लुका 5
5
थिक्सिगेक्पा हुॽसाम्बाहाॽ
(मत्ति ४:१८-२२; मर्कु १:१६-२०; युहु १:४०-४२)
1थिक्ये़न् ये़सुन् गने़सरे़त वाहङ्ङिल्ले़ कुयाओ सुनाइङ् से़सुर ये़बे़ल्ले़ खे़प्मो मनाहाॽ निङ्वाॽफु पाःन्जाक्किन् खे़म्से़ मे़द्ये़आङ् खुने़ॽ चिबुःत् मे़बन्छुरो॥ 2खे़प्मो कुयाओ ने़त्छि खःङ्बेहाॽ ये़सुरे़ निसुसि, कर कुबेसाङ् योःङ् के़ले़प्पाहाॽ खुनिॽ योःङ् वाहप्नु मे़यागे़॥ 3ये़सुन् सिमोनरे़ कुघःङ्बेओ लासे़आङ् मिसाक् कुदिःम्बे केःम्बाओ तेॽबाङ्घु, हे़क्क्याङ् खे़प्मो युङ्सिङ्ङाङ् मनाहाॽ हुॽरुसि॥
4खुने़ॽ पाःप्मा सुरुआङ् सिमोने़न् मे़त्तु, “खःङ्बेन् ना कुदिःम्बे केःम्बाओ तेॽरे़आङ् ङादे़म्मारे़ लागि योःङ्ङिन् ले़प्ते़ॽ॥” 5हे़क्केःल्ले़ सिमोनरे़ नोगप् पिरु, “आदाङ्बे, आनिगे़ग नाम्दाःत्ताःत् याम्बुधिक्काङ् योःङ् ले़प्मनासाङ् ङाधिक्काङ् मे़याङ्घुम्बे़न्लो, हे़क्केसाङ् खे़ने़ॽ के़बाःत्तुबा हे़क्के ले़प्तुङ्साॽरुङ्लो॥” 6हे़क्क्याङ् खुने़ॽ पाःत्तुबा हे़क्के योःङ्ङिन् ले़प्तुल्ले़ यरिक् ङाहाॽ मे़ध्ये़आङ् योःङ्ङिन्ने ते़ःङ्मा हेःक्ते़रो॥ 7हे़क्केःल्ले़ खे़ङ्हाॽरे़ वेॽ खुनिॽ तेःङ्जुम्हाॽ वेॽ खःङ्बेन् फे़त्ते़म्मे़ॽआङ् आभाॽरे़म्मे़ॽओ लॽरिक् हुक्चाःल्किःल्ले़ मे़उःत्तुसि॥ हे़क्क्याङ् खे़ङ्हाॽ मे़भे़रे़आङ् ने़प्माङ् खःङ्बेहाॽ ङाःल्ले़ तिम्से़आङ् निःम्मा इःत्ते़॥ 8सिमोन पत्रुसरे़ कन् निसुआङ् ये़सुरे़ कुदगि थुङ्बोहजॽ युङ्सिङ्ङाङ् मे़त्तु, “आदाङ्बे, इङ्गाॽग साॽरिक् लायोबा मनाआरो, खे़ने़ॽनु वाॽमा मे़लाॽआन्लो, ले़राङ् थ्याङ्ङे़ॽओ॥”
9थेआङ्भे़ल्ले़ सिमोन नु कुन्जुम्हाॽरे़ मे़धासुसिबा ङाहाॽ मे़इःत्तुआङ् साॽरिक् खुनिॽ निङ्वाॽ मये़रो॥ 10सिमोनरे़ कुन्जुम् जब्दियारे़ कुस्साहाॽ याकुब नु युहुन्नासिरे़आङ् खुन्छिॽ निङ्वाॽ मये़॥ ये़सुरे़ सिमोने़न् मे़त्तु, “खे़ने़ॽ मे़गिसे़न्ने़ॽ, ङा के़दे़म्सुबा हे़क्केए आल्लआङ्धो निङ्वाॽफुहाङ्जुम्मो मना के़दे़म्बा के़दाःप्पा के़बोङ्लो॥”
11हे़क्क्याङ् खे़ङ्हाॽरे़ खःङ्बेहाॽ कुयाओ मे़देॽरुसि, हे़क्क्याङ् के़रे़क् मे़ले़रु मे़धआङ् ये़सुन् मे़दिम्दुरो॥
ये़सुरे़ लोगेॽरे़ तरुबा मनान् वेःन्दुॽ
(मत्ति ८:१-४; मर्कु १:४०-४५)
12थिक्ये़न् ये़सुन् लत्छा पाङ्जुम्मो वये़ल्ले़ लोगेॽरे़ तरुआङ् थिम्सुबा मनाधिक् खे़प्मो त्ये़॥ खे़ल्ले़ ये़सुन् निसुआङ् कुदगि साम्बोन् फन्छिङ्ल पेलि फाक्तु, “आदाङ्बे, खे़ने़ॽ निङ्वाॽ के़जोगुने़ फाॽग्र लोगेॽलाम् वेःम्मा के़सुक्कारो॥”
13ये़सुरे़आङ् कुहुक्किन् सन्छुआङ् सुसुर खे़न् मनान् अक्खे मे़त्तु, “इङ्गाॽ के़नुॽर फाॽआङ् निङ्वाॽ चोगुङ्लो॥” हे़क्क्याङ् खिमो खे़न् लोगेॽरे़ तरुबा मनान् नुरे़रो॥ 14हे़क्क्याङ् ये़सुरे़ खे़न् मनान् मे़त्तु, “कन् पाःन्निन् हाःत्ताङ् मे़मे़त्ते़न्ने़ॽ, कर निङ्वाॽफुसाम्बाल्ले़ के़साॽर फाॽआङ् ओसेःन्धाक्सिङ्ङे़ॽ, हे़क्क्याङ् मोसारे़ कुसाम्योथिम् कुइसिक् मनाहाॽ नुराङ् फाॽआङ् ओसेःन्धाक्मासिरे़ लागि सिदुङ्जभा चोगे़ॽओ॥”
15करसाङ् कन् पाःन्निन् काक् पिसाङ् से़रे़आङ् ये़सुरे़ कुबान् खे़म्से़ नु खुनिॽ तुक्मा यॽमालाम् नुसिङ्से़ यरिक् मनाहाॽ ये़सुओ मे़द्ये़॥ 16कर ये़सुन् ए़त्ले़ङ् मनालुम्मोलाम् से़न्छिङ्ङाङ् तुवा चोःक्से़ एःक्सादे़न्हाॽओ पेरो॥
लङ्ले़ःङ्वा तुक्माल्ले़ तरुबा मनान् वेःत्
(मत्ति ९:१-८; मर्कु २:१-१२)
17थिक्ये़न् ये़सुन् मनाहाॽ खाहुन् हुॽरुसिर युङे़ल्ले़ खे़प्मो गालिल नु यहुदियासमा यरिक् पाङ्जुम्मोलाम् हे़क्क्याङ् यरुसले़मलाम् फरिसिहाॽ नु साम्योथिम्साम्बाहाॽआङ् मे़द्ये़आङ् खाहुन् मे़घे़प्सुर मे़युङे़॥ ये़सुरे़ निङ्वाॽफुमाङ्ङिल्ले़ वेःम्मा कुमुक्साम्मिन् कत्तुआङ् वये़, 18हे़क्क्याङ् कुभा मनाहाॽरे़ लङ्ले़ःङ्वा मनान् कुने़त्नाःन्नुए खे़प्मो मे़दारुआङ् ये़सुरे़ कुदगि तेॽमाआङ् ने़मा के़लॽबा निङ्वाॽ मे़जोगु, 19कर खे़प्मो ये़सुन् वये़बा हिम्मो यरिक् मनाहाॽरे़ सधे़क् मे़धिम्सुआङ् मे़युङे़बाल्ले़ चोगुल्ले़ सिगाङ् तेॽमा मे़न्छुक्तुन्॥ हे़क्केःल्ले़ थो खाम्बुओ मे़लासे़आङ् खाम्बुन् मे़हन्दु॥ हे़क्क्याङ् लङ्ले़ःङ्वान् कुने़त्नानुए मनाहाॽरे़ खुनिॽ लुम्मो ये़सुरे़ कुदगि यो मे़होसु मे़धासुरो॥ 20ये़सुरे़ खे़ङ्हाॽरे़ खुनिॽ नसाःन्निन् निसुआङ् खे़न् लङ्ले़ःङ्वा मनान् मे़त्तु, “चुम्मे, खे़ने़ॽ के़लायोहाॽ ले़प्मि पोःक्खे़रो॥” 21हे़क्केःल्ले़ खे़प्मो “कन् मनान् हाःप्पे? अक्खेलॽरिक् निङ्वाॽफुमाङ्ङिल्ले़ कुदक्ले़ङ्वाओ माङ् चे़ॽयापान् के़बाःप्पा कन् मनान् हाःप्पे? लायोलाम् ले़प्मि पिमाग निङ्वाॽफुमाङ्ङिन्नुःल्ले़ वेॽ हाःत्ले़आङ् मे़सुक्तुन्लो” फाॽआङ् साम्योथिम्साम्बाहाॽ नु फरिसिहाॽरे़ खुनिॽ निङ्वाॽबो मे़इःत्तु॥
22खे़ङ्हाॽरे़ खुनिॽ निङ्वाॽबो थे़मा मे़इःत्तुर मे़युङ् के़लॽबान् ये़सुरे़ निसुआङ् मे़त्तुसि, “खिनिॽ अक्तङ्बा थेआङ् के़इःत्तुम्बाबे? 23कन् लङ्ले़ःङ्वान् ‘के़लायोहाॽ ले़प्मि पोःक्खे़’ मे़प्मा उसुरु चोःक्पि? इ ‘पोगे़ॽआङ् के़ने़त्नान् खप्से़ॽआङ् थासिङ्ङे़ॽ’ मे़प्मा उसुरु चोःक्पि? 24कर इक्सादिङ् खाम्बेःक्मो मे़न्छाम्साःल्ले़ लायो ले़प्मि पिमा युक् कत्तुॽ फाॽआङ् खिनिॽ कुसिङ् निःत्ते़म्मे़ॽओ,” हे़क्क्याङ् ये़सुरे़ खे़न् लङ्ले़ःङ्वा मनान् मे़त्तु, “खे़ने़ॽ पोगे़ॽआङ् के़ने़त्नान् याङ्सिङ्ङे़ॽआङ् के़हिम्मो थासिङ्ङे़ॽ॥”
25खिमो खे़न् खुनिॽ तगिए मुत्थ्रिक् पोगे़आङ् कुने़त्नान् याङ्सिङ् हे़क्क्याङ् निङ्वाॽफुमाङ्ङिल्ले़ कुनारा फोसुर कुहिम्मो थासिङ्लो॥ 26के़रे़क्ले़ खुनिॽ साॽरिक् निङ्वाॽ मये़आङ् निङ्वाॽफुमाङ्ङिन् इङ्धाङ् मे़बिरुर मे़बाःत्तु, “अक्तङ्बाग आनिगे आप्फाल्ले़आङ् मे़न्निए वयिगे़रो॥”
ये़सुरे़ ले़बिन् उःत्तुॽ
(मत्ति ९:९-१३; मर्कु २:१४-१७)
27याङ्सि ये़सुन् खे़प्मोलाम् लःन्दे़ पेआङ् एःङ्याङ् के़भोङ्बा ले़बि मिङ् के़वाःप्पा मनान् एःङ्याङ् फोङ्मा ते़न्नो युङे़बा निसुआङ् मे़त्तु, “इङ्गाॽ तिम्दाङ्ङे़ॽओ॥” 28हे़क्क्याङ् खे़न्नाङ् मुत्थ्रिक् पोगे़आङ् के़रे़क् पाःन्हाॽ ले़रुधआङ् खुने़ॽनु थासिङ्लो॥
29याङ्सि ये़सुरे़ कुलागि ले़बिःल्ले़ कुहिम्मो यम्बा चामुक् थिमुक् से़सु॥ खे़प्मो यरिक् एःङ्याङ् के़भोङ्बाहाॽ नु वेॽ तरेबाहाॽ मे़वये़रो॥ 30खे़प्मो फरिसिहाॽ नु खुनिॽ साम्योथिम्साम्बाहाॽ मे़द्ये़आङ् ये़सुरे़ कुहुॽसाम्बाहाॽ मने़ मे़धिक्ते़र अक्खे मे़मे़त्तुसि, “एःङ्याङ् के़भोङ्बाहाॽ हे़क्क्याङ् लायोबाहाॽनु थेआङ् खिनिॽ के़दङ्ङासिआङ् चा के़जाम्बाबे?”
31ये़सुरे़ खे़ङ्हाॽ नोगप् पिरुसि, “सिदाॽसाम्बे़ङ्ग मे़न्दुक्मनाहाॽरे़ लागि मेःन्, कर के़दुक्पाहाॽरे़ लागिरो॥ 32हे़क्केलॽरिक्के इङ्गाॽआङ् साम्योबाहाॽ मेःन्, कर लायोबाहाॽ लायोलाम् मे़हिन्ल फाॽआङ् उःत्छे़ त्याङ्बारो॥”
चाने़त्तिल्ले़ कुयाःम्बेओ
(मत्ति ९:१४-१७; मर्कु २:१८-२२)
33कुभारे़ ये़सुन् मे़मे़त्तु, “युहुन्नारे़ कुहुॽसाम्बाहाॽग ए़त्ले़ङ् चाने़त्तो नु तुवा चोःक्कि मे़युङ्, फरिसिहाॽरे़ खुनिॽ हुॽसाम्बाहाॽआङ् हे़क्के मे़जोक्, कर खे़ने़ॽ के़हुॽसाम्बाहाॽग चाने़त्तोआङ् मे़न्युङ्ने़न्, मे़जर मे़धुङुर मे़वाॽइङ्ग!”
34ये़सुरे़ खे़ङ्हाॽ मे़त्तुसि, “मेःक्खिम्साबे़न् कुन्जुम्हाॽनु वाॽर थारिक् खे़ङ्हाॽ चाने़त्तो मे़युङ्बि? 35कर खे़ङ्हाॽलाम् मेःक्खिम्साबे़न् साक्के़ल्ले़क् मे़दे़म्सुआङ् मे़देॽरुल्ले़ खे़ङ्हाॽ चाने़त्तो मे़युङ्लो॥”
36हे़क्क्याङ् याम्मो खुने़ॽ कन् खे़दाॽइन् खे़ङ्हाॽ मे़त्तुसि, “हाःत्ले़आङ् कुसङ् चाङ्ङिन् थे़ःक्खुआङ् कुद्रे़क् चाङ्ङिन् मे़ले़म्दुन्, ले़म्दुने़ फाॽग्र कुसङ् चाङ्ङिन् ते़ःङ्बेःक्लो, हे़क्क्याङ् कुसङ् चाङ्ङिल्ले़ कुद्रे़क् चाङ्ङिन् मे़घे़म्दुन्नाङ्लो॥ 37हे़क्केलॽरिक् आत्तिल्ले़आङ् कुसङ् चे़ल्ले़क्सेॽ थिन् कुद्रे़क् से़होबा सुःक्वाओ मे़युक्खुन्॥ युक्खुने़ फाॽग्र कुसङ् चे़ल्ले़क्सेॽ थिःल्ले़ कुद्रे़क् से़होबा सुक्वान् थे़ःक्खुदेःसुॽरो॥ हे़क्क्याङ् थिन् वे़त् पेःक् हे़क्क्याङ् से़होबा सुक्वाःन्नाङ् चासोक्लो॥ 38कर कुसङ् चे़ल्ले़क्सेॽ थिन् कुसङ् से़होबा सुःक्वाओए याक्मा पोङ्लो॥ 39हे़क्क्याङ् आत्तिल्ले़आङ् के़दुम्बा चे़ल्ले़क्सेॽ थिन् थुङुआङ् कुसङ् चे़ल्ले़क्सेॽ थिन् थुङ्मा निङ्वाॽ मे़जोगुन्लो, थेआङ्भे़ल्ले़ अक्खे पाःत्तु, ‘के़दुम्बा चे़ल्ले़क्सेॽ थिःन्ने कुजा नुॽरो॥’”
Currently Selected:
लुका 5: LIF
Highlight
Share
Copy
Want to have your highlights saved across all your devices? Sign up or sign in
© 2009, 2023, Wycliffe Bible Translators, Inc. All rights reserved.
