Jɔ̀ɔŋ 19

1Kpeiŋ wo Paalè naŋ nyɛ̀nɛ̀ŋ anyùùŋ nyaŋ naŋ ɓùlò wo Jisɛ̀. 2Yèè aŋ kààlòòɗùà nyaŋ naŋ bàànè ke ɓɔ̀ɗì kana e jèì maŋ dɛiŋ, yèè àŋ nauŋ nyiŋ jàà ɗì. Yèè àŋ naŋ gɔ̀àì wo Jisɛ̀ wɔŋ kùmà maŋ sɛ̀ìŋ tɔɔ. 3Kpeiŋ àŋ nauŋ tɔ̀ɔ̀tù hììle àŋ yaà woo nyààŋ, “Jòòwò wiìŋ, wo Kànà aŋ Juùù nyaŋ!” Yèè àŋ naŋ kɔ̀ àŋ nauŋ bìè bìè maŋ fɛ̀ɛ̀.

4Wo Paalè naŋ ɓɛìŋ kɛ̀ɛ̀ koɓɛ̀ anyùùŋ nyaŋ ko jɔɔlèe yèè wò naŋ woò wààŋ, “Mìŋ yaà ɓɛìŋ kɛ̀lɛ̀ɛ̀ sùà wo Jisɛ̀ ko nɛ̀ɛ̀iŋ niìŋ wèè naŋ nyìmàŋ kɛ̀ miŋ gò yɛmɛ̀ kɛ̀ wò kenàŋ wɛɛ̀ naŋ pɔ̀ɔ̀ kè sàwà wèè è keì euŋ jeeè.” 5Kpeiŋ wo Jisɛ̀ naŋ fòlò ko nɛ̀ɛ̀ŋ nyiŋ niìŋ, ke ɓɔ̀ɗì kanaà àŋ bàànè e jèì maŋ dɛiŋ nɛ̀ yɛ jàaùŋ ɗì e kìlà wò gɔaa wɔŋ deè nyìngà ɓaà wɔŋ yèɔ naŋ tèènè maŋ sɛ̀ìŋ tɔɔ. Wo Paalè naŋ nyiŋ woò wààŋ, “Nyɛ̀iŋ nààŋ nyùùŋ, wo felaaà wɛɛ̀.”

6Nààŋ aŋ kànà sìèfèìŋ zòòlo nyàŋ yèè anyuùŋ tùnìàŋ ke Saaŋ Zòòlò Dayàa naŋ yɛ̀mɛ̀ wo Jisɛ̀, àŋ naŋ kpààŋ sɛiŋ nyààŋ, “Jìwiàuŋ wɔŋ vànèkpaaà diɛŋ! Jìwiàuŋ wɔŋ vànèkpaaà diɛŋ!”

Wo Paalè naŋ nyiŋ woò wààŋ, “Kòa nùuŋ nyɛiŋ bi niŋ jiwìàuŋ wɔŋ vànèkpaaà diɛŋ. Esaɓù kɛ̀ miŋ gò yɛ̀mɛ̀ kè sàwàa wò naŋ pɔɔ̀ yɛ wèè kauŋ jèè è keì.”

7Aŋ Juùù nyaŋ naŋ fasàì nyààŋ, “È kùwàìŋ ke sàwà ke yèɛ wò naŋ pɔɔ̀ yɛ, weètii wò kuwa wo fà, nààŋ wò naŋ ɓèmè wuŋ bi wèè wo nɔ̀ŋ wo Jɔ̀àfèlàà Dayàa.”

8E jùùɛ naŋ wa ngèè ɓɛìŋ nyɛ̀nɛ̀ŋ wo Paalè zimgbe nààŋ anyùùŋ nyaŋ naŋ wa tɛɛ̀ woò. 9Yèè wò naŋ ɓɛìŋ kɛ̀ɛ̀ ko sààŋ gbèè kanaà yèè wò naŋ dàwè wo Jisɛ̀ wààŋ, “Kòò mùŋ yewe?”

Kɛɛ wo Jisɛ̀ gòuŋ wa fasàì. 10Yèè wo Paalè nauŋ woò wààŋ, “Wèè kiìŋ muŋ manàŋ mùŋ doim gbòà kɔɔ? Muŋ nyimààŋ kɛ̀ mìŋ kuwa è gààaŋ wèè kaum dangè maŋ ka foo ɔ̀ɔ̀ mìŋ kuwa e gààaŋ wèè kaum jìwìà wɔ̀ŋ vànèkpaaà diɛŋ?”

11Wo Jisɛ̀ naŋ fasàì wààŋ, “Sèè wo Dayà gòum weè kìɛ̀ŋ è gààaŋ, muŋ naàim weè ɓɛ̀nɛ̀ŋ kpùùnyàŋ wɔ̀ŋ vànèkpaaà diɛŋ. Kɛɛ wo nyùnɔ̀ɔŋ naim mààŋ ko nɛ̀ɛ̀ŋ muìŋ wɔ nàŋ kanaŋ e jùumù gbeeɛ̀.”

12Nààŋ wo Paalè naŋ wa tɛɛ̀ kòmò, wò manaŋ wa kai wo dàngè wo Jisɛ̀ wo ka foo. Kɛɛ aŋ Juùù nyaŋ naŋ wa ngèè ɓɛìŋ kpààŋ sɛiŋ nyààŋ, “Sèè maŋ dàngè wo felaa wɛɛ̀ wo ka foo, kɛ̀ muŋ fè wò nyùùŋ mɔ̀ɔ̀nɔ̀ŋ Siisɔ̀, wò kànà fùɔ̀ŋ anyùùŋ Luùm nyaŋ! Wo nyùnɔ̀ɔŋ gbiŋ ɓemàŋ wuŋ bi wèè wo nɔ̀ŋ wo kana wɔ̀ wò yaà wo jòòuŋ koɓɛ̀ wo kànà fùɔ̀ŋ anyùùŋ Luùm nyaŋ.”

13Nààŋ wo Paalè naŋ kòmò e yèɛ anyùùŋ nyaŋ yaà wa woo lɛ̀, wò naŋ fùlìè wo Jisɛ̀ ko nɛ̀ɛ̀ŋ nyiŋ niìŋ yèè wò naŋ jɛ̀ì ke kpùà kanauŋ nɛɛ̀ŋ diɛŋ koɓɛ̀i àŋ nyaaŋ nyààŋ “Koɓɛ̀ le Zààmàiŋ.” E Hiɓulù mieɛ̀ sùà nyààŋ “Ko Gabatà.” 14Tiiŋ zà è yaà wa naàŋ ebɛ̀ŋ e gɔɛɛ hàì ɗìò tɛɛ ke ɗɔɔ dìàmaàŋ wèè ke ɗɔ̀ɔ̀ wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ ke haì. Yèè wo Paalè naŋ wòò aŋ Juùù nyaŋ wààŋ, “Nyùùŋ nyɛɛ̀ŋ, wo kanaiŋ nɔɔ̀ŋ wɛɛ̀!”

15Yèè anyùùŋ nyaŋ naŋ kpààŋ sɛiŋ nyààŋ, “Jiwàuŋ! Jiwàuŋ! Kpùùnyaàuŋ wɔŋ vànèkpaaà diɛŋ!”

Yèè wo Paalè naŋ nyiŋ dawè wààŋ, “Nìŋ manaŋ ka kpùùnyàŋ wo kanaiŋ nɔɔ̀ŋ wɔŋ vànèkpaaà diɛŋ?”

Yèè aŋ kànà sìèfèìŋ zòòlo nyàŋ naŋ fasaì nyààŋ, “Wo kanaà nɔŋ è kùwàìŋ wɔ nàŋ yaà wo Siisɔ̀, wo kànà anyùùŋ ko Luùm nyaŋ.”

16Kpeiŋ wo Paalè naŋ kìlè wo Jisɛ̀ koɓɛ̀ aŋ kààlòòɗùà nyaŋ wèè aŋ kpuunyàuŋ wɔŋ vànèkpaaà diɛŋ.

Aŋ Juùù nyaŋ kpùùnyàŋ wo Jisɛ̀ wɔŋ vànèkpaaà diɛŋ

(Maafiù 27.32-44; Mài 15.21-32; Luù 23.26-43)

Yèè àŋ naŋ kɔ̀ɔ̀ wo Jisɛ̀ wèè auŋ jìwà. 17Nààŋ àŋ yaà kòasùà wo Jisɛ̀, àŋ nauŋ kìɛ̀ŋ wɔŋ vànèkpaauŋ nɔɔ̀ŋ wèè wo wuŋ koà. Kpeiŋ wò naŋ wuŋ kɔ̀ɔ̀ koɓɛ̀i àŋ nyaaŋ nyààŋ, “Koɓɛ̀ maŋ ɗì Kòkòi.” Àŋ nyaaŋ koɓɛ̀ bi e Hiɓulù mieɛ̀ sùà nyààŋ “Ko Gɔ̀ɔ̀gatɔ̀.” 18Kuii àŋ naŋ wa jìwìè wo Jisɛ̀ wɔŋ vànèkpaaà diɛŋ. Ke ɗɔ̀ɔ̀ guùŋ yii, àŋ naŋ wa kpùùnyɛ̀ŋ aŋ nyùùŋ wùà tìyèe maŋ je nyiŋ vànèkpaa màŋ diɛŋ wo Jisɛ̀ kɔɔ. Wò guùŋ yàaùŋ wa wɔŋ kùàŋ jìka yèè wo bàa yàaùŋ wɔŋ kùàŋ gbɔnɔŋ. 19Wo Paalè naŋ wa kpùùnyɛ̀ŋ wɔŋ fɛi kpuu wɔŋ vànèkpaaà wo Jisɛ̀ kpuunyaŋ wa diɛŋ wɔ̀ŋ wààŋ, “Wo Jisɛ̀ e yìwìà ko Naazɔ̀ɛ̀, wo Kànà aŋ Juùù nyaŋ.” 20E yìwìà koɓɛ̀i àŋ naŋ wa jìwìè wo Jisɛ̀ lɛ wèè e kà ko jawa gbeeì gò wa diidìì. Anyuùŋ zimgbe naŋ wa kpɛ̀nɛ̀ŋ wɔŋ fɛi kpuuɔ̀ kpuunyaŋ wa wɔ̀ŋ vànèkpàà Jisɛ̀ɔ diɛŋ wɔ̀ŋ. Àŋ naŋ niŋ wa sìngè maŋ kàìŋ ɗì taai sùà, e Hiɓulù, wɔŋ kàìŋ aŋ Juùù nyaŋ, e Latììŋ yèè e Guliì mie. 21Kpeiŋ aŋ kànà sìèfèìŋ zòòlo nyàŋ naŋ kɔ̀ koɓɛ̀ Paalèi yèè àŋ nauŋ woò nyààŋ, “Wèè kiìŋ mùŋ naŋ sìngè mààŋ wuŋ nàŋ yaà wo Kànà aŋ Juùù nyaŋ? Mùŋ he weè nàŋ sìngè mààŋ, ‘Wo felaa wɛɛ̀ wààŋ wuŋ nàŋ yaà wo Kànà aŋ Juùù nyaŋ.’ ”

22Kɛɛ wo Paalè naŋ nyiŋ woò wààŋ, “Miŋ naàŋ vɔ̀ɔ̀nɔ̀ŋ è yèɛ mìŋ naŋ sìngè lɛ.”

23Nààŋ aŋ kààlòòɗùà nyaŋ naŋ wa naàŋ kpùùnyɛ̀ŋ wo Jisɛ̀ wɔŋ vànèkpaaà diɛŋ wèè auŋ jìwà, àŋ naŋ gòònò maŋ dèè kɔɔuŋ màŋ e ɗì tiinàŋ e fèemàŋ nyiŋ nɛ̀. Kɛɛ wɔŋ dèèɔ wò gbiinyàŋ wa gbààì wɔŋ, wɔ̀ŋ yaà nɔŋ wɔŋ fàà guùŋ, yèè e fee gbiŋ fè wuùŋ wa. 24Yèè aŋ kààlòòɗùà nyaŋ naŋ wòò nyiŋ bi e fèemàŋ nyààŋ, “Ɓɔ̀ è sɛ̀ɛ̀iŋ wuŋ. Dàà wììŋ ke kpɔlɔ wèè e yɛmɛ̀iŋ sèè mààŋ ɓòò nàŋ do wuŋ nàŋ kɔɔ̀.” Tɛɛ̀ naŋ wa kaaìŋ wèè e nyɛ̀nɛ̀ŋ e yèɛ wɔŋ fɛ̀ì Dayàa naŋ woò lɛ e hɛɛnɛ̀ŋ nààŋ è yaà sìnga niŋ lɛ kɛ̀,

“Àŋ naŋ gòònò maŋ dèè kɔɔim màŋ e fèemàŋ nyiŋ nɛ̀

yèè àŋ naŋ dàà ke kpɔlɔ wèè wɔŋ dèèɔ mìŋ gbiɛŋ gbààì wɔŋ.”

Yèè tɛɛ̀ aŋ kààlòòɗùà nyaŋ naŋ wa nyɛ̀nɛ̀ŋ.

25Aŋ jɔ̀ùŋ nyùùŋ tiinàŋ sia wa e gbɛ̀ɛ̀ wɔŋ vànèkpàà Jisɛ̀ɔ kɔɔ. Aŋ jɔùŋ bi nàŋ yaà wa wo nààŋ Jisɛ̀ɔ yaà wo jeuŋ wo nanàaŋ, wo Mèèle wo jawè Kulopàa, yèè wo Mèèle e yìwìà ko jawaì àŋ nyaaŋ Màŋdalà lɛ. 26Nààŋ wo Jisɛ̀ naŋ yɛ̀mɛ̀ wo yèyeuŋ nɔɔ̀ŋ yèè wo nyùùŋ màŋjɛ̀wɛ̀ɔ wò manaŋ wa wɔ̀ àŋ sia koɓɛ̀ guùŋ, wo Jisɛ̀ naŋ wòò wo nààŋ wààŋ, “Yèye, wo jɔ̀àfelaa mɔɔ̀ŋ wii.”

27Yèè wo Jisɛ̀ naŋ wòò wo nyùùŋ màŋjɛ̀wɛ̀uŋ nɔɔ̀ŋ wààŋ, “Wo yèye mɔɔ̀ŋ wii.” Yèè e yìwìà ke ɗɔɔ yii, wo nyùùŋ màŋjɛ̀wɛ̀ɔ naŋ kɔ̀ɔ̀ wo nààŋ Jisɛ̀ɔ ko gboouŋ noo wèè wouŋ nɔ̀ŋ kùàŋ.

Wo Jisɛ̀ fɔ̀ɔ̀yɛ̀ wɔŋ vànèkpaaà diɛŋ

(Maafiù 27.45-56; Mài 15.33-41; Luù 23.44-49)

28Yèè e teenga lii sùà, wo Jisɛ̀ wa naàŋ nyìmàŋ kɛ̀ wò kpɛ̀ɛ̀yɛ̀ e tòmoɛ̀ wo Dayà nauŋ wa tùɔ̀ŋ wèè wo nyɛ̀nɛ̀ŋ lɛ. Yèè wèè wo nyɛ̀nɛ̀ŋ wa e yèɛ wɔŋ fɛ̀ì Dayàa naŋ woò lɛ e hɛɛnɛ̀ŋ, wo Jisɛ̀ naŋ woò wààŋ, “Ke jòòmàì yààìm.”

29E sàiŋ dìà maŋ muàŋ keekèè yaào wa. Kpeiŋ wò bà guùŋ naŋ dùɔ̀ŋ wo ɓèmè ebɛì yɔuyɔ̀ù fàà, wo niŋ hòà maŋ muàŋ keekèè maŋ sùà, yèè wò naŋ niŋ hɔ̀ɔ̀ ke kùù bà àŋ nyaaŋ hasò, yèè wò naŋ niŋ jòòwò fùùŋ wo niŋ jàà wo Jisɛ̀ wɔŋ nyaàŋ kɔɔ. 30Nààŋ wo Jisɛ̀ naŋ tìyè maŋ muàŋ keekèè maŋ, wò naŋ woò wààŋ, “E gbiŋ è naàŋ jùà.”

Yèè wo Jisɛ̀ naŋ kpààŋ sɛiŋ, yèè wò naŋ mìè nyiiuŋ nɔɔ̀ŋ.

Wo kààlòòɗùàa bà guùŋ naŋ zɔ̀ɔ̀lɔ̀ ke kpɛɛ wo Jisɛ̀ e ɓula

31Yèè wɔŋ niìsìaà bàa hewa nàŋ nɔ̀ŋ ke Ɗɔ̀ɔ̀ Zòòlò aŋ Juùù nyaŋ yèè wɔŋ Ɗaa Gèe Hɔ̀ɛ̀ɛ̀ŋ Diɛɔ̀ŋ. Kè yaà wa ke ɗɔ̀ɔ̀ zòòlo titi wèè aŋ Juùù nyaŋ. Yèè aŋ manàŋ wa wèè màŋ dìè ànyuùŋ fàa nyàŋ maŋ jèè màŋ vànèkpaa màŋ diɛŋ wèè kè ɗɔɔ bi kè do haì. Kpeiŋ àŋ naŋ dàwè wo Paalè wèè wo gè nyiŋ nyààŋ diɛŋ wèè aŋ nyime nyìmè maŋ kpaa nyiŋ màŋ wèè aŋ zumò fàa kɛ̀ àŋ gè maŋ die nyiŋ màŋ maŋ vànèkpaa màŋ diɛŋ. 32Aŋ kààlòòɗùà nyaŋ naŋ nyìmè nyìmè maŋ kpàà anyùùŋ tìyèe nyàŋ jiɛ̀, aŋ yè nyaŋ àŋ naŋ wa jìwìè wo Jisɛ̀ kɔɔ maŋ vànèkpaa nyiŋ màŋ diɛŋ nyàŋ. 33Kɛɛ nààŋ àŋ naŋ wa hnè koɓɛ̀ Jisɛ̀i wèè aŋ nyime nyìmè maŋ kpaauŋ màŋ, àŋ naŋ yɛmɛ̀ kɛ̀ wò wa naàŋ fà tɛ, weètii aŋ gòuŋ wa nyìmè nyìmè màŋ kpaa. 34Yèè wo kààlòòɗùàa bà guùŋ naŋ zɔ̀ɔ̀lɔ̀ ke kpɛɛuŋ nɛɛ̀ŋ wo Jisɛ̀ e ɓula, yèè maŋ sɛ̀ìŋ yaà e wùìyè nao fòlò. 35Èiŋ nyìmàŋ kɛ̀ tɛɛ̀ è yaà e tɔɔɓaa, esaɓù kɛ̀ wo nyùùŋ bà naŋ niŋ wa yɛmɛ̀ e kìlà wò naŋ kìɛ̀ŋ ke mìè seì, wèè kɛ̀ nyɛ̀iŋ pɛɛ niŋ kɛɛnɛ̀ŋ e hààwe. 36Maŋ keì mɛɛ̀ŋ naŋ wa kaaìŋ wèè e nyɛ̀nɛ̀ŋ e yèɛ wɔŋ fɛ̀ì Dayàa naŋ wa woò lɛ e hɛɛnɛ̀ŋ kɛ̀, “Ke goàuŋ nɛɛ̀ŋ bà guùŋ pɛɛ ke naàŋ wa nàwèè nyime.” 37Yèè wɔŋ fɛ̀ì Dayàa koɓɛ̀ bà naŋ ɓɛìŋ woò kɛ̀, “Anyùùŋ do nàŋ gɔ̀àì wo yèɔ àŋ naŋ jùwò e ɓula wɔ̀ le fɛ̀ɛ̀.”

Àŋ sìà wo Jisɛ̀

(Maafiù 27.57-61; Mài 15.42-47; Luù 23.50-56)

38E koya lii wo Jòòsɛ e yìwìà ko jawaì àŋ nyaaŋ Àlòmatià lɛ naŋ hnè ko jawaì. Wo yaà wa nyùùŋ màŋjɛ̀wɛ̀ Jisɛ̀ɔ bà guùŋ kɛɛ ke gbùnuo sùà, esaɓù kɛ̀ wò duɔŋ wa anyùùŋ gbèègbèè aŋ Juùù nyaŋ. Wo Jòòsɛ naŋ wa kùwìè ke jii nyingè yèè wò naŋ kɔ̀ ko fɛ̀ɛ̀fèìŋ wo kanaà Paalè yèè wò nauŋ hùmò e dìè Jisɛ̀ɛ. Wo Paalè naŋ wa fè wo Jòòsɛ e dieɛ̀. Kpeiŋ wo Jòòsɛ naŋ hìɛ̀ŋ wɔŋ kasange, yèè wò naŋ dèèyè e dieɛ̀ e yìwìà wɔŋ vànèkpaaà diɛŋ. 39Wo Nìkɔ̀dimɔ̀ wo yèɔ naŋ wa hnè koɓɛ̀ Jisɛ̀i wɔŋ dùùm guùŋ wɔ, naŋ hìɛ̀ŋ manɛ̀ŋ dò siaŋ bà àŋ nyaaŋ mɛɛ̀ yèè alò maŋ yè maŋ e mùŋga kii miŋ nɛ̀ yaà wa e sɔ̀ngɔ̀ e paàŋ hɔ̀nɔ̀ɔ̀ guùŋ. 40Aŋ fèlàà tìyèe nyàŋ naŋ ɓèmè e dìè Jisɛ̀ɛ yèè àŋ naŋ niŋ kpààì manɛ̀ŋ dò siaŋ, yèè àŋ naŋ niŋ kpènèkpènè maŋ dèè kasange màŋ sùà. E ɗewe kii bi sùà aŋ Juùù nyaŋ hewa bànèbànè anyuùŋ fà nyiŋ nyàŋ wèè aŋ nyiŋ sìà. 41Ko kpòkpò bà yaà wa koɓɛ̀i àŋ naŋ wa jìwìè wo Jisɛ̀ wɔŋ vànèkpaaà diɛŋ lɛ̀. Ko kpòkpò bi ke dùò bà kè yaào wa ke yèɛ àŋ naŋ wa tòmò sùà wèè ke nɔ̀ŋ ke hùaàŋ, ke yèɛ kòò àŋ sììyè wa wò nyùùŋ gbiŋ sùà lɛ. 42Nààŋ ke ɗɔ̀ɔ̀ guùŋ naŋ wa naàŋ joo wèè ke Ɗɔ̀ɔ̀ Zòòlò aŋ Juùù nyaŋ ke haì e kìlà nààŋ ke hùaàŋ naŋ wa gbɛ̀ɛ̀ koɓɛ̀ bi, àŋ nao wa hèè e dìè Jisɛ̀ɛ ke hùaŋ bi sùà.

Currently Selected:

Jɔ̀ɔŋ 19: WFESD

Highlight

Copy