OŌYƐBƐ̄CƐ 5

Umósīsi mɛ́mla Árɔ̄ni wā iyɔ̄bū Uféro

1Umósīsi mɛ́mla Árɔ̄ni lɛ yɛ tá ɛgiyí ɔcɛ́ kú Íjīpiti ā, anɔ́ɔ é da ɔ́ kahíníī, “Óndú ā Ɔwɔicō kú Ísrɛ̄lu ka, ‘Mā ācɛ ɔlɛ́ um tá kéē nyɔ̄ gaá lɛ ucɛ yá gā um ipú ígbíli.’” 2Amáŋ Uféro da uwa ɔ̄kā kahíníī, “Ɔ̄nyɛ wɛ Óndú ā nɛ̄ n géē pó ɔkɔ kú nū, nɛ̄ n géē cɛ̄ lɛ ayí kú Ísrɛ̄lu nyɔ̄ āa? Ń jé Óndú ā ŋ́ ɛ́ɛ́ nɛ̄ n géē cɛ̄ lɛ ayí kú Ísrɛ̄lu nyɔ̄ ŋ́.” 3Anɔ́ɔ é tá ɔ̄ ohi kahíníī, “Ɔwɔicō kú ācɛ kú Uhíbru jīla mla alɔ, le iyī nū mafú lɛ alɔ ɛɛ́. Mā alɔ tá kú ālɔ̄ ga iyāwu kú ɛ̄cī ɛtá, ipú ígbíli kú ālɔ̄ gaá lɛ ɛya gwo lɛ Óndú ā, Ɔwɔicō kú alɔ. Ɔ́dāŋ ka alɔ í yá lɛ ā ŋ́, ó gē bī ōcē obɔ̄bí mɛ́mla ɛfú lɛ kpó alɔ ŋmó.” 4Amáŋ, ɔcɛ́ kú Íjīpiti ā da Umósīsi mɛ́mla Árɔ̄ni ɔ̄kā kahíníī, “Ɔdíyá nɛ̄ aá gáā kpó ācɛ ā ŋmá úklɔ́ āa? Aá bá ipú úklɔ́ kú aá cíí. 5Ācɛ ɔlɛ́ aá lɛwa fíyɛ́ ācɛ kú Íjīpiti á. Aá kē tíne ō kpó uwā ŋmá úklɔ́.” 6Ícíícɛ ɔ́ɔmā ā, Uféro lɛ ɔ́da je lɛ ācɛ kú Íjīpiti nēe wɛ aótrɛ̄yí kú ācɛ kú Ísrɛ̄lu, nēe wɛ aɔ́fiyɛ ā, mɛ́mla aótrɛ̄yí kú úklɔ́ ā kahíníī 7“Aá tɛtɛ gē kpó ácí ihili lɛ uwá, ɛ́ɛ́ nēé gē ma ubulɔ́kwu á. O ŋmá abālɔbányā gɔbū ā, uwá géē kpó ihili abɔ̄yī uwā ɛ́ɛ́ nēé í ma ubulɔ́kwu mɛ́ɛ á. 8Amáŋ, áluka kú ubulɔ́kwu nēé í ma ā, í gáā nyɛ́ fíyɛ́ áluka nēé tɛtɛ gē ma ā ŋ́. Abɔ̄ é lɛ úklɔ́ ō yá ŋ́ mā nēé gē da uwá kéē da um kahíníī, ‘Mā alɔ tá kú ālɔ̄ nyɔ̄ gáā gwɛ́ɛya lɛ Ɔwɔicō ká alɔ á.’ 9Aá jɛ úklɔ́ olɔfú fíyɛ́ lɛ uwá kéē yá, aá híī jāhɔ̄ lɛ ɛlā ɛ̄kɛ̄mgbɛ̄ kú uwā ā ŋ́.’”

10Anɔ́ɔ aótrɛ̄yí kú úklɔ́ ōwē kú ācɛ kú Ísrɛ̄lu ā le tá ɛgiyí ācɛ Ísrɛ̄lu, anɔ́ɔ é da uwá kahíníī, “Uféro le ka ka anúɔ í gaá kpó ácí ihili lɛ aá gɛ ŋ́. 11Ó ka ka aá gáā nyɔ̄ í kpó wā abɔ̄yī aá ŋmá ɛga dúúmā nɛ̄ aá jé mɛ́ɛ̄ á. Amáŋ aá géē ma áluka kú ubulúkwu ékpó nɛ̄ aá tɛtɛ gɛ ma ā kpɔ́.” 12Anɔ́ɔ ācɛ kú Ísrɛ̄lu a kwú pahīla klá ɛga dóódu kú ajɛ Íjīpiti, bá ī tíne ácí ihili ā.

13Anɔ́ɔ aótrɛ̄yí kú úklɔ́ ōwē ā gē pi uwá abɔ̄fú kéē ma áluka kú ubulɔ́kwu nēé tɛtɛ ī ma ɛ̄cī dóódu bɛ̄ɛka eko nɛ̄ ācɛ kú Íjīpiti tɛtɛ ī kpó ácí ihili lɛ uwá abɔ̄yī uwāā. 14Ācɛ kú Íjīpiti nēe wɛ aótrɛ̄yí kú úklɔ́ kú ōwē ā gē ŋmó aótrɛ̄yí kú ācɛ kú Ísrɛ̄lu ā ijē klla ī dā uwá ɔ̄kā kahíníī, “Ɔdíyá nɛ̄ aá gē ma ubulɔ́kwu kú aá jīla ɛ̄cī dóódu bɛ̄ɛka eko otɛtɛ ā gɛ ŋ́ mā ā?”

15Anɔ́ɔ aótrɛ̄yí nēe ŋmá ipú ācɛ kú Ísrɛ̄lu ā le pɛ́ ga ɛgiyí Uféro, gáā le ikwū je klá anú kahíníī, “Ɔdíyá nāa gē yá alɔ ɔdā ɛ́gɛ́nyā ā? 16É je ácí ihili lɛ alɔ gɛ ŋ́, nááná, é gē pi alɔ kú ālɔ̄ ma ubulɔ́kwu kpɔ́. É klla gē ŋmó alɔ ijē, unwalu nyā kē ŋmá ɛgiyí ācɛ ɔlɛ́ uwɔ nɛ̄ n.”

17Amáŋ Uféro tá uwá ohi kahíníī, “Aá kwáahi íbí, aá í klla dɔ̄ɔka ō yúklɔ́ ŋ́. Ɔ́ɔmā yá ɛ́ɛ́ nɛ̄ aá wā gaá da um ka ami ɔ́ɔ̄ le ɛga je lɛ aá kú aá nyɔ̄ gáā lɛ ɛya gwó lɛ Óndú ā, Ɔwɔicō kú aá á. 18Aá le cīgbīhi abālɔbányā gaá yúklɔ́, é gáā kpó ácí ihili lɛ aá ɛ́ɛ́ gɛ ŋ́. Náaná ā aá géē ma áluka ubulɔ́kwu nɛ̄ aá tɛtɛ gē ma ɛ̄cī dóódu ā kpɔ́.”

19Aótrɛ̄yí kú ācɛ kú Ísrɛ̄lu ā le jé ka, unwalu ɔ́ɔ gā lɛ aá eko nɛ̄ Uféro le da uwá ka, uwá géē ma áluka ubulɔ́kwu nēé tɛtɛ gē ma ɛ̄cī ā kpɔ́ ā.

20Abɔ̄ é bá ī wɛ̄ɛcɛ ŋmá ɛgiyí Uféro ā, é jīla Umósīsi mɛ́mla Árɔ̄ni nēe bá ī gbēyī uwā ɔwɛ ā. 21É da Umósīsi mɛ́mla Árɔ̄ni kahíníī, “Ɔwɔicō géē kɛpɔ̄ tū aá, ohígbū ɔdā nɛ̄ aá yá alɔ ā. Nɛ̄ aá je alɔ tá eyī obɔ̄bí kú Uféro mɛ́mla aígabɔ̄ kú ɔlɛ́ nū ā, nɛ̄ aá klla kwú ɛ̄wā ú tú ūwā abɔ̄ kéē lɛ alɔ kpó ŋmó ā.”

Umósīsi jikwū klá Ɔwɔicō

22Anɔ́ɔ Umósīsi je eyī gicō kwu ɛgiyī Ɔwɔicō igbɔhá, anɔ́ɔ ó le ɔ̄kā da Ɔwɔicō kahíníī, “Óndú, ɔdíyá nāa gē yá ācɛ nēe bá ā ɔdōbɔ̄bí ā? Ɔdíyá nāa tū um ɛhɔ̄ wā amānyā ā? 23Ŋmífī nɛ̄ n wā ɛgiyí Uféro gaá bī iyē kú uwɔ lɛ kɛlā lɛ ɔ́ ā, nɛ̄ ó hímāyī yá ācɛ kú Ísrɛ̄lu ɔdōbɔ̄bí fíyɛ́ otɛtɛ á. Á kē yá ɔdā dúúmā ká ā hɛ́ ācɛ ɔlɛ́ uwɔ ā tá ŋ́.

Currently Selected:

OŌYƐBƐ̄CƐ 5: IFBCL

Highlight

Copy