लुका 6

नाःम्‍सिङ् ये़न्‌रे़ कुन्‍दाङ्‌बा

(मत्ति १२:१-१४; मर्कु २:२३-२८)

1थिक् नाःम्‍सिङ् ये़न्‍नो ये़सुन् नु कुहुॽसाम्‍बाहाॽ प्‍याङ्‌सिगे़न् इक्‍ताप्‍लुम्‍मोनु मे़बेर मे़बत्‍छे़ल्‍ले़ कुहुॽसाम्‍बाहाॽरे़ चासम्‍मिन् मे़दुबुआङ् हुक्‍को मे़नुगुर चामा मे़हेःक्‍तुरो॥ 2हे़क्‍केःल्‍ले़ कुभा फरिसिहाॽरे़ खे़ङ्‌हाॽ सेःन्‍मे़दोसुसि, “थेआङ् नाःम्‍सिङ् ये़न्‍नो चोःक्‍मा मे़न्‍नुॽमनाबा याःम्‍बक्‍किन् के़जोगुम्‍बाबे?” 3ये़सुरे़ खे़ङ्‌हाॽ नोगप् पिरुसि, “खिनिॽ साम्‌योसाप्‍लान् मे़न्‍निःत्ते के़वयिॽबि? थिक्‍ले़ङ् दाउद नु कुमनाहाॽरे़ खुनिॽ से़त्‍लाःक्‍ते़ल्‍ले़ 4खुने़ॽ निङ्‌वाॽफु साःङ्‌गाहिम्‍मो लासे़आङ् निङ्‌वाॽफुमाङ्‌ङिन् तोःम्‍मनाबा सेसे खरे़ःङ्‌ङिन् चआङ् कुमनाहाॽआङ् पिरुसि॥ खे़ङ्‌ग आनिॽ साम्‌योथिम् कुइसिक् निङ्‌वाॽफुसाम्‍बाहाॽरे़रक् चामा के़नुॽबा वये़रो॥” 5हे़क्‍क्‍याङ् ये़सुरे़ खे़ङ्‌हाॽ याम्‍मो मे़त्तुसि, “इङ्‌गाॽ मे़न्‍छाम्‍साःङ्‌ग नाःम्‍सिङ् ये़न्‍निल्‍ले़न्‍नाङ् कुन्‍दाङ्‌बाआरो॥”

ये़सुरे़ के़सम्‍बा हुक्‍किन् वेःन्‍दुॽ

(मत्ति १२:९-१४; मर्कु ३:१-६)

6वेॽसमा थिक् नाःम्‍सिङ् ये़न्‍नो खुने़ॽ यहुदि चुम्‍लुङ्‌हिम्‍मो पेआङ् हुॽरुसिर यागे़॥ खे़प्‍मो चुप्‍साङ् कुहुक् के़हेबा मनाधिक् वये़॥ 7आल्‍ल कुभा फरिसिहाॽ नु साम्‌योथिम्‍साम्‍बाहाॽरे़ ये़सुरे़ खे़न् मनान् नाःम्‍सिङ् ये़न्‍नो वेःन्‍दुल्‍ले़ आप्‍तिक् कुःप्‍मा फाॽआङ् खे़प्‍मो मे़सुगुआङ् मे़वये़रो॥ 8कर ये़सुरे़ खुनिॽ निङ्‌वाॽ मे़इःत्तुबा पाःन्‍निन् निङ्‌वाॽ खोसुआङ् खे़न् कुहुक् के़हेबा मनान् मे़त्तु, “फे़रे़ॽआङ् के़रे़क्‍ले़ खुनिॽ तगि ये़बे़ॽ॥” खे़न्‍नाङ् फे़रे़आङ् खे़प्‍मो ये़बे़॥ 9ये़सुरे़ खे़ङ्‌हाॽ मे़त्तुसि, “इङ्‌गाॽआङ् पाःन्‍धिक् सेःन्‍दोनिङ्‌लो—नाःम्‍सिङ् ये़न्‍नो नुबा नु ताप्‍फे़ःम्‍बा याःम्‍बक्‍को, साम्‌योथिम्‍मिल्‍ले़ आत्तिन् चोःक्‍मा आबिॽबे? हिङ्‌मन् से़ःप्‍माबि मे़ङ्‌माबि?” 10खुने़ॽ खिरि ओमे़त्तुसि हे़क्‍क्‍याङ् खे़न् कुहुक् के़हेबा मनान् मे़त्तु, “के़हुक्‍किन् सन्‍छे़ॽ॥” हे़क्‍क्‍याङ् खे़ल्‍ले़ कुहुक्‍किन् सन्‍छुल्‍ले़ खिमो वेःत्ते़रो॥ 11कर खे़प्‍मो के़वाॽबा फरिसिहाॽ नु साम्‌योथिम्‍साम्‍बाहाॽ साॽरिक् खुनिॽ सिक् पोगे़आङ् कन् ये़सुन् थे मे़प्‍माबे फाॽआङ् पान् थक्‍मा मे़हेःक्‍ते़रो॥

थिक्-ने़त् सेःक्‌युक्‍मिबाहाॽ

(मत्ति १०:१-४; मर्कु ३:१३-१९)

12थिक्‌ये़न् ये़सुन् कोःक्‍माओ तुवा चोःक्‍से़ पेआङ् नाम्‍दाःत्ताःत् निङ्‌वाॽफुमाङ्‌ङो तुवा चोगे़रो॥ 13हे़क्‍क्‍याङ् खाओःत्ते़आङ् ये़सुरे़ काक् कुहुॽसाम्‍बाहाॽ उःत्तुसिआङ् खे़ङ्‌हाॽओलाम् थिक्-ने़त् (१२) कुहुॽसाम्‍बाहाॽ सेगुसि॥ खे़ङ्‌हाॽ सेःक्‌युक्‍मिबासि मे़त्तुसिरो॥ 14खे़ङ्‌हाॽओ सिमोन (खुने़ॽ पत्रुस लॽरिक् मिङ् वाःत्तु), हे़क्‍क्‍याङ् खे़ल्‍ले़ कुन्‍साॽ आन्‍द्रियास, याकुब, युहुन्‍ना, फिलिप, बारथोलोमाइ, 15मत्ति, थोमा अल्‍फायसरे़ कुस्‍सा याकुब, सिमोन (खुने़ॽ हाङ्‌बिफ्‍युङ् के़जोःक्‍पा जिलति मे़प्‍मनाबा वये़), 16याकुबरे़ कुस्‍सा यहुदा वये़, हे़क्‍क्‍याङ् यहुदा इस्‍करियोति वये़, खे़न् ताःन्‍दि नसान् के़ले़ङ्‌बा पोःक्‍खे़रो॥

ये़सुरे़ यरिक् मनाहाॽ वेःन्‍दुसिॽ

(मत्ति ४:२३-२५)

17हे़क्‍क्‍याङ् ये़सुन् कुहुॽसाम्‍बाहाॽनु यो थ्‍ये़आङ् ने़ने़बा ते़न्‍नो ये़म्‍सिङ्‌लो॥ खे़प्‍मो यरिक् कुहुॽसाम्‍बाहाॽ नु काक् यहुदिया थुम्, यरुसले़म, हे़क्‍क्‍याङ् वरक्‍किल्‍ले़ कुयाओ के़ने़बा तायर नु सिदोन ये़क्‌यक्‍कोलाम् यरिक् मनाहाॽ मे़द्‌ये़आङ् मे़वये़॥ 18खे़ङ्‌हाॽ खुने़ॽ कुघे़म्‍से़ नु खुनिॽ तुक्‍मा यॽमालाम् वेःत्‍छे़ मे़द्‌ये़आङ् मे़वये़॥ खे़प्‍मो फे़न्‍साम्‍मिल्‍ले़ तुक्‍खे चाःत्तुसिबा मनाहाॽआङ् मे़वेःत्ते़रो॥ 19खे़ङ्‌हाॽरे़ ये़सुन् सुमा मे़गोःत्तु थेआङ्‌भे़ल्‍ले़ के़वेःम्‍बा मुक्‍साम् खुने़ॽओलाम् लःन्‍दे़र पत्‍छे़, हे़क्‍क्‍याङ् खे़ङ्‌हाॽ के़रे़क् वेःन्‍दुसिरो॥

नुॽमा तामा नु तुक्‍खेन्

(मत्ति ५:१-१२)

20ये़सुरे़ कुहुॽसाम्‍बाहाॽ ओमे़त्तुसिर मे़त्तुसि,

“याङ्‌के़साॽबासे, खिनिॽ मुॽइसाबानिङ्‌लो,

थेआङ्‌भे़ल्‍ले़ निङ्‌वाॽफु हाङ्‌जुम्‍मिन् खुने़ॽइन्‍नेरो॥

21आल्‍ल साक्‍किल्‍ले़ तरुसिबासे, खिनिॽ मुॽइसाबानिङ्‌लो,

थेआङ्‌भे़ल्‍ले़ ताःन्‍दि खिनिॽ के़घासिआङ् खिनिॽ निङ्‌सम्‍लो॥

आल्‍लो मे़रिङ् थक्‍नु के़हाःप्‍पासे, खिनिॽ मुॽइसाबानिङ्‌लो,

थेआङ्‌भे़ल्‍ले़ खिनिॽ के़एरिॽरो॥

22“मे़न्‍छाम्‍साःल्‍ले़ चोगुल्‍ले़ मनाहाॽरे़ के़म्‍जिःत्तिॽबा, के़म्‍नाॽरिबा हे़क्‍क्‍याङ् खिनिॽ नामे़धासुआङ् ताप्‍फे़ःल्‍लिक् के़म्‍मे़त्तिबाहाॽ मुॽइसाबानिङ्‌लो॥

23“खे़न् ये़म्‍मो सःत्ते़म्‍मे़ॽओ, ओमु लॽरे़म्‍मे़ॽआङ् लाःक्‍खे़म्‍मे़ॽओ, थेआङ्‌भे़ल्‍ले़ खिनिॽ थुम्‍घोन् साङ्‌ग्राम्‍पेदाङ्‌ङो पयम् यम्‍बा चोक्‍लो॥ खुनिॽ थाःक्‍थे़बाहाॽरे़आङ् उन्‍छोःन्‍बा माङ्‌निङ्‌वाॽपान् के़बाःप्‍पाहाॽ हाबा हे़क्‍केए मे़मे़त्तुसिआङ् मे़वये़रो॥

24“कर आल्‍लो याङ्‌साकुन्‍धेसाबासे, चिःत्ताङ्‌लक् स्‍ये़रो,

थेआङ्‌भे़ल्‍ले़ खिनिॽ सःप्‍मान् नु निङ्‌वाॽ तामान् खिनिॽ हिङ्‌मन्‍नोए के़घोसुम्‍माङ् के़वयिॽरो॥

25आल्‍लो के़घाबाआङ् के़वाॽबासे,

चिःत्ताङ्‌लक् स्‍ये़रो, थेआङ्‌भे़ल्‍ले़ खिनिॽ साक्‍मे़न्‍जा के़बोःक्‍खिॽरो॥

आल्‍लो के़एःप्‍पार के़वाॽबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खिनिॽ मे़रिङ् थक्‍नु के़हाबिॽरो॥

26आल्‍लो मनाहाॽरे़ नुरिक् मे़मे़त्तुसिबासे, चिःत्ताङ्‌लक् स्‍ये़रो, थेआङ्‌भे़ल्‍ले़ खुनिॽ थाःक्‍थे़बाहाॽरे़आङ् इङ्‌ले़क्‍पा माङ्‌निङ्‌वाॽपान् के़बाःप्‍पाहाॽ बा हे़क्‍केए मे़मे़त्तुसिरो॥”

निङ्‌मिहाॽ लुङ्‌माॽ तुक्‍मासि

(मत्ति ५:३८-४२)

27“कर इङ्‌गाॽ आबान् के़घे़म्‍बासे, खिनिॽ निङ्‌मिहाॽ लुङ्‌माॽ तुक्‍ते़म्‍सिम्‍मे़ॽओ॥ याप्‍मि के़जिःप्‍पाहाॽ नुरिक् मे़त्ते़म्‍सिम्‍मे़ॽओ॥ 28खिनिॽ साङ्‌ग्रा के़मे़प्‍पाहाॽ मुॽइसाम् थासे़म् पिरे़म्‍सिम्‍मे़ॽओ॥ खिनिॽ ताप्‍फे़ःल्‍लिक् के़मे़प्‍पाहाॽ तुवा चोगे़म् पिरे़म्‍सिम्‍मे़ॽओ॥ 29हाःत्‍ले़ के़ने़दे़ङ्‌बान् के़ले़ङ् के़बिॽ, खे़ने़ॽ वेॽ ले़प्‍माङ्‌बा के़ने़दे़ङ्‌बान्‍नाङ् खे़न् तोःन्‍दे़ पिरे़ॽ॥ हाःत्‍ले़ साक्‍के़ल्‍ले़क् के़सुङ्‌घेक्‌वान् के़नाप्‍पाङ् तेॽरुॽ, खे़न्‍निन् के़जाङ्‌मा तेत्तिन्‍नाङ् पिरे़देसे़ॽओ॥ 30हे़क्‍क्‍याङ् के़नाःक्‍पाहाॽ पिरे़से़ॽओ॥ हे़क्‍क्‍याङ् के़जिगक्‌वाहाॽ के़देॽबाहाॽ याम्‍मो याङ्‌ना मे़नाःक्‍ते़म्‍सिमिन्‍ने़ॽओ॥ 31हे़क्‍क्‍याङ् वेॽ मनाहाॽरे़ आक्‍खे के़म्‍मे़त्तिबा निङ्‌वाॽ के़इःत्तुम्, खिनिॽआङ् बाहे़क्‍के मे़त्ते़म्‍सिम्‍मे़ॽओ॥

32“खिनिॽ लुङ्‌माॽ के़दुक्‍पाहाॽरक् लुङ्‌माॽ के़दुक्‍तुम्‍सिम्‍ने़ फाॽग्र खिनिॽ थे यम्‍बा याःम्‍बक् के़जोगुम्‍माङ्‌बे? खे़ङ्‌ग लायोबाहाॽरे़आङ् बाहे़क्‍के मे़जोगुॽरो॥ 33हे़क्‍क्‍याङ् खिनिॽ नुरिक् के़मे़प्‍पाहाॽरक् नुरिक् के़मे़त्तुम्‍सिम्‍ने़ फाॽग्र थे यम्‍बा याःम्‍बक् के़जोगुम्‍माङ्‌बे! खे़ङ्‌ग लायोबाहाॽरे़आङ् बाहे़क्‍के मे़मे़त्तुसिॽरो॥ 34हे़क्‍क्‍याङ् खिनिॽ याम्‍मो मे़नुःक्‍तुर फाॽआङ् मनाहाॽ थे़ॽला के़बिरुम्‍सिम्‍ने़ फाॽग्र थे यम्‍बा याःम्‍बक् के़जोगुम्‍माङ्‌बे! खे़ङ्‌ग लायोबाहाॽरे़आङ् बाहे़क्‍के मे़जोगुॽरो॥ 35कर खिनिॽ निङ्‌मिहाॽ लुङ्‌माॽ तुक्‍ते़म्‍सिम्‍मे़ॽ, खे़ङ्‌हाॽ नुरिक् मे़त्ते़म्‍सिम्‍मे़ॽ, हे़क्‍क्‍याङ् मे़नुःक्‍तुर फाॽआङ् मे़न्‍इःत्ते थे़ॽला पिरे़म्‍सिम्‍मे़ॽ, हे़क्‍केःल्‍ले़ खिनिॽ थुम्‍घोन् यरिक् पोङ्‌लो॥ हे़क्‍क्‍याङ् खिनिॽ के़रे़क्‍नुःल्‍ले़ पयम् यम्‍बा निङ्‌वाॽफुमाङ्‌ङिल्‍ले़ कुस्‍सा के़बोःक्‍खिॽरो, थेआङ्‌भे़ल्‍ले़ खुने़ॽग कुनिङ्‌वाॽ मे़न्‍दाःमनाहाॽ नु कुॽइगे़भे़म्‍बा मनाहाॽआङ् लुङ्‌माॽ तुक्‍तुसिॽरो॥ 36खिनिॽ पानुदिङ् पा निङ्‌वाॽफुमाङ्‌ङिन् याप्‍मि लुङ्‌माॽ के़दुक्‍पा चोक्, खे़ल्‍ले़चोगुल्‍ले़ खिनिॽआङ् मनाहाॽ लुङ्‌माॽ तुक्‍ते़म्‍सिम्‍मे़ॽओ॥”

वेॽहाॽ चे़ॽया इङ्‌दो मे़प्‍मासि मेःन्

(मत्ति ७:१-५)

37“मनाहाॽ पान् मे़धिक्‍ते़म्‍सिम्‍मे़न्‍ने़ॽ, हे़क्‍केलॽरिक् निङ्‌वाॽफुमाङ्‌ङिल्‍ले़ खिनिॽआङ् पान् के़न्‍धिक्‍तिन्‍लो॥ मनाहाॽ चे़ॽया इङ्‌दो मे़मे़त्ते़म्‍सिम्‍मे़न्‍ने़ॽओ, हे़क्‍केलॽरिक् खिनिॽआङ् चे़ॽया इङ्‌दो के़मे़म्‍मे़त्तिन्‍लरो॥ मनाहाॽ ले़प्‍मि पिरे़म्‍सिम्‍मे़ॽओ, हे़क्‍केलॽरिक् खिनिॽआङ् निङ्‌वाॽफुमाङ्‌ङिल्‍ले़ ले़प्‍मि के़बिरिॽरो॥ 38मनाहाॽ पिरे़म्‍सिम्‍मे़ॽ हे़क्‍क्‍याङ् खिनिॽआङ् के़म्‍बिरिॽरो॥ नुरिक् सिःक्‍ते़म्‍मे़ॽ नुरिक् थे़क्‍ते़म्‍मे़ॽर नुरिक् मुन्‍दे़म्‍मे़ॽर कुधिम् पोङ्‌ङाङ् कुवे़त्‍वे़त् मनाहाॽ सिःक्‍ते़म् पिरे़म्‍सिम्‍मे़ॽ, बा हे़क्‍केलॽरिक्‍के खिनिॽआङ् के़म्‍बिरिॽरो॥ खिनिॽ आक्‍खेलॽरिक् के़सिःक्‍तुम् के़बिरुम्‍सिम्, बा हे़क्‍केलॽरिक् खिनिॽआङ् के़म्‍सिःक्‍ति के़म्‍बिरिॽरो॥”

39हे़क्‍क्‍याङ् ये़सुरे़ कन् खे़दाॽइन् खे़ङ्‌हाॽ मे़त्तुसि, “मिक्‍फःम्‍बाल्‍ले़ वेॽ मिक्‍फःम्‍बे़न् लाम्‍लोमा मे़सुक्‍तुन्‍लो, लाम्‍लोसुने़ फाॽग्र ने़प्‍माङ् लुम्‍बाःत्तो के़ङ्‌सि लाःत्‍छिॽरो॥ 40हुॽसाम्‍बे़न् कुसिक्‍साम्‍बे़न्‍नुःल्‍ले़ यम्‍बा मेःन्‍लो॥ कर खुने़ॽ नुरिक् हुॽसिङ् सुःत्‍छिङ्‌ङाङ् खुने़ॽ कुसिक्‍साम्‍बे़न् कुइसिक् पोङ्‌लो॥

41“आबाङे थक्‍को साःङ्‌वे़त् चाराम्‍बा मे़न्‍निमनाबाल्‍ले़ आक्‍खेलॽरिक् के़न्‍साॽरे़ कुधक्‍कोबा वाम्‍सिक्‍किन् के़निसुबे? 42खे़ने़ॽ आबाङे के़धक्‍को साःङ्‌वे़त् चाराम्‍बा के़न्‍निसुन्‍निल्‍ले़ आक्‍खेलॽरिक् के़न्‍साॽइन् के़धक्‍कोबा वाम्‍सिक्‍किन् खे़क्‍खुङ् पिने़ लॽरिक् मे़प्‍मा के़सुक्‍तुबे? कुनिङ्‌वाॽ के़जिःप्‍पाए, के़रे़क्‍नुःल्‍ले़ तगि आबाङे के़धक्‍कोबा साःङ्‌वे़त्तिन् नाःत्ते़देसे़ॽओ, हे़क्‍क्‍याङ्‌लक् के़न्‍साॽरे़ कुधक्‍कोबा वाम्‍सिक्‍किन् उसुरु के़निसुआङ् खे़ङ्‌मा के़सुक्‍तुॽरो॥

सिङ्‌बुङ् नु सिङ्‌सेॽ

(मत्ति ७:१६-२०, १२:३३-३५)

43“आत्तिन् नुबा सिङ्‌बुङ्‌ङोआङ् ताप्‍फे़ःम्‍बा सिङ्‌सेॽ मे़धोःक्‍ने़न्‍लो, हे़क्‍केलॽरिक् आत्तिन् ताप्‍फे़ःम्‍बा सिङ्‌बुङ्‌ङोआङ् नुबा सिङ्‌सेॽ मे़धोःक्‍ने़न्‍लो॥ 44खे़न् सिङ्‌बुङ्‌हाॽग सिङ्‌सेहाॽ ओमे़प्‍माआङ्‌साङ् कुसिङ् निःत्‍मे़दे़त्‍लो॥ आप्‍फाल्‍ले़आङ् तिङ्‌ग्रेक् पोःक्‍लाओलाम् मनाहाॽरे़ पःत्‍छेॽइन् मे़न्‍दुबुन्‍लो॥ हे़क्‍केलॽरिक् तिङ्‌वासेक् पोःक्‍लाओलाम् चे़ल्‍ले़क्‍सेॽइन् मे़न्‍छुप्‍सुन्‍लो॥ 45नुबा मनाःल्‍ले़ कुनिङ्‌वाॽ सिगाङ् के़याक्‍पा नुबा पाःन्‍नोलाम् नुबा याःम्‍बक् चोगुॽरो॥ हे़क्‍केलॽरिक्‍के ताप्‍फे़ःम्‍बा मनाःल्‍ले़आङ् कुनिङ्‌वाॽ सिगाङ् के़याक्‍पा ताप्‍फे़ःम्‍बा पाःन्‍नोलाम् फे़न् याःम्‍बक् चोगुॽरो॥ हे़क्‍क्‍याङ् निङ्‌वाॽ सिगाङ् के़याक्‍पा पाःन्‍हाॽए मनाहाॽरे़ खुनिॽ मुरालाम् मे़बाःत्तु मे़लःत्तुॽरो॥

ने़प्‍फु हिम् के़जोःक्‍पाहाॽ

(मत्ति ७:२४-२७)

46“इङ्‌गाॽ पाःत्तुङ्‌बा पान् कुइसिक् के़न्‍जोगुम्‍मिन्‍निल्‍ले़, थेआङ् इङ्‌गाॽ ‘आदाङ्‌बे, आदाङ्‌बे,’ याप्‍मि के़मे़त्तिॽबे? 47इङ्‌गाॽ आबान् के़घे़म्‍बाआङ् खे़न् कुइसिक् के़जोःक्‍पा मनान् आक्‍तङ्‌बा चोक् फाॽआङ् मे़त्‍निङ्‌लो— 48खे़न् नुबा पाङ्‌यक्‍को हिम् के़जोःक्‍पा मना कुइसिःक्‍लो॥ खे़ल्‍ले़ हिम् चोःक्‍मा फाॽआङ् यो खाम् सिगाङ्‌बा यम्‍बा लुङ्‌ङिन् मे़न्‌याङ्‌ङे थारिक् तयु॥ हे़क्‍क्‍याङ् यम्‍बा लुङ्‌सम्‍दाङ् पाङ्‌यक् नेम्‍भो ने़स्‍सुआङ् लुङ्‌धाक् से़त्तुर हिम् चोगुॽ॥ हे़क्‍क्‍याङ् यम्‍बा वाहिप्‍मान् थ्‍ये़आङ् वाकुक्‍से़ ये़आङ् च्‍वाःत्तिल्‍ले़ खे़न् हिम्‍मिन् लक्‍तु, कर थेआङ् मे़बोःक्‍खे़न्, थेआङ्‌भे़ल्‍ले़ खे़न् हिम्‍मिल्‍ले़न् नुरिक्‍काङ् पाङ्‌यक् युक्‍खुआङ् वये़रो॥ 49हे़क्‍क्‍याङ् आबान् के़घे़म्‍बाआङ् पाःत्तुङ्‌बा पान् कुइसिक् मे़न्‍जोःक्‍मनाबा मनान् आक्‍तङ्‌बा चोक् फाॽआङ् मे़त्‍निङ्‌लो—खे़ल्‍ले़आङ् हिम् चोःक्‍मा फाॽआङ् पाङ्‌यक् तयु, कर नुबा पाङ्‌यक् नेम्‍भो मे़न्‍ने़ए लुङ्‌धाक् से़त्तुआङ् हिम् चोगु॥ हे़क्‍क्‍याङ् यम्‍बा वाहिप्‍मान् थ्‍ये़, वाकुक्‍खु ये़आङ् च्‍वाःत्तिल्‍ले़ खे़न् हिम्‍मिन् लक्‍तु, हे़क्‍क्‍याङ् लुःन्‍दुदेसुरो॥ हे़क्‍क्‍याङ् खे़न् हिम्‍मिन् चोःन्‍दे़बेआङ् यम्‍बा मे़म्‍भै पोःक्‍खे़रो॥”

Currently Selected:

लुका 6: LIF

Highlight

Copy