Jɔ̀ɔŋ 18

Àŋ kùwà wo Jisɛ̀

(Maafiù 26.47-56; Mài 14.43-50; Luù 22.47-53)

1Nààŋ wo Jisɛ̀ naŋ wa kpɛ̀ɛ̀yɛ̀ zòòlo, wuŋ yaà anyùùŋ màŋjɛ̀wɛ̀uŋ nyàŋ naŋ nìè ko toò ɓòìɓòì bà àŋ nyaaŋ nyààŋ Kɛdilɔ̀ùŋ, yèè àŋ naŋ kɔ̀ ko kpòkpò bà. 2Wo Jisɛ̀ yèè anyùùŋ màŋjɛ̀wɛ̀uŋ nyàŋ heo wa deenè e teenga zimgbe. Wo Juɗà wuŋ pɛɛ zà, wo yèɔ naŋ mààŋ wo Jisɛ̀ wɔ, wa nyìmàŋ koɓɛ̀ bi. 3Nààŋ wo Juɗà naŋ wa jɔ̀ɔ̀ e ɗààhiì wèè wo maàŋ wo Jisɛ̀, wò naŋ wa kɔ̀ ko kpòkpòi. Kɛɛ wò naŋ wa kɔ̀ɔ̀ ke gbòò aŋ kààlòòɗùà Luùm nyaŋ bà, yèè anyuùŋ tùnìàŋ ke Saaŋ Zòòlò Dayà nyaŋ bà, aŋ yè nyaŋ aŋ kànà sìèfèìŋ zòòlo nyàŋ yèè Fɛlosiì nyaŋ naŋ wa tùɔ̀ŋ wèè aŋ kùwà wo Jisɛ̀. Nààŋ àŋ yaà wa kɔɔyɛ, àŋ naŋ kɔ̀ɔ̀ maŋ sìngà mɛ̀ɛŋ, maŋ laumpò, yèè manɛ̀ŋ sùmiaŋ ko kààmè Jisɛ̀. 4Kɛɛ nààŋ wo Jisɛ̀ naŋ wa nyìmè tɛ kɛ̀ kiìŋ nàŋ yaà wa hinie wèè e kaaìŋ, wò naŋ fòlò yèè wò naŋ nyiŋ dawè wààŋ, “Ɓòò nìŋ yaà kaame?”

5Yèè àŋ naŋ fasàì wo Jisɛ̀ nyààŋ, “È yààìŋ kààmè wo Jisɛ̀ e yìwìà ko Naazɔ̀ɛ̀.”

Yèè wo Jisɛ̀ naŋ nyiŋ fasàì wààŋ, “Miàŋ nàŋ yaà wo Jisɛ̀.”

Wo Juɗà, wo yèɔ naŋ wa mààŋ wo Jisɛ̀ wɔ sìà nyiìŋ wa kɔɔ. 6Yèè nààŋ wo Jisɛ̀ naŋ nyiŋ wa woò wààŋ, “Miàŋ nàŋ yaà wo Jisɛ̀,” aŋ gbiŋ naŋ bɔ̀mɔ̀ŋ maŋjɛ̀wɛ yèè àŋ naŋ sɔ̀ɔ̀ ko dììnaŋ. 7Yèè wo Jisɛ̀ naŋ nyiŋ ɓɛìŋ dawè wààŋ, “Ɓòò nìŋ yaà kaame?”

Yèè àŋ naŋ ɓɛìŋ fàsàì wo Jisɛ̀ nyààŋ, “È yààìŋ kààmè wo Jisɛ̀ e yìwìà ko Naazɔ̀ɛ̀.”

8Yèè wo Jisɛ̀ naŋ nyiŋ ɓɛìŋ woò wààŋ, “Kàiŋ niŋ woò tɛ kɛ̀ miàŋ nàŋ yaà wo Jisɛ̀. Weètii, sèè mààŋ miàŋ nìŋ yaà kaame, kɛ̀ dàngeìŋ anyuùŋ gbànaŋ nyɛɛ̀ŋ aŋ ka.” 9Wo Jisɛ̀ naŋ wa tɛɛ̀ woò wèè e nyɛ̀nɛ̀ŋ e yèɛ wò naŋ wa woò lɛ e hɛɛnɛ̀ŋ, nààŋ wò naŋ wa woò wààŋ, “Dèda, aŋ yè nyaŋ mùŋ naim wa kiɛ̀ŋ nyaŋ, mìŋ naŋ nyiŋ wa yɛ̀mɛ̀ diɛŋ e yìwìà e gààaŋ mùŋ naim wa kiɛ̀ŋ lɛ sùà. Mìŋ naŋ nyiŋ wa gbònò koɓɛ̀ guùŋ, yèè wo bà gbiŋ gò wa go.”

10Kɛɛ wo Saimɔŋ Piilɛ̀, anyùùŋ nyaŋ bà guùŋ koɓɛ̀ bi naŋ gè e kòyà ɗùàuŋ nɛ̀ yèè wò naŋ nyɛ̀mɛ̀ŋ wo ɓɔ̀ìjɔ̀à wo Kànà Sìèfèìŋ Zòòlo Gbeeɔ̀, wouŋ kɛ̀ɛ̀ ke nùŋ kùàŋ jìka kpo. E dèè wo ɓɔìjɔ̀àa nàŋ yaà wa wo Maakɔ̀. 11Yèè wo Jisɛ̀ naŋ wòò wo Pììlɛ wààŋ, “Hoà e koya mɔ̀ɛ̀ wɔŋ ɓuùiŋ nɔɔ̀ŋ sùà. Mìŋ naŋ nyimèè wèè ka kɔ̀ɛ̀ e keì nyìngaà dìì, e yèɛ wo Dèda miɔ̀ŋ naŋ banebànè wèè ka niŋ kɔ̀ɛ̀ sùà lɛ.”

Àŋ kòà wo Jisɛ̀ wo Anàŋ fɛɛ̀feìŋ

12Wo sìèfèìŋ aŋ kààlòòɗùà anyùùŋ Luùm nyaŋ yèè aŋ kààlòòɗùàuŋ nyàŋ, yèè aŋ ɓɔ̀ìjɔ̀à aŋ Juùù nyaŋ, naŋ kùwò wo Jisɛ̀ àŋ nauŋ dèkè. 13Àŋ naŋ wa kɔ̀ɔ̀ wo Jisɛ̀ koɓɛ̀ Anàiŋ wuŋ jiɛ̀, wo dèmààŋ Kaifɔ̀ɔ, wo Kànà Sìèfèìŋ Zòòlo Gbeeɔ̀ wɔŋ doa wiiŋ. 14Wo Kàìfɔ̀ guùŋ wɛɛ̀ naŋ wa wòò anyùùŋ gbèègbèè aŋ Juùù nyaŋ wààŋ, “È yaà tɛ̀ɛ̀ wèè wo nyùùŋ guùŋ wo fà wèè anyùùŋ nyaŋ, e nɛ̀ɛŋ nyɛ̀nɛ̀ŋ wɔŋ fuɔɔ̀ŋ gbiŋ wɔŋ pɔɔpɔ̀ɔ̀ lɛ.”

Wo Pììlɛ gè maŋhɛɛ kɛ̀ wo nyimààŋ wo Jisɛ̀

(Maafiù 26.69, 70; Mài 14.66-68; Luù 22.55-57)

15Wo Saimɔŋ Piilɛ̀ yaà wo nyùùŋ màŋjɛ̀wɛ̀ɔ bà guùŋ naŋ dè wo Jisɛ̀ maŋjɛ̀wɛ. Wo Kànà Sìèfèìŋ Zòòlo Gbeeɔ̀ wa nyìmàŋ wo nyùùŋ màŋjɛ̀wɛ̀ bi tɛ̀ɛ̀ kaiŋ, yèè wò naŋ jèè wo Jisɛ̀ maŋjɛ̀wɛ aŋ jɔ̀ɔ̀yɛ̀ wɔŋ gbàngiɔ̀ sùà aŋ kà ko jɔ̀ɔ̀lègbèè wɔŋ gbòòkùàŋ wo kànà sìèfèìŋ zòòlo gbeeɔ̀, 16kɛɛ wo Pììlɛ naŋ wa jòò ko jɔɔlè gbeeì wɔŋ gbemgbeeɔ̀ feìŋ. Kɛɛ nààŋ wo nyùùŋ màŋjɛ̀wɛ̀ɔ naŋ wa jɔ̀ wɔ naŋ wa nyìmè wo kànà sìèfèìŋ zòòlo gbeeɔ̀ tɛ̀ɛ̀ lɛ, wò naŋ kɛ̀ɛ̀ maŋjɛ̀wɛ koɓɛ̀ wo ɓɔì jɔùŋjɔaà tunìàŋ wɔŋ gbàngiɔ̀ wɔŋ, yèè wò nauŋ gbòò kɔɔ wèè wo dangè wo Pììlɛ wo jɔ̀à. Kpeiŋ wò nauŋ dangè wo jɔ̀à. 17Wo ɓɔì jɔùŋjɔaà tunìàŋ wɔŋ gbàngiɔ̀ wɔ naŋ dàwè wò Pììlɛ wààŋ, “Kenàŋ wɛɛ̀, muŋ fè wò nyùùŋ màŋjɛ̀wɛ̀ wò felaa wɛɛ̀ bà?”

Yèè wo Pììlɛ naŋ fasàì wààŋ, “Kpele, mìŋ fè wò bà.”

18Ke fòìɛ naŋ wa gàŋ, yèè aŋ ɓɔìjɔ̀à nyaŋ yaà anyùùŋ nyaŋ tunìàŋ ke sààŋ zòòlò Dayàa nyàŋ naŋ dììyè e hmɔ̀ɔ̀ŋ. Àŋ naŋ niŋ jɛ̀ì e kɔɔ àŋ yaà kùmìè hmɔ̀ɔ̀ɛŋ, yèè wo Pììlɛ wuŋ pɛɛ naŋ kɔ̀ wo sìè ko hmɔ̀ɔ̀ŋ kɔɔì wèè wo kòmàŋ e hmɔ̀ɔ̀ŋ.

Wo Kànà Sìèfèìŋ Zòòlo Gbeeɔ̀ naŋ dàwè wo Jisɛ̀

(Maafiù 26.59-66; Mài 14.55-64; Luù 22.66-71)

19Wo Kànà Sìèfèìŋ Zòòlo Gbee gɔuɔ̀ Anàŋ naŋ dàwè wo Jisɛ̀ e nyaàiŋ dè anyùùŋ màŋjɛ̀wɛ̀uŋ nyàŋ yèè e yèɛ wò naŋ kàà anyùùŋ lɛ. 20Kɛɛ wo Jisɛ̀ nauŋ fasàì wààŋ, “Mìŋ naŋ gbòò koɓɛ̀ anyùùŋ nyaŋ gbiŋ janyai. Yèè mìŋ naŋ kàà anyùùŋ maŋ sààŋ zòòlò aŋ Juùù nyaŋ yaà Ke Saaŋ Zòòlò Dayàa dìì, ko yèi anyùùŋ nyaŋ gbiŋ hewa hnàŋ koɓɛ̀ guùŋ nɛ. Mìŋ gò wòò è keì gbiŋ kè gbùnuo sùà. 21Kɛ̀ wèè kiìŋ mùŋ yààìm daawe? Wèè kiìŋ muŋ fè dàwè ànyùùŋ nyaŋ naim wa kumiè nyaŋ? Àŋ nyìmàŋ kɛ̀ kiìŋ mìŋ naŋ nyiŋ woò.”

22Nààŋ wo Jisɛ̀ naŋ tɛɛ̀ woò, anyuùŋ tùnìàŋ ke Saaŋ Zòòlò Dayàa bà guùŋ siao wa wɔ̀ naŋ hèè wo Jisɛ̀ fɛ̀ɛ̀ nyààŋ yèè wò naŋ woò wààŋ, “Wèè kiìŋ mùŋ gboo yɛi koɓɛ̀ wo Kànà Sìèfèìŋ Zòòlo Gbeeɔ̀?”

23Wo Jisɛ̀ naŋ fasàì wààŋ, “Sèè mààŋ è keì naanààŋ mìŋ naŋ woò, kɛ̀ wòò niŋ koɓɛ̀ anyùùŋ nyaŋ gbiŋ kià. Kɛɛ sèè mààŋ mìŋ naŋ wòò è tɔɔɓaaà, kɛ̀ wèè kiìŋ mùŋ naim hèèfɛ̀ɛ̀?”

24Kpeiŋ wo Anàŋ nauŋ tùɔ̀ŋ koɓɛ̀ wo Kaifɔ̀i, wo Kànà Sìèfèìŋ Zòòlo Gbeeɔ̀.

Wo Pììlɛ ɓɛìŋ gè maŋhɛɛ kɛ̀ wo nyimààŋ wò Jisɛ̀

(Maafiù 26.71-75; Mài 14.69-72; Luù 22.58-62)

25Wo Saimɔŋ Piilɛ̀ kòò wò siao wa weè nɔŋ ko kùmìè e hmɔ̀ɔ̀ɛŋ. Yèè anyùùŋ bà nauŋ dawè nyààŋ, “Sɔ̀ɔ̀ mùŋ yaà wò nyùùŋ màŋjɛ̀wɛ̀ Jisɛ̀ɔ bà guùŋ?”

Yèè wo Pììlɛ naŋ niŋ ɓɛìŋ gè maŋhɛɛ wààŋ, “Kpele, miŋ fè wò bà.”

26Kpeiŋ wo ɓɔìjɔ̀àa bà guùŋ wèè wo Kànà Sìèfèìŋ Zòòlo Gbeeɔ̀, wo wùìya nyuuŋ koɓɛ̀ wo ɓɔìjɔ̀àa bà guùŋ wo yèɔ wo Pììlɛ naŋ kɛ̀ɛ̀ ke nùŋ wɔ, nauŋ dawè wààŋ, “Miŋ gòum weè yɛmɛ̀ kò kpòkpòi nyɛ̀iŋ wo kenàŋ wii?”

27Yèè wo Pììlɛ naŋ niŋ ɓɛìŋ gè maŋhɛɛ wààŋ, “Kpele, e fèìm,” ko fɛɛ̀feìŋ wo tɔɔ wowo naŋ kolèè.

Àŋ kòà wo Jisɛ̀ wo Paalè fɛɛ̀feìŋ

(Maafiù 27.1, 2, 11-14; Mài 15.1-5; Luù 23.1-5)

28È yaà wa maŋ nyiìŋ tɛ̀tɛ̀ wɔŋ niìsìaà bàa, àŋ naŋ gè wo Jisɛ̀ ko gbòò Kaifɔ̀, yèè àŋ nauŋ kɔ̀ɔ̀ ko sààŋ gbèè kanaà Paalè, wo kànà anyùùŋ ko Luùm nyaŋ. Kɛɛ anyùùŋ nyaŋ gbiŋ naŋ wa sìè ko jɔɔlèe ko fulieuŋ. Sèè wo bà gbiŋ woo wa weè jɔ̀à, wò naàŋ wa weè nɔ̀ŋ è zɛ̀nɛuŋ wèè wo jè e nɛ̀ŋjè wɔ̀ŋ Ɗaa Gèe Hɔ̀ɛ̀ɛ̀ŋ Diɛɔ̀ŋ. 29Kpeiŋ wo Paalè naŋ fòlò ko jɔɔlèe ko nɛ̀ɛ̀ŋ nyiŋ niìŋ, yèè wò naŋ nyiŋ dawè wààŋ, “Kiìŋ kè sàwà wo kenàŋ wɛɛ̀ naŋ pɔɔ̀?”

30Anyùùŋ nyaŋ naŋ fasàì nyààŋ, “Wò yaà wo nyuùŋ pɔ̀ɔ̀ ke sàwà! Esaɓùɛ lii è nauŋ hìɛ̀ŋ ko nɛ̀ɛ̀ŋ muìŋ.”

31Wo Paalè naŋ wòò aŋ Juùù nyaŋ wààŋ, “Kɛ̀ nyɛ̀iŋ bi kòa nùuŋ yèè niŋ kiliàuŋ e kiti diɛŋ màànààŋ ke sàwàiŋ nɛɛ̀ŋ naŋ woò lɛ.”

Kpeiŋ anyùùŋ nyaŋ naŋ fasàì nyààŋ, “Ke sàwàa gò wi gè nyààŋ diɛŋ wèè eiŋ jìwà wò nyùùŋ gbiŋ.” 32Tɛɛ̀ zà naŋ wa kaaìŋ wèè e nyɛ̀nɛ̀ŋ e yèɛ wo Jisɛ̀ naŋ wa woò lɛ e hɛɛnɛ̀ŋ nààŋ wò naŋ wa wòò e ɗewe kiiɛ̀ wò do wa nàŋ fɔ̀ lɛ.

33Wo Paalè naŋ kɛ̀ɛ̀ ko sààŋ gbèè kanaà yèè wò naŋ dàwè wo Jisɛ̀ wààŋ, “Muàŋ nàŋ yaà wo kànà aŋ Juùù nyaŋ?”

34Wo Jisɛ̀ nauŋ fasàì wààŋ, “Muàŋ bi nàŋ yaà dààwè wɔŋ mààŋdàwè wɛɛ̀ŋ, ɔ̀ɔ̀ wo nyùùŋ bà naum wòò e kiim?”

35Wo Paalè naŋ fasàì wààŋ, “Màŋ nyìmàŋ kɛ̀ miŋ fè wò Juùù. Anyùùŋ muàŋ bi nyàŋ yèè aŋ kànà sìèfèìŋ zòòlo nyàŋ naum hìɛ̀ŋ ko nɛ̀ɛ̀ŋ miìŋ. Kiìŋ mùŋ naŋ nyɛ̀nɛ̀ŋ?”

36Yèè wo Jisɛ̀ naŋ woò wààŋ, “E kana mɛ̀ fè wèè ànyùùŋ nyaŋ è ɗuunyaŋ lɛɛ̀. Sèè è nɔ̀ŋ yɛi weè, anyùùŋ màŋjɛ̀wɛ̀im nyàŋ henàŋ sòmò wèè aŋ ɓɔìjɔ̀àiŋ nyàŋ goim weè nàŋ hìɛ̀ŋ koɓɛ̀ anyùùŋ gbèègbèè aŋ Juùù nyaŋ. Kɛɛ e kana mɛ̀ fè wèè ànyùùŋ nyaŋ è ɗuunyaŋ lɛɛ̀.”

37Kpeiŋ wo Paalè nauŋ dawè wààŋ, “Weètii mùŋ yaà wo kana?”

Wo Jisɛ̀ naŋ fasàì wààŋ, “Nyɛ̀iŋ naŋ woò nààŋ mìŋ yaà wo kana. Mìŋ naŋ wa hnè e ɗuunyaŋ lɛɛ̀ wèè ka nɔ̀ŋ wo kana, yèè ɓɔɔɓɔɔ wèè ka wòò anyùùŋ nyaŋ e ɗuunyaŋ lɛɛ̀ e tɔ̀ɔ̀nyaàaŋ. Anyùùŋ tɔ̀ɔ̀nyaàŋ nyaŋ komo ke miè miɛ̀ŋ yèè àŋ jɔɔlɔ̀ nyiìŋ dìì nyaŋ.”

38Yèè wo Paalè naŋ dàwè wo Jisɛ̀, wuŋ pɛɛ wo Juùù nyuuŋ wààŋ, “Kiìŋ nàŋ yaà e tɔ̀ɔ̀nyaàŋ?”

Àŋ jìwìà wo Jisɛ̀ wɔŋ vànèkpaaà diɛŋ

(Maafiù 27.15-31; Mài 15.6-20; Luù 23.13-25)

Kpeiŋ wo Paalè naŋ fòlò ko jɔɔlèe koɓɛ̀ anyùùŋ nyaŋ yèè wò naŋ nyiŋ woò wààŋ, “Miŋ gò yɛ̀mɛ̀ kè sàwàa wò kenàŋ wɛɛ̀ naŋ pɔɔ̀ yɛ.” 39Wɔŋ doa gbiŋ e tèèngà wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ, è yaà wa e langi wèè wo Paalè wo gè wo nyùùŋ guùŋ ko sààŋ nyìwì wo yèɔ anyùùŋ nyaŋ manaŋ wa wɔ̀. Nààŋ e faaàŋ naŋ wa gbònò koɓɛ̀ guùŋ, wo Paalè naŋ nyiŋ dawè wààŋ, “Nìŋ manaŋ wèè ka dàngè wo kànà aŋ Juùù nyaŋ weèiŋ?”

40Kɛɛ aŋ kànà sìèfèìŋ zòòlo nyàŋ yèè e faaàŋ naŋ kpààŋ sɛiŋ nyààŋ, “Kpele, e manàuŋ! Kìɛ̀ŋ wi wo Bàlaɓà.” Wo Bàlaɓà zà naŋ wa jìwè wo nyùùŋ bà e tèèngà e gbɔ̀ɔ̀ e kànà fuɔɔ̀ŋ bà.

Currently Selected:

Jɔ̀ɔŋ 18: WFESD

Highlight

Copy