OŌYƐBƐ̄CƐ 18

Ujɛ́tro wā ɛgiyí Umósīsi

1Ohilí kú Umósīsi, Ujɛ́tro, nōo wɛ ɔ̄cogwɛ́ɛya kú Umídīyan ā, lɛ odúúdú ɔdā nɛ̄ Ɔwɔicō yɔ̄ ī yá lɛ Umósīsi mɛ́mla ācɛ kú Ísrɛ̄lu ā, mɛ́mla ɛ́gɛ́nɛ̄ ó kpó uwá bɛ̄cɛ ŋmá Íjīpiti ā pó. 2#Oyɛb 2.21,22Anɔ́ɔ ó ga ɛgiyí Umósīsi mɛ́mla ɔnyā kú Umósīsi, Usipóra nɛ̄ Umósīsi mā ɔ̄ tá igbīhi, ɔlɛ́ ádā nū ā, 3#Ācot 7.29mla ayípɛ̄ ɔlɛ́ nū ɛpa, nɛ̄ ó hī iyē kú uwā lé ka, Ugássɔm, nɛ̄ ɛyí nū wɛ, “N wɛ ugbɔga ipú ajɛ nyā”, 4Mɛ́mla Ɛlísaa, nɛ̄ ɛyí nū wɛ, Ɔwɔicō Ádā um ā wɛ otábō kú um á. Ó ka ohígbū ka ó lɛ um nyatá ŋmá abɔ̄ kú Uféro.” 5Ádā ɔnyā nū, Ujɛ́tro ā gā ɛgiyí nū mɛ́mla ɔnyā nū, mɛ́mla ayí nū ɛpa ā, ɛga nɛ̄ó yɔ̄ ipú ígbíli ɛyí ɛfu kú Ɔwɔicō ā. 6Ó le ɛhɔ̄ tū fu Umósīsi ka aá ɔ́ɔ yɔ̄ ī wā, 7anɔ́ɔ Umósīsi le tɛ́ɛcɛ gaá jīla anú ɔwɛ, le túkpɛɛ́ iyɔ̄bū nū, lɛ ɔ́ kwú bɔ́tū. Lɛ ɔ̄kā kú ɔbɔ́lā kú iyí uwā da. Anɔ́ɔ é le pɛ́ tá ipú áklɔ̄kpɛ kú Umósīsi á. 8Anɔ́ɔ Umósīsi le ka lɛ ohilí nū, odúúdú ɔdā nɛ̄ Óndú ā yá Uféro mɛ́mla ācɛ kú Íjīpiti, ohígbū ācɛ kú Ísrɛ̄lu ā, mɛ́mla ɛdɔ ōwē dóódu nɛ̄ ó má ā, mɛ́mla ɛ́gɛ́nɛ̄ Óndú á nya uwá tá lɛ ā. 9Anɔ́ɔ Ujɛ́tro gwéeyē ohígbū odúúdú olɔhi nɛ̄ Óndú ā yá lɛ ācɛ kú Ísrɛ̄lu ā, mɛ́mla ɛ́gɛ́nɛ̄ ó nya uwá tá ŋmá abɔ̄ kú ācɛ kú Íjīpiti ā. 10Anɔ́ɔ Ujɛ́tro kahíníī, “N cɛ̄tra Óndú ā, nōo nyā aá tá ŋmá abɔ̄ kú Uféro mɛ́mla abɔ̄ kú ācɛ kú Íjīpiti ā. N cɛ̄tra Óndú ā nōo nya ācɛ ɔlɛ́ nū tá ŋmá ɔfiyɛ ā! 11Ícɛ nyā, n le jé ka Óndú ā nwuné fíyɛ́ ɔwɔ dóódu kpɛ́mm á, ohígbū ka ó lɛ ācɛ kú nū hɛ́tā ŋmá abɔ̄ kú ācɛ kú Íjīpiti o yɔ́bɔ́ɔcɛ, nēe bá ī yá uwā ōwē ā.” 12Anɔ́ɔ Ujɛ́tro, ádā ɔnyā kú Umósīsi lɛ ɛya o yɔlá. dúúdú gwó lɛ Ɔwɔicō á. Anɔ́ɔ Árɔ̄ni wā mla anyākwɔ́cɛ kú Ísrɛ̄lu ā, gaá lɛ ɔdōlé lé mla ohilí kú Umósīsi ipéyī Ɔwɔicō á.

É le ācɛ ohɛ́pɔ̄ mɛ́mla ācogbāājɛ fu

13Oŋmɔ́ɔ̄cīnū, Umósīsi yɔ̄ ī kɛpɔ̄ kú ācɛ ā, ŋmá ɔ̄cɔ̄ɔ̄cí jāā gbó otú. 14Eko nɛ̄ ohilí Umósīsi le ɔdā nɛ̄ Umósīsi yɔ̄ ī yá lɛ ācɛ ā má ā, Ó da ɔ̄kā kahíníī, “Ɔdí nāa yɔ̄ ī yá lɛ ācɛ ā yɔ̄ ā? Ɔdíyá nāa cīce ōfōōfū uwɔ, nɛ̄ ācɛ le jīla tā uwɔ ŋmá ɔ̄cɔ̄ɔ̄cī jāā gbó otú ā?”

15Anɔ́ɔ Umósīsi da ohilí nū kahíníī, “N géē yá ɛ̄nyā piíí, ohígbū ka ācɛ ā gē wā ɛgiyí um, gáā jé ɔdā nɛ̄ Ɔwɔicō bī ɔtū lɛyíkwu uwá ā. 16Eko nɛ̄ ācɛ ɛpa le gbɛlā, é gē wā ɛgiyí um, cɛ́ɛ́ n gē da uwá ɔ̄cɛ nɛ̄ ɛlā kú nū le kpaakpa ā. Cɛ́ɛ́ n klla gē da uwá ɔdā nɛ̄ íne kú Ɔwɔicō ka lɛyíkwu ɔ́ ā.”

17Anɔ́ɔ ohilí kú Umósīsi ā da Umósīsi kahíníī, “Ɔdā nāa gē yá nyā, á yɔ̄ ī yá ɔ̄ ɔwɛ okpaakpa ŋ́. 18Ɛ̄jɛ̄ géē jē awɔ mɛ́mla ācɛ ā ānāānā. Iyó ā le gbɛnú ce uwɔ bá. Á gáā yá ɔ̄ ōfōōfū uwɔ glá ŋ́. 19Lɛ ahɔ̄ jē gā um abālɔbányā ká n̄ lɛ ɛlā olɔhi nwū uwɔ, Ɔwɔicō kē í yɔ̄ mla awɔ. Ó le kpaakpa kú ā kwɛyí ācɛ ā iyɔ̄bū Ɔwɔicō klla ī bī ɛpɔ̄ kú uwā wā ɛgiyí nū. 20A cíkā ō nwū uwā íne ā, kú ā klla yá kéē jé ɔwɛ nɛ̄é gé yɛ mla ɔdā nēé cíkā ō yá ā. 21Ofíyɛ́ dúú ā, lɛ ācɛ nēe lɔfú klla ī yúufi Ɔwɔicō, nɛ̄ ɔ̄cɛ géē lɛ ɔtūce uwá glá, mɛ́mla ācɛ nēe géē tá kéē miyɛ omíci ā fu. Kéē lɛ ācɛ ā kɔ̄ úlúúlā, mɛ́mla ofɛɛhɛhɔ̄ mɛ́mla ofɛpa cigwó ofɛpa cigwó, mɛ́mla igwíígwó kéē gbō uwā. 22Lɛ ɛga je lɛ uwá kéē kɛpɔ̄ kú ācɛ ā eko dóódu. Ɛpɔ̄ nōo ce uwá abɔ̄ bá ā, nēé géē bī wā gé lɛ uwɔ mɛ́ɛ̄ á, cɛ́ɛ́ kóō le tɔ́ɔtɛ́ gā uwɔ. Cɛ́ɛ́ é cē uwɔ bī iyó ā. 23Ɔ́dāŋ ka a lɛ ɔdā nɛ̄ n da uwɔ nyā yá, ɛ́gɛ́nɛ̄ Ɔwɔicō je ɔ́da gā uwɔ lɛ ā. Á gáā gbagbafú ŋ́, nááná nɛ̄ odúúdú ācɛ nēe bá ā géē ga ɔlɛ́ uwá ɛbɔ́, abɔ̄ nēé le ɛpɔ̄ kú uwā ka lɛ uwá ā”.

24Umósīsi le ɛlā nɛ̄ ohilí nū ka ā pó. 25Anɔ́ɔ ó le ācɛ ɔ̄kwɛ̄yi fu ŋmá ipú odúúdú ācɛ kú Ísrɛ̄lu ā. Ó fu uwá kéē wɛ aótrɛ̄yí kú ācɛ úlúúlā, mɛ́mla ācɛ ofɛɛhɛ̄hɔ̄ mɛ́mla ācɛ ofɛpa cigwó ofɛpa cigwó mɛ́mla ācɛ igwíígwó. 26Uwá gē kɛpɔ̄ kú ācɛ ā eko dóódu á. Ɛpɔ̄ nōo le lɔnɔ nɛ̄hi ā, nɛ̄é gē bī gé lɛ Umósīsi á. Ɛpɔ̄ nɛ̄ŋcɛ́ ɔhá ā, é gē ka abɔ̄yī uwā. 27Anɔ́ɔ Umósīsi lɛ ohilí nū tá úŋmóō, anɔ́ɔ ohilí nū ā nyɛ̄ɛ̄ le tá ɔlɛ́ nū á.

Currently Selected:

OŌYƐBƐ̄CƐ 18: IFBCL

Highlight

Copy