OŌYƐBƐ̄CƐ 17

Éŋkpɔ̄ nōo ŋmá ipú ápátɛ́cɔ̄ ā

1 # Áluk 20.2-13 Odúúdú ójila kú ācɛ Ísrɛ̄lu ā nyɛ̄ɛ̄ ŋmá ígbíli kú Ínoobīya. Anɔ́ɔ é yɔ̄ gē yɛ ŋmá ɛga éyi ga ɛga ɔhá ɛ́gɛ́nɛ̄ Óndú ā gē je ɔ́da lɛ uwá lɛ ā. É gaá lɛ áklɔ̄kpɛ cē ci Urefidím, amáŋ éŋkpɔ̄ í yɔ̄ abɔ́ɔ nɛ̄ ācɛ ā gé gwá ŋ́.

2Ohígbū ɔ́ɔmā ā, ācɛ ā gbɔɔ́ ka iŋini tá Umósīsi, anɔ́ɔ é da ɔ́ kahíníī, “Je éŋkpɔ̄ lɛ alɔ kú ālɔ̄ gwá.” Anɔ́ɔ Umósīsi da uwá kahíníī, “Ɔdíyá nāa géē ka iŋini tá um ā? Ɔdíyá nɛ̄ aá gē jé Óndú ā má ā?”

3Amáŋ, ijēēnyi yɔ̄ ī ŋmó ācɛ ā, anɔ́ɔ é ba gē ka iŋini tá Umósīsi kpɔ́ á. É kahíníī, “Ɔdíyā nāa kpó alɔ bɛ̄cɛ ŋmá Íjīpiti ā? Ká ā gaá kpó alɔ mɛ́mla ayí alɔ mɛ́mla anyā alɔ mɛ́mla aɛ́na mɛ́mla aálá bá kú ijēēnyi kóō kpó alɔ ŋmó nɛɛ?”

4Anɔ́ɔ Umósīsi le ikwū je klá Óndú ā da ɔ́ kahíníī, “Ɔdí nɛ̄ n géē yá mla ācɛ nēe bá nyā ā? É le tútū kéē tá ɛcɔ̄ klá um ɛɛ́.”

5Óndú ā da Umósīsi kahíníī, “Le anyākwɔ́cɛ kú ācɛ ā ōhī kpó ká a nyɔ̄ iyɔ̄bū kú ācɛ ā, kwú okwutɛ kú uwɔ nāa miya kwu ísu kú Unáyilu ā ú. 6N géē háyi iyɔ̄bū uwɔ, ɛyí ápátɛ́cɔ̄ kú ɛfu kú Uhɔ́rɛ̄bu ā. A géē lɛ okwutɛ ā fīyɛ̄ ápátɛ́cɔ̄ ā, éŋkpɔ̄ géē bɛ̄cɛ ŋmá anú lɛ ācɛ ā kéē gwá.” Umósīsi le ɔdā nɛ̄ Óndú ā ka ā yá ipéyī anyākwɔ́cɛ kú ācɛ Ísrɛ̄lu ā.

7É kwú iyé í ce abɔ́ɔ ka Umása mɛ́mla Umɛ́rība, #17.7 Umása...Umɛ́rība. ɛyí kú iyē nyā okónu ācɛ Uhíbru wɛ “ojámá” mɛ́mla “iŋini ō ka.” ohígbū ka ācɛ kú Ísrɛ̄lu ka iŋini klla jé Óndú ā má eko nēé dɔɔ̄ka ka ka, “Óndú ā yɔ̄ mla alɔ kɛ̄ɛ, ka ó yɔ̄ mla alɔ ŋ́?”

Ɛfú nēé kpó mla ācɛ Ámālɛ̄ki

8Ācɛ Ámālɛ̄ki wā gáā le ɛfú kpó tú uwá Urefidím. 9Anɔ́ɔ Umósīsi da Ujóssuwa kahíníī, “Le ācɛnyīlɔ ōhī fu lɛ alɔ, kéē nyɔ̄ gáā nuunu mla ācɛ Ámālɛ̄ki óócí. N géē háyi ɛyí ɛfu kú Óndú ā lɛ okwutɛ ā bī abɔ̄ kú um. 10Anɔ́ɔ Ujóssuwa le yá ɛ́gɛ́nɛ̄ Umósīsi da ɔ́ ā. Anɔ́ɔ ó le bɛ̄ɛcɛ kóō kpɛ́fú tá ācɛ Ámālɛ̄ki á. Anɔ́ɔ Umósīsi mɛ́mla Árɔ̄ni mɛ́mla Uhɔ́ɔ le yɛ tá ɛyí ɛfu ā. 11Eko dúúmā nɛ̄ Umósīsi bī abɔ̄ kú nū kwiicō, ācɛ kú Ísrɛ̄lu gē yálé, eko dúúmā nɛ̄ ó kwu abɔ̄ ú wāajɛ, ācɛ Ámālɛ̄ki gbɔɔ́ ō yálé. 12Amáŋ abɔ̄ kú Umósīsi gbɔɔ́ ō gbogwú, anɔ́ɔ Árɔ̄ni mɛ́mla Uhɔ́ɔ lɛ ɛcɔ̄ bī gé lɛ ɔ́, anɔ́ɔ ó má cīce ɛyí nū á. Anɔ́ɔ é bī ɔ̄ abɔ̄ kwiicō, ɔ̄cɛ éyi bī abɔ̄ éyi, ɔ̄cɛ ɔhá bī abɔ̄ ɔhá. Anɔ́ɔ abɔ̄ kú nū kwiicō jāā gbó ɛnɔ ogajɛ á. 13Ujóssuwa bī ɔkpacańgelī le ācɛ Ámālɛ̄ki kpó wúlatāajɛ.

14 # Obla 25.17-19; 1 Usám 15.2-9 Anɔ́ɔ Óndú ā da Umósīsi ka “Lɛ ɛ́gɛ́nɛ̄ aá yá ācɛ ā lé ā tá táajɛ, cɛ́ɛ́ kéē géē blakwu ɔ́. Le ka lɛ Ujóssuwa kahíníī, “N géē je ācɛ kú Ámālɛ̄ki yíífi ŋmá ajɛ nɛ̄ ɔ̄cɛ dúúmā kú ipú ɛcɛ nyā í gáā blakwu uwá ɛ́ɛ́ gɛ ŋ́.” 15Umósīsi lɛ ede gwó abɔ́ɔ, anɔ́ɔ ó kwú iyē í ce abɔ́ɔ ka “Óndú ā wɛ otúta kú um á.” 16Ó da uwá kahíníī, “Aá bī otúta kú Óndú ā kwu icō. Cɛ́ɛ́ Óndú ā géē kpɛ́fú tú ācɛ Ámālɛ̄ki ŋmá ayááyí ga ayááyí.”

Currently Selected:

OŌYƐBƐ̄CƐ 17: IFBCL

Highlight

Copy