे, खे़ने़ॽ के़बाःत्तुबा हे़क्केए इङ्गाॽ चोगुङ्, आल्लसाङ् यरिक् युङ्मा ते़न्हाॽ ने़रो॥’ 23हे़क्केःल्ले़ कुन्दाङ्बाल्ले़ खे़न् मे़त्तु, ‘हे़क्केने़ फाॽग्र खे़ने़ॽ पाङ्भेॽओ पेगे़ॽआङ् लाम्लाम्मो के़वाॽबा मनाहाॽ हारा साभाङ्जाओ मे़दारए पोङ् फाॽआङ् उःत्ते़ तारे़से़ॽओ॥ हे़क्केलॽरिक् कन् आहिम्मिन् सधे़क् तिम्लरो॥’ 24उःप्मनाबा तरेबा आत्तिल्ले़आङ् इङ्गाॽ से़सुङ्बा साभाङ्जाओ चामा मे़घोसुन्लो॥”
हुॽसाम्बा पोङ्मा तुक्खेन्
(मत्ति १०:३७-३८)
25थिक्ले़ङ् यरिक् यरिक् मनाहाॽरे़ ये़सुरे़ कुएःक् कुएःक् मे़नाःत्तुर मे़वये़ल्ले़ खुने़ॽ खिरि हिसिङ्ङाङ् मे़त्तुसि, 26“इङ्गाॽ याप्मि के़दिम्बाल्ले़ कुम्मा-कुम्बासि, कुमेःत्-कुस्साहाॽ, कुम्भुॽ कुन्साॽसि, कुन्ने़ॽ कुन्साॽसि, हे़क्क्याङ् कुहिङ्मन्निन् इङ्गाॽनुःल्ले़आङ् साॽरिक् मिःम्जि मे़त्तुने़ फाॽग्र खे़ङ्ग इङ्गाॽ आहुॽसाम्बा पोङ्मा मे़सुक्ने़न्लो॥ 27हे़क्क्याङ् खे़ने़ॽ के़सिलाम्साक्मा सिङ्ङिन् आबाङे के़बङ्सिङ्ङाङ् इङ्गाॽ के़न्दिम्मान्ने़ फाॽग्र आहुॽसाम्बा पोङ्मा के़न्छुक्ने़न्लो॥ 28आल्ल निङ्वाॽ इःत्ते़म्मे़ॽ, खिनिॽओ थिक्किल्ले़ यम्बा चङ्हिम् चोःक्मा निङ्वाॽ चोगुल्ले़, चोःक्मानुःल्ले़ तगि खे़न् सुःप्माल्ले़ आक्खे़न् याङ्साकुन्धे चाहाबा चोक् लॽरिक् निङ्सेक् चोगुबि मेःम्बि? 29-30मेःन्ने फाॽग्र हिम्पाङ्यक् ने़माग सुक्तु, कर खे़न् चोःक्मा सुःप्मा मे़सुक्तुन्लो॥ हे़क्क्याङ् कन् के़निबा के़घे़म्बा मनाहाॽरे़ खे़न् अक्खे मे़मे़त्तुर किनाःन्दि मे़बिरुरो, ‘खे़ने़ॽ हेःक्माग के़हेःक्तु, कर सुःप्मा के़न्छुक्तुन्लो!’
31“आल्ल लत्छा थिबोङ् हे़न्छिङ् (१०,०००) थक्सुबा के़गप्पा हाङ्ङिल्ले़ वेॽसमा निबोङ् हे़न्छिङ् (२०,०००) थक्सुबा के़गप्पा हाङ्ङिन्नु थङ् चोःक्से़ पेःक्मानुःल्ले़ तगि खे़ल्ले़ युङ्सिङ्ङाङ् खे़न् वेॽसमा हाङ्ङिन् नाःम्मा सुक्तुबि मेःम्बि फाॽआङ् नुरिक्काङ् निङ्वाॽ इःत्तुॽरो॥ 32खे़ल्ले़ खे़न् हाङ्ङिन् नाःम्मा मे़सुक्तुन्बा निःन्धो चोगुने़ फाॽग्र खे़ल्ले़ खे़न् हाङ्ङिन् लाम्मो थङ् चोःक्से़ फे़न्ल पत्तिल्ले़सा हाङ्लाइङ्बान् पाङ्घुआङ् नादङ् चोगुॽरो॥ 33हे़क्केलॽरिक्के खे़ने़ॽ के़गत्तुबा काक् पाःन्हाॽ के़न्ले़रुन्ने़ फाॽग्र इङ्गाॽ आहुॽसाम्बा पोङ्मा के़न्छुक्ने़न्लो॥
34“युम्मिङ्ग नुबाए चोक्, कर युम्मिल्ले़ कुलिम्मे़न् माबेःक्ने़ फाॽग्र याम्मो के़लिम्बा चोःक्मा सुक्मे़दे़त्ने़न्लो॥ 35हे़क्क्याङ् खे़ङ्ग इक्ताप्पो चुतोआङ् मे़बोङ्ने़न् मनाहाॽरे़ बा हे़क्केए लाप्मे़भुसु मे़देसुरो॥ हे़क्क्याङ् आबाःन्निन् नुरिक्काङ् खे़प्से़म्मे़ॽआङ् कुसिङ् निःत्ते़म्मे़ॽओ!”
Currently Selected:
लुका 14: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
