Luka 22

Mji Ku Pəli Mnya Ata Kəra Yesu

(Mat 26:1-5; Mar 14:1-2; Yah 11:45-53)

1Sakatə sakar Kucalər Buradi Na Kula Yist tə mda ana pəla Kucalər Fəlɓəla Kəi ni abaka hara, 2antə pristayeri na ol'ola kəga maləmayeri ar thlipə tsawur Musa ni, ləkwa bara laku tə ka da tsi Yesu akwa ɗuwari, kamnyar da akwa thlivər mji.

Yahuda Iskariyoti Ku Kələngkər Ka Tsa Ɓəli Yesu

(Mat 26:14-16; Mar 14:10-11)

3Antə Shatan ləkwa ɗəffa Yahuda natə mda ana kəga ni Iskariyoti, pal akwa nca mjirthlipərni na kumnya suɗə ni. 4Antə Yahuda mwari ka gari ka pristayeri na ol'ola ka mji na ol'ola ata kəra mbwar vəngkər aka Hyel ni, ata kəra laku tə tsa ata ɓəli Yesu ala ɗa.

5Apani ɗəffa ɗa ku ndzi msəra ala ɗa, har tə da kələngkər abbər da ata hamta alari kwaba. 6Antə Yahuda ku kələngkər, ka ləkwa bara lakur ɓəli Yesu ala ɗa, ma sakatə mji aɗi hang wa.

Yesu Ku Səm Susəmər Kucalər Fəlɓəla Kəi Kəga Mjirthlipərni

(Mat 26:17-25; Mar 14:12-21; Yah 13:21-30)

7Sakatə vir Buradi Na Kula Yist, vir tə mda ana tsi ɓzər gam kamnyar Kucalər Fəlɓəla Kəi ni ku hara, 8antə Yesu thlentə Bitrəs ka Yahwana, ka pəla ala ɗa, “Mwar giri, ka giri ɗəmha ala mburu vəi tə mburu ata səm susəmər Kucalər Fəlɓəla Kəi ni ata.”

9Antə da yu ni abbər, “Ama antə ga ata bara ka yeru ɗəmhə nə ri?”

10Antə Yesu pəla, “Ma sakatə giri ku ləkwa kuta di, giri ata kəɓa ka mdə laga na ka tughum ka yimi ata kərari. Nu giri ni akwa kəlara kəi tə tsa ku ləkwa, 11ka giri pəla aka mthlakər kəi ni abbər, ‘Maləm pəla akwa mbwar mətəpi madi antə tsa ata səm susəmər Kucalər Fəlɓəla Kəi kəga mjirthlipərni ri?’ 12Antə tsa ata ncanta ala giri, mbwa laga na ola amta namnamari. Anda antə ka giri ɗəmhə shanga su.”

13Antə da ku mwari ka wutə tsu apatə Yesu ku pəla ala ɗa. Antə da ku ɗəmhə susəmər Kucalər Fəlɓəla Kəi ni.

Səm Susəmər Hirdzi Ar Mthlaku

(Mat 26:26-30; Mar 14:22-26; 1 Kor 11:23-25)

14Sakatə saka ni ku hara, antə Yesu ndzəndzi ata vəi səm susəma kəga aposəlayeri arni. 15Antə tsa pəla ala ɗa, “I ku mwaɓə ka duna kəi səm susəma ngəni kəga giri akəmata I a ɗar bwani! 16Kamnyar I akwa pəla ala giri abbər, I aɗi ata jaktə səmari kəra wa, tar ma karapwari ku nghyaɓəladzi akwa kuthlikurər Hyel.”

17Antə Yesu ku kətə kwapə ka usar Hyel ata kər, ka pəla ala ɗa, “Dlu giri ngəni ka giri ndəkəmta akwa nca giri. 18Kamnyar I akwa pəla ala giri, I aɗi ata jaktə sa yimər anap ngəni kəra wa, tar ma kuthlikurər Hyel ku si.”

19Antə tsa kətə buradi, ka usar Hyel ata kər, ka ɓəgəlwa, ka hamta ala ɗa, akwa pəla, “Ngəni an dzi, tə mdə hamta kamnyar giri. Ka giri hara ngəni kamnyar ɗangtə ra.” 20Tsu apani, aghəla susəm ni, antə tsa kətə kwapu, akwa pəla, “Ngəni an kwapər alkawalər na bilən tə mdə hara ka mamshirna, mamshi na pumtadzi kamnyar giri.

21 “Amma nggədza mdə na ata ɓəli ra ni, akwa səm susəma ata vəi duku ka iya! 22Ɓzər Mda ata sə mta tsu apatə Hyel ku thlamta. Amma sha ku wutə mdə na ata ɓəli Ɓzər Mdə ni!”

23Antə mjirthlipərni baɗitə yu nvwa ɗa abbər, wa akwa nca ɗa an ata hara su ngəni ri?

Beɗi Ata Kəra Olkur

24Antə beɗi laga thlata akwa daɓwa ɗa abbər wan tə kalkal ka tsa ndzi olta shang akwa nca ɗa ri? #Mat 18:1; Mar 9:34; Luk 9:46 25Antə Yesu pəla ala ɗa, “Kuthlyayeri na ar mji na aɗi səndə Hyel wa ana nca kuthlikur ata kəra mji na akira ɗa, tsuwa mji na ka kuthlikur ata kəra ɗa ni ana kəga kərɗa abbər, ‘Mjir dlar mji.’ #Mat 20:25-27; Mar 10:42-44 26Amma ar giri aɗiya ndzi apani wa. Ata vəya ndaga ka mdə na ola akwa nca giri ndzi apa tsa an raka ta shang, ka mdə na olər giri ndzi apa tsa an mafar giri. #Mat 23:11; Mar 9:35 27Kamnyar wa an olari ri, mdə na andzəndzi ata vəi səm susəma, nənga mdər mwanta alari susəm nə ri? Ai mdə na andzəndzi akwa vəi səm susəm ni. Amma arna I akwa nca giri apa mdər mwantə susəm ni. #Yah 13:12-15

28 “Kamnyar giri an mji na ku nggitə ka ndzəndzi adzə ra akwa shanga su na wutə ra. 29Antə apatə Təddarna ku hamta ali dunar hara kuthlikur, antə I ata hamta ala giri dunari, 30kamnyar ka giri sə səm ka sa ata vəi duku ka iya akwa kuthlikurərna. Tsuwa giri ata ndzəndzi ata dəkəl kuthlikurayeri, ka hara shariya aka nyarmbwayeri na kumnya suɗa akwa Israila.” #Mat 19:28

Bitrəs Ata Sə Kampikər Səndə Yesu Ka Makər

(Mat 26:31-35; Mar 14:27-31; Yah 13:36-38)

31 “Siman, Siman! Psi thləma ga! Shatan ku bara abbər ka mdə nar laku ka tsa ngkərtə giri shang, ka tsa kərtərɓəla giri apatə mda ana kətərɓəla alkama kazhar binari. 32Amma I ku hara adduwa kamnyar nga, abbər ka hamta jirər nga sə kətə wa. Tsuwa ma sakatə ga ku ngka adzə ra, ka gə dunautə maɗama' nga.”

33Antə Bitrəs pəla aka Yesu, “Mthlaku, I ku ɗəmhədzi kəi nu nga ba akwa pərsəna, wala mwa an ata mta.”

34Antə Yesu pəla, “Bitrəs, I akwa pəla ala ga akwabə fugəm atuwa ashina, ga ata sə kampiku ka makər abbər ga aɗi səndə ra wa.”

Ka Giri Kətə Pirti Ka Thləvu Ka Katsakar

35Antə Yesu pəla aka mjirthlipərni, “Saka tə I thlentə giri kula pirti, kula thləvu, kula ɓaɓi ni, giri ku tur su ya?” #Mat 10:9-10; Mar 6:8-9; Luk 9:3; 10:4

Antə da pəla, “Awa.”

36Antə tsa pəla ala ɗa, “Amma kulini ma mdə na ka thləvur kəs kwaba ka tsa kəta, har ma wala thləvu. Tsuwa ma mdə na aɗi ka katsakar wa, ka tsa ɗələmta ləptərni ka tsa mastə pal. 37Kamnyar I akwa pəla ala giri abbər tar ka kakaɗə na pəla, ‘Da ku jikau ni akwa nca mjir biku,’ ni nghyaɓəladzi ata iya. Kamnyar su tə mdə rəbuta ata kəri ni akwa nghyaɓəladzi.”

38Antə mjirthlipərni pəla, “Mthlaku, nggədza katsakarayeri suɗa.” Antə tsa pəla ala ɗa, “Ku mzhi.”

Yesu Ku Hara Adduwa Ata Gar Zaitun

(Mat 26:36-46; Mar 14:32-42)

39Antə Yesu ku ləɓəla akwa bərni ni ka mwari akwa Gar Zaitun, apatə tsa ana hara hwatu. Antə mjirthlipərni nutə ni. 40Sakatə tsa mzhitə vəi ni, antə tsa pəla ala ɗa, “Ka giri hara adduwa ta giri asə ləkwa ngkərtədzi.”

41Antə tsa ɗar ləkəma kazhar ɗa, tə daɓwa ndzi apa cijukurər ndzəhər pela. Antə tsa zuzuri ka hara adduwa 42abbər, “Tədda, ma ga hira, ka gə kələmta ali kwapər bwani ngəni. Wala apani aɗi abbər ka gə hara su tə I akwa barari ni wa, amma su tə gə hira.” 43Antə mdərthlentərhyel səghəi amtazi ka jakə alari duna. 44Sakatə tsa akwa bwani na mwavər, antə tsa hara adduwa ka duna, tə vəi ufu ku səɓəla ata dzari apa mamshi akwa təgəri ata di.

45Sakatə tsa thlata akwa hara adduwa ni, ka ngka adzə mjirthlipərni, antə tsa wutə ɗa akwa heni, kamnyar ɗəffa ɗa ku ɓzi duna. 46Antə tsa pəla ala ɗa, “Kamnyar mi tə giri akwa heni ri? Thlatə giri ka giri hara adduwa ta giri asə ləkwa ngkərtədzi.”

Mdə Ku Ngkəi Yesu

(Mat 26:47-56; Mar 14:43-50; Yah 18:3-11)

47Sakatə Yesu tsu akwa gari ni, antə dlamar mji laga si. Tsuwa Yahuda na pal akwa nca mjirthlipərni na kumnya suɗə ni, akəma ɗa akwa pwar ɗa. Antə tsa si adzə Yesu kamnyar ka tsa vədzə mnyari aka Yesu. 48Amma Yesu pəla alari, “Yahuda, ka vədza kəsəm mnya aka mda, antə ga ata ɓəli Ɓzər Mdə ya?”

49Sakatə mjirthlipərni na adzə ni ku wutə su ngəni, antə da pəla, “Mthlaku, ka yeru mpa ɗa ka katsakar ya?” 50Təng jiri pal akwa nca ɗa nthlə mafar prist na ol ni kəgari, ka nthləmta thləmari na abwa mazəm.

51Amma Yesu pəla, “Giri aɗiya jaktə wa!” Antə tsa ku tsəkwar thləma na abwa mazəm.

52Antə Yesu pəla aka pristayeri na ol'ola, ka mji na ol'olər sək kəra mbwar vəngkər səli, ka mji damwa na ol'ola, na si kamnyar ngkəi ni ni abbər, “Giri si ka katsakarayeri, kəga zwalayeri kamnyar ngka ra apa dlu I mdər thla laku ya? 53Tədəku viri I adzə giri akwa mbwar vəngkər səli, giri aɗi ngkəi ra wa. Amma ngəni an sakar giri, sakatə kuthlu akwa hara kuthlikur.” #Luk 19:47; 21:37

Bitrəs Ku Kampikər Səndə Yesu

(Mat 26:57-58,69-75; Mar 14:53-54,66-72; Yah 18:12-18,25-27)

54Sakatə da ku ngkəi Yesu, antə da təra ka tsa ka mwantə ni akwa kəyir prist na ola. Bitrəs akwa nu ghəla ɗa ka daɓwa ɗa tauwa. 55Sakatə da ku mbahə u'u ata kutakəi, ka ndzəndzi akwa thlirari, antə Bitrəs ndzəndzi adzə ɗa. 56Sakatə ngkwa laga ku wutə Bitrəs andzəndzi ata mnya u'u ni. Antə ngkwa ni wul ni ɓɗaku, ka pəla, “Mdə ngəni ma tsa ata vəi duku ka Yesu!”

57Amma Bitrəs kampiku ka pəla, “Awa, ngkwargai, I asəndə ni wa!” 58Aghəla nda raka antə mdə damwa wutə Bitrəs ka pəla alari, “Gə ma ga akwa nca ɗa!” Amma Bitrəs pəla, “Mdə ragai, I aɗi akwa wa.”

59Aghəla nda ka awur pal, antə mdə damwa pəla, “Jiri kula nuhum, mdə ngəni ata vəi duku ka Yesu, kamnyar tsa mdər Galili.”

60Amma Bitrəs pəla, “Mdə ragai, I asəndə su tə ga akwa gari ata kər nə wa.” Tsa tsu akwa gari ni təng təkəma fugəm baɗitə tuwa. 61Antə Mthlaku ku shinardzi ka wulhə Bitrəs. Antə Bitrəs ɗangtə su tə Mthlaku pəla alari nda abbər, “Akwabə fugəm atuwa ashina, ga ata sə pəla abbər ga asəndə ra wa ka makər.” 62Antə Bitrəs ku ləɓəla ka tuwa ka duna.

Mji Ku Hara Kyartəkur Aka Yesu Ka Dlaɓu Ni

(Mat 26:67-68; Mar 14:65)

63Antə mji na akwa sək kəra Yesu ni hara kyartəkur alari ka dlaɓu ni. 64Da hartə ncari, ka pəla alari, “Hara naɓikur ja! Wan tsa ngə nə ri?” 65Antə da kəɗar mnya ɗimi alari suayeri ka damwa, akwa nggənggəl ni.

Mji Ku Mwantə Yesu Akəma Majalisa

(Mat 26:59-66; Mar 14:55-64; Yah 18:19-24)

66Sakatə viri ku kuri, antə mji na ol'olər mji, ka pristayeri na ol'ola, ka maləmayeri ar thlipə tsawur Musa, tsaptədzi ata kəma duku. Antə mdə səntə Yesu akəma ɗa. 67Antə da pəla, “Ma ga an Kristi ni, pəla ala yeru.” Antə tsa pəla, “Wala mi pəla ala giri, giri aɗi ata hamta jiri ali wa. 68Tsuwa wala mi yu giri, giri aɗi ata hamta ali amsa wa. 69Amma akəmazi, Ɓzər Mda ata sə ndzəndzi abwa mazəma Hyel na ka duna ta shang.”

70Antə shanga ɗa yu ni abbər, “Antə ngəni gə Ɓzər Hyel ya?” Antə tsa pəla, “Giri ata mzhi pəla, I Ɓzər Hyel.”

71Antə da pəla, “Kamnyar mi tə mburu akwa bara seɗa damwa ri? Mburu ku nggata akwa mnyari surni.”

Currently Selected:

Luka 22: KNB

Highlight

Copy