Luka 23

Mji Ku Səntə Yesu Akəma Bilatus

(Mat 27:1-2,11-14; Mar 15:1-5; Yah 18:28-38)

1Antə shanga ɗa ku thlata ata kəma duku, ka mwantə Yesu akəma Bilatus. 2Antə da baɗitə səntə ndərayeri abbər, “Yeru ngkəi mdə ngəni akwa ndəndatə mjir yeru, akwa pəla yeru aɗiya hamta tsəma aka Kaisar wa. Tsuwa tsa akwa pəla abbər tsa ka kərari an Kristi, kuthli ni.”

3Antə Bilatus yu ni abbər, “Ga an kuthlir mjir Yahudi ni ya?” Antə Yesu pəla alari, “I, apatə ga ku pəla.”

4Antə Bilatus pəla aka pristayeri na ol'ola kəga dlamar mji ni abbər, “I aɗi wutə biku adzə mdə ngəni wa.”

5Amma da ndzangkir akwa pəla, “Tsa akwa thlentə hangkala mji ka surthlipərni akwa shanga Yahudiya, su na baɗita akwa Galili har ka mzhitə vəi ngəni.”

Yesu Akəma Hirudus

6Amma sakatə Bilatus ku nggata apani, antə tsa yu abbər, “Mdə ngəni ni mdər Galili ya?” 7Sakatə tsa nggaɓəla abbər Yesu thlata akwa tsəɗiyir Kuthli Hirudus, antə tsa thlentə ni adzə Hirudus, tsuwa akwa saka nda Hirudus ka kərari surni akwa Urushalima. 8Sakatə Hirudus wutə Yesu, təng ɗəffari ndzi msəra alari ka duna, kamnyar tsa ku kəɗar bara ka tsa wutə ni, kamnyar tsa ku nggatə labar ata kərari. Antə tsa vu ɗəffari abbər ma vir laga tsa ata wutə Yesu ni akwa hara surndata. 9Antə Hirudus yu Yesu ata kəra suayeri hang, amma tsa aɗi hamta alari amsa wa. 10Antə pristayeri na ol'ola ka maləmayeri ar thlipə tsawur Musa thlatə ka ləkwa burkatə ni ka duna. 11Antə Hirudus ka sojayeri arni ku ngga mnyari ka hara kyartəkur alari. Da hadza alari ləptu na ɓɗaku, ka jaktə thlentə ni aka Bilatus. 12Tsu vir nda antə Hirudus ka Bilatus ndzi pazhi, kamnyar hwatu da dawa.

Mji Ku Thlamta Shariyar Mta Ata Kəra Yesu

(Mat 27:15-26; Mar 15:6-15; Yah 18:39—19:16)

13Antə Bilatus tsaptə pristayeri na ol'ola, kəga mjir pwara na ol'ola ka mambila mji, 14ka pəla ala ɗa, “Giri sənta ali mdə ngəni, ka pəla abbər tsa akwa ndəndatə hangkala mji. Antə I yu ni akəma giri, tsuwa I aɗi wutə biku adzə ni ata kəra suayeri tə giri burkatə ni kamnyar nə wa. 15Tsuwa wala Hirudus ma, tsa aɗi wutə biku adzə ni wa, an su na hara tə tsa jaktə thlentə ni ala mburu ni. Su aɗi tə mdə ngəni hara na ata hara ka mdə tsi ni wa. 16Antə apani I ata ɓu ni ka kwandeng daci kəi psi ni ka tsa təra.”#23:16 Kakaɗayeri laga aɗi na ka vəras 17, na pəla, “Kəlara sakar Kucalər Fəlɓəla Kəi Bilatus ana psi ala ɗa mdə pal akwa nca pərsənayeri ni, natə mji ni an carɓəla abbər ka mdə psi ala ɗa.”

18Amma shanga mji ku haptə kuraku ata kəma duku, ka pəla, “Təra giri ka tsa! Ka giri psi ala yeru Barabbas!” 19Mdə hambwa Barabbas akwa pərsəna kamnyar bikər ti bwari akwa kuta di, natə har tə mdə tsi mda akwa ni.

20Kamnyar tə Bilatus akwa bara ka tsa msərantə Yesu, antə tsa jaktə gari ala ɗa ka damwa. 21Amma da ləkəma hara kuraku abbər, “Kukwamta ni! Kukwamta ni!”

22Antə Bilatus jaktə gari ala ɗa na makərkur, ka yu ɗa abbər, “Kamnyar mə ri? Man su tə tsa ɓzamtə ri? I aɗi wutə ɗimikur tə tsa hara na ku mzhi ka mdə tsi ni wa. Antə I ata ɓu ni ka kwandeng kəi psi ni.”

23Amma da ləkəma ka haptə kuraku akwa ndzangkir alari abbər ka mdə kukwamta ni. Antə akwa tsikərari da ku sə səma. 24Antə Bilatus ku thlamta shariya ni apatə da akwa barari. 25Tsa psi ala ɗa mdə tə da bara ni, mdə tə mdə hambwa ni akwa pərsəna kamnyar bikər ti bwari ka tsi mdə ni, ka hamta ala ɗa Yesu ka da hara su tə da hir ka tsa.

Mdə Ku Kukwamta Yesu Ata Udzəm Kadləkadla

(Mat 27:32-44; Mar 15:21-32; Yah 19:17-27)

26Sakatə da akwa təra ka Yesu, antə da ngkəi mdə laga ka thləmari Siman, mdər Sayirin, na thlata akwa mtaku, ka vəngkər alari udzəm kadləkadla ni, ka tsa kəla ka nu Yesu kəgari.

27Antə mji dlama dlama ku nu ni, kəga mwanki na akwa tsa ləlu ka jikatuwa kamnyar ni. 28Amma Yesu ku shinardzi abwar ɗa ka pəla, “Mwankir Urushalima, giri aɗiya tuwa kamnyar na wa, amma ka giri tuwa kamnyar kəra giri kəga maɗa' giri. 29Kamnyar saka akwa si tə mji ata sə pəla,

“ ‘Da ku hara saa mwanki na aɗi ana ya wa,

mwanki na aɗi ɗar ya maɗankyar wa,

mwanki na aɗi ɗar hamnya uwa aka ɓzər wa!’ ”

30 “Sakanda mji ata sə pəla aka garayeri abbər,

“ ‘Ndlangkər girdzi ata kəra yeru!’

Ka pəla ɗəɗəgəlayeri abbər,

‘Ka giri ɗuwar yeru!’ ” #Kəl Yah 6:16

31 “Kamnyar ma har u'u ata tam nfu na tsu miraku ka thlali ka mbamta ni, suari ata ndzi məmi akwa sakatə tsa ku ul ri?”

32Tsuwa mdə ku mwantə mji damwa suɗa na hara ɗimikur, kamnyar ka mdə tsi ɗa ata kəma duku kəga Yesu. 33Sakatə da mzhitə vəi tə mda ana kəga abbər, “Kugwar kər,” antə da kukwamta ni anda, ata vəi duku ka mji na hara ɗimikur ni, pal abwa mazəmari, ka pal abwa matsəkarari. 34Antə Yesu pəla, “Tədda, ka gə yafitə ɗa, kamnyar da aɗi səndə su tə da akwa harari wa.” Antə da ndəkəi ləptayeri arni atar ndzəh kuriya. 35Antə mji ku thləthlatə akwa wul su. Antə mji na ol'ol ni hara kyartəkur alari ka pəla, “Tsa ku mbantə mji laga, to ka tsa mbantə kərni ja, ma tsa an Kristi ar Hyel, Ɓzərni na Carcarari ni!”

36Antə sojayeri ni si tsuwa ka hara kyartəkur alari. Antə da ha alari yimər anap na mumwasu, 37akwa pəla, “Ma ga an kuthlir mjir Yahudi ni, mbantə kər ngə ja!” 38Antə mdə ku rəbutə ndərayeri ngəni amta abwa kərari abbər, “NGƏNI AN KUTHLIR MJIR YAHUDI.”

39Antə pal akwa nca mjir hara ɗimikur tə mdə kukwamta ɗa ata vəi duku ka Yesu ni, mnya ɗimi alari akwa pəla, “Ga aɗi Kristi wa ya? Mbantə kər nga, ka gə mbantə yeru tsu bu!”

40Amma mdə na duku ni mnya alari ka pəla, “Har ar ngə ga aɗi akwa thlivər Hyel wa! Ai ga ku hara saa tə har mdə thlamta ala giri shariya jili duku ka tsa ni! 41Ai ar mwa su tə mdə hara ala mwa ni kalkal, kamnyar mwa akwa dlu watsəɓər ɗimikur tə mwa hara. Amma ar mdə ngəni su aɗi tə tsa ɓzamtə wa.” 42Antə tsa jaktə pəla ala, “Yesu, ka gə sə ɗangtə ra ma sakatə ga ku si akwa kuthlikurər nga.”

43Antə Yesu pəla alari, “Jiri, I akwa pəla ala ga, tsu ashina ga ata ndzi adzə ra akwa vəi ndzəndzi na msəra ar mji na kula biku.”

Mtər Yesu

(Mat 27:45-56; Mar 15:33-41; Yah 19:28-30)

44Apa sakatə pci təpkər, antə kuthlu si ka hartə shanga tsəɗi ni, har ka mwanta aka saka makər. 45Sakatə pci ku zhar mbila, antə lapəli ar mbwar vəngkər səli ni ntaudzi ka bwa suɗa. 46Antə Yesu ku haptə kurakari ka duna ka pəla, “Tədda, akwa tsiya ga, antə I akwa hamta mpikəi!” Sakatə tsa ku pəla ndər ngəni, antə ɗəffari ku ləɓəla.

47Sakatə olər sojayeri ni ku wutə su na hara, antə tsa hu Hyel akwa pəla, “Jiri, mdə ngəni mdə na pwa!”

48Sakatə shanga dlamar mji na tsaptədzi kamnyar wul su, wutə su na hara ni, antə da ku ngka ka ləha akwa tsa kərathla ɗa akwa ɗəffə ɓzəɓza. 49Antə shanga mji na ku səndə Yesu, kəga mwanki na baɗitə nu ni təng ahar Galili ni, ku thləthlatə catta akwa wul suayeri ngəni ni. #Luk 8:2-3

Mji Ku Harəmta Yesu

(Mat 27:57-61; Mar 15:42-47; Yah 19:38-42)

50Akwa saka ndaga mdə laga aɗi ka thləmari Yusuf, pal akwa nca mjir Majalisa. Tsa mdə na pwa tsuwa tsa hir jirkur. 51Wala tə tsa akwa Majalisa ni, tsa aɗi kələngkər aka su tə Majalisa thlamta ni wa, wala su tə ka mdə hara wa. Tsa thlata ahar Arimathliya akwa tsəɗi Yahudiya, tsuwa tsa akwa sək səyir kuthlikur ar Hyel. 52Antə mdə ngəni mwari adzə Bilatus ka kiɗə abbər ka mdə na alari mshiyir Yesu. 53Antə tsa ku kəlghəi ni, ka pərtə ni akwa zhaɓər lilin na ɓɗaku, ka peri ni akwa kul tə mdə ntula ata pirakthlya, natə mda aɗi ɗar har mda akwa wa. 54Mdə hara su ngəni akwa Virər Ɗəmhədzi, mbila raka ka mdə ləkwa Vir Ghərəmtaghəra.

55Sakatə mda akwa təra ka mshiyir Yesu ni, antə mwanki na thlata ahar Galili ni, ku nu ɗa ka ra wutə kul ni, ka laku tə mdə vəi mshiyirni akwa kul ni. 56Antə da jaktə ngka avi, ka ɗəmhə sur shiwura na msəra ka mal kəkəra, kamnyar sə kəkərtə mshiyirni ni kəgari. Akwa Vir Ghərəmtaghəra antə da ghərəmtaghəra tsu apatə Tsawa ku thlamta.

Currently Selected:

Luka 23: KNB

Highlight

Copy