OŌYƐBƐ̄CƐ 12

Onyatá

1 # Ulīf 23.5; Áluk 9.1-5; 28.16; Obla 16.1,2 Óndú ā kɛlā lɛ Umósīsi mɛ́mla Árɔ̄ni ajɛ kú Íjīpiti kahíníī, 2“Ɔyā nyā géē wɛ ɔyā aflɛ́yí kú ohútu kú iháyí lɛ aá. 3Aá nyɔ̄ gaá ī ka lɛ odúúdú ójila kú Ísrɛ̄lu ka, ɛ̄cī igwó kú ɔyā nyā ā, ɔ̄cɛ éyééye géē bī ɔyí álá éyi ámāŋ ka ɔyí ɛwū éyi kwɛyí ipɔ́ɔnū kú ɔlɛ́ nū. 4Ɔ́dāŋ́ ka ipɔ́ɔnū dúú le nyɛ́ nē é je ɔyí álá éyi lé ōfōōfū ūwā glá ŋ́, anú mɛ́mla oladógbe kú nū géē báana tū ɔyí álá éyi, ɛ́gɛ́nɛ̄ áluka kú ācɛ ā lɛ ā, mɛ́mla ɛ́gɛ́nɛ̄ ācɛ ā géē lé glá ā. 5Álá kú uwā ā í gáā lɛ ɛnyá dúúmā ŋ́. Ó í wɛ iháyí éyi, aá géē je álá amáŋ opī kú iháyí éyi ā ŋmá ipú aɔ́dājɛ kú aá glá. 6Aá géē leyīkwu ɔɔ́ lɔɔlɔhi jāā gbó ɛ̄cī igwɛ́ɛnɛ kú ɔyā ā, eko nɛ̄ odúúdú ójila kú Ísrɛ̄lu géē ŋmó álá kú uwā ɔnɔ̄ɔ̄nɛ̄ ā. 7Ācɛ ā géē je oyī kú ɛbɛ́ ā nya ɔcí odūngwɔ̄wɛ ɛpɛlɛ́ɛpa ā mɛ́mla ɛhícō kú Okómpinu ɔwɛ kú inu nēé lé ɛbɛ́ ā. 8É géē pá ɛbɛ́ ā otú ɔ́ɔmā klla í je ɔ́ lé mla ēpū ohɔ́ɔnɔ mla igbō nɛ̄ ó gē nū ŋ́. 9Aá híī lé ɛga dóódu kú ɛbɛ́ ā ɛ̄mɛ̄ɛ̄mɛ̄ ŋ́, ɛ́ɛ́ nɛ̄ aá kōō he ɔ́ ɔlá ŋ́. A lɛ ɔ́ pá, kwú īkpɛ̄yí mɛ́mla iklíkpó mɛ́mla iyípú ā. 10Aá cɛ̄ lɛ odóódu kú nū hile gbɔ́ɔ́cī ŋ́, odóódu kú nū nōo hile gbɔ́ɔ́cī ā, aá lɛ ɔ́ kpó tū ipú ɔlá. 11Ɔwɛ nɛ̄ aá géē lé ɛbɛ́ ā yɔ̄ á, aá lɛ ɛ́nyɔ́ kú aá gbō, lɛ áblákpá kú aá kpó wu ikpó, kwú okwutɛ kú aá ú bī abɔ̄, aá géē lé ɛbɛ́ ā ipú ínwúleyī kwū. Ó wɛ Ucɛ kú eko nɛ̄ Óndú ā hɛ́ ācɛ ɔlɛ́ nū tá,”

12Otú ɔ́ɔmā, n géē yɛ odúúdú ajɛ kú Íjīpiti ā, géē ŋmó ayí nɔ̄nyīlɔ aflɛ́yí kú ācɛ ā mɛ́mla ákú aɛ́bɛ́, klla í yá aɔ́wɔ kú Íjīpiti ā italā. Ami wɛ Óndú á. 13Oyī nōo bá okómpinu ā géē wɛ ɔdōcābɔ̄ nōo géē mafú ɔlɛ́ nɛ̄ aá bá ā. Eko nɛ̄ n lɛ oyī ā má, n géē hɛ́gla aá, ɔdā dúúmā í gáā yá aá, eko nɛ̄ n géē ŋmó ācɛ mɛ́mla ɛbɛ́ kú ācɛ Íjīpiti ā ŋ́.

14 # Oyɛb 23.15; 34.18; Ulīf 23.6-8; Áluk 28.17-25; Obla 16.3-8 Aá géē lɛ ɛ̄cī kú ojīlīmā ō ce um nyā tū kóō blatū aá kú ɔdā nɛ̄ n yá ā. Aá géē lé ucɛ nyā ŋmá iháyí ga iháyí, ŋmá ayááyí ga ayááyí, piyóó ipú ɛcɛ.”

Ucɛ kú igbō nōó ī nū ŋ́ mā

15Aá géē lé igbō nōó gē nū ŋ́ mā ɛ̄cī ahāapa. Ɛ̄cī aflɛ́yí ā, aá géē kpó ɔdōnīgbō dóódu ŋmá ɔlɛ́ aá. Ohígbū ka ɔ̄cɛ dóódu nōo lɛ igbō nēé le ɔdōnīgbō tū ɔ̄ ā lé, é gáā je ɔ́ koó wɛ éyi kú ācɛ ɔlɛ́ um gɛ ŋ́. 16Ɛ̄cī aflɛ́yí mla ɛ̄cī ɔ́mahāapa ā, aá géē jīla kú aá gbā um ɛ̄gbā. Aá gáā yúklɔ́ dúúmā ɛ̄cī ɔ́ɔmā ŋ́. Ɔdā nɛ̄ aá géē lé ā ōfōōfūnū ā nɛ̄ aá géē yá á. 17Anɔ́ɔ aá géē lɛ ucɛ kú igbō nōó gē nū ŋ́ mā tū ohígbū ka ɛ̄cī nyā nɛ̄ n kpó ɛwa kú aá bɛ̄cɛ ŋmá ajɛ kú Íjīpiti á. Ohígbū ɔ́ɔmā, aá géē lɛ ɛ̄cī nyā tū kóō o wɛ eko kú uce o ŋmá ayááyí ga ayááyí ga eko nɛ̄ ó lɛ oōmɛ ŋ́. 18O gbɔɔ́ ŋmá ɔnɔ̄ɔ̄nɛ̄ kú ɛ̄cī ɔ́migwɛ́ɛnɛ kú ɔyā aflɛ́yí ā, aá gáā lé igbō nōó gē nū ŋ́, jāā gbó ɔnɔ̄ɔ̄nɛ̄ kú ɛ̄cī ofu cɛ éyi kú ɔyā ɔ́ɔmā. 19Ɛ̄cī ahāapa ɔ́ɔmā, ɔdōnīgbō dóódu kóō híī yɔ̄ ɔlɛ́ aá ŋ́. Ɔ́dāŋ́ ka ɔ̄cɛ dúúmā, ɔyí ajɛ ámāŋ ugbɔga lɛ igbō nēé le ɔdōnīgbō tū ɔ̄ ā lé, ó gáā wɛ éyi kú ācɛ ɔlɛ́ um, Ísrɛ̄lu ɛ́ɛ́ gɛ ŋ́. 20Ɔdā dóódu nēé le ɔdōnīgbō tū ɔ̄ aá gáā lé ŋ́. Ɛga dóódu nɛ̄ aá lā ā, aá gáā lé igbō nēé le ɔdōnīgbō tū ɔ̄ ā ŋ́.

Umósīsi tū ācɛ ā ukɔ́

21Umósīsi le odúúdú anyākwɔ́cɛ kú Ísrɛ̄lu ā hīgwú ŋmá ipɔ́ɔnū dóódu ká, “Ɔnyɔɔnyɛ kú aá kóō kwú ɔyí álá amáŋ opī kú iháyí éyi ú cɛ́ɛ́ kóō lɛ ɔ́ ŋmó, o yá ɛ́ɛ́ ká aá mla ipɔ́ɔnū kú aá ká aá lé ucɛ kú Onyatá ā. 22Aá kwú isosō ú, ká aá lɛ ɔ́ wu oyí nōo yɔ̄ ocíbú ā, cɛ́ɛ́ kú aá lɛ nya ɔcí kú odūngwɔ̄wɛ mɛ́mla ɔcí kú ikpɛ̄yí okómpíinu kú inu kú ɔlɛ́ aá. Ɔ̄cɛ dúúmā kú aá í gáā bɛ̄cɛ ŋmá ɔlɛ́ ā ŋ́ jāā gbó oŋmɔ́ci nū. 23#Uhíb 11.28Ohígbū ka eko nɛ̄ Óndú ā géē yɛ bū Íjīpiti ipú kóō ŋmó ācɛ kú Íjīpiti ā, ó géē má oyī nōo bá aɔ́cí kú odūngwɔ̄wɛ mɛ́mla ɔcí ō bá ɛhícō kú okómpíinu ā, cɛ́ɛ́ ó gáā cɛ̄ Alelékwū ō ŋmɔ́ɔ́cɛ ā bēhé ga ipú inu ɔlɛ́ aá gaá ŋmó aá ŋ́. 24Aá mɛ́mla ayípɛ̄ ɔlɛ́ aá géē lɛ íne nyā tū piyóó ipú ɛcɛ. 25Eko nɛ̄ aá gaajɛ nɛ̄ Óndú ā géē je lɛ aá, ɛ́gɛ́nɛ̄ ó cokónu lɛ aá ā. Aá géē yɔ̄ ī lé ucɛ kú onyatá nyā piyóó kóō wɛ oblatū. 26Eko nɛ̄ ayí aá lɛ ɔ̄kā da aá ka, ɔdí wɛ ɛyí kú ucɛ nyā a?” 27Aá géē da uwá kahíníī, “Alɔ bá ī ŋmó ɛbɛ́ kú ɛ̄cī onyatá nyā o yá kú ālɔ̄ lɛ ojīlīmā ce Óndú ā, ohígbū ka ó le hɛ́gla ɔlɛ́ kú ācɛ Ísrɛ̄lu ipú ajɛ kú Íjīpiti. Anɔ́ɔ ó le ācɛ kú Íjīpiti kpó ŋmó, amáŋ ó habɔ̄ alɔ tá.” Ācɛ kú Ísrɛ̄lu le okwúukwu kwu ajɛ anɔ́ɔ é le ɛ̄gbā gbā Ɔwɔicō á. 28Anɔ́ɔ ācɛ kú Ísrɛ̄lu ā nyɛ̄ɛ̄ gáā le ɔdā nɛ̄ Óndú ā da Umósīsi mɛ́mla Árɔ̄ni ā yá á.

Ikwū kú ayí aflɛ́yí kú ācɛ kú Íjīpiti

29 # Oyɛb 4.22,23 Ahāpōtú ā, Óndú ā le odúúdú aɔ́kplá kú ācɛ kú Íjīpiti kpó ŋmó. O gbɔɔ́ ŋmá ɔyí kú Uféro nōo gáā lúgwū akpa kú ɔcɛ́ kú nū ā, jāā ga ayí kú alagbá nōo yɔ̄ ipú agbá ā, kwú odúúdú ayí aflɛ́yí kú ɛbɛ́ ɔlɛ́ kú uwā. 30Otú ɔ́ɔmā Uféro mɛ́mla aígabɔ̄ kú ɔlɛ́ nū mɛ́mla odúúdú ācɛ kú Íjīpiti ā le kpó héyī. É bá gē jikwū nɛ̄hi ɛga dóódu kú ajɛ kú Íjīpiti, ohígbū ka ɔlɛ́ dúúmā í yɔ̄ nɛ̄ okwū kú ɔyí aflɛ́yí í tá anú ŋ́ nɛɛ ŋ́. 31Otóótú ɔ́ɔmā, Uféro le Umósīsi mɛ́mla Árɔ̄ni hīgwú, anɔ́ɔ ó da uwá kahíníī, “Aá le bɛ̄cɛ, aá mɛ́mla odúúdú ācɛ kú Ísrɛ̄lu ā, kú aá nyɛ̄ɛ̄ ŋmá ajɛ kú ɔlɛ́ um, kú aá nyɔ̄ gáā gbɔ̄ɔkɔ lɛ Óndú ā, ɛ́gɛ́nɛ̄ aá ka ā. 32Aá lɛ aálá, aɛ́wū, mɛ́mla aɛ́na kú aá kpó kú aá nyɛ̄ɛ̄. Kú aá lɛ ɔkɔ gbā klla lɛ ɔhā hɛ́ ce um dúú.”

33Ācɛ kú Íjīpiti ā nmúleyīkwū tū ācɛ kú Ísrɛ̄lu kéē nyɛ̄ɛ̄ ŋmá ɔlɛ́ uwā fíya. É kahíníī, “Odúúdú alɔ géē pɛ́ kwú ɔ́dāŋ ka aá pɛ́ nyɛ̄ɛ̄ ŋ́.” 34Anɔ́ɔ ācɛ a le ámú kú igbō nōó gē nū ŋ́ mā, kpó tū ipú ógo oyígbō, kwú īlī ú kpó gbō uwā. Anɔ́ɔ é kwú uwā ú kpó ce ɔkɔ á. 35#Oyɛb 3.21,22Ācɛ kú Ísrɛ̄lu ā le yá ɛ́gɛ́nɛ̄ Umósīsi ka lɛ uwá ā. É le aɔ́dā o bī yíifa kú oje nɛ̄hɛ́ mɛ́mla ugóolu (oje ɔdɔ) mɛ́mla oje udɔ mɛ́mla īlī kpó ba ŋmá ɛgiyí ācɛ kú Íjīpiti. 36Óndú ā cɛ̄ lɛ ācɛ kú Íjīpiti ā lɛ ojīlīmā ce ācɛ kú Ísrɛ̄lu, anɔ́ɔ ɔdā dóódu nēé ba ŋmá ɛgiyí ācɛ Íjīpiti ā, é le kpó lɛ uwá. Ɔwɛ nyā nɛ̄ ācɛ kú Ísrɛ̄lu le kpó agbénú kú ācɛ kú Íjīpiti nyɔ̄ á.

Ācɛ kú Ísrɛ̄lu nyɛ̄ɛ̄ ŋmá Íjīpiti

37Ācɛ kú Ísrɛ̄lu gbo iyāwu ikpó kú uwā ŋmá Urámɛ̄sis lɛyíkwu Usúkɔ̄tu. É lɛbɛ̄ɛka ācɛ (600,000), ācɛnyā mɛ́mla ayípɛ̄ í kwu uwá ɛɛ́ ŋ́. 38Ɛwa nɛ̄hi kú ācɛ ɔhá mɛ́mla aálá, aɛ́wū mɛ́mla aɛ́na nyɔ̄ mla uwá dúú. 39Anɔ́ɔ é le igbō nōó gē nū ŋ́ mā yá ŋmá umu, nēé bī ŋmá Íjīpiti ā, ohígbū keé nū uwā ŋmá Íjīpiti acígilí, é je ɛga lɛ uwá kéē yá ɔdōlé dúúmā ŋ́. 40#Ohút 15.13; Ugal 3.17Ācɛ kú Ísrɛ̄lu lā Íjīpiti iháyí úlā ce ofu cigwó (430). 41Ɛ̄cī nɛ̄ iháyí úlā ce ofu cigwó ɔ́ɔmā ā le yá jīla ā, odúúdú aípɔ́ɔma kú Óndú ā nyɛ̄ɛ̄ ŋmá Íjīpiti. 42Otú ɔ́ɔmā wɛ otú nɛ̄ Óndú ā leyīkwɛcɛ gɛɛ kóō lɛ ācɛ Ísrɛ̄lu kpó bɛ̄cɛ ŋmá ajɛ kú Íjīpiti. É géē leyīkwɛcɛ otū gbɔ́ɔ̄cī iháyí dóódu, kóō kwú pīya uculo kú oblatu kú ojīlīmā ō ce Óndú ā ohígbū ɔdā nōó yá ɔ́ɔma, o ŋmá ipɔ́ɔma éyi ga ipɔ́ɔma ɔhá.

Íne kú ucɛ kú onyatá

43Anɔ́ɔ Óndú ā da Umósīsi mɛ́mla Árɔ̄ni kahíníī, “Ɛ̄nyā wɛ íne kú ucɛ kú Onyatá á. Ugbɔga dóódu í gáā wɛ ipú uculo kú ucɛ kú Onyatá nyā ŋ́. 44Amáŋ, ɔfiyɛ dóódu nɛ̄ aá lá mla ije ā, géē lé eko nɛ̄ aá lɛ ɔ́ apī hɛ́. 45Ugbɔga, amáŋ ɔ̄cɛ o yúklɔ́ ɔ́gwū dóódu nōo yɔ̄ ɔlɛ́ aá í gáā lé ŋ́. 46#Áluk 9.12; Ujɔ́n 19.36É géē lé odúúdú ucɛ ā ipú inu nēé yá ɔdōlé āa. Ɔ̄cɛ dúú kóō bī ɔdōlé ā wɛ̄ɛcɛ ŋ́. Aá gáā ca ikpokwú dóódu kú ɛbɛ́ ā ŋ́. 47Odúúdú éwo kú Ísrɛ̄lu ā géē lé ucɛ nyā a. 48Amáŋ, ɔ̄cɛ dóódu nɛ̄ ó hɛ́ apī ɛ́ɛ́ ŋ́, í gáā lé ŋ́. Ɔ́dáŋ ka éwɔhá lā ipú aá, nōo dɔɔ̄kā kóō lé ucɛ nyā mla aá. Aá géē hɛ́ odúúdú ācɛnyīlɔ nēe bá ɔlɛ́ nū ā apī. Cɛ́ɛ́ é géē je ɔ́ bɛ̄ɛka ɔyí-ápī kú Ísrɛ̄lu ā, cɛ́ɛ́ ó lɔfú lé ucɛ ā mla aá. 49Íne ékpónú nyā yɔ̄ lɛ ayí-apī kú Ísrɛ̄lu mɛ́mla éwɔhá nēe lā ipú aá ā á. 50Odúúdú ācɛ kú Ísrɛ̄lu lɛyítájɛ lɛ ɔdā nɛ̄ Óndú ā da Umósīsi mɛ́mla Árɔ̄ni ā klla le uwa kpó yá jīla. 51Ɛ̄cī ɔ́ɔmā ā, Óndú ā lɛ ayí kú Ísrɛ̄lu kpó bɛ̄cɛ ŋmá ajɛ kú Íjīpiti.

Currently Selected:

OŌYƐBƐ̄CƐ 12: IFBCL

Highlight

Copy