Markus 9
9
1Antə tsa pəla ala ɗa, “I akwa pəla ala giri jirkur, mji laga aɗi athləthlata azi na aɗi ata mtə kambəla wutə kuthlikurər Hyel si ka dunarni wa.”
Palidzər Yesu
(Mat 17:1-13; Luk 9:28-36)
2Aghəla vir ngkwa antə Yesu kətə Bitrəs, ka Yakub, ka Yahwana, ka mwantə ɗa ata kəra gar na nal, tə da ndzəndzi anda shiɗa. Təkəma təng dludzər ni palidzi akəma ɗa,#2 Bit 1:17-18 3tə ləptərni ndzi shalak mwapu akwa mbəlmbəla, natə mda aɗi akwa duniya ni na amzhi kəcimta ləptu ni ka tsa ndzi mwapu apani wa. 4Antə da wutə Iliya, ka Musa akwa gari ka Yesu akəma ɗa. 5Antə Bitrəs pəla aka Yesu, “Maləm, ku hara ɓɗaku tə mburu azi ni. Ndzi ka yeru namtə tentayeri makər, pal kamnyar nga, pal kamnyar Musa, ka palari tsuwa kamnyar Iliya.” 6Bitrəs aɗi səndə su tə ka tsa pəla wa, kamnyar shanga ɗa ngəni makər ni ku thlivəra.
7Təng dlamba laga si ka hartə ɗa akwa ləmbəku. Təng təkəma kuraku laga səɓəla akwa dlamba ni akwa pəla, “Ngəni an Ɓzərna natə I hira. Psi gir thləm alari!” #Mat 3:17; Mar 1:11; Luk 3:22 8Təkəma antə da wuli su, amma da aɗi wutə mdə damwa adzə ɗa wa, təng Yesu shini. 9Sakatə da akwa səghəi ata kəra gar ni, antə Yesu tsaktə ɗa abbər da aɗiya ngkər su tə da wutə ni aka wama wa, tar aghəla sakatə Ɓzər Mdə ku thlata akwa mtəmta.
10Antə mjirthlipərni ni kəsi ndər ni akwa daɓwa ɗa, akwa yu nvwa ɗa abbər, “Man karapur thlata akwa mtəmta nə ri?” 11Antə da yu ni abbər, “Kamnyar mi tə maləmayeri ar thlipə tsawur Musa ana pəla, tar ma Iliya ku si katagu nə ri?” #Mat 11:14
12Antə Yesu pəla ala ɗa, “Jiri tar ka Iliya si katagu, ka tsa namɓəla shanga su. Amma tsuwa kamnyar mi tə mdə rəbutə abbər tar ka Ɓzər Mdə ɗar bwani akwa lakwayeri zumzum hang, ka mji taratə ni nə ri? 13Amma I akwa pəla ala giri abbər Iliya ku kurtə si, tsuwa da ku hara alari shanga su tə da hira, tsu apatə mdə rəbuta akwa kakaɗu ata kərari ni.”
Yesu Ku Mbantə Ɓzər Laga Na Ka Shatan Akwa Dzari
(Mat 17:14-21; Luk 9:37-43a)
14Sakatə Yesu ka mjirthlipərni na makərni ngka adzə mambila mjirthlipərni ni, antə da wutə dlamar mji hang ku kalaktə ɗa, ka maləmayeri ar thlipə tsawur Musa ni akwa beɗi kəga da. 15Sakatə shanga mji ni wutə Yesu, antə da ndatədzi ka duna, tə da hwi mwari adzə ni ka thlawar ni. 16Antə Yesu ku yu mjirthlipərni abbər, “Giri akwa beɗi ata kəra mi kəga da nə ri?”
17Antə mdə laga akwa nca mji ni pəla aka Yesu, “Maləm, I səntə ɓzərna ala ga, kamnyar tsa ka shatan laga akwa dzari na ku dləɓtə mnyari. 18Kəlara sakatə shatan ni ku baɗitə hara bwani alari, tsa ana ngkəi ni ata di, ka muthlafu səɓəla akwa mnyari. Tsuwa tsa ana ɓɗəɓɗə thlirari, ka ulantə dzari. I ku gari aka mjirthlipər nga abbər ka da kədləɓəla shatan ni, amma da aɗi mzhi wa.”
19Antə Yesu pəla ala ɗa, “Giri na mjir zaman ngəni, giri hilhilari, kula hamta jiri. Kəi fəi adzə giri apa madə ri kambəla giri mbərsa ka ndərərna ni? Har ka vədza aka saka madi antə I ata ləkəma ka mbwi ɗəffi ka giri ri? Səntə gir ni ali azi!” 20Antə da səntə alari ɓzər ni. Təkəma tə mambəl ni wutə Yesu, təng tsa tsa ɓzər ni, tə tsa ndla ata di, ka ləkwa takəla, ka muthlafu akwa səɓəla akwa mnyari. 21Antə Yesu ku yu baba' ɓzər ni abbər, “Nawa antə su ngəni baɗita alari ri?”
Antə mdə ni pəla, “Təng tə tsa ɓzəngkyar. 22Su ni ku bara psu ni akwa u'u ka akwa yimi ka hang, ka tsa tsi ni. Amma ma su aɗi tə ga ata mzhi harari, kətadzə yeru usa, ka gə dlar yeru.”
23Antə Yesu pəla alari, “Ma ga amzha! Ai shanga su ana ndzi kasəla aka mdə na ku hamta jiri.”
24Təkəma antə baba' ɓzərni haptə kurakari ka pəla, “I ku hamta jiri, dlar ra kara jaka ali hamta jirərna.”
25Sakatə Yesu wuta abbər mji akwa si ata kəma duku ka hwi kamnyar wul su na akwa hara ni, antə tsa mpa aka shatan ni abbər, “Shatan twangtwangkur ka mnya dləɓdləɓa, I akwa tsawa ala ga, səɓəla akwa dzari, tsuwa ga aɗiya jaktə ləkwa dzari kəra wa.”
26Antə shatan ni hara kuraku, ka kənggərtə ɓzər ni ka duna, kambəla tsa səɓəla. Sakatə shatan ni ku səɓəla təng ɓzər ni ndzi apa mtəmtari, har tə mji hang pəla, “Ai ɓzər ni ku mti.” 27Amma Yesu ku tamtə tsiyari ka thlentə ni ata səlari, antə tsa thlatəmta. 28Sakatə Yesu ləvəi ata kəma duku ka mjirthlipərni, antə da yu ni akwa ɗuwari abbər, “Kamnyar mi tə ar yeru, yeru aɗi ana mzhi kədləɓəla shatan ni wa ri?”
29Antə Yesu pəla ala ɗa, “Jili mambəl ngəni, su aɗi na amzhi kədləɓəla ni wa, tar adduwa daci.”
Yesu Ku Jaktə Pəla Su Ata Kəra Mtərni
(Mat 17:22-23; Luk 9:43-45)
30Antə Yesu ka mjirthlipərni ku zhar vəi na nda ka təramta akwa kuta Galili, amma Yesu aɗi hir ka wama səndə vəi tə tsa akwa wa. 31Kamnyar tsa akwa thlipa aka mjirthlipərni abbər, “Mda ata hamta Ɓzər Mda aka mji, ka da tsi ni. Ma sakatə da ku tsi ni, tsa ata thlata aghəla vir makər.”
32Amma da aɗi nggaɓəla karapur gari ngəni wa, tsuwa da akwa thlivəra yu ni.
Wa An Təramta Ka Olkur Ri?
(Mat 18:1-5; Luk 9:46-48)
33Antə da si ahar Kafarnahum. Sakatə da ləvəi akwa kutakəi ni, antə Yesu yu mjirthlipərni abbər, “Man tə giri akwa beɗi ata kər akwa laku nə ri?”
34Amma da dləɓ səri, kamnyar ata laku ni da beɗi abbər wan olta shang akwa nca ɗa ri? #Luk 22:24 35Antə Yesu ndzəndzi ka kəga mjirthlipərni na kumnya suɗə ni adzə ni, ka pəla ala ɗa, “Ma mdə na akwa bara ka tsa ndzi akəma, tar ka tsa tərghəi kərari ka ndzi aghəli ta shang, ka tsa ndzi buɗar shanga mji tsuwa.” #Mat 20:26-27; 23:11; Mar 10:43-44; Luk 22:26 36Antə tsa kətə ɓzəngkyar laga na raka, ka vu tə tsa thləthlata akwa nca ɗa. Sakatə tsa kətə ni ka fəfahə ni, antə tsa pəla ala ɗa, 37“Kəlara mdə na ku dlu ɓzəngkyar na raka apa ngəni akwa thləmi, tsa ku dlu ra. Tsuwa kəlara mdə na ku dlu ra, aɗi iya antə tsa dlu wa, amma mdə na thlentə ra.” #Mat 10:40; Luk 10:16; Yah 13:20
Kəlara Mdə Na Aɗi Dawar Mburu Wa, Tsa Ar Mburu
(Luk 9:49-50)
38Antə Yahwana pəla aka Yesu, “Maləm, yeru ku wutə mdə laga akwa kədləɓəla shatanayeri akwa thləma ga, antə yeru ngkatə ni. Kamnyar tsa aɗi akwa nu mburu wa.”
39Amma Yesu pəla, “Giri aɗiya ngkatə ni wa, kamnyar mda aɗi na ata hara surndata akwa thləmi antə aghəla nda, ka tsa mzhi pəla suayeri na ɗimi ɗimi ata kəri wa. 40Kamnyar kəlara mdə na aɗi nggəlar mburu wa, tsa ar mburu. #Mat 12:30; Luk 11:23 41Kamnyar jiri, I akwa pəla ala giri, kəlara mdə na ku na ala giri yimər sa, wala an kwapə duku, kamnyar tə giri ar Kristi, jiri tsa ata wutə watsəɓari.” #Mat 10:42
Suayeri Na Ana Ngkərtə Mda Ka Mdə Hara Biku
(Mat 18:6-9; Luk 17:1-2)
42 “Tsuwa kəlara mdə na ata hara ka pal akwa nca maɗankyar ngəni raka raka na ku hamta jiri ali ni, ka tsa hara biku, ata ndzi hərku alari ka mdə mbwatə bur na ola ata wulyari, ka psu ni akwa manda. 43Ma tsiya ga ata vu nga akwa hara biku, nthləmta ni bu! Ai kuji ka gə ləkwa mpikə na akur wa ka tsiya gə duku, ta ga aləkwa kəyir u'u ka tsiya gə suɗa, vəi tə u'urni ana mtə wa ni. #Mat 5:30 #9:43 Bwadukwa kakaɗayeri na waci ka vəras 44 ni na akwa pəla, “Anda kulamnya na akwa ɓɗə ɗa aɗi ana mtə wa, tsuwa u'u na akwa mba ɗa ni, sur mzhi tsiyari aɗi wa.” 45Tsuwa ma səla ga ata vu nga akwa hara biku, nthləmta ni bu. Ai kuji ka gə ləkwa mpikə na akur wa nggurdəkəi, ta mda apsu nga akwa kəyir u'u ka səla gə suɗa.#9:45 Bwadukwa kakaɗayeri na waci tə mdə rəbuta ka tsi ni ka vəras 46, na akwa pəla, “Anda kulamnya na akwa ɓɗə ɗa aɗi ana mtə wa, tsuwa u'u na akwa mba ɗa ni, sur mzhi tsiyari aɗi wa.” 47Tsuwa ma nca ga ata vu nga akwa hara biku, tuhurɓəla ni bu. Ai kuji ka gə ləkwa kuthlikurər Hyel ka nca gə duku, ta mda apsu nga akwa kəyir u'u ka nca gə suɗa.#Mat 5:29 48Akwa vəi tə kulamnyayeri na ana ɓɗəɓɗə mda aɗi ata mtə ba saka madi wa, tsuwa vəi tə u'u aɗi ata mtə wa ba saka madi.
49 “Mda ata sə kəcimta kəlara mda ka u'u, apatə mda ana kəcimta saɗaka mbamba ka una.
50 “Unə msəra. Amma ma msərakur un ni ku mti, apa madi tə vəi unkurərni ni ata jaktə namtədzi ka damwa ri?
“Ka giri ndzi ka msərakur un ni akwa ndzəndziyir giri, ka giri ndzi ka msərakur kəga nvwa giri.” #Mat 5:13; Luk 14:34-35
Currently Selected:
Markus 9: KNB
Highlight
Share
Copy
Want to have your highlights saved across all your devices? Sign up or sign in
KAKAƊU NA ƁƊAKKARKARA © Typeset by the CAP Division of the Bible Society of Nigeria, 2014.
