MARKA 1

Baptistu Johana thuhril

(Mt 3.1-12; Lk 3.1-18; Joh 1.19-28)

1Pathian Fapa Isua Krista Chanchin Ṭha thlen ṭan tirhna chu. 2Zâwlnei Isaia lehkhabuah,

“Ngai teh, ka tirhkoh i hmaah

ka tîr a,

Ani chuan i kawng a siam ang.” #Mal 3.1

3“Thlalêra mi au râwl chuan,

‘Lalpa lamlian sial ula,

a kawngte tingîl rawh u,’ a ti,”

tia ziak ang khân, #Is 40.3 4Johana, thlalêra baptistu kha, thil tihsual ngaihdam nân simna baptisma thu hrilin a lo chhuak a. 5Tin, Judai rama mi zawng zawng leh Jerusalem khuaa mi zawng zawngte an chhuak a, a hnên lamah an kal a, an sualte thupha chawiin Jordan luiah chuan a hnênah baptisma an chang ta hlawm a. 6Tin, Johana chu sanghâwngsei hmul puanin a inthuam a, a kâwng chu savun kâwnghrênin a hrêng a, a chaw chu khaukhuap leh ram khawizu a ni. #2 Lal 1.8 7Tin, “Ka hnungah keimah aia ropui zâwk a lo kal mêk a ni; kûna a pheikhawk hrui phelh tlâk pawh ka ni lo ve. 8Kei zawngin tuiin ka baptis ṭhîn che u a; ani erawh chuan Thlarau Thianghlimin a baptis ang che u,” tiin a hril a.

Isua baptisma chan leh thlêmna

(Mt 3.13—4.11; Lk 3.21-22; 4.1-13)

9Tin, chûng nîahte chuan heti hi a lo ni a, Isua chu Galili rama Nazareth khua aṭangin a lo kal a, Jordan luiah chuan Johana hnênah baptisma a chang ta a. 10Chu veleh tui ata a chhuahin, vân inhawnga Thlarau ṭhuro anga a chunga lo chhuk a hmu a. 11Tin, “Nang, ka Fapa duh tak i ni a, i chungah ka lâwm êm êm a ni,” tiin vân aṭangin aw a lo chhuak a. #Gen 22.2; Sam 2.7; Is 42.1; Mt 3.17; 12.18; Mk 9.7; Lk 3.22

12Tin, Thlarau chuan ani chu thlalêrah a tîr chhuak ta nghâl a. 13Tichuan, Setana thlêm chungin thlalêrah chuan ni sawmli a awm a, ramsa zîngahte a awm a; vântirhkohte chuan a rawng an bâwlsak a.

Sangha mantu pali koh thu

(Mt 4.12-22; Lk 4.14-15; 5.1-11)

14Tin, Johana an man hnuin, Isua chu Pathian Chanchin Ṭha hrilin Galili ramah a lo kal a, 15“Hun chu a lo thleng ta a, Pathian ram pawh a lo hnai ta; sim ula, Chanchin Ṭha hi ring rawh u,” a ti zêl a. #Mt 3.2

16Tin, Galili dîl kam chu a hrût laiin, Simona leh Simona unau Andria chu dîlah chuan lên dêngin a hmu a; sangha mantu an ni rêng a. 17Tin, Isuan an hnênah, “Mi zui rawh u; tichuan, mihring mantuah ka siam ang che u,” a ti a. 18Tin, lênte chu kalsanin an zui ta nghâl a.

19Tin, thui lo tê a kalin, Zebedaia fapa Jakoba leh a unau Johana chu a hmu a, chu mite chu lên siam ṭhain lawngah bawk an awm a. 20Tin, ani chuan anni chu a ko ta nghâl a; tichuan, an pa Zebedaia chu inhlawhfa an rawihte hnênah chuan lawngah an kalsan a, an zui ta a.

Ramhuai man mi pakhat tihdam

(Lk 4.31-37)

21Tin, Kapernaum khuaah an va lût a; tin, Chawlhniah chuan inkhâwmna inah a lût a, a zirtîr ta nghâl a. 22A thu zirtîr chu mak an ti hle a; lehkhaziaktute ang lova, thuneihna nei âwm taka anmahni a zirtîr avângin.#Mt 7.28,29.

23Tin, an inkhâwmna inah chuan ramhuai bawlhhlawh pai mi pakhat a lo awm a; 24ani chu, “Nazareth Isu, keini leh nang eng nge kan inzâwlna awm? Min tiboral tûrin i lo kal em ni? Nang ka hria a che, Pathian mi thianghlim i ni e,” tiin a au chhuak ta nghâl a. 25Tin, Isuan a hau va, “Ngawi la, a chhûng ata lo chhuak rawh,” a ti a. 26Tin, ramhuai bawlhhlawh chu amah sawisaa ring taka auvin, a chhûng ata a lo chhuak ta a. 27Tin, an zain mak an ti êm êm a; chutichuan, “Hei hi eng nge ni le? Zirtîrna thar a nih hi le! Ramhuai bawlhhlawhte pawh thunei takin thu a pe a, a thu an âwih zêl hi le,” tiin an inhnial a. 28Tin, Galili ram vêl zawng zawnga ram tinah a chanchin chu a thang ta nghâl a.

Petera pizawn leh mi tam tak tihdam

(Mt 8.14-17; Lk 4.38-41)

29Tin, inkhâwmna in ata chu an chhuahin, Jakoba leh Johana nên Simona leh Andria inah chuan an lût ta nghâl a. 30Tin, Simona nupuia nu chu khawsikin a nâ a, a lo mu a; tichuan, a chanchin chu Isua an hrilh ta nghâl a; 31tin, ani chuan a kut a va chelh a, a kai tho ta a; tichuan, a khawsik chu a reh a, an rawng a bâwlsak ta a.

32Tin, tlai lamah ni a tlâk hnu chuan, damlo zawng zawng leh ramhuai mante a hnênah an rawn hruai a. 33A khuain kawngkhâr bulah chuan an lo awm khâwm ta mup a. 34Tin, mi tam tak nat tinrênga nâte chu a tidam a, ramhuai tam tak a hnawt chhuak bawk a; ramhuaite chuan amah chu an hriat avângin an ṭawng a phal lo.

Isuan Galili ram a fang

(Lk 4.42-44)

35Tin, zîngah khawvâr hma daihin a tho va, a chhuak a, thlalêr hmunah a va kal a, chutah chuan a ṭawngṭai a. 36Tin, Simona leh a ṭhiante chuan an va zawng a; 37tin, ani chu an va hmuh chuan a hnênah, “Mi zawng zawngin an zawng che asin le,” an ti a. 38Tin, ani chuan an hnênah, “Hêng lai vêla khaw dangahte huan i kal ang u, chûngahte pawh chuan thu ka hril theihna tûrin; chu chu ka lo kal chhan a ni si a,” a ti a. 39Tichuan, thu hrila ramhuaite hnawt chhuak zêlin, Galili ram zawng zawnga an inkhâwmna inahte a lût zêl a. #Mt 4.23; 9.35

Phâr tihdam

(Mt 8.1-4; Lk 5.12-16)

40Tin, a hnênah phâr a lo kal a, “I duh chuan mi tithianghlim thei e,” tiin a hmaah ṭhingṭhiin a ngên chiam a. 41Tin, ani chuan a lo khawngaih êm êm a, a han ban a, a dek a, “Ka duh e, lo thianghlim tawh ang che,” a ti a. 42Tichuan, chawplehchilhin a phâr chu a lo reh ta nghâl a, a lo thianghlim ta a. 43,44Tin, Isua chuan, “Tu ma hnêna eng mah sawi lo tûrin fîmkhur ang che; amaherawhchu, puithiam hnênah va inentîr la, i inthen nân Mosian thil a ruatte kha hlân rawh, an hriat fiahna tûrin,” a ti tlat a, a kaltîr ta nghâl a. #Lev 14.1-32 45Nimahsela, ani chu a chhuak a, chu mi chanchin chu nasa taka tlângaupuiin a puang darh ta a; chutichuan, Isua chu a langin khuaah a lût thei ta lo va, thlalêr hmunahte a awm ta zâwk a; tin, hmun tin ata a hnênah an lo kal ṭhîn a.

Currently Selected:

MARKA 1: MIZOVBSI

Highlight

Copy