लुका 15
15
के़माबा मे़ल्लुक्
(मत्ति १८:१२-१४)
1थिक्ये़न् यरिक् एःङ्याङ् के़भोङ्बाहाॽ नु वेॽ लायोबाहाॽ ये़सुरे़ कुबान् खे़म्से़ खुने़ॽ कुघिरि मे़जुप्से़ल्ले़ 2फरिसिहाॽ नु साम्योथिम्साम्बाहाॽ कानाक्नाक् मे़लॽरे़र अक्खे मे़बाःत्तु, “कन् मनाःल्ले़ग लायोबाहाॽआङ् ताःक्तुसिआङ् सोरिक् युङ्ङाङ् चाजारो॥” 3हे़क्केःल्ले़ ये़सुरे़ खे़ङ्हाॽ खे़दाॽधिक् मे़त्तुसि 4“खिनिॽओ किप्थिक् (१००) मे़ल्लुक्हाॽ के़गप्पा मनाःल्ले़ लत्छान् मासुल्ले़ फाङ्-फाङ् (९९) मे़ल्लुक्हाॽ चाराम्मादे़न्नो ले़रुधसिआङ् खे़न् के़माबे़न् मे़ङ्घोए थारिक् मे़गोःत्तुन्बि? 5-6खुने़ॽ खे़न् के़माबा मे़ल्लुक्किन् खोसुआङ् कुभक्ताङ्ङो पक्खुर सःत्ल नुःङ् तारो॥ हे़क्क्याङ् कुन्देङ् कुन्जुम्हाॽ नु कुबाङ्भेॽसाबाहाॽ अक्खे मे़त्तुसिरो, ‘हौ! आल्ल आनिॽ सःत्तिरो, थेआङ्भे़ल्ले़ के़माबा आमे़ल्लुक्किन् याम्मो खोसुङ्ङाङ् वाॽआरो॥’ 7खे़प्से़म्मे़ॽओ, हे़क्केलॽरिक्के साङ्ग्राम्पेदाङ्ङो लायोलाम् हिम्मा मे़म्बोङ्मनाबा फाङ्-फाङ् (९९) साम्योबाहाॽनुःल्ले़आङ् लायोलाम् के़हिम्बा लायोबाधिक्किल्ले़ लागि यम्बा सःप्मान् पोङ्लो॥”
के़माबा याङ्ङे़त्छिन्
8ये़सुरे़ खे़ङ्हाॽ वेॽसमा खे़दाॽधिक् मे़त्तुसि, “आल्ल थिबोङ् युप्पा याङ्इत्छि के़गप्मा मे़न्छुमाॽधिक्ले़ याङ्धिक् मासुल्ले़ खे़ल्ले़ सेमि हाःन्दुआङ् खे़न् याङ्इत्छिन् मे़ङ्घोए थारिक् हिम्मिन् तुगुर मे़गोःत्तुम्बि? 9हे़क्क्याङ् खे़ल्ले़ खोसुआङ् कुन्देङ् कुन्जुम्हाॽ, कुबाङ्भेॽसाबाहाॽ उःत्तुसिआङ् अक्खे मे़त्तुसि, ‘आल्ल आनिॽ सःत्तिरो, थेआङ्भे़ल्ले़ इङ्गाॽ मासुङ्बा आयाङ्इत्छिन् इङ्गाॽ खोसुङ्ङाङ् वाॽआरो॥’ 10खे़प्से़म्मे़ॽओ, हे़क्केलॽरिक्के थिक् लायोलाम् के़हिम्बाल्ले़ लागि निङ्वाॽफुमाङ्ङिल्ले़ कुमाङ्लाइङ्बाहाॽआङ् मे़सःत्लो॥”
के़माबा सान्
11हे़क्क्याङ् ये़सुरे़ याम्मो वेॽसमा खे़दाॽआङ् मे़त्तुसि, “उन्छेःन् ने़प्फु ये़म्बित्छाॽसा के़गप्पा लत्छा मनाधिक् वये़॥ 12हे़क्क्याङ् थिक्ये़न् फोॽबाल्ले़ कुम्बान् अक्खे मे़त्तु, ‘आम्बे, इङ्गाॽ के़याङ्साकुन्धेन् फःक्खे़आङ् आलक्को के़धाबान् पिराङ्ङे़ॽओ॥’ हे़क्क्याङ् खे़न् मनाःल्ले़आङ् कुयाङ्साकुन्धेन् खे़ङ्हाॽ हाःत्तुसिरो॥ 13थिक्ये़न् निये़न् एगाङ् कुस्सा फोॽबाल्ले़ कुलक्को के़धाबा याङ्साकुन्धेहाॽ के़रे़क् कक् मे़त्छिङ्ङाङ् माःङ्घा लाजेॽओ पेरो॥ खे़प्मो खे़ल्ले़ कुयाङ्साकुन्धेहाॽ हने़ ए़ःत्ले़ले़ लॽमा नु चामा थुङ्माओ च माःन्दुरो॥ 14हे़क्क्याङ् खुने़ॽ कुयाङ्साकुन्धेहाॽ माःन्दुआङ् वये़ल्ले़ खे़प्मो यम्बा साक् थ्ये़आङ् खे़ल्ले़ चामा थुङ्मा थेआङ् मे़घोसुन्लो॥ 15हे़क्केःल्ले़ खुने़ॽ हाबा खे़न् लाजेॽओबा थिक् मनाःल्लो याःम्बक् चोःक्से़ पेआङ् खे़न् मनाःल्ले़ खुने़ॽ फाक्चा पिमा याःम्बक्को फत्छु॥ 16हे़क्क्याङ् खे़न् आत्तिल्ले़आङ् चामा थुङ्मा मे़म्बिरुन्निल्ले़ खे़ल्ले़ फाक्चान् चामा निङ्वाॽ चोगुरो॥
17“हे़क्क्याङ् खुने़ॽ कुनिङ्वाॽ सेरे़आङ् अक्खेलॽरिक् इःत्छिङ्, ‘आम्बारे़ कुहिम्मोग कुसे़वारोबाहाॽरे़ खाघा मे़ज मे़धुङुर मे़नन्छुॽ, कर इङ्गाॽग कप्मो साक्किल्ले़ सिमा इःत्ताङ्लो॥ 18इङ्गाॽ आल्लो आम्बारे़ कुहिम्मोए नुःङ्ङा पेःक्काआङ् मे़त्तुङ्, आम्बे, साङ्ग्राम्पेदाङ्बा निङ्वाॽफुमाङ्ङिन् नु के़दक्ले़ङ्वाओ इङ्गाॽ लायो चोगुङ्ङाङ् वाॽआरो॥ 19आल्ल इङ्गाॽ के़स्साआ पाःप्माआङ् मे़लाॽआन्लो॥ खे़ने़ॽ के़से़वारोबा कुइसिक् के़हिम्मो कत्ताङ्ङे़ॽओ॥’
20“हे़क्क्याङ् खे़न् मुत्थ्रिक् पोगे़आङ् कुम्बारो नुःक्खे़ पे॥ खे़न् फे़रे़र पत्छे़बा माःङ्घालाम्नुए कुम्बारे़ निसुआङ् मिःम्जिरे़ कुलुङ्माॽ कुधिम् पोःक्खे़, हे़क्क्याङ् लोःक्ते़र पेआङ् खे़न् हे़प्प्रे़क् हे़प्तुआङ् चुप् मे़त्तुरो॥ 21कुस्सा फोॽबे़ल्ले़ कुम्बा मे़त्तु, ‘आम्बे, साङ्ग्राम्पेदाङ्बा निङ्वाॽफुमाङ्ङिन् नु के़दक्ले़ङ्वाओ इङ्गाॽ लायो चोगुङ्ङाङ् वाॽआरो॥ आल्ल इङ्गाॽ के़स्साआ पाःप्माआङ् मे़लाॽआन्लो॥#१५:२१ खे़ने़ॽ के़से़वारोबा कुइसिक् के़हिम्मो कत्ताङ्ङे़ॽओ॥’ 22कर कुम्बारे़ खे़प्मो के़वाॽबा कुसे़वारोबाहाॽ मे़त्तुसि, ‘हारा पेगे़म्मे़ॽआङ् कन् आस्सा फोॽबान् काक्नुःल्ले़ नुबा तेःत्तिन् फे़त्ते़म्मे़ॽआङ् चाक्ते़म्मे़ॽ, कुहुक्चोओ स्वागेप् वाःत्ते़म्मे़ॽ, हे़क्क्याङ् कुलाङ्ङो लाङ्सुःप् चाक्ते़म्मे़ॽओ॥ 23हे़क्क्याङ् थाःङ्ङो चालुप्मनाबा थक्साधिक् फे़त्ते़म्मे़ॽआङ् से़रे़म्मे़ॽ, हे़क्क्याङ् चामुक् थिमुक् यारिप् चोगुम्माङ् सःत्तिरो॥ 24थेआङ्भे़ल्ले़ कन् आस्सान् स्ये़आङ् वये़, कर याम्मो हिङे़॥ खुने़ॽ मये़आङ् वये़, कर याम्मो इङ्गाॽ खोसुङ्ङाङ् वाॽआरो॥’ हे़क्क्याङ् खे़ङ्हाॽरे़ यम्बा साभाङ्जा से़मा मे़हेःक्तुरो॥
25“आल्ल खे़न् ये़म्मो कुस्सा तुम्बे़न् प्याङ्सिगे़न् इक्ताप्पो याःम्बक् चोःक्नु यागे़॥ खे़न् आक्खो नुःक्खे़आङ् हिम्बेसाङ् के़रे़ल्ले़ हिम्मो मुक्लाहाॽ मुक्ते़बा नु मनाहाॽ मे़लाःक्खे़बा खे़प्सुसि॥ 26हे़क्क्याङ् खुने़ॽ कन् थे पोङ्ल पत्पे? फाॽआङ् खे़प्मो के़वाॽबा से़वारोबान् सेःन्दोसु॥ 27हे़क्क्याङ् खे़न् से़वारोबाल्ले़आङ् नोगप् पिरु, ‘खे़ने़ॽ के़न्साॽ फोॽबे़न् थेआङ् मे़म्बोङ्ङे नुरिक्काङ् नुःक्खे़ त्ये़आङ् वाॽ, खे़ल्ले़चोगुल्ले़ के़म्बारे़ चालुप्मनाबा थक्साधिक् से़प्मा पाङ्घुसिआङ् कप्मो चामुक् थिमुक् से़सुबारो॥’ 28कर खुने़ॽ कुयाःक्ले़ॽरे़आङ् हिम्सिगाङ् लाःप्माए मे़दे़न्दे़न्लो॥ हे़क्केःल्ले़ कुम्बा लाःक्कात् लःन्दे़आङ् खे़न् हिम्सिगाङ् पित्छि फाॽआङ् ले़मु॥ 29हे़क्केःल्ले़ खे़न् कुस्सा तुम्बाल्ले़ कुम्बा अक्खे मे़त्तु, ‘ओमे़त्ते़ॽ, इङ्गाॽ कम्भे़रिक् तङ्बे थारिक् खे़ने़ॽ कुसे़वा चोगुङ्, के़बाःत्तुबा पान् आप्फाल्ले़आङ् इङ्गाॽ मे़न्अप्पे़न्, हे़क्केसाङ् खे़ने़ॽ आन्देङ् आन्जुम्हाॽनु चामुक् थिमुक् चोगुङ्नि फाॽआङ् मे़न्दाक्साधिक्काङ् के़म्बिराङ्ङिन्लो॥ 30कर कन् के़स्साःल्ले़ खे़ने़ॽ के़याङ्सा कुन्धेहाॽ के़त्निमाहाॽनु ए़ःत्ले़ले़ लॽमाओ के़रे़क् माःन्दु॥ कर खुने़ॽ नुःक्खे़ त्ये़ःल्ले़ खे़ने़ॽ चालुप्मनाबा थक्सान् के़से़रुआङ् चामुक् थिमुक् के़से़सुरो॥’ 31हे़क्केःल्ले़ कुम्बारे़ कुस्सान् मे़त्तु, ‘आमिःम् आस्साए, खे़ने़ॽग सदादिङ् इङ्गाॽनुए के़वाॽरो, हे़क्क्याङ् इङ्गाॽ कत्तुङ्बा काक् आयाङ्साकुन्धेहाॽ खे़ने़ॽइन्नेरो॥ 32कर के़न्साॽ नुःक्खे़ त्ये़बाओ आनिॽ सःप्मा पोङ्लो॥ थेआङ्भे़ल्ले़ खुने़ॽ स्ये़आङ् वये़, याम्मो हिङे़आङ् वाॽ॥ खुने़ॽ मये़बेआङ् वये़, कर याम्मो आनिॽ आघोसुम्माङ् आवाॽरो॥’”
Currently Selected:
लुका 15: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
