OŌYƐBƐ̄CƐ 11
11
Umósīsi le ikwū kú aɔ́kplá kú Íjīpiti ka tɛ́ɛcɛ
1Anɔ́ɔ Óndú ā da Umósīsi kahíníī, “N géē yá Uféro mɛ́mla ācɛ ɔlɛ́ nū italā éyi kpɔ́. Igbīhi ɛ̄nyā, cɛ́ɛ́ ó mā aá tá kú aá nyɔ̄. Á kú ɔ̄kwɔ̄ɔ̄kwɛ̄yi ā, anú abɔ̄yī nū gáā nū aá bɛ̄ɛ̄cɛ ŋmá amānyā á. 2Le da ācɛ kú Ísrɛ̄lu ka ɔnyɔɔnyɛ kú uwā kóō lɛ aɔ́dā ō bī yíifa kú oje nɛ̄hɛ́ mɛ́mla ákú ugóolu (oje ɔdɔ) ba ŋmá ɛgiyí oladógbe kú nū, ācɛnyā í ba ŋmá ɛgiyi ācɛnyā ɔ́mpa uwā.” 3Óndú kwú ācɛ kú Ísrɛ̄lu ú téeyī olɔhi kú ācɛ kú Íjīpiti ā. Ofíyɛ́ dúú ā, aígabɔ̄ mɛ́mla odúúdú ācɛ je Umósīsi ka ɔ́ɔ wɛ ɔ̄cɛ nɛ̄hi.
4Umósīsi da ɔcɛ́ ā kahíníī, “Óndú ā kahíníī, ‘Ahāpōtú n géē yɛ bū ipú Íjīpiti 5anɔ́ɔ ɔdúúdú ayínɔ̄nyīlɔ aflɛ́yí kú ācɛ kú Íjīpiti dóódu nēe bá ajɛ kú Íjīpiti ā géē kwú. O ŋmá ɔyínɔ̄nyīlɔ aflɛ́yí kú ɔcɛ́ ā nōo gáā lúgwū ɔcɛ́ kú ádā nū ā, jāā gaá kwu ɔyínɔ̄nyīlɔ kú ɔfiyɛ nōo gē gbā īkpɔ̄dā ā. Ayí aflɛ́yí nɛ̄ aɛ́na ma ā géē pɛ́ kwú dúú. 6Ācɛ géē yɔ̄ ī jikwú gbōmgbōm ɛga dóódu kú ajɛ kú Íjīpiti, nɛ̄ ɛdɔ nū í yɔ̄ jééjéē ɛ́ɛ́ ŋ́, nɛ̄ ɛdɔ nū í klla gáā yɔ̄ igbɔhá ɛ́ɛ́ gɛ ŋ́. 7Amáŋ, ɛga nɛ̄ ayí kú Ísrɛ̄lu bá ā, ewō í kōō gaá fu ɔ̄cɛ Ísrɛ̄lu ámāŋ ka aɛ́bɛ́ dúúma kú uwā ɔnū ŋ́. Abɔ́ɔ ā, aá géē jé ka ami Óndú ā le ācɛ kú Ísrɛ̄lu fō ɛyɛ́ɛ́yí hī ācɛ kú Íjīpiti ā tá’” 8Umósīsi le ɛlā kú nū ŋmɛ́yí o ŋmá ɛlā nɛ̄ ó ka kahíníī, “Odúúdú aígabɔ̄ kú uwɔ ā géē wā ɛgiyí um, klla í gbɔ̄kɔ gā um klla í da um ka um lɛ ācɛ ɔlɛ́ um kpó kú ālɔ̄ lɛ pɛ́ nyɛ̄ɛ̄.” Igbīhi ɛlā ā, Umósīsi le cɔ̄nū nɛ̄hi, anɔ́ɔ ó nyɛ̄ɛ̄ ŋmá ɛgiyí ɔcɛ́ á.
9Anɔ́ɔ Óndú ā da Umósīsi kahíníī, “Uféro í gáā jāhɔ̄ lɛ aá ŋ́, cɛ́ɛ́ kú úklɔ́ ōhídáagó kú um ā kóō le nyīla ajɛ kú Íjīpiti.”
10Umósīsi mɛ́mla Árɔ̄ni lɛ odúúdú ɔdā ōhídáagó nēe bá nyā kpó yá ipéyī Uféro, amáŋ Óndú ā le ɔtū kú Uféro yá lɔfú kpɔ́, anɔ́ɔ ó cɛ̄ lɛ ācɛ kú Ísrɛ̄lu bɛ̄cɛ ŋmá ajɛ ā ŋ́ kpɔ́.
Currently Selected:
OŌYƐBƐ̄CƐ 11: IFBCL
Highlight
Share
Copy
Want to have your highlights saved across all your devices? Sign up or sign in
