LUKA 5

Lawng aṭangin a zirtîr

(Mt 13.1,2; Mk 3.9,10)

1Tin, heti hi a ni a, mipuiin Pathian thu an ngaihthlâka amah an bâwr huai huai laiin, ani chu Gennesaret dîl kamah chuan a ding a; #Mt 13.1-2; Mk 3.9-10; 4.1 2tin, dîl kamah chuan lawng pahnih awm a hmu a; nimahsela, sangha mantute chu an chhuak a, an lênte an su a. 3Tichuan, lawng pakhat, Simona ta zâwkah chuan a chuang a, a hnênah vaukam ata tlêma tawlh luh deuh a dîl a. Tin, a ṭhu a, lawng aṭang chuan mipuite chu a zirtîr ta a.

Isua thu âwihin Simonan sangha tam tak a man

(Joh 21.6)

4Tin, thusawi a bân chuan Simona hnênah, “Li thûk lam pan la, sangha man tûrin in lênte dêng rawh,” a ti a. 5Tin, Simonan a hnênah, “Zirtîrtu, rim takin zankhuain kan bei a, eng mah kan man lo va; nimahsela, i thuin lênte ka dêng leh ang e,” a ti a, a chhâng a. #Joh 21.3 6Tin, an han den chuan sangha tam tak an khuh a, an lênte chu a chat pheuh pheuh va. #Joh 21.6 7Tin, lawng danga an pâwlpui awmte chu anmahni rawn pui tûrin kutin an hui a. Tin, an lo kal a, lawng pahnih chu pil lek lek khawpin an chhûng khat ve ve a.

Zirtîr koh hmasak berte

(Mt 4.18-22; Mk 1.16-20)

8Tin, Simon Peteran chu chu a hmuh chuan Isua khûp kiangah a bawkkhup a, “Lalpa, mi kalsan rawh, mi sual ka nih hi,” a ti a. 9An sangha man chu ani leh a ṭhianten mak an ti hle si a. 10Simona pâwl vêk Zebedaia fapa Jakoba leh Johana pawhin mak an ti hle bawk a. Tin, Isuan Simona hnênah, “Hlau suh, tûn hnuah zawng mihring i man tawh ang,” a ti a. 11Tin, an lawngte chu vaukamah an dah a, engkim kalsanin amah chu an zui ta a.

Phâr tihdam

(Mt 8.1-4; Mk 1.40-45)

12Tin, heti hi a ni a, khaw pakhata a awm laiin ngai teh, mi pakhat phâr bawm hi a awm a, ani chuan Isua a lo hmu a, lei siin a bawkkhup a, “Lalpa, i duh chuan mi tithianghlim thei e,” a ti a, a ngên chiam a. 13Tin, ani chuan a han ban a, a dek a, “Ka duh e, lo thianghlim tawh ang che,” a ti a. Tin, chawplehchilhin a phâr chu a lo reh ta nghâl a. 14Tin, a hnênah, “Tu mah hrilh suh; amaherawhchu, puithiam va inentîr la, i inthen nân Mosia ruat angin hlân rawh, mite hriattîrna tûrin,” a ti tlat a. 15Nimahsela, a chanchin thu chu a thang lehzual sauh va; mipui tam tak a thu hriat duh leh an nâte tihdam duhin an rawn inkhâwm chiam a.#Lev 14.1-32. 16Nimahsela, ani chu thlalêrahte a kal hrang a, a ṭawngṭai ṭhîn a.

Zeng tihdam

(Mt 9.1-8; Mk 2.1-12)

17Tin, heti hi a ni a, chûng lai chuan ni khat chu a zirtîr a. Tin, a kiangah Pharisaite leh dân zirtîrtute ṭhuin an awm a, chûngte chu Galili leh Judai ram khaw tin aṭang leh Jerusalem khua aṭanga lo chhuak an ni a; tin, mi tihdam nân Lalpa thiltihtheihna chu a hnênah a awm. 18Tin, ngai teh, khum chawpin zeng pakhat an rawn zâwn a; a hmaa dah tûrin zâwn luh an tum a. 19Tin, mipui avâng chuan zâwn luhna rêng an hmu lo va, in chungah an lâwn chho va, in chung aṭangin, a lai takah, Isua hmaah a khum chawpin an puh thlâktîr a. 20Tin, an rinzia chu a lo hmuhin a hnênah chuan, “Mihring, i sualte ngaihdam a ni tawh e,” a ti a.

21Tin, lehkhaziaktute leh Pharisaite chuan, “Pathian sawi chhia hi tu nge maw a nih le? Pathian chauh lo chuan tuin nge sualte ngaidam thei ni?” tiin an ngaihtuah a. 22Chutichuan, Isuan an ngaihtuah chu a hria a, an hnênah chuan, “In thinlungah eng nge in ngaihtuah? 23‘I sualte ngaihdam a ni tawh,’ tih leh, ‘Tho la, kein kal tawh rawh,’ tih hi a eng nge sawi awl zâwk ni? 24Eng pawh ni sela, khawvêlah Mihring Fapa hian sual ngaihdam theihna a nei tih in hriat nân,” a ti a, (zeng hnênah chuan) “Tho la, i khum la la, i inah kal rawh ka ti a che,” a ti a. 25Tichuan, an mit hmuhah a tho ta nghâl a, a mutna chu a la a, Pathian fak chung zêlin a inah a haw ta a. 26Tin, an zain mak an ti hle a, Pathian an fak a, “Vawiinah chuan thilmak tak kan hmu a ni,” an ti a, an hlau êm êm a.

Levia koh thu

(Mt 9.9-13; Mk 2.13-17)

27Tin, chûng zawhah chuan a chhuak a, chhiah chawina hmuna ṭhu, chhiahkhawntu pakhat, a hming Levia a hmu a; tin, a hnênah, “Mi rawn zui rawh,” a ti a. 28Tichuan, engkim a kalsan a, a tho va, a zui ta a.

29Tin, Levia chuan a inah Isua tân ruai ropui tak a ṭheh a; tichuan, chhiahkhawntute leh mi dangte nên, mi tam takin anmahni an kîlpui hlawm a. 30Tin, Pharisaite leh an lehkhaziaktute chu a zirtîrte chungah an phunnawi a, “Engati nge chhiahkhawntute leh mi sualte hnêna in eia, in in le?” an ti a.#Lk 15.1-2. 31Tin, Isuan an hnênah, “Mi hrisêlte chuan dâktawr an ngai lo va, mi bawrhsâwmte zâwkin an ngai a ni. 32Mi fel takte lam tûra lo kal ka ni lo va, mi sualte lama simtîr tûra lo kal ka ni zâwk,” a ti a, a chhâng a.

Chaw nghei chungchâng zawhna

(Mt 9.14-17; Mk 2.18-22)

33Tin, annin a hnênah, “Johana zirtîrten chaw an nghei fo va, an ṭawngṭai ṭhîn; Pharisai zirtîrte pawhin chutiang bawkin an ti ṭhîn; nimahsela, i zirtîrte hian an eiin an in ṭhin,” an ti a. 34Isuan an hnênah, “Mo hruaitute hnêna a pasal tûr chu a awm chhûng zawng, mo hruaitute chu in ngheitîr thei ṭhîn em ni? 35Nimahsela, a pasal tûr chu an hnên ata hruai bo nite a la thleng ang a, chumi nîah erawh chuan an la nghei ang,” a ti a.

36Tin, an hnênah tehkhin thu pawh a sawi a: “Tu mân puan thar pawt thlain puan hluiah an bel ngai lo; bel ang sela, a thar chuan a tiṭet ang a, a thar them leh a hlui chu a inpâwl bawk hek lo vang. 37Tin, tu mân uain thar savun uain peng hluiahte an thun ngai lo, thun ang sela, uain thar chuan savun pengte chu a tâwn puak ang a, a bua ang a, savun pengte pawh chu a lo chhia ang. 38Uain thar chu savun uain peng tharahte an thun zâwk tûr a ni. 39Tin, tu mân uain rei in zawhin a thar an duh ngai lo; ‘A rei a ṭha zâwk,’ an ti si a,” a ti a.

Currently Selected:

LUKA 5: MIZOVBSI

Highlight

Copy