Jɔ̀ɔŋ 21
21
Wo Jisɛ̀ naŋ fòlò anyùùŋ màŋjɛ̀wɛ̀ nɔɔnɔŋ le tìyèe feìŋ
1Eɓìèmàŋjɛ̀wɛ̀ tii wo Jisɛ̀ naŋ fòlò anyùùŋ màŋjɛ̀wɛ̀uŋ nyàŋ feìŋ wɔŋ Jùwò Tàbiliàa kɔɔ. E ɗeweɛ̀ lɛɛ̀ è naŋ wa kaaìŋ. 2Wo Saimɔŋ Piilɛ̀, wo Sewìɔ Tàmaŋ, wo Nàntanyàŋ e yìwìà ko Kenàŋ yèè ko Galaliì, aŋ jɔ̀àfèlàà Zɛɓɛdiì nyaŋ yèè aŋ wùìyauŋ nyàŋ Jìiiŋ yaà wo Jɔ̀ɔŋ, àŋ yaà wa koɓɛ̀ guùŋ, e hààwè anyùùŋ màŋjɛ̀wɛ̀ tìyèe bà ɓɛìŋ. 3Wo Saimɔŋ Piilɛ̀ naŋ nyiŋ wa woò wààŋ, “Mìŋ yaà kɔ̀ɔ̀yɛ̀ ko sungie.”
Yèè anyùùŋ màŋjɛ̀wɛ̀ gbànaŋ nyàŋ nauŋ woò nyààŋ, “È yààùm dè sùà maŋjɛ̀wɛ eiŋ ka.” Àŋ naŋ wa sɛ̀ɛ̀ wɔŋ gɔ nyiŋ nɔɔ̀ŋ sùà yèè àŋ naŋ kɔ̀. Kɛɛ aŋ gò wa kùwà è nɛ̀ŋ gbiŋ wɔ̀ŋ dùùm wiiŋ. 4Kpeiŋ maŋ nyiìŋ tɛ̀tɛ̀ miiŋ e teengaà e gɔɛɛ jɔaà nɔ̀ŋ yɛi fòla sùà le, wo Jisɛ̀ naŋ hnè wo sìè e wùìyèɛ kɔɔ, kɛɛ anyùùŋ màŋjɛ̀wɛ̀uŋ nyàŋ nyimààŋ wa kɛ̀ wuŋ wo. 5Yèè wo Jisɛ̀ naŋ nyiŋ dawè wààŋ, “Dàwim nyàŋ, kòò nìŋ kùwò wò kɛì gbiŋ?”
Yèè àŋ nauŋ fasàì nyààŋ, “Kpele, kòò è kùwòìŋ è nɛ̀ŋ gbiŋ.”
6Wo Jisɛ̀ naŋ nyiŋ woò wààŋ, “Gbìnyaìŋ wɔŋ kpeeiŋ nɔɔ̀ŋ e wùìyèɛ sùà wɔŋ gɔiŋ nɔɔ̀ŋ wɔŋ kùàŋ jìka, yèè nìŋ do nàŋ kùwò aŋ kɛ̀ì.” Àŋ nao gbìɛ̀ŋ wɔŋ kpeeɔ̀, yèè wɔŋ kpeeɔ̀ naŋ dìè aŋ kɛ̀ì e nyɛ̀nɛ̀ŋ aŋ fè wuŋ wa ɓɛ̀nɛ̀ŋ gɔ̀ɛ̀ɛ wèè aŋ wuŋ gbìàŋ kò gɔì, esaɓù kɛ̀ aŋ kuwà wa è gààaŋ wèè aŋ wuŋ gɔ̀ɛ̀ɛ̀.
7Wo nyùùŋ màŋjɛ̀wɛ̀ɔ wo Jisɛ̀ manaŋ wa wɔ̀ naŋ wòò wo Saimɔŋ Piilɛ̀ wààŋ, “Wo Kanaà wò!” Nààŋ wo Pììlɛ naŋ kòmò kɛ̀ wo Kanaà wo, wò naŋ gbìɛ̀ŋ wɔŋ deèuŋ nɔɔ̀ŋ gbààì wɔŋ yèɔ wò naŋ gè wò naŋ haà e teengaà wò yaà wa toomo lɛ̀. Yèè wò naŋ vaì wo sɛ̀ɛ̀ e wùìyèɛ sùà. 8Koɓɛ̀i wɔŋ gɔ jɔaà jaa wa e wùìyèɛ diɛŋ lɛ̀, e dìì dii kiio lɛ̀ yaà wa sɔ̀ngɔ̀ kpàlafɛɛ hɔ̀nɔ̀ɔ̀ guùŋ wèè ko tiwiì. Yèè anyùùŋ màŋjɛ̀wɛ̀ gbànaŋ nyàŋ naŋ jèè ko gɔì àŋ yaà gɔ̀ɛ̀ɛ sùà wɔŋ kpee dìà aŋ kɛ̀ìɔ ko tiwiì. 9Nààŋ anyùùŋ màŋjɛ̀wɛ̀ nyaŋ naŋ wa fòlò wɔŋ gɔɔ̀ sùà e tiwi feìŋ nɛ, àŋ naŋ mɛ̀ɛ̀ŋ e hmɔɔ̀ŋ dììya wo kɛì hàwà nìŋ diɛŋ yèè ke gbɔ̀u. 10Yèè wo Jisɛ̀ naŋ nyiŋ woò wààŋ, “Hìaìŋ aŋ kɛ̀ì nyaŋ nìŋ naŋ nɔŋ kùwò nyaŋ bà.”
11Yèè wo Saimɔŋ Piilɛ̀ naŋ kɛ̀ɛ̀ ko gɔì yèè wò naŋ gɔ̀ɛ̀ɛ̀ wɔŋ kpee dìà aŋ kɛ̀ìɔ ko tiwi. Aŋ kɛì gbeegbèè hɔ̀nɔ̀ɔ̀ guùŋ kpɛ̀ɛ̀ùŋ tìyèe jɛ̀wɛ̀ zììyà jɛ̀wɛ̀ taai (153) nàŋ yaà wa wɔŋ kpeeɔ̀ sùà, kɛɛ wɔŋ kpeeɔ̀ gò wa kɛtɛ kɛ̀tɛ̀. 12Yèè wo Jisɛ̀ naŋ nyiŋ woò wààŋ, “Hnaìŋ niŋ jè e nɛ̀ŋ.” Anyùùŋ màŋjɛ̀wɛ̀ nyaŋ bà guùŋ pɛɛ gòuŋ wa dawè kɛ̀ ɓòò nàŋ yàaùŋ. Àŋ wa nyìmàŋ kɛ̀ wo Kanaà wo wa. 13Wo Jisɛ̀ naŋ ɓèmè ke gbɔ̀uɛ̀ bà yèè wò naŋ nyiŋ kiɛ̀ŋ. Eɓìèmàŋjɛ̀wɛ̀ tii wò naŋ ɓɛìŋ ɓèmè wo kɛìɔ bà yèè wò naŋ nyiŋ wuŋ kiɛ̀ŋ.
14Tɛɛ̀ nàŋ yaà wa e teenga dìà taaà wèè wo Jisɛ̀ wo fòlà anyùùŋ màŋjɛ̀wɛ̀uŋ nyàŋ feìŋ nààŋ wò naŋ wa yèwè e fàaà dìì wɔŋ nyiiŋ gèeo sùà.
Wo Jisɛ̀ yèè wo Pììlɛ naŋ gbòò
15Nààŋ wo Jisɛ̀ yèè anyùùŋ màŋjɛ̀wɛ̀uŋ nyàŋ naŋ wa kpɛ̀ɛ̀yɛ̀ e nɛ̀ŋ jèe, wo Jisɛ̀ naŋ dàwè wo Saimɔŋ Piilɛ̀, wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, mùŋ mànàìm maŋ nìàŋ anyùùŋ màŋjɛ̀wɛ̀ gbànaŋ nyàŋ?”
Wo Saimɔŋ Piilɛ̀ naŋ fasàì wààŋ, “Hɛ̀ɛɛ̀ŋ Kanaà, màŋ nyìmàŋ kɛ̀ mìŋ mànàùm.”
Yèè wo Jisɛ̀ naŋ woò wààŋ, “Kɛ̀ gɔ̀ɔ̀yɛɛ̀ aŋ ɓaawaaim nyàŋ.” 16E dìà tìyèeɛ̀ wo Jisɛ̀ naŋ ɓɛìŋ dàwè wo Saimɔ̀ŋ wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, kòò mùŋ mànàìm?”
Wo Saimɔ̀ŋ naŋ ɓɛìŋ fasàì wààŋ, “Hɛ̀ɛɛ̀ŋ Kanaà, màŋ nyìmàŋ kɛ̀ mìŋ mànàùm.”
Yèè wo Jisɛ̀ nauŋ ɓɛìŋ woò wààŋ, “Yɛ̀mɛ̀ aŋ ɓaawaaim nyàŋ diɛŋ.” 17E dìà taaà wo Jisɛ̀ naŋ ɓɛìŋ dàwè wo Saimɔ̀ŋ wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, kòò mùŋ mànàìm?”
Wo Pììlɛ naŋ nɔ̀ŋ ɗoomɛɛŋ ke nyowo sùà nààŋ wo Jisɛ̀ nauŋ dawè e dìà taaà sùà wààŋ, “Kòò mùŋ mànàìm?” Yèè wo Pììlɛ nauŋ woò wààŋ, “Kanaà, màŋ nyìmàŋ maŋ keì maŋ gbiŋ. Màŋ nyìmàŋ kɛ̀ mìŋ mànàùm.”
Yèè wo Jisɛ̀ nauŋ ɓɛìŋ woò wààŋ, “Kɛ̀ gɔ̀ɔ̀yɛɛ̀ aŋ ɓaawaaim nyàŋ.” 18Yèè wo Jisɛ̀ nauŋ ɓɛìŋ woò wààŋ, “Miŋ woòum e tɔɔɓaaà, e teengaà mùŋ yaà wa wo nyuùŋ bɔwɔ lɛ̀, mùŋ hewa kpàà muàŋ bi yèè maŋ kà koɓɛ̀ gbiŋ ko yèi mùŋ manaŋ lɛ̀. Kɛɛ sèè mùŋ nɔ̀ŋ wa nàwèè naàŋ wo nyuùŋ gɔu, mùŋ do nàŋ vùlɔ̀ŋ maŋ kuàum màŋ. Kpeiŋ kɛ̀ anyùùŋ bà nàŋ doum nàŋ sìè e tɛɛ̀kìì mɔ̀ɛ̀ e tɛɛ, yèè aum kùwà maŋ kùàŋ aum kòà koɓɛ̀i muŋ manàŋ wèè maŋ ka lɛ̀.” 19Wo Jisɛ̀ naŋ wa tɛɛ̀ woò wèè wo tɔ̀ɔ̀ wo Pììlɛ e ɗewe kiiɛ̀ wò do wa nàŋ fɔ̀ lɛ yèè e yèɛ do wa nàŋ hìɛ̀ŋ e jòòwo koɓɛ̀ Dayài lɛ̀. Yèè wo Jisɛ̀ nauŋ tɛɛ̀ woò wààŋ, “Dèim maŋjɛ̀wɛ ke kpèè miɛ̀ŋ sùà, yèè e nɔ̀ŋ kii mɛ̀ sùà.”
Wo Jisɛ̀ naŋ wòò e kèè wo nyùùŋ màŋjɛ̀wɛ̀ɔ wò manaŋ wɔ̀
20Wo Pììlɛ naŋ kìlè wo yɛ̀mɛ̀ ko jɛ̀wɛ̀, yèè wò naŋ yɛ̀mɛ̀ wo nyùùŋ màŋjɛ̀wɛ̀ɔ wo Jisɛ̀ manaŋ wa wɔ̀ wò kùwà nyiìŋ maŋjɛ̀wɛ. Wo nyùùŋ màŋjɛ̀wɛ̀ bi nàŋ jaa wa wo Jisɛ̀ kɔɔ fɔ̀ɔ̀ e teengaà àŋ yaà wa jììyè nɛ̀ŋje lɛ̀. Wuŋ naŋ wa dawè wààŋ, “Kanaà, ɓòò nàŋ yaà hinie wèè woum maàŋ?” 21Nààŋ wo Pììlɛ naŋ yɛ̀mɛ̀ wo nyùùŋ màŋjɛ̀wɛ̀ wɛɛ̀, wò naŋ dàwè wo Jisɛ̀ wààŋ, “Kanaà, kiìŋ mùŋ kuwa maŋ woò e nyaàiŋ dè wo felaa wɛɛ̀?”
22Wo Jisɛ̀ nauŋ fasàì wààŋ, “Sèè ka mànàŋ wèè wo jèè wɔŋ nyiiŋ gèeɔ̀ sùà e jèèsùà ka wa nàwèè kɛ̀ɛ̀ maŋjɛ̀wɛ, kiìŋ tii kuwa eum nyinìàŋ? Mùŋ kuwa maim dè maŋjɛ̀wɛ.”
23Yèè ebò naŋ ɓààyè anyùùŋ màŋjɛ̀wɛ̀ Jisɛ̀ nyaŋ e fèemàŋ kɛ̀ wo nyùùŋ màŋjɛ̀wɛ̀ wɛɛ̀ wo naàŋ wa nàwèè fɔ̀. Kɛɛ wo Jisɛ̀ gò wa woò wààŋ wo naàŋ fɔ̀. Wò naŋ wa nɔŋ woò wààŋ, “Sèè ka mànàŋ wèè wo jèè wɔŋ nyiiŋ gèeɔ̀ sùà e jèèsùà ka wa nàwèè kɛ̀ɛ̀ maŋjɛ̀wɛ, kiìŋ tii kuwa eum nyinìàŋ?”
24Wo nyùùŋ màŋjɛ̀wɛ̀ wɛɛ̀ naŋ sìngè maŋ keì mɛɛ̀ŋ gbiŋ. Èiŋ nyìmàŋ kɛ̀ ke mìè seìɛ wò naŋ kiɛ̀ŋ lɛ è yaà tɔɔɓaa.
Ko dìèmè wɔŋ fɛi sìnga wɛɛ̀ŋ
25Wo Jisɛ̀ naŋ wa nyɛ̀nɛ̀ŋ maŋ keì zimgbe. Sèè maŋ gbiŋ maŋ wa weè nɔ̀ŋ sìnga miŋ maŋ fɛi sùà, ko nɛ̀nɛ̀ŋ gbiŋ naàŋ weè nɔ̀ŋ e ɗuunyaàŋ wèè eiŋ miŋ noo bàànè hàa.
Currently Selected:
Jɔ̀ɔŋ 21: WFESD
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.
Jɔ̀ɔŋ 21
21
Wo Jisɛ̀ naŋ fòlò anyùùŋ màŋjɛ̀wɛ̀ nɔɔnɔŋ le tìyèe feìŋ
1Eɓìèmàŋjɛ̀wɛ̀ tii wo Jisɛ̀ naŋ fòlò anyùùŋ màŋjɛ̀wɛ̀uŋ nyàŋ feìŋ wɔŋ Jùwò Tàbiliàa kɔɔ. E ɗeweɛ̀ lɛɛ̀ è naŋ wa kaaìŋ. 2Wo Saimɔŋ Piilɛ̀, wo Sewìɔ Tàmaŋ, wo Nàntanyàŋ e yìwìà ko Kenàŋ yèè ko Galaliì, aŋ jɔ̀àfèlàà Zɛɓɛdiì nyaŋ yèè aŋ wùìyauŋ nyàŋ Jìiiŋ yaà wo Jɔ̀ɔŋ, àŋ yaà wa koɓɛ̀ guùŋ, e hààwè anyùùŋ màŋjɛ̀wɛ̀ tìyèe bà ɓɛìŋ. 3Wo Saimɔŋ Piilɛ̀ naŋ nyiŋ wa woò wààŋ, “Mìŋ yaà kɔ̀ɔ̀yɛ̀ ko sungie.”
Yèè anyùùŋ màŋjɛ̀wɛ̀ gbànaŋ nyàŋ nauŋ woò nyààŋ, “È yààùm dè sùà maŋjɛ̀wɛ eiŋ ka.” Àŋ naŋ wa sɛ̀ɛ̀ wɔŋ gɔ nyiŋ nɔɔ̀ŋ sùà yèè àŋ naŋ kɔ̀. Kɛɛ aŋ gò wa kùwà è nɛ̀ŋ gbiŋ wɔ̀ŋ dùùm wiiŋ. 4Kpeiŋ maŋ nyiìŋ tɛ̀tɛ̀ miiŋ e teengaà e gɔɛɛ jɔaà nɔ̀ŋ yɛi fòla sùà le, wo Jisɛ̀ naŋ hnè wo sìè e wùìyèɛ kɔɔ, kɛɛ anyùùŋ màŋjɛ̀wɛ̀uŋ nyàŋ nyimààŋ wa kɛ̀ wuŋ wo. 5Yèè wo Jisɛ̀ naŋ nyiŋ dawè wààŋ, “Dàwim nyàŋ, kòò nìŋ kùwò wò kɛì gbiŋ?”
Yèè àŋ nauŋ fasàì nyààŋ, “Kpele, kòò è kùwòìŋ è nɛ̀ŋ gbiŋ.”
6Wo Jisɛ̀ naŋ nyiŋ woò wààŋ, “Gbìnyaìŋ wɔŋ kpeeiŋ nɔɔ̀ŋ e wùìyèɛ sùà wɔŋ gɔiŋ nɔɔ̀ŋ wɔŋ kùàŋ jìka, yèè nìŋ do nàŋ kùwò aŋ kɛ̀ì.” Àŋ nao gbìɛ̀ŋ wɔŋ kpeeɔ̀, yèè wɔŋ kpeeɔ̀ naŋ dìè aŋ kɛ̀ì e nyɛ̀nɛ̀ŋ aŋ fè wuŋ wa ɓɛ̀nɛ̀ŋ gɔ̀ɛ̀ɛ wèè aŋ wuŋ gbìàŋ kò gɔì, esaɓù kɛ̀ aŋ kuwà wa è gààaŋ wèè aŋ wuŋ gɔ̀ɛ̀ɛ̀.
7Wo nyùùŋ màŋjɛ̀wɛ̀ɔ wo Jisɛ̀ manaŋ wa wɔ̀ naŋ wòò wo Saimɔŋ Piilɛ̀ wààŋ, “Wo Kanaà wò!” Nààŋ wo Pììlɛ naŋ kòmò kɛ̀ wo Kanaà wo, wò naŋ gbìɛ̀ŋ wɔŋ deèuŋ nɔɔ̀ŋ gbààì wɔŋ yèɔ wò naŋ gè wò naŋ haà e teengaà wò yaà wa toomo lɛ̀. Yèè wò naŋ vaì wo sɛ̀ɛ̀ e wùìyèɛ sùà. 8Koɓɛ̀i wɔŋ gɔ jɔaà jaa wa e wùìyèɛ diɛŋ lɛ̀, e dìì dii kiio lɛ̀ yaà wa sɔ̀ngɔ̀ kpàlafɛɛ hɔ̀nɔ̀ɔ̀ guùŋ wèè ko tiwiì. Yèè anyùùŋ màŋjɛ̀wɛ̀ gbànaŋ nyàŋ naŋ jèè ko gɔì àŋ yaà gɔ̀ɛ̀ɛ sùà wɔŋ kpee dìà aŋ kɛ̀ìɔ ko tiwiì. 9Nààŋ anyùùŋ màŋjɛ̀wɛ̀ nyaŋ naŋ wa fòlò wɔŋ gɔɔ̀ sùà e tiwi feìŋ nɛ, àŋ naŋ mɛ̀ɛ̀ŋ e hmɔɔ̀ŋ dììya wo kɛì hàwà nìŋ diɛŋ yèè ke gbɔ̀u. 10Yèè wo Jisɛ̀ naŋ nyiŋ woò wààŋ, “Hìaìŋ aŋ kɛ̀ì nyaŋ nìŋ naŋ nɔŋ kùwò nyaŋ bà.”
11Yèè wo Saimɔŋ Piilɛ̀ naŋ kɛ̀ɛ̀ ko gɔì yèè wò naŋ gɔ̀ɛ̀ɛ̀ wɔŋ kpee dìà aŋ kɛ̀ìɔ ko tiwi. Aŋ kɛì gbeegbèè hɔ̀nɔ̀ɔ̀ guùŋ kpɛ̀ɛ̀ùŋ tìyèe jɛ̀wɛ̀ zììyà jɛ̀wɛ̀ taai (153) nàŋ yaà wa wɔŋ kpeeɔ̀ sùà, kɛɛ wɔŋ kpeeɔ̀ gò wa kɛtɛ kɛ̀tɛ̀. 12Yèè wo Jisɛ̀ naŋ nyiŋ woò wààŋ, “Hnaìŋ niŋ jè e nɛ̀ŋ.” Anyùùŋ màŋjɛ̀wɛ̀ nyaŋ bà guùŋ pɛɛ gòuŋ wa dawè kɛ̀ ɓòò nàŋ yàaùŋ. Àŋ wa nyìmàŋ kɛ̀ wo Kanaà wo wa. 13Wo Jisɛ̀ naŋ ɓèmè ke gbɔ̀uɛ̀ bà yèè wò naŋ nyiŋ kiɛ̀ŋ. Eɓìèmàŋjɛ̀wɛ̀ tii wò naŋ ɓɛìŋ ɓèmè wo kɛìɔ bà yèè wò naŋ nyiŋ wuŋ kiɛ̀ŋ.
14Tɛɛ̀ nàŋ yaà wa e teenga dìà taaà wèè wo Jisɛ̀ wo fòlà anyùùŋ màŋjɛ̀wɛ̀uŋ nyàŋ feìŋ nààŋ wò naŋ wa yèwè e fàaà dìì wɔŋ nyiiŋ gèeo sùà.
Wo Jisɛ̀ yèè wo Pììlɛ naŋ gbòò
15Nààŋ wo Jisɛ̀ yèè anyùùŋ màŋjɛ̀wɛ̀uŋ nyàŋ naŋ wa kpɛ̀ɛ̀yɛ̀ e nɛ̀ŋ jèe, wo Jisɛ̀ naŋ dàwè wo Saimɔŋ Piilɛ̀, wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, mùŋ mànàìm maŋ nìàŋ anyùùŋ màŋjɛ̀wɛ̀ gbànaŋ nyàŋ?”
Wo Saimɔŋ Piilɛ̀ naŋ fasàì wààŋ, “Hɛ̀ɛɛ̀ŋ Kanaà, màŋ nyìmàŋ kɛ̀ mìŋ mànàùm.”
Yèè wo Jisɛ̀ naŋ woò wààŋ, “Kɛ̀ gɔ̀ɔ̀yɛɛ̀ aŋ ɓaawaaim nyàŋ.” 16E dìà tìyèeɛ̀ wo Jisɛ̀ naŋ ɓɛìŋ dàwè wo Saimɔ̀ŋ wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, kòò mùŋ mànàìm?”
Wo Saimɔ̀ŋ naŋ ɓɛìŋ fasàì wààŋ, “Hɛ̀ɛɛ̀ŋ Kanaà, màŋ nyìmàŋ kɛ̀ mìŋ mànàùm.”
Yèè wo Jisɛ̀ nauŋ ɓɛìŋ woò wààŋ, “Yɛ̀mɛ̀ aŋ ɓaawaaim nyàŋ diɛŋ.” 17E dìà taaà wo Jisɛ̀ naŋ ɓɛìŋ dàwè wo Saimɔ̀ŋ wo jɔ̀àfèlàà Jɔ̀ɔɔ̀ŋ wààŋ, “Saimɔ̀ŋ, kòò mùŋ mànàìm?”
Wo Pììlɛ naŋ nɔ̀ŋ ɗoomɛɛŋ ke nyowo sùà nààŋ wo Jisɛ̀ nauŋ dawè e dìà taaà sùà wààŋ, “Kòò mùŋ mànàìm?” Yèè wo Pììlɛ nauŋ woò wààŋ, “Kanaà, màŋ nyìmàŋ maŋ keì maŋ gbiŋ. Màŋ nyìmàŋ kɛ̀ mìŋ mànàùm.”
Yèè wo Jisɛ̀ nauŋ ɓɛìŋ woò wààŋ, “Kɛ̀ gɔ̀ɔ̀yɛɛ̀ aŋ ɓaawaaim nyàŋ.” 18Yèè wo Jisɛ̀ nauŋ ɓɛìŋ woò wààŋ, “Miŋ woòum e tɔɔɓaaà, e teengaà mùŋ yaà wa wo nyuùŋ bɔwɔ lɛ̀, mùŋ hewa kpàà muàŋ bi yèè maŋ kà koɓɛ̀ gbiŋ ko yèi mùŋ manaŋ lɛ̀. Kɛɛ sèè mùŋ nɔ̀ŋ wa nàwèè naàŋ wo nyuùŋ gɔu, mùŋ do nàŋ vùlɔ̀ŋ maŋ kuàum màŋ. Kpeiŋ kɛ̀ anyùùŋ bà nàŋ doum nàŋ sìè e tɛɛ̀kìì mɔ̀ɛ̀ e tɛɛ, yèè aum kùwà maŋ kùàŋ aum kòà koɓɛ̀i muŋ manàŋ wèè maŋ ka lɛ̀.” 19Wo Jisɛ̀ naŋ wa tɛɛ̀ woò wèè wo tɔ̀ɔ̀ wo Pììlɛ e ɗewe kiiɛ̀ wò do wa nàŋ fɔ̀ lɛ yèè e yèɛ do wa nàŋ hìɛ̀ŋ e jòòwo koɓɛ̀ Dayài lɛ̀. Yèè wo Jisɛ̀ nauŋ tɛɛ̀ woò wààŋ, “Dèim maŋjɛ̀wɛ ke kpèè miɛ̀ŋ sùà, yèè e nɔ̀ŋ kii mɛ̀ sùà.”
Wo Jisɛ̀ naŋ wòò e kèè wo nyùùŋ màŋjɛ̀wɛ̀ɔ wò manaŋ wɔ̀
20Wo Pììlɛ naŋ kìlè wo yɛ̀mɛ̀ ko jɛ̀wɛ̀, yèè wò naŋ yɛ̀mɛ̀ wo nyùùŋ màŋjɛ̀wɛ̀ɔ wo Jisɛ̀ manaŋ wa wɔ̀ wò kùwà nyiìŋ maŋjɛ̀wɛ. Wo nyùùŋ màŋjɛ̀wɛ̀ bi nàŋ jaa wa wo Jisɛ̀ kɔɔ fɔ̀ɔ̀ e teengaà àŋ yaà wa jììyè nɛ̀ŋje lɛ̀. Wuŋ naŋ wa dawè wààŋ, “Kanaà, ɓòò nàŋ yaà hinie wèè woum maàŋ?” 21Nààŋ wo Pììlɛ naŋ yɛ̀mɛ̀ wo nyùùŋ màŋjɛ̀wɛ̀ wɛɛ̀, wò naŋ dàwè wo Jisɛ̀ wààŋ, “Kanaà, kiìŋ mùŋ kuwa maŋ woò e nyaàiŋ dè wo felaa wɛɛ̀?”
22Wo Jisɛ̀ nauŋ fasàì wààŋ, “Sèè ka mànàŋ wèè wo jèè wɔŋ nyiiŋ gèeɔ̀ sùà e jèèsùà ka wa nàwèè kɛ̀ɛ̀ maŋjɛ̀wɛ, kiìŋ tii kuwa eum nyinìàŋ? Mùŋ kuwa maim dè maŋjɛ̀wɛ.”
23Yèè ebò naŋ ɓààyè anyùùŋ màŋjɛ̀wɛ̀ Jisɛ̀ nyaŋ e fèemàŋ kɛ̀ wo nyùùŋ màŋjɛ̀wɛ̀ wɛɛ̀ wo naàŋ wa nàwèè fɔ̀. Kɛɛ wo Jisɛ̀ gò wa woò wààŋ wo naàŋ fɔ̀. Wò naŋ wa nɔŋ woò wààŋ, “Sèè ka mànàŋ wèè wo jèè wɔŋ nyiiŋ gèeɔ̀ sùà e jèèsùà ka wa nàwèè kɛ̀ɛ̀ maŋjɛ̀wɛ, kiìŋ tii kuwa eum nyinìàŋ?”
24Wo nyùùŋ màŋjɛ̀wɛ̀ wɛɛ̀ naŋ sìngè maŋ keì mɛɛ̀ŋ gbiŋ. Èiŋ nyìmàŋ kɛ̀ ke mìè seìɛ wò naŋ kiɛ̀ŋ lɛ è yaà tɔɔɓaa.
Ko dìèmè wɔŋ fɛi sìnga wɛɛ̀ŋ
25Wo Jisɛ̀ naŋ wa nyɛ̀nɛ̀ŋ maŋ keì zimgbe. Sèè maŋ gbiŋ maŋ wa weè nɔ̀ŋ sìnga miŋ maŋ fɛi sùà, ko nɛ̀nɛ̀ŋ gbiŋ naàŋ weè nɔ̀ŋ e ɗuunyaàŋ wèè eiŋ miŋ noo bàànè hàa.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Gola New Testament Translation and Literacy Project © Bible Society in Liberia, 2019.