LUKA 4

Isua thlêmna tawh thu

(Mt 4.1-11; Mk 1.12-13)

1-2Tin, Isua chu Thlarau Thianghlimin a khat a, Jordan lui aṭangin a kîr leh a, Diabola thlêm chungin thlalêrah ni sawmli Thlarau hruaiin a awm a.

3Tin, chûng ni chuan eng mah a ei lo; tin, a tâwpah chuan a ril a lo ṭâm ta a. Tin, Diabola chuan a hnênah, “Pathian Fapa i nih chuan he lung hi chhanga chang tûrin thu pe rawh,” a ti a. 4Tin, Isuan a hnênah, “ ‘Mihring hi chhang chauhvin an nung lo vang,’ tih ziak a ni,” a ti a, a chhâng a.#Deut 8.3.

5Tin, a hruai chho va, mit khap kâr lovah khawvêl ram zawng zawng a entîr a. 6Tin, Diabola chuan a hnênah, “Hêng zawng zawng chunga thuneihna leh a ropuina hi ka pe ang che; ka hnêna pêk a ni tawh si a, ka duh apiang hnênah ka pe bawk ṭhîn a ni. 7Chutichuan, chibai mi bûk la, a zain i ta a ni vek ang,” a ti a. 8Tin, Isuan a hnênah, “ ‘Lalpa i Pathian chibai bûk la, ama rawng chauh bâwl rawh,’ tih ziak a ni,” a ti a, a chhâng a.#Deut 6.13.

9Tin, Diabola chuan Jerusalem khuaah a hruai a, Pathian biak in chhîp zumah chuan a dah a; tin, a hnênah, “Pathian Fapa i nih chuan heta ṭang hian tla thla rawh;

10‘Nangmah humhim tûr chein,

I chung thûah zawng

A vântirhkohte chu

thu a pe ang,’

tih leh,#Sam 91.11.

11‘An kutin an dâwm ang chia;

Chuti lo chuan, i kein lung

i chhuih hlauh dah ang e,’

tih ziak a ni si a,” a ti a.#Sam 91.12.

12Tin, Isuan a hnênah,

“ ‘Lalpa i Pathian fiah suh,’

tih a ni e,” tiin a chhâng a.#Deut 6.16.

13Tin, Diabola chuan a thlêmna tûr tinrênga a thlêm zawh chuan, a remchân hun atân a kalsan ta a.

Galili ramah Isuan rawngbâwl a ṭan

(Mt 4.12-17; Mk 1.14-15)

14Tin, Isua chu Thlarau thiltihtheihna puin Galili ramah a haw leh ta a; tin, a chanchin chu, chumi vêl ram tinah chuan a thang ta a. 15Tin, an inkhâwmna inahte a zirtîr zêl a, mi zawng zawng fakin a awm a.

Nazareth khuaah Isua a hnawng

(Mt 13.53-58; Mk 6.1-6)

16Tin, a seilenna khua Nazareth chu a lo thleng a; tin, Chawlhnia a tih dân pângngaiin inkhâwmna inah a lût a, chhiar tûrin a ding a. 17Tin, zâwlnei Isaia lehkhabu chu a hnênah an pe a. Tin, lehkhabu zial chu a phelh a, he thu ziakna lai hi a chhar a,

18“Riangvaite hnênah

Chanchin Ṭha hril tûra

mi ruat avângin,

Lalpa Thlarau chu

ka chungah a awm;

Ani chuan salte hnêna

chhuahna thu leh,

Mitdelte hnêna mitvâr

neih lehna thu sawi tûr te,

Tihduhdah tuarte

chhuahtîrna tûr te,#Is 61.1-2

19Lalpa lungawi kum thu

sawi tûr tein,

mi tîr a ni,”

tih hi.

20Tin, lehkhabu chu a zial a, rawngbâwltu a pe leh a, a ṭhu ta a. Tin, inkhâwmna ina mi zawng zawng mit chu a chungah a fu a. 21Tin, an hnênah, “He Pathian Lehkha Thu hi vawiinah hian in hriatah a lo thleng ta,” tiin a sawi ṭan a, 22Tin, an zain amah an fak a, a kamchhuak khawngaih thute chu mak an ti hle a. Tin, “He mi hi Josefa fapa a ni lo vem ni?” an ti a.

23Tin, ani chuan an hnênah, “Nangnin he tehkhin thu hi, ‘Dâktawr, nangmah intidam rawh,’ ‘Kapernaum khuaa i thiltih kan lo hriat apiang kha, hetah nangma khaw lamah pawh hian ti rawh,’ tiin mi la hrilh dâwn ngei nâk hi,” a ti a. 24Tin, amah vêkin, “Tihtak meuhvin ka hrilh a che u, zâwlnei tu mah mahni khaw lama miin an lâwm ngai lo.#Joh 4.44 25Chutichuan, dik takin ka ti a che u, Elija dam laia kum thum leh thla ruk vân a pina, khawvêla ṭâm nasa tak a lo tlâk khân, Israel ramah hmeithai tam tak an awm a;#1 Lal 17.1 26nimahsela, an zînga tu hnênah mah Elija tirh a ni lo va, Sidon ram lama Sarepta khuaa hmeichhe pakhat hmeithai hnênah chauh tirh a nih zâwk kha.#1 Lal 17.8-16 27Tin, zâwlnei Elisa dam lai pawh khân Israel ramah phâr tam tak an awm a; nimahsela, an zîngah tu mah tihthianghlimin an awm lo va, Naamana, Suria rama mi chauh tihthianghlima a awm tâk zâwk kha,” a ti a.#2 Lal 5.1-14

28Tin, inkhâwmna ina mi zawng zawng chuan chûng thu chu an hriat veleh, an lo thinur êm êm a, 29an tho hlawm a, khua ata chu an nam chhuak a, paih thlâk tûrin an khaw awmna khâm kovah chuan an hruai ta a. 30Nimahsela, ani chu an kârah a kal tlang a, a kal ta zêl mai a.

Ramhuai pai mi pakhat

(Mk 1.21-28)

31Tin, Galili rama khaw pakhat, Kapernaum-ah chuan a zuk kal ta a. Tin, Chawlhniah mite a zirtîr a; 32tin, thunei taka a sawi avângin a thu zirtîr chu mak an ti hle a.#Mt 7.28-29

33Tin, inkhâwmna inah chuan ramhuai bawlhhlawh thlarau pai mi pakhat a lo awm a; ani chu aw ring takin, 34“A! Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian Mi Thianghlima i ni e,” tiin a au chhuak a. 35Tin, Isuan a hau va, “Ngawi la, a chhûng ata lo chhuak rawh,” a ti a. Tin, ramhuai chuan a laiah a titlu zet a, tina lovin a chhûng ata chu a lo chhuak ta a. 36Tin, an zain mak an ti hle a, “Hei hi eng thu nge ni le? Thunei tak leh thiltithei takin ramhuai bawlhhlawhte thu a pe a, an chhuah hi,” tiin an inbia a. 37Tin, chumi vêl ram khaw tinah a chanchin a thang ta a.

Simona pizawn leh mi tam tak tihdam

(Mt 8.14-17; Mk 1.29-34)

38Tin, a tho va, inkhâwmna in ata chu a chhuak a, Simona inah a lût ta a. Tin, Simona nupuia nu chu nasa takin a khua a lo sik a; tichuan, a tân an lo ngensak a. 39Tin, a kiangah a ding a, khawsik chu a hau va, a reh ta a; tin, a tho ta nghâl a, an rawng a bâwlsak ta a.

40Tin, ni tlâk dâwn laiin natna hrang hranga nâ, damlo nei apiangin a hnênah an rawn hruai a; tin, an zaa chungah chuan a kut a nghat ṭheuh va, a tidam ta zêl a. 41Tin, ramhuaite pawh, “Pathian Fapa i ni,” tia auvin mi tam tak kawchhûng ata an lo chhuak a. Tin, anmahni a hau va, Krista a ni tih an hriat avângin an ṭawng a phal lo.

Inkhâwmna inahte Isuan thu a sawi

(Mk 1.35-39)

42Tin, khawvâr veleh a chhuak a, thlalêr hmunah a kal a; tin, mipuite chuan an zawng a, a hnênah an lo kal a, anmahni a kalsan loh nân chelh an tum a. 43Nimahsela, ani chuan an hnênah, “Khaw dangahte pawh Pathian ram Chanchin Ṭha ka hril tûr a ni, chumi avâng chuan tirh ka ni si a,” a ti a. 44Tichuan, Galili rama inkhâwmna inahte thu a hril a.

Currently Selected:

LUKA 4: MIZOVBSI

Highlight

Copy