Markus 8

Yesu Ku Ndlantə Mji Dəpu Nfwar Ka Susəma

(Mat 15:32-39)

1Tsu akwa kuta virayeri nda, antə mji jaktə tsaptədzi dlama dlama adzə Yesu. Tsuwa da aɗi ka susəma tə ka da səm wa. Antə Yesu kəgatə mjirthlipərni ka pəla ala ɗa, 2“Mji ngəni akwa hara kətadzə ra, kamnyar ashina vira ɗa makər adzə ra, kula su tə ka da səma. 3Ma I salamtə ɗa ka mi ni ka da ləha, nuhum da asə thləvamtadzi ata laku, kamnyar bwadukwa ɗa thlata akwa vəi na ciju ka si.”

4Antə mjirthlipərni pəla alari, “Ka, akwa mtaku ngəni, ama antə mburu ata mzhi wutə susəma na ata mzhi ndlantə mji ngəni dlama dlama nə ri?”

5Antə Yesu pəla ala ɗa, “Kər buradi yiɗau an akəla giri ri?” Antə da pəla, “Murfa.”

6Antə tsa pəla aka mji na dlama dlama ni ka da ndzəndzi ata di. Antə tsa kətə kər buradi na murfə ni, ka usar Hyel, ka ɓəgəlwa, ka hamta aka mjirthlipərni. Antə mjirthlipərni ndəkəmta aka dlamar mji ni. 7Tsuwa da ka maɗa' kəlfa yiɗauwa. Sakatə tsa usar Hyel ata kəra kəlfayeri ni, ka pəla aka mjirthlipərni ka da ndəkəmta aka mji tsuwa. 8Antə shanga ɗa ku səma ka ndli, antə mjirthlipərni tsaptə na ɓushirəmtadzi, har ka nghyantə thlambəl murfa. 9Tsuwa hangkur mji na səm susəm ni ku mwanta apa mji shili dəpu nfwar. Antə tsa ku salamtə ɗa. 10Aghəla nda təkəma antə tsa ləkwa shar ni ata kəma duku kəga mjirthlipərni, ka mwari akwa tsəɗi Dalmanuthla.

Mji Ku Bara Seɗa Akəla Yesu

(Mat 16:1-4)

11Antə mjir Farisi laga si adzə Yesu, ka baɗitə beɗi kəga tsa. Da akwa bara ka da ngkərtə ni, antə da pəla ka tsa ncanta ala ɗa sur ndatə na ata thlata amtazi. #Mat 12:38; Luk 11:16 12Antə Yesu mpikəmta mpika ka duna, ka pəla, “Kamnyar mi tə mji na akwa zaman ngəni ana bara sur ndatə ri? I akwa pəla ala giri jirkur, seɗa aɗi tə mda ata harari aka mjir zaman ngəni wa!” #Mat 12:39; Luk 11:29

13Antə tsa ku zhar ɗa, ka jaktə ləkwa shar ni, ka təra mwari aɓəla bwanda manda ni.

Yist Ar Mjir Farisi Ka Hirudus

(Mat 16:5-12)

14Akwa saka ngəni mjirthlipərni aɗi ɗangtə si ka buradi wa, təng kər buradi duku daci an akəla ɗa akwa shar ni. 15Antə Yesu tsaktə ɗa abbər, “Ka giri hara hangkal, ka giri ngga ngga yistər mjir Farisi ka ar Hirudus ni.” #Luk 12:1

16Antə da gari akwa daɓwa ɗa abbər, “Sakani kamnyar tə mburu aɗi ka buradi wa ni ya?”

17Amma Yesu ku səndə su tə da akwa pəlari, antə tsa pəla ala ɗa, “Kamnyar mi tə giri akwa gari abbər giri aɗi ka buradi wa nə ri? Ba kulini giri aɗi wulɓəla wala nggaɓəla wa ya? Nənga ɗəffa giri an hara ɓəɓal kamtə ri? 18I ana wuta apa giri ka nca, ka kamnyar mi tə giri aɗi akwa wutə su wa ri? Tsuwa I ana wuta apa giri ka thləm, ka kamnyar mi tə giri aɗi akwa nggatə su wa ri? Tsuwa kamnyar mi tə giri amzhi ɗangtə su wa ri? 19Sakatə I ɓəgəlwa buradi na ntəfu nda aka dəpu ntəfu ni, thlambəl yiɗau tə giri nghyantə ka na ɓushirəmtadzi nə ri?”

Antə da pəla alari, “Kumnya suɗa.”

20 “Tsuwa sakatə I ɓəgəlwa kər buradi murfa aka mji dəpu nfwar ni, thlambəl yiɗau antə giri nghyantə ka na ɓushirəmtadzi nə ri?”

Antə da pəla alari, “Murfa.”

21Antə tsa pəla ala ɗa, “Har ba kulini giri aɗi nggaɓəla wa ya?”

Yesu Ku Mbantə Mdlyang Laga Ahar Bethsaida

22Sakatə da si ahar Bethsaida, antə mji laga səntə mdlyang laga aka Yesu, ka kiɗə ni abbər ka tsa tsəkwar mdə na mdlyang ni. 23Antə Yesu kəsi tsiya mdə na mdlyang ni, ka mwantə ni aɓəla ata hil di, ka tiftə mtili ata nca mdlyang ni, ka vəngkər tsiyari ata kərari, ka yu ni abbər, “Ga ata mzhi wutə su ya?”

24Antə mdə na mdlyang ni haptə ncari amta ka pəla, “I, I akwa wul mji akwa mwa, amma da dludzi ka nfwayeri.”

25Antə Yesu jaktə vəngkər tsiyari aka nca mdə na mdlyang ni, antə mdə ni ɗəmbəla ncari akwa wul su njingnga, antə ncari ngka lapiya apa na hwatu, tə tsa ləkwa wutə shanga su yur. 26Antə Yesu ku salamtə mdə ni ka tsa ngka avi aharngkiɗa, ka pəla alari, “Wala kuta di ni, ga aɗiya ləkwa wa.”

Su Tə Bitrəs Pəla Ata Kəra Yesu

(Mat 16:13-20; Luk 9:18-21)

27Antə Yesu ka mjirthlipərni ku ləkəma ka mwari akwa kauyayeri na kalaktə Kaisariya Fəlippi. Ata laku ni antə Yesu yu mjirthlipərni abbər, “Mji ana pəla I an wa ri?”

28Antə da pəla alari, “Mji laga ana pəla abbər ga an Yahwana na Mdər hara Baptizma, mji laga ana pəla, Iliya, mji laga tsuwa ana pəla, ga an pal akwa nca naɓiyayeri.” #Mar 6:14-15; Luk 9:7-8

29Antə tsa yu da, “Amma ar giri, giri ana pəla I an wa ri?” Antə Bitrəs shinau ka pəla, “Ga an Kristi.” #Yah 6:68-69 30Antə Yesu tsaktə ɗa abbər da aɗiya pəla su ata kərari aka wama wa. 31Antə Yesu baɗitə ngkər ala ɗa abbər dwali ka Ɓzər Mdə ɗar bwaniyir suayeri hang, ka mji na ol'ola, ka pristayeri na ol'ola, ka maləmayeri ar thlipə tsawur Musa, sə nggəlar ni, har ka da tsi ni. Amma aghəla vir makər tsa ata jaktə thlata. 32Tsa pəla gari ngəni ni ata bəbal. Antə Bitrəs ndəkərəmta ni ata tenga ka baɗitə mpa alari ata kəra su ngəni. 33Amma Yesu shinardzi ka wulhə mjirthlipərni, ka mpa aka Bitrəs abbər, “Tərardzi kazhar ra, Shatan ragai! Kamnyar ga akwa dzama apa mda, ga aɗi akwa dzama apa Hyel wa.”

34Antə tsa tsaptə mji dlama dlama adzə ni ata kəma duku kəga mjirthlipərni, ka pəla ala ɗa, “Kəlara mdə na ata bara nu ra, tar ka tsa nggəlar kərni, ka tsa kətə udzəm kadləkadla arni, ka tsa nu ra. #Mat 10:38; Luk 14:27 35Kamnyar kəlara mdə na akwa bara mbantə mpikari, mpikari ata sha. Amma kəlara mdə na akwa shamta mpikari kamnyar na, ka kamnyar labar na msəra, tsa ata mbantə mpikari. #Mat 10:39; Luk 17:33; Yah 12:25 36Kamnyar man ampaniyari ri, ma mda ata ndzi mthlakər shanga duniya ni, amma tsa ata ni ka mpikari? 37Wala tsuwa man tə mda ata mzhi paltari ka mpikari ri? 38Kamnyar kəlara mdə na ata səli kamnyar na, ka kamnyar ndərərna akwa zaman ngəni na ar ləka ka ar biku ni, Ɓzər Mdə tsuwa ata sə səli hara seɗa ata kərari, sakatə tsa ata si akwa səliyir Təddarni kəga mjirthlentərhyel na Ɓɗakkarkara.”

Currently Selected:

Markus 8: KNB

Highlight

Copy